Ti Namnamayo​—Ti Dios wenno ti Kinabaknang?

“Iti adu a tawtawen isut’ agbutbuteng iti nakapimpintas a balayna a nalikmut iti de kadena nga alad ken senerraan dagiti dua a nakandaduan a landok a ruruangan.”

KASTA ti panangiladawan ti maysa a report dagiti damdamag maipapan ti maysa a nabaknang a viuda a natay iti im-ima dagiti mannanakaw a nangitaray kadagiti alahasna ken ti $1 milion manipud iti balayna. Kalpasan a nasarakanda ti bagina, inusar ti polisia ti maysa a karkariton ti groseria tapno pangiluganan iti sabali pay a $5 milion a kuarta a nangiruar iti pagtaenganna. Dagiti polis ti nakakita pay met iti rinibribo a “regregalo iti panagkasangay” nga adda pay dagiti nakakapet a tarheta a naikkan ti direksion a “To Jesus Christ” ken “To God.”

Daytoy nagtawid a babai ti kasla awan gagayyemna, ket isut’ nagbibiag iti kankanayon a panagbuteng. Saludsodanyo ti bagiyo, Kasano ti pudno a kinapateg dagiti minilmilion a kasta unay ti panangipatpategna? Mainayon pay, Kasano ti kinabaknangna no maipapan iti Dios? Pagaammoyo unay a ti Dios ket saan a maay-ayo babaen kadagiti “regregalo ti panagkasangay,” ken ti panagikut kadagiti kinabaknang dina met maibunga ti kinatalna iti Dios. Makita dayta manipud iti balakad iti Biblia a ditay ‘imaldit ti inanamatayo kadagiti kinabaknang a pagduaduaan, no di ket iti Dios, isu a mangted kadatayo iti nawadwad kadagiti isuamin a pagnam-ayantayo.’​—1 Timoteo 6:17.

Apay a dagiti kinabaknang awan kinasigurona? Nalabit ammoyo no kasano ti kinapudno dagiti sasao ni Jesus: “Saankayo nga agurnong kadagiti gupgupit nga agpaay kadakayo ditoy daga, isu a ti sanga ken ti lati dadaelenda, ken isu a dagiti mannanakaw kalienda ken takawenda.” (Mateo 6:19) Kas pagaammoyon, kanayon nga adda ti peggad a ti uram ti mangdadael iti maysa a balay. Dadduma a tattao iduldulinda dagiti napapateg a gamgamengda kadagiti banko, ngem saan kadi a dagiti mannanakaw ti agtakaw met manipud kadagitoy? Uray pay ti baro a kotse ket mabalin nga aglati.

Ket ti met ngay ekonomia dagiti nasnasion? Kadagiti adu a dagdaga ti implasion ket kas maysa a mannanakaw; daytat’ mangpabassit kadagiti kinabaknang ti maysa a tao. “Kalpasan ti panangablat ti nakaro unay nga implasion iti Alemania kadagiti immuna a paset ti 1920’s, dagiti mapan aggatang kasapulanda dagiti binasbasket a kuarta . . . tapno paggatang kadagiti groseria . . . Dagiti presio idiay Alemania ti ngimmato iti nasurok a 1 trilion a porsiento manipud Agosto 1922 ingganat’ Nobiembre 1923.” (The World Book Encyclopedia) Anian a makapaupay ti panagtalek iti kuarta!

Sisisirib a namagbaga ni Jesus: “Ngem agurnongkayo kadagiti gupgupit sadi langit, isu a ti sanga ken ti lati dida dadaelen ken isu a dagiti mannanakaw dida kalien ken takawen.” (Mateo 6:20) Ania dagitoy a “gupgupit”? Buklen dagiti indibidual a rekord dagiti naimbag nga ar-aramid, ti panagbalintayo a nabaknang iti Dios. ‘Ania,’ mabalin a maisaludsodyo, ‘ti kalikaguman dayta kaniak?’ Iti pasetna, sumungbat ti Biblia a kaipapanan dayta nga “agaramidda koma iti naimbag, a nabaknangda koma kadagiti naimbag nga aramid, a managparanudda, a nalakada a makipagrikna.”​—1 Timoteo 6:18.

