KAMALIG
Bodega wenno patakder a pakaidulinan dagiti pagtaraon, a kas iti arak ken lana, kasta met dagiti napateg a metal wenno batbato ken dadduma pay nga aruaten. Ti sarusar ket patakder a naaramat a pagidulinan iti nairik ken nasaksak a bukbukel. Dagiti kamarin, torre, ken dadduma pay a pasilidad a pagidulinan ket gagangay kadagidi kadaanan a tiempo (1Cr 27:25; 2Cr 32:27, 28; Joe 1:17; Hag 2:19), ket ti sumagmamano a siudad kangrunaanna a nagpaayda kas disso a pagidulinan.—Ex 1:11.
Kasapulan idi dagiti kamalig mainaig iti santuario tapno maaywanan dagiti apagkapullo ken dagiti kontribusion—manipud kadagiti talon, minuyongan, ken kaubasan—nga inted ti Israel kadagiti Levita. (Mal 3:10) Adda dagiti Levita a naisaad nga agaywan kadagiti pempen ket imbunongda dagiti kasta a probision kadagiti kakabsatda.—1Cr 26:15, 17; Ne 12:44; 13:12, 13.
Iti kadaanan nga Egipto, nadumaduma ti porma ken pannakaipatakder dagiti sarusar, a ti maysa a kita ket umarngi iti agdama-aldaw a garong iti uneg ti daga. Adda ruanganna iti tuktok a pagiserrekan iti bukbukel (babaen ti iyuuli iti agdan) ken babassit nga umayas a ruruangan iti patas ti daga maipaay a pangiruaran iti bukbukel. Iti Makintengnga a Daya, nabayagen a maar-aramat met dagiti sarusar iti uneg ti daga. Nabatad nga ad-adda a matarigagayan dagitoy iti narasay ti pannakatagitaona a luglugar agsipud ta mailemmengda manipud kadagiti tulisan.
Mangiladawan nga Usar. Ni Jesu-Kristo pinaregtana dagiti adalanna a saanda a maringgoran maipapan kadagiti namaterialan a kasapulan, no di ket sapulenda laeng ti ‘tinapayda nga agpaay itoy nga aldaw.’ Pinalagipanna ida a ti Dios taraonanna dagiti tumatayab nupay saanda nga agipempen iti bambanag kadagiti kamalig wenno kadagiti kamarin. (Mt 6:11, 25, 26; Lu 12:22, 24) Tapno maipakita a ti biag saan nga agtaud iti bambanag nga ik-ikutan ti maysa, nangipaay ni Jesus iti pangngarig maipapan iti maysa a nabaknang a tao a nangpanunot a suktanna dagiti kamaligna iti daddadakkel pay a pangidulinanna iti adu a sanikuana, ngem nagangayanna, natay met laeng; saan ngarud a nakagunggona kenkuana ti namaterialan a kinabaknangna.—Lu 12:13-21.
Imbes a paregtaennatayo a manginanama kadagiti naindagaan a sanikua ket iti kasta mangurnong iti kasta unay a pempen kadagita, kunaen ti masirib a mannurat ti Proverbio: “Padayawam ni Jehova iti napapateg a bambanagmo . . . Iti kasta dagiti pempen ti abastom mapusekto nga aglaplapusanan.” (Pr 3:9, 10) Naiparangarang daytoy iti kapadasan ti nasion ti Israel. Naruay idi ti pannakabendisionda no situtulnog nga agserbida ken Jehova ken iyegda dagiti apag-isu nga apagkapullo iti santuario. (De 28:1, 8; 1Ar 4:20; 2Cr 31:4-10; Mal 3:10) Iti Salmo 144:13-15, agparang a tinukoy ni Ari David dagita a material a bendision gapu iti kinatulnog. Kalpasan nga insalakanna ni David ken dagiti tattaona ken pinagballigina ida kadagiti kabusorda, dagiti bendision nga inted ni Jehova ramanenna ti panangpunnoda kadagiti bodegada kadagiti apit ken inikkanna ida iti material a kinabaknang. Kas panangipakita a ni Jehova ti pudpudno a gubuayan ti kinabaknang ken kinaragsakda, ingngudo ni David daytoy a salmo kadagitoy a sasao, “Naragsak ti ili a ti Diosna isu ni Jehova!”
Piguratibo nga Usar. Ni Juan a Manangbautisar pinakdaaranna dagiti Fariseo ken dagiti Saduceo maipapan iti napeggad a kasasaadda. Dagiti pudpudno nga agbabbabawi inyarigna iti trigo a maurnong, ngem dagidiay a panguluen impadisna iti taep. Kinunana kadakuada: “Daydiay um-umay a sumaruno kaniak . . . urnongennanto ti trigona iti kamalig, ngem ti taep puorannanto iti apuy a saan a maiddep.” (Mt 3:7-12; Lu 3:16, 17) Nangipadto ni Jesus iti maysa a “panagani,” nga innaigna iti “panungpalan ti sistema ti bambanag” ket iti dayta dagiti angheliko a “managani” ummongenda dagiti simboliko a “dakes a ruot” a mapuoran, idinto ta “dagiti trigo” maummong iti ‘kamalig’ ti Dios, ti naisubli a kongregasion Kristiano, a sadiay maaddaanda iti anamong ken pannalaknib ti Dios.—Mt 13:24-30, 36-43.
Maipapan iti bambanag nga iti aglawlaw dagita nangipasdek ni Jehova kadagiti pagbeddengan babaen kadagiti naparsua a puersa, wenno linlinteg ti nakaparsuaan, kasta met iti bambanag nga inlasinna iti sidong ti panangiturayna agpaay kadagiti naisangayan a panggep, sinaona dagitoy kas adda “kadagiti kamalig.” Ti baybay naikuna a ‘naurnong a kas iti maysa a puttot, a naikabil kadagiti kamalig.’ (Sal 33:7) Maipapan met iti dadduma pay a karkarna a paspasamak iti nakaparsuaan a no dadduma inaramatna a pangduprak kadagiti kabusorna, inyimtuodna ken Job: “Nakastrekkan aya kadagiti kamalig ti niebe, wenno makitam aya uray dagiti kamalig ti uraro, isuda nga inggawidko maipaay iti tiempo ti rigat, maipaay iti aldaw ti dangadang ken gubat?” (Job 38:22, 23; idiligyo ti Jos 10:8-11; Uk 5:20, 21; Sal 105:32; 135:7.) Uray ti buybuyot dagiti Medo ken dagiti Persiano iti sidong ni Ari Ciro, inraman ni Jehova kadagiti “igam ti panangkondenarna” a nairuar iti “kamaligna” maibusor iti Babilonia.—Jer 50:25, 26.