Taginayonem ti ‘Nasin-aw a Puso’ iti Daytoy Napeggad a Tiempo
“AWAN ti makailibak a ti kinasin-aw iti moral ket problema ita ti Simbaan.” Dayta ti napaliiw ti periodista a Katoliko a ni Vittorio Messori maipapan kadagiti seksual nga eskandalo a nakairamanan ti Simbaan ti Italia iti nabiit pay. “Ken saan a masolbar dayta uray maikkat ti pagannurotan a mangiparit kadagiti padi a mangasawa gapu ta 80 a porsiento kadagita a kaso ket pakairamanan dagiti homoseksual—dagiti kaso ti seksual a kinalulok dagiti padi a nangabuso kadagiti adulto a lallaki ken babbarito.”—La Stampa.
Awan duadua a ti nasaknap a kinadakes ket maysa a pagilasinan ti ‘maudi nga al-aldaw’ daytoy agdama a sistema ti bambanag. (2 Tim. 3:1-5) Kas ipakita dagiti damag, ti panagrakaya iti moral ket addaan iti dakes nga impluensia saan laeng nga iti kaaduan a tattao no di ket uray kadagiti agkunkuna nga adipen ida ti Dios. Makaaramidda kadagiti dakes a bambanag gapu iti rinuker ken narugit a pusoda. (Efe. 2:2) Adda ngarud nasayaat a rason ni Jesus a nangikuna a “rummuar manipud puso dagiti nadangkes a panagrasrason, panangpapatay, pannakikamalala, pannakiabig, panagtakaw, ulbod a pammaneknek, panagtabbaaw.” (Mat. 15:19) Nupay kasta, tarigagayan ni Jehova a Dios nga ayaten dagiti adipenna ti “kinasudi [wenno, kinasin-aw] ti puso.” (Prov. 22:11) Kasano ngarud a mataginayon ti maysa a Kristiano ti nasin-aw a puso iti daytoy napeggad a tiempo?
No Ania ti Kaipapanan ti ‘Nasin-aw a Puso’
Iti Biblia, masansan a nausar ti “puso” iti simboliko a pamay-an. Sigun iti maysa a reperensia, ti termino a puso iti Biblia ipasimudaagna ti “kaunggan a paset ti tao” ken ti “kangrunaan a kitkitaen ti Dios kadagiti tattao, a sadiay ti nakaibatayan ti relasionda kenkuana, ken mangimpluensia iti moral a tignayda.” Irepresentar ti puso ti pudno a kinataotayo. Kas ipaganetget ti nadakamat iti ngato, ti puso ti sukimaten ken ipatpateg ni Jehova kadagiti adipenna.—1 Ped. 3:4.
Iti Biblia, dagiti sasao a “nasin-aw” ken “nadalus” mabalin nga ipamatmatda ti pisikal a kinadalus. Ngem mabalin met nga agaplikar dagita iti moral ken narelihiosuan a kinadalus—awan mulitna. Kinuna ni Jesus iti Sermonna iti Bantay: “Naragsak dagiti nasin-aw ti pusoda.” Gapuna, ti tuktukoyen ni Jesus ket dagidiay nadalus ti kinataoda. (Mat. 5:8) Nasin-aw dagiti rikna, tarigagay, ken motiboda. Gapu iti ayat ken panagyaman, sipapasnek nga ayatenda ni Jehova iti amin a pusoda. (Luc. 10:27) Saan kadi a kayatmo met ti agbalin a nasin-aw iti kasta a wagas?
Ti Panangtaginayon iti ‘Nasin-aw a Puso’—Maysa a Karit
Ti maysa nga adipen ni Jehova ket saan laeng nga “awanan basol ti im-imana” no di ket masapul a “nadalus ti pusona.” (Sal. 24:3, 4) Ngem narigrigat ita kadagiti adipen ti Dios ti panangtaginayon iti ‘nadalus a puso.’ Ni Satanas ken ti lubong nga iturturayanna, agraman ti imperpekto a lasagtayo, ket napigsa ti impluensiada a mangyadayo kadatayo ken Jehova. Tapno masarangettayo dagita nga impluensia, nakapatpateg nga ayaten ken salimetmetantayo a naimbag ti ‘nasin-aw a puso.’ Salakniban ken tulongannatayo dayta nga agtalinaed a gayyem ti Dios. Kasanotayo a mataginayon ti nasin-aw a puso?