Iti intero a daga itatta, addada minilmilion a Saksi ni Jehova a sipapasnek a makapaneknek a ti panangiranud kadagiti naespirituan ken namaterialan a bambanag kadagiti dadduma​—nangnangruna ti panangtulong kadagiti dadduma a makaammo maipapan ti namnama ti Pagarian babaen ti pannakiraman kadagiti ar-aramid kas ti panangasaba, panangisuro ken panagaramid ti adalan​—isu dagiti naimbag nga ar-aramid nga addaan anamong ni Jehova ket dagitoy nangyegda iti pudpudno a pannakapnek. Uray ni patay saanda a matakawan ti maysa a tao kadagiti gunggona nga iyeg ti kasta a panagurnong iti gupgupit sadi langit. Apay a kasta? Inkari ni Jesus: “Siak ti panagungar ken ti biag. Ti mamati kaniak, uray no matay, agbiagto pay.”​—Juan 11:25.

Dagiti Awan Gatadda a Gupgupit a Mabalintay a Tagiragsaken Itan

Kalpasan ti panangikuna a rebbeng nga imaldittayo ti inanamatayo “iti Dios,” intuloy a kinuna ni Pablo a ‘ti Dios ti mangted kadatayo iti nawadwad kadagiti isuamin a pagnam-ayantayo.’ (1 Timoteo 6:17) Malaksid kadagiti inaldaw-aldaw a kasapulan ti panagbiag, ti Kangatuan ti siaayat a mangipapaay kadagiti awan gatadna a gupgupit kadagidiay tattao nga inanamonganna. Ania dagita a gupgupit?

Kitaenyo ti kuna ti Proverbio 3:13-18: “Naragsak ti tao a makasarak iti sirib, ken ti tao a makaala iti pannakaawat, ta ti pannakagun-od kenkuana nasaysayaat ngem ti pannakagun-od iti pirak ket ti magunggona kenkuana nasaysayaat ngem balitok a nasudi. Napatpateg ngem kadagiti rubis ket awan kadagiti bambanag a mabalinmo a tarigagayan ti maiyasping kenkuana. Ti kaatiddog dagiti al-aldaw adda iti imana a kannawan; iti imana a kattigid adda dagiti kinabaknang ken dayaw. . . . Isu ti kayo ti biag kadagiti kumpet kenkuana, ket naragsak ti siasinoman a mangsalimetmet kenkuana.” Gapuna ti “sirib” ket maysa a gupit a lab-awanna ti pateg amin dagiti kinabaknang ti lubong.

Ti sirib ket isu ti panangiyaplikar iti pannakaammo iti umiso a pamay-an. Isu dayta ti abilidad a mangusar ti pannakaammo ken pannakaawat a sibaballigi tapno mangrisot kadagiti parikut, tapno maliklikan, wenno maatipa, dagiti peggad, tapno maragpat dagiti kalat wenno tapno matulongan dagiti dadduma a mangaramid iti kasta. Dikay kadi umanamong nga itatta kasapulantayo ti kasta a sirib tapno masangotay a sibaballigi dagiti pakasusuotan iti panagbiag ket mataginayontayo ti nasayaat a takdertayo iti Dios?

Iti panangisalaysayna iti sirib, impaganetget ti Proverbio 3:13-18 ti kinaragsak. Saan kadi a ti kinaragsak maysa a gupit a tartarigagayantay amin? Ti nadiosan a sirib ti mangted kadatayo iti daytoy a ragsak agsipud ta ti pudno a ragsak dumteng laeng manipud iti Gubuayanna, ni Jehova a Dios. Paneknekan ti kapadasan a ti pudno a ragsak di magun-odan no awan ti panagtulnog iti Kangatuan ken itutulok iti panagandar ti espirituna. Dagiti kinaragsak a naikari idiay Biblia agpannurayda iti umiso a pannakirelasiontayo, wenno ti naanamongan a takder iti nailangitan nga Amatayo. (Mateo 5:3-10) Gapuna, babaen iti panangiyaplikar kadagiti intay naadal manipud panagad-adal iti Biblia, ipakpakitatayo “ti sirib a naggaput’ ngato” a mangted kadatayo iti ragsak a di mabalin nga ipaay amin dagiti kinabaknang iti lubong.

