Makisinningedkayo ken Jehova

“UMADANIKAYO iti Dios, ket isu umadaninto kadakayo,” insurat ni adalan a Santiago. (Santiago 4:8) Ken inkanta ni salmista David: “Ti kinapagayam ken Jehova addanto kadagiti agbuteng kenkuana.” (Salmo 25:14) Nalawag a kayat ni Jehova a nasinged koma ti relasiontayo kenkuana. Ngem saan a tunggal maysa nga agdaydayaw iti Dios ken mangtungtungpal kadagiti bilinna ket nasinged kenkuana.

Dakayo ngay? Addaankayo kadi iti nadekket a pannakirelasion iti Dios? Di pagduaduaan a kayatyo ti agbalin a nadekdekket kenkuana. Kasanotay a makisinninged iti Dios? Ania ti kalikaguman daytoy kadatayo? Ti Biblia iti maikatlo a kapitulo ti libro a Proverbio 3, ti sumungbat.

Iparangarang ti Kinamanagayat ken Kinapudno

Ni Ari Solomon iti nagkauna nga Israel linuktanna ti maikatlo a kapitulo ti Proverbio 3 babaen ti sasao nga: “Anakko, dika lipaten ti lintegko ngem salimetmetam koma dita pusom dagiti bilbilinko: Ta inayondanto kenka ti kaatiddog dagiti aldaw, ken tawtawen ti panagbiag, ken ti talna.” (Proverbio 3:1, 2) Ni Jehova ti talaga a gubuayan daytoy naamaan a patigmaan a naiturong kadatayo yantangay pinaltiingan ti Dios ni Solomon idi insuratna dagitoy a sasao. Mabalakadantayo ditoy a mangipangag kadagiti pammalagip ti Dios​—ti linteg, wenno pannursuro, ken bilbilinna​—a nailanad iti Biblia. No aramidentayo daytoy, ‘mainayonto kadatayo ti kaatiddog dagiti aldaw, ken tawtawen ti panagbiag, ken ti talna.’ Wen, matagiragsaktayo uray itan ti natalna a biag ken maliklikan dagiti aramid a mangiturong kadatayo iti nasapa nga ipapatay a masansan a mapasamak kadagiti nadangkes. Kanayonanna, manamnamatay ti agbiag nga agnanayon iti natalna a baro a lubong.​—Proverbio 1:24-31; 2:21, 22.

Intuloy ni Solomon: “Da kinamanagayat ken pudno [“kinapudno,” NW] didaka koma baybay-an: yukkormo ida ita tengngedmo; isuratmo ida iti tapi ta pusom: Iti kasta masarakamto ti parabur ken naimbag a pannakaawat iti imatang ti Dios ken ti tao.”​—Proverbio 3:3, 4.

Ti orihinal a sao a naggapuan ti “kinamanagayat” ket maipatarus met kas “nasungdo nga ayat” ken kalikagumanna ti kinamatalek, pannakikaykaysa, ken kinasungdo. Determinadotayo kadi nga agtalinaed a nadekket ken Jehova ania man ti mapasamak? Iparparangarangtay kadi ti kinamanagayat kadagiti kapammatiantayo? Ikagkagumaantay kadi a taginayonen ti kinadekkettayo kadakuada? Iti inaldaw a pannakilangentayo kadakuada, adda met laeng kadi ‘ti linteg ti kinamanagayat iti dilatayo’ uray kadagiti narikut a kasasaad?​—Proverbio 31:26.

Gapu ta aglaplapusanan ti kinamanagayatna, ‘sisasagana a mamakawan’ ni Jehova. (Salmo 86:5) No nagbabawiantayon dagiti naglabas a basoltayo ket nalinteg itan ti pannagnatayo, masiguradotayo nga ipaay ni Jehova “dagiti panawen ti pannakabang-ar.” (Aramid 3:19) Tuladentay met laeng kadi ti Diostayo babaen ti panangpakawan kadagiti labsing dagiti sabsabali?​—Mateo 6:14, 15.

Ni Jehova ti “Dios ti kinapudno,” ket kayatna nga agbalin a ‘napudno’ dagidiay agtarigagay a makisinninged kenkuana. (Salmo 31:5, NW) Manamnamatay kadi nga agbalin a Gayyemtayo ni Jehova no doble kara ti panagbiagtayo​—sabali ti tignaytayo no dagiti kakaduatayo a Kristiano ti katimpuyogtayo ket sabali met no awanda a makakitkita kadatayo​—a kas iti “tattao ti kinaulbod” nga ilimedda ti kinasiasinoda? (Salmo 26:4) Anian a kinamaag dayta yantangay “isuamin a bambanag lamolamoda ken sipapanayagda a nailatak kadagiti mata” ni Jehova!​—Hebreo 4:13.