Pakdaarannatayo ti Hebreo 3:12: “Agannadkayo, kakabsat, ta amangan no addanto ketdi tumanor iti asinoman kadakayo a maysa a nadangkes a puso nga awanan pammati babaen ti iyaadayo iti sibibiag a Dios.” Ditay mapagtalinaed a ‘nasin-aw ti pusotayo’ no dayta ket “awanan pammati.” Ania dagiti nasaknap a sursuro ni Satanas a Diablo a mangpakapuy iti pammatitayo iti Dios? Karaman kadagita ti teoria ti ebolusion, ti kapanunotan nga awan ti pudno a pagalagadan no ania ti naimbag ken dakes, ken ti panagduadua nga impaltiing ti Dios ti Nasantuan a Kasuratan. Masapul a ditay ipalubos nga apektarannatayo dagiti kasta a makapapatay a kapanunotan. (Col. 2:8) Ti kangrunaan a salaknib manipud kadagita a panangraut ket ti inaldaw a panagbasa iti Biblia ken nauneg a panagmennamenna. Ti umiso a pannakaammo iti Sao ti Dios parayrayenna ti panagayattayo ken ni Jehova ken ti panangapresiartayo iti pannakilangenna kadagiti tattao. Kasapulan ti kasta nga ayat ken panangapresiar tapno mailaksidtayo dagiti ulbod a pannursuro ken masalimetmetantayo ti natibker a pammati ken Jehova. Iti kasta, mataginayontayo ti nasin-aw a puso.—1 Tim. 1:3-5.
No Maipasango iti Tarigagay ti Lasag
Ti sabali pay a kita ti panangraut a mabalin a pakaipasanguantayo bayat nga ikagkagumaantayo a taginayonen ti ‘nasin-aw a puso’ ket ramanenna dagiti nainlasagan ken materialistiko a tarigagay. (1 Juan 2:15, 16) Ti ayat iti kuarta wenno tarigagay nga agurnong iti kinabaknang ken agikut kadagiti material a bambanag ti posible a mamagbalin a dakes iti puso, a mangituggod iti maysa a Kristiano nga agaramid iti maikaniwas iti pagayatan ti Dios. Sumagmamano ti nagbalin a di mapagpiaran iti trabahoda, naulbod iti sabsabali, wenno nagtakawda pay ketdi iti kuarta wenno dadduma a bambanag.—1 Tim. 6:9, 10.
Iti sabali a bangir, no patanorentayo ti umiso a panagamak a di mapagura ni Jehova, panagayat iti kinahustisia, ken determinasion a mangsalimetmet iti nadalus a konsiensia, ipakpakitatayo nga ipatpategtayo ti ‘nasin-aw a puso.’ Dayta a panangipateg tignayennatayo nga agtultuloy nga “agbiag a mapagtalkan iti amin a bambanag.” (Heb. 13:18) Mabalin nga agresulta iti nasayaat a panangsaksi no agtignaytayo a sililinteg ken mapagtalkan. Ti maysa nga Italiano a Saksi a ni Emilio, nga agtartrabaho kas drayber iti pangpubliko a lugan, ket nakasarak iti pitaka a naglaon iti 470 a euro ($680, U.S.). Nasdaaw dagiti katrabahuanna idi intedna ti pitaka iti superbisorda, a nangipulang iti makinkukua. Dadduma a katrabahuanna ti nangapresiar unay iti inaramidna, isu a nagpayadalda iti Biblia. Kas resultana, pito a tattao manipud iti dua a pamilia ti nangawat iti kinapudno. Wen, ti panagbalin a mapagtalkan maigapu iti nasin-aw a puso pudno a tignayenna dagiti sabsabali a mangidayaw iti Dios.—Tito 2:10.
Ti sabali pay a mangyeg iti dakes nga impluensia iti nasin-aw a puso ti maysa a Kristiano ket ti ballikug ken imoral a panangmatmat iti sekso. Kinapudnona, mabalin a maimpluensiaan ti puso ti maysa a Kristiano gapu iti panangmatmat ti adu nga awan dakesna ti panagdenna sakbay ti kasar, pannakikamalala, ken homoseksualidad. No tumulok ti maysa a tao iti seksual nga imoralidad, mabalin nga agtungpal dayta iti doble kara a panagbiagna, nga ilimedna ti ar-aramidenna a basol. Saan la ketdi a panangiparangarang dayta iti ‘nasin-aw a puso.’
