Makagunggona ti Panagadal

NAPALIIWMO kadin no agpili dagiti tattao iti prutas? Kaaduan ket amirisenda ti kolor ken kadakkelna tapno maammuanda no naluomen. Dagiti dadduma angotenda ti prutas. Dadduma sagidenda, pislenda pay ketdi. Timbengen met dagiti dadduma iti imada tapno ammuenda no ania ti natubtubbog. Ania ti pampanunoten dagitoy a tattao? An-anagenda dagiti detalye, am-amirisenda dagiti naggigidiatan, tantandaananda dagiti immuna a pilida, ken pagdildiligenda ti madama a kitkitaenda ken ti datin nga ammoda. Naimas ti maalada gapu ta inamirisda a naimbag dayta.

Siempre, dakdakkel nga amang ti magunggona iti panagadal iti Sao ti Dios. No napateg iti biagtayo ti kasta a panagadal, bumileg ti pammatitayo, rumayray ti ayattayo, nabungbunga ti ministeriotayo, ket dagiti pangngeddengtayo ipamatmatda ti naun-uneg a pannakaawat ken nadiosan a sirib. Maipapan iti kakasta a gunggona, kuna ti Proverbio 3:15: “Amin a sabsabali pay a pakaragsakam saan a maipada iti dayta.” Sagsagrapem kadi ti kakasta a gunggona? Ti wagas ti panagadalmo mabalin nga adda pakainaiganna iti dayta.​—Col. 1:9, 10.

Ania ti panagadal? Saan a basta parparawpaw a panagbasa. Ramanenna ti panangusarmo iti panunot iti naannad wenno napaut a panangusig iti maysa a suheto. Kaipapananna ti pananganagmo iti nabasam, panangidilig kadagiti dati nga ammon, ken panangtarus kadagiti rason kadagiti banag a naisao. No agad-adalka, panunotem iti nauneg ti aniaman nga ideya a kabbaro kenka. Utobem met no kasano nga ad-adda a mayaplikarmo ti Nainkasuratan a balakad. Kas Saksi ni Jehova, kayatmo pay a panunoten dagiti gundaway a mausarmo ti ad-adalem a tumulong kadagiti sabsabali. Nalawag a ti panagadal ramanenna ti panagmennamenna.

Maaddaan iti Umiso a Panagis-isip

No agsaganaka nga agadal, iruarmo dagiti masapulmo a kas ti Biblia, aniaman a publikasion a planom nga usaren, lapis wenno ballpen, ken uray kuaderno. Ngem isaganam met kadi ti pusom? Kunaen ti Biblia kadatayo a ni Esdras “insaganana ti pusona nga umuman iti linteg ni Jehova ken mangaramid iti dayta ken mangisuro idiay Israel iti alagaden ken hustisia.” (Esd. 7:10) Ania ti ramanen ti kasta a panangisagana iti puso?

Ti kararag tulongannatayo nga agadal iti Sao ti Dios buyogen ti umiso a kababalin. Kayattay a ti pusotayo, ti kaunggan a katataotayo, ket sidadaan nga umawat iti pannursuro nga ipaay ni Jehova kadatayo. Tunggal mangrugika nga agadal, dawatem ti tulong ti espiritu ni Jehova. (Luc. 11:13) Kiddawem a tulongannaka a mangtarus iti kaipapanan ti adalem, no kasano a nainaig dayta iti panggepna, no kasano a matulongannaka a mangilasin iti naimbag ken dakes, no kasano a mayaplikarmo dagiti prinsipiona iti biagmo, ken no kasano a ti material apektaranna ti relasionmo kenkuana. (Prov. 9:10) Bayat nga agad-adalka, ‘agtultuloy nga idawatmo iti Dios’ nga ikkannaka iti sirib. (Sant. 1:5) Sipupudno a tingitingem ti bagim sigun iti maad-adalmo bayat a kiddawem ken Jehova a tulongannaka a mangiwaksi kadagiti di umiso a kapanunotan ken dakes a tarigagay. Kanayon a ‘sumungbatka ken Jehova buyogen ti panagyaman’ kadagiti banag nga ipalgakna. (Sal. 147:7) Ti kastoy a panagadal a nabuyogan iti kararag pasingedennatayo ken Jehova, tangay tulongannatayo a mangipangag kenkuana bayat nga agsasao kadatayo babaen ti Saona.​—Sal. 145:18.