Ti kinamanagayat ken kinapudno ket maipateg koma kas di magatadan a kuentas a ‘nayukkor iti tengngedtayo,’ a tumulong tapno ‘masarakantayo ti parabur ti Dios ken ti tao.’ Saantay la nga iparangarang dagita a galad no di pay ket ikitikittayo iti ‘tapi ti pusotayo,’ a pagbalinen ida a napateg a paset ti katataotayo.

Naan-anay nga Agtalek ken Jehova

Intuloy ti masirib nga ari: “Agtalekka ken ni Jehova iti amin a pusom, ket dika agtalged iti pannakaawatmo met laeng: Kadagiti amin a dalanmo isu ti bigbigem, ket isu iturongnanto dagiti desdesmo.”​—Proverbio 3:5, 6.

Maikari a talaga ni Jehova iti naan-anay a panagtalektayo. Kas Namarsua, “napigsa iti pannakabalin[na]” ken isut’ Gubuayan ti “pigsa.” (Isaias 40:26, 29) Maibanagna amin a pinanggepna. Ti mismo a naganna ket literal a kaipapananna “Pagbalinenna,” ken pabilgenna ti panagtalektayo a kabaelanna a tungpalen ti inkarina! Gapu ta ‘di mabalin nga agulbod ti Dios,’ isut’ ladawan ti kinapudno. (Hebreo 6:18) Ayat ti kangrunaan a galadna. (1 Juan 4:8) “Sililinteg kadagiti amin a dalanna, ken sipaparabur kadagiti amin nga aramidna.” (Salmo 145:17) No ditay talken ti Dios, asino ngarud koma? Siempre, tapno masukay ti panagtalek kenkuana, masapul a ‘mananam ken makitatayo a ni Jehova naimbag’ babaen ti panangyaplikar iti biagtayo dagiti maad-adaltayo iti Biblia ken panangmennamenna kadagiti nasayaat a resultana.​—Salmo 34:8.

Kasano a ‘bigbigentayo ni Jehova iti amin a dalantayo’? Kuna ti napaltiingan a salmista: “Pampanunotekto met amin nga aramidmo, ken ut-utobekto dagiti gapuanam.” (Salmo 77:12) Gapu ta ti Dios ket di makita, napateg ti panangutob kadagiti nakaskasdaaw nga aramidna ken pannakilangenna iti ilina tapno sumingedtayo kenkuana.

Napateg met ti kararag tapno sipapanunottayo ken Jehova. Immararaw ni Ari David ken ni Jehova iti “agmalmalem.” (Salmo 86:3) Masansan a nagkararag ni David iti agpatnag, kas idi nagpuga idiay let-ang. (Salmo 63:6, 7) “Itultuloyyo ti panagkarkararag iti isuamin a gundaway iti espiritu,” imbalakad ni apostol Pablo. (Efeso 6:18) Kasano kasansan ti panagkararagtayo? Maragsakantay kadi a maaddaan iti naimpusuan a pannakisarita iti Dios? No maipasango kadagiti narikut a kasasaad, umar-ararawtay kadi iti tulongna? Agpapaiwanwantayo kadi kenkuana babaen ti kararag sakbay nga aramidentayo dagiti nasken a pangngeddeng? Dagiti naimpusuan a kararagtayo ken ni Jehova pagbalinennatayo a nasinged kenkuana. Kasta met a mainanamatayo nga ipangagna ti kararagtayo ken ‘palintegenna dagiti danatayo.’

Anian a kinamaag no ‘agtalektayo iti bukodtayo a pannakaawat’ wenno iti natan-ok a tattao ti lubong idinto ta mabalintayo ti agkammatalek a naan-anay ken Jehova! “Saanka koma a masirib kadagita matam met laeng,” kuna ni Solomon. Iti kasunganina, imbalakadna: “Agbutengka ken Jehova, ket pagtalawam ti dakes: Isunto ti salun-at ta pusegmo, ken pata kadagita tultulangmo.” (Proverbio 3:7, 8) Ti umiso a panagbuteng a mapagura ti Dios ti mangiwanwan koma iti amin a tignay, panunot, ken riknatayo. Ti kasta a nadayaw a panagbuteng lapdannatayo nga agaramid iti kinadakes. Sa makapaimbag ken makapabang-ar dayta iti espiritualidadtayo.

