Ania ti Panangmatmatyo iti Bagiyo?

ISUT’ natangsit. Gapu ta naital-o iti nangato a saad iti gobierno, pagragsakanna ti nalabes a panangitan-ok ken pammadayaw kenkuana. Ngem kasta unay ti rurodna idi adda maysa nga opisial a nagkedked a mangipaay ti kasta a pammadayaw kenkuana. Tapno makabales, insikat daytoy napalangguad nga opisial nga ikisap amin a tattao iti imperio a kapulian daytoy nakabasol. Anian a ballikug a panangipapan iti bagi!

Ti manangisikat isu ni Aman, maysa a nangato nga opisial iti palasio ni Ari Asuero ti Persia. Ket ti kinagurana? Ti Judio nga agnagan Mardokeo. Nupay ti panangisikat ni Aman a mangikisap iti maysa a puli ket naidumduma a tignay, ipakitana ti peggad ken nakaam-amak a pagbanagan ti kinatangsit. Saan la a riribuk ti kinapalangguadna kadagiti dadduma no di pay ket nangiturong daytoy iti pannakaibabainna iti publiko ken kamaudiananna iti ipapatayna.​—Ester 3:1-9; 5:8-14; 6:4-10; 7:1-10.

Umapay met ti Kinatangsit Kadagiti Pudno a Managdaydayaw

Kalikaguman ni Jehova a ‘makipagna[tayo] a sipapakumbaba iti Dios.’ (Mikias 6:8) Naglaon ti Biblia iti nagduduma a pakasaritaan ti tattao a di nangtaginayon iti naemma a panangmatmat iti bagida. Nagresulta daytoy kadagiti parikut ken panagladingitda. Ti panangusig iti sumagmamano kadagitoy nga ehemplo matulongannatayo a mangamiris iti kinamaag ken peggad ti di natimbeng a panagpampanunot.

Adda tiempo idi a ti propeta ti Dios a ni Jonas dina natimbeng ti pampanunotna ta pinadasna ti aglibas idi binilin ti Dios a pakdaaranna dagiti dakes a tattao idiay Nineve maipapan iti panangukom ni Jehova kadakuada. (Jonas 1:1-3) Kalpasanna, nagpasugnod ni Jonas idi nagbabawi dagiti taga Nineve gapu iti panangasabana. Maseknan unay iti reputasionna kas propeta nga uray la nagbassit wenno awan panangipategna iti biag dagiti rinibu a taga Nineve. (Jonas 4:1-3) No ipapantayo nga importantetay la unay, mabalin a narigat a masalimetmetan ti di panangidumduma ken umiso a panangmatmat kadagiti tattao ken paspasamak iti aglawlawtayo.

Usigenyo met ni Uzzias, maysa a naimbag nga ari ti Juda. Idi saanen a natimbeng ti panagpampanunotna, sipapalangguad a pinadasna nga agawen ti sumagmamano nga annongen dagiti papadi. Gapu iti kinaparammag ken nakaro a kinakuspag, nagsagaba ti salun-atna ken napukawna ti anamong ti Dios.​—2 Cronicas 26:3, 16-21.

Gistay nagbalin a silo kadagiti apostol ni Jesus ti di natimbeng a panagpampanunot. Naseknanda unay iti bukodda a dayaw ken pannakabalin. Idi immay ti nakaro a suot, binaybay-anda ni Jesus ket pimmanawda. (Mateo 18:1; 20:20-28; 26:56; Marcos 9:33, 34; Lucas 22:24) Gapu ta napalangguad ken nangato ti panangipapanda iti bagida, gistay nalipatanda ti panggep ni Jehova ken ti pasetda mainaig iti pagayatanna.

Dagiti Dakes nga Epekto ti Nangato a Panangipapan iti Bagi

Ti di natimbeng a panangmatmat iti bagitayo ket mabalin a makasair ken mangdangran iti relasiontayo kadagiti sabsabali. Kas pagarigan, ipapantayo a nakatugawtay iti maysa a silid ket nalabit nadlawtayo ti agassawa nga agin-innarasaas ken agkatkatawa. No bagitay la ti pampanunotentayo, mabalin nga agsuspetsatayo a datayo ti katkatawaanda gapu ta agin-innarasaasda. Nalabit ditay kayat a panunoten nga adda sabali a gapu no apay nga agkatkatawada. Total, sino koma pay ti sabali a pagsarsaritaanda? Mabalin a marurod ken ikeddengtayo a ditayton pulos kasarsarita dagita nga agassawa. Iti kasta, mabalin nga agbanag ti di natimbeng a panangipapan iti bagitayo kadagiti di pagkikinnaawatan ken nadadael a relasion kadagiti gagayyem, kameng ti pamilia, ken dadduma pay.

