“Pagdayawmo ti Kukuam ken Jehova”​—Kasano?

“PAGDAYAWMO ti kukuam ken Jehova, ken dagiti umuna a bungbunga ti amin a maapitmo.” Adda kadagitoy naipaltiing a nainsiriban a sasao, a naisurat agarup 2,600 a tawenen ti napalabas, ti tulbek tapno masagrap ti naruay a parabur ni Jehova, ta kinuna pay ti nagsurat: “Iti kasta dagiti sarusarmo mapnodanto a sipupusek, ket dagiti baldem agliplippiasdanto iti baro nga arak.”​—Proverbio 3:9, 10.

Ngem aniat’ kaipapananna ti panangdayaw iti Dios? Ania dagiti napateg a banag a pagdayawtayo ken Jehova? Ken kasanotay a maaramid daytoy?

‘Padayawam ni Jehova’

Iti Kasuratan, ti kangrunaan a Hebreo a sao para iti dayaw, ka·vohdhʹ, literal a kaipapananna “kinadagsen.” Gapuna ti panangpadayaw iti maysa a tao kaipapananna ti panangibilang kenkuana kas nadagsen, nakaskasdaaw, wenno nabalor. Ti maysa pay a Hebreo a sao para iti dayaw, yeqarʹ, ket naipatarus met a “napateg” ken “napapateg a bambanag.” Umasping iti dayta, ti Griego a sao a ti·meʹ, a naipatarus a “dayaw” iti Biblia, ipasimudaagna ti panagraem, pateg, kinapateg. Gapuna ti maysa padayawanna ti sabali babaen ti panangipakitana iti dayta a tao iti nauneg a panagraem ken panangipateg.

Adda pay sabali nga aspeto ti panangpadayaw. Usigenyo ti salaysay maipanggep iti matalek a Judio a ni Mardokeo, a naminsan inlatakna ti plano a panangpapatay ken ni Ari Asuero iti nagkauna a Persia. Idi agangay, idi naammuan ti ari nga awan aniaman a naaramid a pammadayaw ken ni Mardokeo maigapu iti dayta nga inaramidna, sinaludsodna iti kangrunaan a ministrona, a ni Aman, no kasano ti kasayaatan a panangpadayaw iti daydiay pakaragsakan ti ari. Impagarup ni Aman nga agpaay kenkuana ti kasta a dayaw, ngem anian a panagbiddutna! Nupay kasta, kinuna ni Aman a ti kasta a tao rumbeng a makawesan iti “naarian a pagan-anay” ken agsakay iti “kabayo a pagsakayan ti ari.” Kinunana: “Isu ti pasakayenda iti bukot ti kabayo nga ipagna iti lansangan ti ili, ket iwaragawagda iti sanguananna, Daytoy ti maaramidto iti lalaki a pagrag-oan a dayawen ti ari.” (Ester 6:1-9) Iti daytoy a pagarigan, ti panangpadayaw iti maysa a tao ramanenna ti panangitan-ok kenkuana iti publiko tapno pagraeman unay ti intero nga ili.

Iti umasping a pamay-an, ti panangpadayaw ken Jehova adda dua nga aspetona: personal a panangipakita kenkuana iti dakkel a panangipateg ken panangitan-ok kenkuana iti publiko babaen ti pannakiraman ken panangsuporta iti trabaho a panangipaduyakyak iti naganna iti publiko.

“Ti Kukuam”​—Ania Dagitoy?

Dagiti kukuatayo awan duadua ramanenna ti biag, tiempo, saguday, ken pigsatayo. Dagiti ngay material a sanikuatayo? Usigenyo ti sasao ni Jesus idi nakitana ti napanglaw a balo a nangipisok iti dua a babassit a sinsilio a bassit unay ti pategna idiay baul ti gameng ti templo. Kinunana: “Daytoy a balo, nupay napanglaw, nangipisok iti ad-adu ngem iti isuda amin. Ta amin dagitoy [dagiti dadduma pay a nagabuloy] nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.” (Lucas 21:1-4) Pinadayawan ni Jesus daytoy a balo gapu iti panangaramatna iti material a sanikuana iti panangitandudo iti panagdayaw ken Jehova.