Itedyo ken Jehova ti Kasayaatan nga Ik-ikutanyo

Iti ania pay a pamay-an a sumingedtay iti Dios? Imbilin ti ari:“Padayawam ni Jehova iti napapateg a bambanagmo ken iti umuna a bungbunga ti isuamin nga apitmo.” (Proverbio 3:9, NW) Mapadayawan ni Jehova no ipaayantayo iti dakkel a panagraem ken itan-oktayo iti publiko babaen ti pannakiraman ken panangsuporta iti panangipaduyakyak iti naganna kadagiti tattao. Dagiti napateg a banag a pangidayawtayo ken Jehova isu ti tiempo, dagiti saguday, bileg, ken material a sanikuatayo. Dagitoy koma dagiti umuna a bunga​—dagiti kasayaatan nga ik-ikutantayo. Saan kadi a rumbeng a ti panangaramattayo kadagiti sanikuatayo iyanninawna ti determinasiontayo a ‘mangitultuloy a sapulen nga umuna iti pagarian ken iti kinalinteg ti Dios’?​—Mateo 6:33.

Ti panangidayawtayo ken ni Jehova babaen kadagiti napateg nga ik-ikutantayo ket sigurado a magunggonaan. Ipanamnama ni Solomon: Iti kasta dagiti sarusarmo mapnodanto a sipupusek, ket dagiti baldem agliplippiasdanto iti baro nga arak.” (Proverbio 3:10) Nupay ti mismo a naespirituan a kinabaknang ket saan nga agbanag iti material a kinabaknang, mangyeg kadagiti adu a bendision ti panangusar a sipaparabur kadagiti ik-ikutantayo a pagdayaw ken Jehova. Mangpakired a “taraon” para ken Jesus ti panangaramid iti pagayatan ti Dios. (Juan 4:34) Kasta met, makapasalun-at ti pannakiraman iti trabaho a panangasaba ken panangaramid iti adalan a pakaidayawan ni Jehova. No agtultuloytayo iti dayta a trabaho, mapnonto ti naespirituan a sarusartayo. Aglaplapusananto ti rag-otayo​—ti isimbolo ti baro nga arak.

Saan aya a ni Jehova met laeng ti pagpannurayan ken pagkararagantayo iti umdas a material a taraon iti tunggal aldaw? (Mateo 6:11) Kinapudnona, naggapu amin nga ik-ikutantayo iti naayat a nailangitan nga Amatayo. Ibuyatto ni Jehova dagiti kanayonan a bendision sigun iti panangusartayo kadagiti napateg a sanikuatayo a mangidayaw kenkuana.​—1 Corinto 4:7.

Awatentayo ti Disiplina ni Jehova

Kas panangbigbig iti pateg ti disiplina tapno mapatanor ti kinasinged ken Jehova, balakadannatayo ti ari ti Israel: “Anakko, dika laisen ti pammagbaga ni Jehova; dika met mauma iti panangtubngarna; ta ti ay-ayaten ni Jehova tubngarenna; kas met laeng maysa nga ama iti anakna a pagay-ayatanna.”​—Proverbio 3:11, 12.

Nupay kasta, nalabit saan a nalaka para kadatayo nga awaten ti disiplina. Insurat ni apostol Pablo: “Awan ti disiplina a kasla makaparag-o iti agdama, no di ket makapaladingit; ngem kalpasanna kadagidiay a nasanayen iti dayta ipaayna ti natalna a bunga, nga isu ti, kinalinteg.” (Hebreo 12:11) Ti pannubngar ken disiplina ket napateg a paset ti panagsanay a mamagsinged kadatayo iti Dios. Ti panangilinteg ni Jehova​—aggapu man daytoy kadagiti dadakkeltayo, ti kongregasion Kristiano, wenno iti panangmennamenna iti Kasuratan bayat ti personal a panagadaltayo​—ket ebkas ti ayatna kadatayo. Masiribtayo no awatentayo dayta.

Salimetmetam ti Sirib ken Pannakaawat

Insaruno nga impaganetget ni Solomon ti kinapateg ti sirib ken pannakaawat iti panangsukay iti nasinged a relasion iti Dios. Kastoy ti kunana: “Naragsak ti tao a makasarak iti sirib, ken ti tao a makaala iti pannakaawat. Ta ti pannakagun-od kenkuana nasaysayaat ngem pannakagun-od iti pirak, ket ti magunggona kenkuana nasaysayaat ngem balitok a nasudi. . . . Isu ti kayo ti biag kadagiti kumpet kenkuana: ket naragsak ti siasinoman a mangsalimetmet kenkuana.”​—Proverbio 3:13-18.

