PAMMASIGURO
Garantia iti panangtungpal iti maysa a pagrebbengan; tani, pammatalged, wenno seguro; daydiay namagbalin iti bagina a manungsungbat maipaay iti sabali. Ti salmista nagpakaasi ken Jehova nga agserbi kas “pammasiguro” maipaay kenkuana, a salaknibanna manipud kadagiti manangsaur.—Sal 119:122.
Ti nakaugalian a pamay-an ti panagbalin a pammasiguro maipaay iti sabali nagtalinaed a di nagbaliw iti adu a siglo. Ni patriarka Job tinukoyna dayta kas iti sumaganad: “Pangngaasim, ti garantiak ikabilmo iti aywanmo. Siasino pay ti makialamanonto kaniak kas tani?” (Job 17:3) Makatulong ti Proverbio 17:18 iti panangammo iti pamay-an a nasurot: “Ti tao nga awanan iti puso makialamano, nga agserbi a naan-anay a pammasiguro iti sanguanan ti kaduana.” Nabatad a ti maysa a tao nagbalin a pammasiguro maipaay iti sabali no, iti imatang dagiti saksi, nakisinnipat, nakipinnetpet, wenno nakialamano iti nagpautang ket ikarina nga aklonen dagiti pagrebbengan ti nakautang no saan a makabayad. Iti Dumaya, daytoy a tignay a pannakisinnipat wenno pannakipinnetpet ipasimudaagna a naselioan ti tinnawar wenno ti tulagan. (Pr 11:21) Nabatad a kastoy ti pamay-an a panangpatalged ni Jehu iti positibo a sungbat ni Jehonadab iti saludsod a, “Ti kadi pusom nalinteg a maibuyog kaniak, no kasano a ti pusok nalinteg a maibuyog ita pusom?” Ta kinunana ken Jehonadab: “No nalinteg, iyawatmo kaniak ta imam.”—2Ar 10:15.
Nangaramat ni Juda iti dadduma pay a pamay-an, nga intedna ti pangselio a singsingna, ti singdanna, ken ti sarukodna ken Tamar kas tani agingga a makaipatulod ken Tamar iti maysa nga urbon dagiti kalding kas bayad iti seksual a pannakidenna. (Ge 38:17-20) Ni Ruben nangitukon ken Jacob iti pammasiguro maipaay ken Benjamin, idi insingasingna nga ikuyogna ni Benjamin idiay Egipto, a kinunana: “Ti bukodko a dua nga annak mabalinmo a papatayen no isu saanko nga isubli kenka.” Nagkedked ni Jacob. Idi agangay, nagballigi ni Juda iti panangitukonna iti bagina nga agserbi kas pammasiguro maipaay ken Benjamin: “Siak ti pammasiguro maipaay kenkuana. Manipud iti imak mabalinmo a kalikaguman ti multa maipaay kenkuana.” Idi agparang nga agbalin koman ni Benjamin nga adipen iti Egipto, sisasagana nga indatag ni Juda ti bagina tapno alaenna ti saad ni Benjamin kas adipen, yantangay ni Juda ti pammasiguro maipaay iti ubing. Daytoy ti legal a nakaibatayan ti pakaasina ken Jose: “Ta ti adipenmo nagbalin a pammasiguro maipaay iti ubing bayat nga adayo iti amana . . . Gapuna ita, pangngaasim, bay-am nga agbati ti adipenmo imbes a ti ubing kas adipen ti apok.”—Ge 42:37, 38; 43:8, 9; 44:32, 33.
Dagiti tani a naipaay kas garantia ti nakautang iti nagpautang kenkuana ket siiinget a tinarawidwidan ti Linteg. Bayat ti irarang-ay ti komersio iti Israel, immadu met ti panangipaay iti pammasiguro kadagiti aramid iti panagtagilako. Namakdaar ti proverbio a daytoy ket napeggad ken minamaag nga aramid, nangnangruna no ti maysa awan pannakabaelna a mangipaay iti dayta a saanna nga irisgo ti pannakapukaw ti nasken a bambanag iti panagbiag.—Pr 6:1-5; 11:15; 22:26, 27; kitaenyo ti TANI.