Mabalin nga agpasindayag dagidiay managpaimportante, a naynay nga ipagpannakkelda dagiti kunkunada a naisangsangayan a saguday, gapuanan, wenno adu a sanikuada. Wenno isuda ti makaadu kadagiti saritaan, nga adda kanayon a dakamatenda maipapan ti bagida. Ti kasta a panagsasao ipakitana ti kinaawan ti napudno nga ayat ken makapasuron pay unay. Masansan ngarud nga iyad-adayo dagitoy a napasindayag ti bagbagida kadagiti dadduma.​—1 Corinto 13:4.

Kas Saksi ni Jehova, mabalin nga umsien ken didatay denggen no mangasabatayo. Rumbeng a laglagipentayo a saan a datayo a mismo ti busbusorenda, no di ket ni Jehova, ti Gubuayan ti mensahetayo. Nupay kasta, mabalin a dakes ti ibunga ti ballikug a panangipapan iti bagitayo. Sumagmamano a tawenen ti naglabas, sinintir ti maysa a kabsat a lalaki ti pammabalaw ti maysa a bumalay isu a pinagsasawanna met. (Efeso 4:29) Kalpasan dayta, saanen a pulos a nakiraman dayta a kabsat iti panangasaba iti binalaybalay. Wen, mabalin a pagpungtotennatayo ti kinatangsit bayat a mangaskasabatayo. Ikagumaantayo a di mapasamak ti kasta. Imbes ketdi, sipapakumbaba nga agpatulongtayo ken ni Jehova tapno masalimetmetantayo ti umno a panangipateg iti pribilehio a makiraman iti Nakristianuan a ministerio.​—2 Corinto 4:1, 7; 10:4, 5.

Ti nangato a panangipapan iti bagi lapdannatayo nga umawat iti kasapulan unay a balakad. Iti maysa a pagilian idiay Central America sumagmamano a tawenen ti naglabas, maysa a barito ti nagpaset iti Teokratiko nga Eskuelaan ti Panagministro iti kongregasion Kristiano. Idi sipaprangka a binalakadan ti manangaywan iti eskuelaan, imbarsak ti nakaunget a barito ti Bibliana iti suelo sa nagtabbuga a rimmuar iti Kingdom Hall nga awan pulos panggepna nga agsublin. Ngem sumagmamano nga aldaw kalpasanna, nagpakumbaba, nagpadispensar iti manangaywan iti eskuelaan, ket sitatakneng nga inawatna ti balakadna. Idi agangay, rimmang-ay daytoy a barito iti Nakristianuan a kinanataengan.

Ti kinaparammag ken panagpapaimportante madadaelna ti relasiontayo iti Dios. Mamallaag ti Proverbio 16:5: “Isu-amin a natangsit ti pusona makarimon ken ni Jehova.”

Natimbeng a Panangmatmat iti Bagitayo

Nalawag a saantayo koma nga agpapaimportante. Siempre, dina kayat a sawen a tagilag-anentayo ti tignay wenno saotayo. Ipamatmat ti Biblia a rumbeng a nanakman dagiti manangaywan, ministerial nga adipen, ken amin nga adda iti kongregasion. (1 Timoteo 3:4, 8, 11; Tito 2:2) Kasano ngarud a mapatanor ken masalimetmetan dagiti Kristiano ti naemma, natimbeng, ken nanakman a panangmatmat iti bagida?

Mangipaay ti Biblia iti adu a makapabileg nga ulidan dagiti tattao a nangsalimetmet iti natimbeng a panangmatmat iti bagida. Naisangsangayan ti ulidan ni Jesu-Kristo no iti kinapakumbaba. Sidadaan ti Anak ti Dios a nangpanaw iti nadayag a saadna idiay langit ket nagbalin a nanumo a tao ditoy daga tapno matungpalna ti pagayatan ni Amana ken maisalakanna ti sangatauan. Iti laksid dagiti pannakalalais, pannakaabuso, ken nakababain nga ipapatay, tinaginayonna ti panagteppel ken dignidad. (Mateo 20:28; Filipos 2:5-8; 1 Pedro 2:23, 24) Kasano a nabaelan daytoy ni Jesus? Naan-anay a nagpannuray ken ni Jehova ken determinado a nangitungpal iti pagayatan ti Dios. Siaanep nga inadal ni Jesus ti Sao ti Dios, sipapasnek a nagkararag, ken sipipinget a nangasaba. (Mateo 4:1-10; 26:36-44; Lucas 8:1; Juan 4:34; 8:28; Hebreo 5:7) Ti panangsurot iti pagwadan ni Jesus tumulong kadatayo a mangpatanor ken mangsalimetmet iti natimbeng a panangmatmat iti bagbagitayo.​—1 Pedro 2:21.