Kas pammalagipna kadatayo maipapan ti sirib ken pannakaawat a naiparangarang kadagiti nakaskasdaaw nga aramid ni Jehova idi nangparsua, kuna ti ari: “Ni Jehova iti siribna binangonna ti daga; iti pannakaawat pinatakderna dagiti langlangit. . . . Anakko, dida kadi pumanaw kadagita matam; salimetmetam ti natarnaw a kinasirib ken kinaannad: Iti kasta isudanto ti biag ita kararuam, ken saniata ita tengngedmo.”​—Proverbio 3:19-22.

Ti sirib ken pannakaawat ket nadiosan a galgalad. Saantay la a sukayen dagitoy no di pay ket salimetmetantayo babaen ti di pulos panangbaybay-a iti naanep a panagadal iti Kasuratan ken panangyaplikar iti maad-adaltayo. Intuloy ni Solomon: “Iti kasta magnakanto iti dalanmo a sitatalged, ket ti sakam dinto maitibkol.” Sana innayon: “Intono agiddaka, dikanto agbuteng: wen, agiddakanto, ket ti turogmo nasam-itto.”​—Proverbio 3:23, 24.

Wen, mabalintay a magna a sitatalged ken maturog nga addaan talna ti panunot bayat nga ur-urayentayo ti arig mannanakaw nga iyaadani ti aldaw ti “kellaat a pannakadadael” ti dakes a lubong ni Satanas. (1 Tesalonica 5:2, 3; 1 Juan 5:19) Uray kabayatan ti asidegen a dakkel a rigat, adda daytoy a pammatalged kadatayo: “Dika agbuteng iti kellaat a pagbutngan, kasta met iti pannakarebbek dagiti nadangkes, intono dumteng: Ta ni Jehova isunto ti katalekmo, ket saluadannanto ta sakam iti pannakatiliwna.”​—Proverbio 3:25, 26; Mateo 24:21.

Aramidem ti Naimbag

Indagadag ni Solomon: “Dika medmedan ti imbag kadagiti karbenganna, no adda ita imam iti pannakabalin a mangaramid.” (Proverbio 3:27) Ti panangaramid iti naimbag kadagiti sabsabali iramanna ti sipaparabur a panangiranud kadakuada kadagiti ik-ikutantayo, ket adu ti saklawenna daytoy. Ngem saan aya a ti panangtulong iti sabsabali a maaddaan iti nasinged a relasion iti pudno a Dios ti kasayaatan a maaramidtayo kadakuada iti daytoy “panawen ti panungpalan”? (Daniel 12:4) Kadagitoy ngarud nga aldaw nga ipakita ti kinaregta iti trabaho a panangikasaba iti Pagarian ken panagaramid iti adalan.​—Mateo 28:19, 20.

Dinakamat met ti masirib nga ari ti sumagmamano nga aramid a rumbeng a liklikan, a kunkunana: “Dika kunaen iti kaarrubam, inkan, ket baliwam ti umay, ket intono bigat ti panangtedko: no adda kenka ita iti biangmo. Dika panggepen ti dakes a maibusor iti kaarrubam nga agbiag a sitatalna iti sibaymo. Dika karinggor ti maysa a tao nga awan gapuna, no awan ti ranggas nga inaramidna kenka. Dika apalan ti tao a nauyong, ket dika pilien ti uray ania kadagiti daldalanna.”​—Proverbio 3:28-31.

Kas pananggupgop iti pakaigapuan ti balakadna, kuna ni Solomon: “Ta ti naulpit maysa a makarimon ken Jehova; Ngem ti pannakipagayamna adda kadagiti nalinteg. Ti panangilunod ni Jehova adda iti balay dagiti nadangkes; ngem bendisionanna ti pagnaedan dagiti nalinteg. Pudno nga umsienna dagiti manangumsi; ngem itdenna ti parabur iti napakumbaba. Ti masirib tawidennanto ti dayaw; ngem ti bain isunto ti magunggona dagiti maag.”​—Proverbio 3:32-35.

No kayattay a tagiragsaken ti kinasinged ken Jehova, rumbeng a ditay mangparnuay kadagiti nasikap ken makadangran a gakat. (Proverbio 6:16-19) Satay la magun-od ti anamong ken bendision ti Dios no aramidentayo ti umiso iti imatangna. Nalabit umawattayo met iti saan a namnamaen a pammadayaw no mapaliiw ti sabsabali nga agtigtignaytayo maitunos iti nadiosan a sirib. Masapul ngarud nga ilaksidtayo dagiti nasikap a pamay-an daytoy dakes ken naranggas a lubong. Iti kasta, itultuloytayo ti nalinteg a panagbiag ket makisinningedtayo ken Jehova!

[Dagiti Ladawan iti panid 25]

‘Padayawam ni Jehova iti napapateg a bambanagmo’