Nabautisaran ni Gabriele idi agtawen iti 15 ken dagus a nagpayunir. Ngem di nagbayag, rinugianna ti makitimpuyog kadagiti di umiso a kakadua kadagiti nightclub. (Sal. 26:4) Dayta ti nangrugian ti imoral ken doble kara a panagbiagna, a nagresulta iti pannakailaksidna iti kongregasion Kristiano. Dayta a panangdisiplina ni Jehova ti namagpanunot kenkuana a naimbag. Malagip ni Gabriele: “Rinugiak nga inaramid ti amin a banag a pulos a diak impateg idi. Inaldaw a binasak ti Biblia, nga inkagumaak a tarusan no ania ti kayat nga ipaawat ni Jehova, ken inadalko a naimbag dagiti teokratiko a publikasion. Napaneknekak no kasano a makagunggona ken makapnek ti personal a panagadal ken no kasano kadakkel a pammabileg ti magun-odko iti panagbasak iti Biblia ken iti napasnek a panagkararag.” Dagita ti nangtulong ken Gabriele a nangiwaksi iti imoral nga aramidna ken nangisubli iti dati a relasionna ken Jehova.
Agserserbi manen ita ni Gabriele kas payunir a kaduana ni baketna. Patalgedan ti kapadasanna a ti panagadal iti Biblia ken kadagiti publikasion manipud iti “matalek ken masirib nga adipen” ket makatulong iti maysa a tao a maaddaan iti nasin-aw a puso ken mangilaksid iti imoralidad.—Mat. 24:45; Sal. 143:10.
‘Nasin-aw a Puso’ iti Sidong ti Pakasuotan
Sumagmamano nga adipen ti Dios ti naupay gapu kadagiti ibubusor, rigat ti panagbiag, ken nakaro a sakit. Adda pay tiempo a naldaangan ti pusoda. Napasaran met ni Ari David ti kasta: “Ti espirituk talipungawen iti unegko; iti kaunggak mabibineg a mismo ti pusok.” (Salmo 143:4) Ania ti nakatulong kenkuana idi adda kadagiti kasta a kasasaad? Linagip ni David dagiti inaramid ni Jehova agpaay kadagiti adipenna ken iti panangispal ti Dios iti mismo a biagna. Inutobna dagiti gapuanan ni Jehova agpaay iti natan-ok a naganna. Kanayon a pinampanunot ni David dagiti aramid ti Dios. (Sal. 143:5) Iti umasping a pamay-an, ti panangutob maipapan iti Namarsua ken iti amin a nagapuananna ken iti agtultuloy nga ar-aramidenna para kadatayo ket makatulong uray no maipaspasangotayo iti pakasuotan.
Mabalin nga agsakit ti nakemtayo no adda—wenno no ipagaruptayo nga adda—nangsair kadatayo. Mabalin nga agimulatayo iti sakit ti nakem kadagiti kakabsattayo no agtultuloy a pampanunotentayo ti napasamak. Nalabit a ditay kayaten ti makikadua kadakuada, iputongtayo ti bagitayo, ken ditay unay maseknanen kadagiti sabsabali. Ngem dagiti kadi kasta a reaksion ket maitunos iti tarigagaytayo a maaddaan iti ‘nasin-aw a puso’? Nalawag a ti kalattayo a maaddaan iti nasin-aw a puso ramanenna ti pannakilangen ken panangtratotayo kadagiti kakabsattayo a Kristiano.
Iti tengnga ti dumakdakes ken bumabbaba a moral ti lubong, ad-adda a madlaw a naidumatayo kas pudno a Kristiano agsipud ta ipatpategtayo ti ‘nasin-aw a puso.’ Ti talna ti panunot nga itden ti panangaramid iti pagayatan ti Dios ket mangyeg iti nasayaat nga epekto iti biagtayo. Kangrunaanna, matagiragsaktayo ti nasinged a pannakigayyem iti Namarsua kadatayo, ni Jehova a Dios, a mangipatpateg kadagiti addaan iti ‘nadalus a puso.’ (Sal. 73:1) Wen, mabalin a mairamantayo kadagidiay maibilang a naragsak gapu ta kas iti inkari ni Jesus, “makitadanto ti Dios” inton Isu ket agtignay maipaay kadagiti mangipatpateg iti ‘nasin-aw a puso.’—Mat. 5:8.