Usigenyo met ti nasayaat nga ulidan ni Jonatan nga anak ni Ari Saul. Gapu iti kinasubeg ni amana, napukaw ni Jonatan ti gundaway a sumukat ken ni Saul kas ari. (1 Samuel 15:10-29) Nagsakit kadi ti nakem ni Jonatan iti dayta? Inapalanna kadi ni David, ti agkabannuag a lalaki a mangala iti saadna kas agturay? Nupay ni Jonatan ket laklakay nga adayo ken nalabit mas aduan kapadasan ngem ni David, sieemma ken sipapakumbaba nga immannugot iti urnos ni Jehova ken sisusungdo a sinuportaranna ni David. (1 Samuel 23:16-18) Ti nalawag a pannakaawat iti pagayatan ti Dios ken ti sidadaan a panagtungpal iti dayta tulongannatayo a ‘di mangpanunot nga ad-adda iti bagitayo ngem iti rebbengtayo a panunoten.’​—Roma 12:3.

Insuro ni Jesus ti pateg ti panangiparangarang iti kinaemma ken kinapakumbaba. Inyilustrarna daytoy babaen ti panangikunana a no mapan makiboda dagiti adalanna, saanda koma nga alaen “ti katan-okan a lugar” ta nalabit adda umay a mas mabigbigbig a tao ket maibabainda no mapaakarda iti kanunumuan a lugar. Tapno ad-adda a nalawag ti kayatna nga isuro, innayon ni Jesus: “Ta tunggal maysa a mangitan-ok iti bagina maipababanto ket ti mangipababa iti bagina maitan-okto.” (Lucas 14:7-11) Masiribtayo no ipangagtayo ti balakad ni Jesus ken ‘kawesantayo ti bagbagitayo iti kinapakumbaba iti panagpampanunot.’​—Colosas 3:12; 1 Corinto 1:31.

Dagiti Bendision ti Natimbeng a Panangmatmat

Matagiragsak dagiti agserserbi ken ni Jehova ti pudpudno a rag-o iti ministerioda no naemma ken napakumbabada. Nalaklaka nga asitgan dagiti panglakayen no sipapakumbaba a ‘tratuenda ti arban buyogen iti kinadungngo.’ (Aramid 20:28, 29) Nalaglag-an ti rikna ti amin nga adda iti kongregasion a makisarita ken agpatulong kadakuada. Iti kasta, ad-addanto ti kinasinged iti uneg ti kongregasion buyogen ti espiritu ti ayat, kinabara, ken panagtalek.

Maaddaantayo kadagiti nasayaat a gagayyem no saantayo nga agpapaimportante. Ti kinaemma ken kinapakumbaba lapdannatayo a mangpatanor iti mannakisalisal nga espiritu ken mangikagumaan a mangartap iti dadduma iti aramid wenno material a bambanag. Dagitoy a nadiosan a galad ti tumulong tapno ad-adda nga agbalintayo a naanus, ket iti kasta, nalaklakatayo a liwliwaen ken saranayen dagidiay agkasapulan. (Filipos 2:3, 4) Kaaduanna a nasaysayaat ti panagtignay dagiti tattao no maguyugoyda babaen ti ayat ken asi. Ket saan kadi nga agbalin a pamuon a pakaibangonan ti natibker a panaggagayyem ti kasta a relasion nga awan panagimbubukodanna? Anian a bendision iti saan a panagpapaimportante!​—Roma 12:10.

No adda nasairtayo, nalaklaka nga aminen ti kamalitayo no natimbeng ti panangmatmat iti bagitayo. (Mateo 5:23, 24) Agbanag dayta iti nasaysayaat a relasion, ket iruanganna ti panagkappia ken panagrinnaem. No napakumbaba ken naemma dagiti manangaywan, kas kadagiti Kristiano a panglakayen, adda gundawayda a mangaramid iti adu a pagimbagan ti sabsabali. (Proverbio 3:27; Mateo 11:29) Nalaklaka met a pakawanen ti napakumbaba a tao dagiti nakabasol kenkuana. (Mateo 6:12-15) Saan a dagdagus nga agpungtot gapu la iti babassit a banag, ken agtalek a korehirento ni Jehova dagiti saan a mapalinteg ita iti aniaman a pamay-an.​—Salmo 37:5; Proverbio 3:5, 6.

Ti kangrunaan a bendision a magun-od no napakumbaba ken nanumo ti panangmatmattayo iti bagitayo isu ti panangtagiragsak iti pabor ken anamong ni Jehova. “Ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.” (1 Pedro 5:5) Ditay koma pulos matnag iti palab-og ti panangipapan iti bagitayo a nalablabes ngem iti aktual a kasasaadtayo. Imbes ketdi, sipapakumbaba a bigbigentayo ti lugartayo iti urnos ni Jehova kadagiti bambanag. Agkakaimbag a bendision ti agur-uray iti amin a mangtungpal iti bilinna a ‘makipagna a sipapakumbaba iti Dios.’

[Ladawan iti panid 22]

Sipapakumbaba a sinuportaran ni Jonatan ni David