Nalawag, no kasta, a dagiti napapateg a banag a dinakamat ni Solomon ramanenna met ti aniaman a material a sanikua a mabalin nga adda kadatayo. Ket ti sasao a “dagiti umuna a bungbunga ti amin a maapitmo” ipasimudaagna ti panangited ken Jehova ti kasayaatan iti kukuatayo.

Nupay kasta, kasano a mangpadayaw iti Dios ti panangted kadagiti material a bambanag? Saan kadi a kukuana amin a banag? (Salmo 50:10; 95:3-5) “Naggapu amin a bambanag kenka,” binigbig ni Ari David iti naimpusuan a kararagna ken Jehova. Ket no maipapan iti dakkel a donasion nga impaayna ken dagiti tattao a pagbangon iti templo, kinuna ni David: “Iti kukuam ti itdenmi kenka.” (1 Cronicas 29:14) Gapuna no mangipaaytayo iti sagut ken Jehova, isubsublitay laeng ti intedna kadatayo a gapu iti kinaimbag ti pusona. (1 Corinto 4:7) Ngem, kas nadakamaten, ti panangpadayaw ken Jehova ramanenna ti panangitan-ok kenkuana iti imatang dagiti sabsabali. Ket mangpadayaw iti Dios dagiti material a sagut a maar-aramat iti panangyadelantar iti pudno a panagdayaw. Naglaon ti Biblia kadagiti nagsayaat nga ehemplo iti kastoy a panangpadayaw ken Jehova.

Dagiti Napalabas nga Ehemplo

Ag-3,500 a tawenen ti napalabas, idi dimteng ti tiempo a panangipaay ni Jehova iti tabernakulo idiay let-ang kas lugar a pagdaydayawan dagiti Israelita, adda pakasapulan para iti nadumaduma a napapateg a bambanag a nairaman iti disenio nga inted ti Dios. Binilin ni Jehova ni Moises a ‘mangpalubos iti siasinoman a siaannugot ti pusona nga iyegna koma ti sagsagut ken Jehova.’ (Exodo 35:5) Intuloy a kunaen ti salaysay: “Isuda immayda, tunggal maysa a natignay ti pusona ken siannugot ti nakemna, inyegda ti isagut ken Jehova, a maipaay iti pannakaaramid ti tolda ti gimong, ken maipaay iti amin a panagannong idiay, ken maipaay kadagiti nasantuan a kawkawes.” (Exodo 35:21) Kinapudnona, ti boluntario a datonda, ad-adu nga amang ngem iti kasapulan para iti trabaho ket dagiti tattao kinasapulan a ‘matuben iti panangyegda’!​—Exodo 36:5, 6.

Usigenyo ti maysa pay nga ehemplo. Idi natungpalen ti panggep ti tabernakulo ken maisagsaganan ti pannakaibangon ti templo, dakkel ti personal nga inyabuloy ni David para iti templo nga ipatakder ni Solomon nga anakna. Inwaragawagna met kadagiti sabsabali a makiramanda, ket nangipangag ti ili babaen kadagiti sagut a napapateg a banag a maipaay ken Jehova. Ti laengen pirak ken balitok ket agpateg ita iti agarup $50 bilion. “Ket nagrag-o dagiti umili, ta nagidatonda iti sibubulos a nakem.”​—1 Cronicas 29:3-9; 2 Cronicas 5:1.