Ti kasta a kinatulok a mangipangag igiddiatna dagiti tattao ni Jehova kadagiti dadduma nga agad-adal. Kadagidiay awanan iti nadiosan a debosion, gagangay kadakuada ti agduadua wenno mangkarit iti adda a naisurat. Ngem saan a kasta ti kababalintayo. Agtalektayo ken Jehova. (Prov. 3:5-7) No adda ti ditay maawatan, ditay sidadarasudos nga ipapan a kamali dayta. Bayat a suksukimaten ken birbirokentayo dagiti sungbat, agpannuraytayo ken Jehova. (Mik. 7:7) Kas ken Esdras, kayattay a tungpalen ken isuro ti maadaltayo. Buyogen itoy a pagannayasan ti puso, manamnama nga adu ti maganabtayo iti panagadaltayo.

No Kasano ti Agadal

Imbes a basta mangrugika iti parapo 1 nga aglaylayon agingga iti maudi, padalanam pay nga umuna ti pakabuklan ti artikulo wenno ti kapitulo nga adalem. Irugim babaen ti pananganagmo iti pannakaisao ti paulo. Isu daytoy ti tema ti adalem. Kalpasanna, imutektekam a naimbag no kasano a nainaig dagiti subtitulo iti tema. Amirisem dagiti ladawan, tsart, wenno mangisuro a kahon a naipakuyog iti material. Iyimtuodmo iti bagim: ‘Maibatay iti daytoy a pananganalisar, ania ti namnamaek a maadalko? Kasano a makatulong daytoy kaniak?’ Iti kasta, adda pagturongan ti panagadalmo.

Ita, rugiamon nga adalen ti impormasion. Adda dagiti nayimprenta a saludsod kadagiti artikulo a maadal iti Pagwanawanan ken dadduma a libro. Bayat a basbasaem ti tunggal parapo, nasayaat no markaam dagiti sungbat. Uray no awan dagiti saludsod, mabalin latta a markaan dagiti napateg a punto a kayatmo a tandaanan. No kabbaro kenka ti maysa a punto, agsarimadengka bassit a manganag iti dayta tapno sigurado a maawatam a nalaing. Siputam dagiti ilustrasion wenno argumento a mausarmonto iti tay-ak ti ministerio wenno iti maited kenka a palawag. Panunotem dagidiay tattao a ti pammatida ket mapabileg no iranudmo kadakuada ti ad-adalem. Markaam dagiti punto a kayatmo nga usaren, sa repasuem dagita inton malpaska nga agadal.

Bayat nga us-usigem ti material, basaem dagiti naisitar a kasuratan. Anagem no kasano a nainaig ti tunggal teksto iti kababagas ti parapo.

Mabalin a makasalawka kadagiti punto a saanmo a dagus a matarusan wenno kayatmo nga ibuksilan a naan-anay. Imbes a palubosam dagita a mangitawtaw kenka, ilistam ta sanguemto iti sabali a tiempo. Masansan a malawagan dagiti punto no ileppasmo a basaen ti material. Ket no saan, mabalin nga ituloymo ti agsukimat. Ania dagiti mabalinmo a sukimaten? Nalabit adda kasuratan a naadaw ngem narigatmo a maawatan. Wenno saanmo a dagus a makita no ania ti koneksionna iti suheto nga ad-adalem. Nalabit a matarusam ti ideya iti dayta a material ngem narigatmo a mailawlawag iti sabali. Imbes a baybay-am lattan, mabalin a nasaysayaat no sukimatem dagita inton malpas ti madama nga ad-adalem.