Ngem, laglagipenyo pay met, a kuna ti Proverbio 3:16: “Ti kaatiddog dagiti al-aldaw adda iti imana a kannawan.” Daytoy maawatan a tuktukoyenna ti kannawan ti pannalaknib, ti ima a sisasagana a tumulong ken mangsalwad iti maysa a tao kadagiti panawen a napeggad. Kadagitoy nga al-aldaw adu dagiti nagbibiag a nalulok, iti seksual nga imoralidad, panangabuso ti droga, ken dadduma pay. Awan duadua a nabasayon ti AIDS (Acquired Immune Deficiency Syndrome) ti naikawing kadagiti kakasta nga ar-aramid. Manipud iti napaliiwyon, naragsak aya a pudpudno dagiti tattao nga agar-aramid kadagitoy a bambanag? Wenno nangyegda kadagiti bagbagida ken kadagiti dadduma ti dakkel a ladingit ken panagpaut-ot agraman pay ni patay?

Maisupadi iti dayta, ti panangiyaplikar ti nainsiriban a balakad manipud Sao ti Dios ti kanayon nga adda iti “ima a kannawan” a mangsalaknib kadatayo manipud kadagita a peggad. Gapuna, ti sirib paatiddogenna ti biagtayo, salwadannatayo manipud iti kurso a mangiturong iti nasapa nga ipapatay. Gapuna, ti nadiosan a sirib ti sigurado a mamagbalin iti agdama a biagtayo nga ad-adda a naragsak.

Magna a Sisisirib Itan

Ti pammaneknek nga adda iti aglawlawtayo ipakitana nga agbibiagtayon kadagiti “maudi nga al-aldaw” daytoy a sistema dagiti bambanag. (2 Timoteo 3:1-5) Gapuna, nasken nga agbantaytayo a maibusor iti pannakatnag iti espiritu ti lubong. Ti kasta nga espiritu ipagpaganetgetna dagiti material a bambanag babaen iti panangawisna kadagiti inaagum a tartarigagay. Maysa a pammabasol a naipasango maipapan ken ni Job, a maysa a matalek a tao iti rekord ti Biblia, a ta daytoy a tao agserserbi iti Dios gapu kadagiti inaagum a pagimbagan, maipaay kadagiti material a gunggona. (Job 1:9-11) Sipupudno aya a maiyeg met dayta a pammabasol a maibusor kadatayo?

No sumungbattayo iti saan, mabalin a sibaballigi a lablabanantayo ti materialismo itatta. Ngem daytoy a peggad, ti materialismo, ti maysa kadagiti kasisikapan a mabalin a sanguentayo. Kuna ni Jesu-Kristo a “ti panagagawa iti daytoy a sistema dagiti bambanag ken ti panangallilaw dagiti kinabaknang leppesenda ti sao.” (Mateo 13:22) Nalawag, masapul nga agbantaytayo a kanayon a maibusor “iti panangallilaw dagiti kinabaknang,” ta dagitoy saanda a pudpudno a napateg.

Kasapulan a palpalagipantayo a kanayon ti bagbagitayo iti bassit laeng a pateg dagiti material a bambanag. Kuna ti Sao ti Dios: “Ti sanikua ti nabaknang a tao isu ti nabileg nga ilina, ket kas natayag a bakud iti panangipagarupna.” (Proverbio 18:11) Wen, ti kinatalged nga ipaay dagiti kinabaknang ket ar-arapaap laeng, maysa a panangallilaw. Saan a gapu ta dagiti material a bambanag a mismo ket dakesda. Ti dakes a ta isut’ panangisentrotay ti biagtayo iti aglikmutda imbes nga iti pananggun-od iti anamong ti Dios. Ni Jesus, a mabigbigbig kas maysa kadagiti kasiriban a mannursuro iti historia, silalawag a nagkuna: “Ti biag ti tao saan nga adda iti kaadu dagiti gameng a kupkupikupanna.”​—Lucas 12:15.

Ngarud surotentayo koma ti maysa a kurso ti panagbiag a mamagbalin kadatayo a “nabaknang iti Dios.” (Lucas 12:21) Awanen ti napatpateg pay ngem ti naanamongan a takder iti Namarsua. Amin a panagreggetda a mangtaginayon iti dayta ti makatulong iti ‘panangurnongtayo iti maysa a nasayaat a pamunganayan a maisagana iti aldaw a mapasungad, tapno magun-odantayo ti biag a pudno.’​—1 Timoteo 6:19.