‘Dagiti Boluntario a Daton’ iti Kaaldawantayo

Kasanotay a mairaman iti rag-o nga itden ti boluntario a panagidaton iti kaaldawantayo? Ti kapatgan a trabaho iti daytoy a lubong ita isu ti panangikasaba iti Pagarian ken panagaramid kadagiti adalan. (Mateo 24:14; 28:19, 20; Aramid 1:8) Ket nakita ni Jehova a maitutop nga italek kadagiti Saksina ti naindagaan nga intereses ti Pagarian.​—Isaias 43:10.

Nabatad a kasapulan ti kuarta tapno masuportaran ti trabaho dagiti Saksi ni Jehova ita. Ti panagipatakder ken panangmantener kadagiti Kingdom Hall, Assembly Hall, sanga nga opisina, paktoria, ken pagtaengan a Bethel ramanenna ti kuarta. Addada met paggastuan iti panagimaldit ken panagiwaras kadagiti Biblia ken naibatay-Biblia a publikasion iti nadumaduma a pagsasao. Kasano a masupsuportaran ti kakasta a paggastuan ti organisasion? Babaen kadagiti naan-anay a boluntario a kontribusion!

Kaaduan kadagiti kontribusion ket agtaud kadagiti indibidual a​—kas iti balo a pinaliiw ni Jesus​—kalalainganna laeng ti kabibiagda. Tangay dida kayat a maliwayan daytoy a benneg ti panagdayaw ken Jehova, mangyabuloyda iti kalalainganna a gatad a “maitunos iti pudno a kabaelanda,” ken no dadduma, iti pay ketdi “nalablabes ngem iti pudno a kabaelanda.”​—2 Corinto 8:3, 4.

“Tunggal maysa aramidenna koma kas iti inkeddengna iti pusona, saan nga iti dakes a nakem wenno iti sidong ti pannakapilit, ta ti Dios ayatenna ti naragsak a manangited,” kinuna ni apostol Pablo kadagiti Kristiano idiay Corinto. (2 Corinto 9:7) Kalikaguman ti naragsak a panangted ti nasayaat a panagplano. Imbaga ni Pablo kadagiti taga Corinto: “Tunggal umuna nga aldaw ti lawas tunggal maysa kadakayo iti bukodna a balay mangilasin koma a mangidulin iti aniaman a kas iti irarang-ayna, tapno inton dumtengak saanton a maaramid dagiti panagur-or.” (1 Corinto 16:2) Umasping iti dayta, iti pribado ken boluntario a pamay-an, dagidiay agtarigagay a mangted iti donasion a pangyadelantar iti trabaho a mainaig iti Pagarian ita mabalinda ti mangilasin iti paset ti sapulda a maipaay iti dayta a panggep.

Bendisionan ni Jehova Dagidiay Mangidayaw Kenkuana

Nupay saan a mangiturong ti material a kinabaknang a mismo iti naespirituan a kinabaknang, ti sipaparabur a panangusar kadagiti kukuatayo​—ti tiempo, pigsa, ken material a sanikuatayo​—a pagdayaw ken Jehova mangyeg kadagiti nabaknang a bendision. Wen, ta ti Dios, a makinkukua iti amin a banag, ipasiguradona kadatayo: “Ti managparabur a kararua mapalukmegto; ket ti agsibug, isu met laeng masibuganto.”​—Proverbio 11:25.

Kalpasan ti ipapatay ni Ari David, inusar ni Solomon nga anakna ti boluntario a kontribusion a naurnong ni amana a pagibangon iti nadayag a templo, kas imbilin ni Jehova. Ket kabayatan ti panagtalinaed ni Solomon a matalek iti panagdaydayawna iti Dios, ‘ti Juda ken ti Israel nagnaedda a sitatalged . . . manipud Dan agingga iti Beer-seba, kadagiti amin nga aldaw ni Solomon.’ (1 Ar-ari 4:25) Napno dagiti kamalig, nagliplipias dagiti burnay iti arak​—bayat a ti Israel ‘indaydayawda ni Jehova kadagiti kukuada.’