Idi insurat ni apostol Pablo ti detalyado a suratna kadagiti Hebreo a Kristiano, nagsardeng iti ngalay dayta ket kinunana: “Daytoy ti kangrunaan a punto.” (Heb. 8:1) Kasta kadi ti sagpaminsan nga ipalpalagipmo iti bagim? Amirisem no apay a kasta ti inaramid ni Pablo. Kadagiti immuna a kapitulo ti naipaltiing a suratna, nailawlawagnan a ni Kristo, kas naindaklan a Nangato a Padi ti Dios, ket simreken idiay langit a mismo. (Heb. 4:14–5:10; 6:20) Ngem, babaen ti panangitampok ken panangipaganetgetna iti dayta a kangrunaan a punto iti rugi ti kapitulo 8, insagana ni Pablo ti panunot dagiti agbasa iti suratna tapno panunotenda a naimbag no kasano a nainaig dayta iti biagda. Inlawlawagna a nagparangen ni Kristo iti saklang ti Dios gapu kadakuada ket linuktanna ti dalan tapno makastrekda iti nailangitan a “nasantuan a disso.” (Heb. 9:24; 10:19-22) Ti kinatalged ti namnamada isut’ tumulong a mangtignay kadakuada a mangyaplikar iti kanayonan a balakad a linaon ti suratna maipapan iti pammati, panagibtur, ken Nakristianuan a kondukta. Kasta met, no agadaltayo, ti panangimutektek kadagiti kangrunaan a punto tulongannatayo a mangtarus iti pannakabukel ti tema ken itukitna iti isiptayo dagiti nasayaat a rason nga agtignaytayo a maitunos iti dayta.

Tignayennakanto kadi ti personal a panagadalmo? Napateg daytoy a saludsod. No adda maadalmo, iyimtuodmo iti bagim: ‘Kasano nga apektaran daytoy ti kababalinko ken dagiti kalatko iti biag? Kasano a maipakatko daytoy nga impormasion a mangrisut iti parikut, iti panagdesision, wenno iti panangragpat iti kalat? Kasano a mausarko daytoy iti pamiliak, iti tay-ak ti ministerio, iti kongregasion?’ Sikakararag nga usigem dagitoy a saludsod, nga utobem dagiti agpaypayso a situasion a pangipakatam iti pannakaammom.

No nalpasmon ti maysa a kapitulo wenno artikulo, repasuem iti apagbiit. Kitaem no malagipmo dagiti kangrunaan a punto ken dagiti mangsuporta nga argumento. Makatulong daytoy kenka a mangtandaan iti impormasion a mausarmonto iti masanguanan.

No Ania ti Adalen

Kas tattao ni Jehova, nagadu ti adalentayo. Ngem sadino ti pangrugiantayo? Tunggal aldaw, nasayaat no adalentayo ti teksto ken komento iti Panangsukimat Kadagiti Kasuratan iti Inaldaw. Tunggal lawas, tumabunotayo kadagiti gimong ti kongregasion, ket no agadaltayo kas panagsagana kadagitoy a gimong, ad-adda a magunggonaantayo. Mainayon iti daytoy, nainsiriban a binusbos dagiti dadduma ti tiempoda babaen ti panagadalda kadagiti Nakristianuan a publikasiontayo a nayimprenta sakbay a naammuanda ti kinapudno. Dagiti dadduma pilienda ti sumagmamano a benneg ti linawas a panagbasada iti Biblia sada adalen a naun-uneg dagita a bersikulo.

Kasanon no dinaka palubosan ti kasasaadmo a mangadal a naimbag iti amin nga impormasion a mausig kadagiti linawas a gimong ti kongregasion? Dimo koma basta sidadaras a palabasan ti material tapno laeng mabasam wenno, nakarkaro pay, amangan ta saanmo nga adalen ti uray ania kadagita gapu ta dimo met la maadal amin. Imbes ketdi, ikeddengmo no kasano kawadwad ti mabalinmo nga adalen, ket ipasnekmo nga adalen dayta. Linawas nga aramidem dayta. Inton agangay, ikagumaam nga iraman ti maadal kadagiti dadduma pay a gimong.

‘Bangonem ti Sangakabbalayam’

Maawatan ni Jehova a masapul nga igaed dagiti ulo ti pamilia ti agtrabaho tapno maipaayda ti kasapulan dagiti ay-ayatenda. “Isaganam dagiti trabahom iti ruar,” kuna ti Proverbio 24:27, “ket saganaem maipaay kenka iti tay-ak.” Ngem saan a mabalin a liwayam dagiti naespirituan a kasapulan ti pamiliam. Gapuna, ituloy ti bersikulo: “Kalpasanna masapul a bangonem met ti sangakabbalayam.” Kasano a maaramid daytoy dagiti ulo ti pamilia? Kuna ti Proverbio 24:3: “Babaen iti panangilasin mapaneknekanto dayta [ti sangakabbalayan] a naipasdek a sititibker.”

