Pananggatang ti Kinaragsak nga Awan Kuarta
MAWAWAN unay kalpasan ti pannagna iti adayo iti sidong ti init iti kalgaw, nakagtengkayo iti maysa a bassit a purok. Iti ragsakyo nakakitakayo iti maysa a karatula nga agkunkuna nga adda dagiti nalamiis nga inumen. Ngem kalpasanna naammuanyo nga awan aniaman a kuartayo a pagbayad iti dayta a pagrepresko.
Iti pannakakita iti problemayo, kuna ti agtagilako, ‘Ala ketdi, gumatangkayo iti inumen—diyo kasapulan ti aniaman a kuarta.’ Dagdagus, nariknayo ti nauneg a panagyaman iti daytoy naasi a panangitukon. Nupay kasta, maisaludsodyo, ‘Kasano dayta? Kasano a gumatangak nga awan ti kuarta?’
Pananggatang nga Awan Kuarta
Nupay kasla arapaap daytoy, agpadpada a ni Karel ken Julian, a nadakamat idiay panid 3, ti naaddaan iti kasta a kapadasan. Pinatida idi a ti kuarta ti mangiyeg ragsak kadakuada. Ngem inlawlawag ni Karel: “Ti panagadal iti Biblia ti nangbalbaliw iti panangmatmatko iti kuarta. Daytat’ nangipaay iti namnama iti biag nga agnanayon iti maysa a paraiso a daga, banag a napatpateg ngem iti aniaman a magatang ti kuarta.” Daydiay dati nga agpangpanggep nga agbalin a milionario a ni Julian ti nangisalaysay: “Dandaniakon makagteng iti kalatko idi naammuakon ti kinapudno manipud iti Biblia.”
Umas-asping met, ti dati nga operator ti supermarket a ni Kiyoshi Tomomitsu a taga Japan ti dati a mangipangpangruna iti trabahona, a ti panangaywanna iti pamiliana ket “segundario laeng a paginteresan.” Inrasonna: “Impagarupko no maparagsakko ti pamiliak babaen ti panangipaay kadagiti supisiente a material a bambanag nga agpaay iti masanguananda.” Idi napagsaludsodan no aniat’ nangbalbaliw iti panangmatmatna iti kuarta ken dagiti material a bambanag, simmungbat ni Kiyoshi: “Dagiti kasuratan manipud iti Biblia, kas iti Proverbio 23:23, a kunana, ‘Gatangem ti kinapudno ket dika lakuen.’”
‘Ngem,’ maisaludsodyo, ‘kasanok a “gatangen ti kinapudno”?’
Ti Ngina ti Kinaragsak
Kasapulanna ti dadduma a tiempoyo. ‘Gundawayanyo a naimbag ti tiempoyo,’ imbalakad ni Kristiano nga apostol Pablo, ‘ta dagiti aldaw dakesda.’ (Efeso 5:15-17) Dagiti Saksi ni Jehova nga adda iti lugaryo maragsakanda a mangiyurnos iti pannakisarita kadakayo maipapan kadagiti kinapudno manipud Sao ti Dios, ti Biblia, iti oras a kumbiniente kadakayo, ket daytoy ti interamente nga awan ti bayadanyo a kuarta.
Adda aya panagkitakityo a ‘mairaman’? No kasta, ngarud ipapusoyo dagiti sasao ni Jesus: “Naragsak dagiti mabisin ken mawaw iti kinalinteg, ta mapnekdanto.” Iti panangiturong ti atension dagiti managdengngegna kadagiti pamay-an a pakagun-odanda ti ragsak, kuna ni Jesus: “Naragsak dagidiay silalagip kadagiti naespirituan a kasapulanda, ta kukuada ti pagarian ti langit.” (Mateo 5:3, 6) Daytoy nailangitan a gobierno, ti Pagarian ti Dios, ti kakaisuna nga autoridad a makaited kadakayo iti “pasaporteyo nga agturong iti ragsak.”