Idi agangay, kinuna ni Jehova babaen ken ni propeta Malakias: “Padasendak ita iti daytoy, kuna ni Jehova dagiti buybuyot, no siak diakto luktan kadakayo dagiti tawtawa ti langit, ket ibuyatkonto kadakayo ti bendision, nga awanto ti lugar a makalaon nga umawat.” (Malakias 3:10) Ti naespirituan a kinarang-ay a tagtagiragsaken dagiti adipen ni Jehova ita ket pammaneknek a tungtungpalen ni Jehova ti karina.

Pudno a maragsakan ni Jehova no aramidentayo ti pasettayo iti panangyadelantar iti interes ti Pagarian. (Hebreo 13:15, 16) Ket inkarina a suportarannatayo no ‘itultuloytayo a sapulen nga umuna ti pagarian ken ti kinalintegna.’ (Mateo 6:33) Buyogen ti dakkel a rag-o, sapay koma ta ‘pagdayawtayo ken Jehova dagiti kukuatayo.’

[Kahon iti panid 28, 29]

Dagiti Pamay-an a ti Dadduma Boluntario a Mangtedda Kadagiti Kontribusion iti Sangalubongan a Trabaho

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a nasuratan iti: “Kontribusion Para iti Sangalubongan a Trabaho ti Sosiedad​—Mateo 24:14.” Kada bulan ipatulod dagiti kongregasion dagitoy a kantidad iti sangalubongan a hedkuarter sadi Brooklyn, New York, wenno iti lokal a sanga nga opisina.

Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1060 Manila, wenno iti opisina ti Sosiedad iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

Kondisional a Donasion nga Urnos

Mabalin nga italek ti kuarta iti Watch Tower Society agingga iti ipapatay ti nangidonar, iti donasion a no dumteng ti personal a pakasapulan, maisubli ti donasion iti nangidonar. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

Naiplano a Panangted

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted nga agpaay iti serbisio ti Pagarian iti intero a lubong. Mairaman kadagitoy ti:

Seguro: Mabalin a ti Watch Tower Society ti mapanaganan kas benepisario ti life insurance policy wenno ti retirement/pension plan. Rumbeng a mapakaammuan ti Sosiedad maipapan iti kakasta nga urnos.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificates of deposit, wenno individual retirement accounts, maitunos kadagiti alagaden ti lokal a banko. Rumbeng a mapakaammuan ti Sosiedad maipapan kadagiti kasta nga urnos.

Stocks ken Bonds: Mabalin nga idonar dagiti stocks ken bonds iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nangidonar.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba iti life estate iti nangidonar, a makapagtultuloy nga agnaed sadiay bayat a sibibiag. Masapul a makiuman ti maysa iti Sosiedad sakbay ti legal a panangyallatiw kadagiti papeles ti aniaman a real estate iti Sosiedad.

Testamento ken Talek: Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Sosiedad ti mabalin a mapanaganan kas benepisario iti maysa a trust agreement. Mabalin nga addada bentahana iti buis no maysa a relihioso nga organisasion ti benepisario ti talek. Rumbeng a mapatulodan ti Sosiedad iti kopia ti testamento wenno trust agreement.

Nangisagana ti Sosiedad iti broshur iti pagsasao nga Ingles nga addaan tema a Planned Giving. Dagiti adda idiay Estados Unidos nga agpalplano a mangted itan iti maysa a naisangsangayan a sagut iti Sosiedad wenno adda ipatawidda inton pumusayda makatulong daytoy nga impormasion. Ad-adda pay a kasapulanda dayta no adda tarigagayanda nga iringpas a kalat ti pamilia wenno agplanoda maipapan iti dagada bayat nga ar-aramatenda dagiti bentaha iti buis tapno makissayan ti gastos a mainaig iti dayta a sagut wenno tawid.

Para iti kanayonan nga impormasion iti aniaman a nadakamaten, agsuratkayo iti Watch Tower, P.O. Box 2044, 1060 Manila, wenno iti opisina ti Sosiedad iti pagilianyo.