Kasano a magunggonaan ti sangakabbalayam babaen ti panangilasin? Ti panangilasin isu ti abilidad ti panunot a mangmatmat iti banag a saan a nabatad. Maitutop a kunaen a ti epektibo a panagadal ti pamilia ket mangrugi iti panangusigmo iti mismo a pamiliam. Komusta ti naespirituan nga irarang-ay dagiti kameng ti pamiliam? Umimdengka a naimbag bayat a makisarsaritaka kadakuada. Adda kadi reklamo wenno sakit ti nakemda? Dagiti kadi materialistiko a gannuat ti ipangpangrunada? No kaduam dagiti annakmo iti tay-ak ti ministerio, mabainda kadi a mangipabigbig iti bagbagida kas Saksi ni Jehova iti imatang dagiti kapatadanda? Kaay-ayoda kadi ti urnos ti pamiliayo a panagbasa ken panagadal iti Biblia? Talaga kadi nga agbibiagda a mayannurot iti dalan ni Jehova? Ti naannad a panagpaliiw ipalgakna kenka no ania ti nasken nga aramidem, kas ulo ti pamilia, tapno maipasdek ken mapatanor dagiti naespirituan a galad iti tunggal kameng ti pamiliam.

Sumapulka kadagiti artikulo Ti Pagwanawanan ken Agriingkayo! maipapan kadagiti espesipiko a kasapulanyo. Kalpasanna, ipakpakaunam iti pamiliam no ania ti adalenyo tapno pagpampanunotanda dayta nga impormasion. Taginayonem ti naayat a kasasaad bayat ti panagadalyo. Ipaganetgetmo ti pateg ti ad-adalenyo, nga ipakitam no kasano nga agaplikar dayta kadagiti kasapulan ti pamiliayo, a dimo ung-ungtan wenno pabainan ti asinoman a kameng ti pamilia. Iramanmo amin ida. Tulongam ti tunggal maysa a mangbigbig no kasano a “perpekto” ti Sao ni Jehova a mangipaay iti talaga a nasken iti biag.​—Sal. 19:7.

Panagapit Kadagiti Gunggona

Dagiti managpaliiw a tattao nga awanan iti naespirituan a pannakaawat ket mabalin nga adalenda ti uniberso, dagiti pasamak iti lubong, ken uray ti bagbagida ngem dida matarusan ti pudno a kaipapanan dagiti maim-imatanganda. Iti sabali a bangir, iti tulong ti espiritu ti Dios, dagidiay regular nga agad-adal iti Sao ti Dios mailasinda kadagitoy a banag dagiti gapuanan ti Dios, ti kaitungpalan ti padto ti Biblia, ken ti pannakaibuksil ti panggep ti Dios a mangbendision kadagiti natulnog a tattao.​—Mar. 13:4-29; Roma 1:20; Apoc. 12:12.

Nupay nakaskasdaaw dayta, saan koma a dayta ti pamkuatantayo nga agtangsit. Imbes ketdi, ti inaldaw a panangsukimat iti Sao ti Dios tulongannatayo nga agtalinaed a napakumbaba. (Deut. 17:18-20) Ilisinatayo met iti “makaallilaw a pannakabalin ti basol” agsipud ta no sibibiag ti Sao ti Dios iti pusotayo, ti pannulisog ti basol dina maringbawan ti determinasiontayo a mangsaranget iti dayta. (Heb. 2:1; 3:13; Col. 3:5-10) Iti kasta, “magna[tayo] a maikari ken Jehova iti panggep a panangay-ayo a naan-anay kenkuana bayat nga agtultuloy[tayo] nga agbunga iti tunggal naimbag nga aramid.” (Col. 1:10) Ti panangaramid iti kasta isu ti panggeptayo a mangadal iti Sao ti Dios, ket ti panangitungpal iti dayta ti kadakkelan a gunggona.