Ngarud, ania nga akem, ti rebbeng a papel ti kuarta iti biagyo? Makapainteres, mangted ti Biblia kadagiti praktikal a pagannurotan iti daytoy.
Ti Nainsiriban nga Usar ti Kuarta Itatta
“Pagdayawmo ti kukuam ken Jehova,” imbalakad ti Sao ti Dios. (Proverbio 3:9) Gapuna, dagidiay kumita iti Dios a maipaay iti pudno a ragsak usarenda ti kuartada iti pamay-an a makaay-ayo kenkuana. Rantada nga aywanan a siuumiso dagiti namaterialan a kasapulan ti pamiliada. (1 Timoteo 5:8) Siuumiso a saganaanda dagiti dadduma a nainaig kadakuada iti pammati. Ken mangtedda met kadagiti boluntario a kontribusion a mangsuportar iti trabaho ti panangted kadagiti makapabileg iti naespirituan nga impormasion a kas kadagiti Biblia ken kadagiti publikasion a naibatay iti Biblia kas iti daytoy a magasin.
Gapu ta pagaammoda a ti Pagarian ti Dios ti mangpaksiatto iti natauan a sosiedad kadagiti materialistiko, inaagum nga elemento ti komersio, liklikanda ti pannakaallilawda a mangibuyat iti kuarta kadagiti gannuat nga ammoda a naikeddeng iti pannakapaayna. (Daniel 2:44) ‘No adda ngarud pagtaraonda ken pagkawesda,’ kontentodan iti panagbiag a mangaywan kadagiti maipangpangruna iti biag.—1 Timoteo 6:8.
Kinaragsak Itan—Maysa a Kinapudno
“Maysa kadagiti umuna a banag a nadlawko iti pannakaidennak kadagiti Saksi ni Jehova,” insalaysay ni Sue a taga Inglatera, “isu ti no kasano a dagidiay agbibiag sigun kadagiti prinsipio ti Biblia, a naigamerda a naan-anay iti panagdayawda, ti kasla isudat’ addaan kadagiti bambanag a kasapulanda.” Ni lakayna, ni John, nadlawna dayta met laeng a banag. Inlawlawagna:
“Babaen laeng iti pannakaammo kadagiti kinapudno ti Biblia a makitak no aniat’ mapaspasamak iti kaaduan a tattao. Ti pagbambannoganda ket agpannuray a naan-anay iti kuarta. Ti Biblia tinulongannak a makaammo a ti kinaragsak ket saan nga umay iti kasta a pamay-an. Itan mabigbigko a ti kinaragsak ket isu ti bunga ti panagaramid kadagiti bambanag a maipaay kadagiti dadduma ket daytat’ saan nga isu ti pagpatinggaan a mismo.”
Da John ken Sue ket duada laeng kadagiti nasurok ngem tallo a milion kadagiti Saksi ni Jehova a mangpaneknek iti kinapudno ti kari ni Jesus a no birukem nga umuna ti Pagarian ti Dios ken ti kinalintegna, amin dagiti material a kasapulan “mainayondanto kadakayo.”—Mateo 6:33.
Sapsapulenyo met laeng aya ti makaep-ep ti waw a dandanum ti kinapudno? Nabaknangkayo man wenno napanglaw, mabalin a kukuayo ti kinaragsak babaen ti panangipangag iti napropetikuan nga awis ti Dios: “O, tunggal mawaw! Umaykayo kadagiti dandanum. Ken dayta nga awanan ti pirak! Umaykayo, gumatangkayo . . . nga awan ti pirak ken awan ti baybayad.” (Isaias 55:1) Daytoy a tukon ti kaskasdi a balido pay. Gundawayanyo dayta bayat a kabaelanyo pay.
[Dagiti ladawan iti panid 10]
Ti kinaragsak ket bunga ti panangusar iti kuarta nga agpaay iti pamiliami ken ti panangtulong kadagiti sabsabali