Malagipyo Pay Aya?
Nakitayo aya a dagiti nabiit pay a ruar iti Ti Pagwanawanan ket praktikal ti pategda? Ngarud kitaenyo no malagipyo pay dagiti sumaganad:
◻ Ania’ kayat a sawen ti mamarkaan a maipaay iti pannakailasat babaen iti propetiko a lalaki nga addaan iti pagtinteruan ti mannurat idiay sirmata ni Ezequiel? (Ezequiel 9:2-6)
Dayta kaipapananna a ti maysa indedikarna ti bagina nga agaramid iti pagayatan ti Dios, nabautisaran kas adalan ni Jesu-Kristo, ken addaan iti kasla Kristo a personalidad.—4/15, panid 11, 12.
◻ Ania dagiti panggep a sinerbian ti padto ti Biblia?
Dagiti padto ket ipakaammoda ti kinapudno maipapan iti Dios, ti pagayatanna, ken dagiti moral a pagalagadanna. Lawlawaganna ti relasion ti tao ken ni Jehova tapno iyegna ti sangatauan a maitunos iti panggepna, a mangiturong dayta iti naan-anay a kaitungpalanna. (Isaias 1:18-20; 2:1-5; 55:8-11)—5/1, panid 5.
◻ Ania a makapapatay a bisin ti nagsaknap iti intero a daga itatta?
Maysa a naespirituan a panagbisin, “iti panagdengngeg ti sasao ni Jehova.” (Amos 8:11)—5/1, panid 10, 11.
◻ Ania “ti panagbuteng ken Jehova”? (Proverbio 1:7)
Isu dayta ti umiso a panagamak a mamagpungtot ken Jehova gapu ta apresiarentayo ti kinamanagayat ken kinaimbagna. Dayta met kaipapananna ti panangbigbig ken ni Jehova kas ti Katan-okan nga Ukom ken ti Mannakabalin-amin, panagtalek a naan-anay kenkuana, ken pananggura iti dakes iti imatangna. (Salmo 2:11; 115:11; Proverbio 8:13)—5/15, panid 28.
◻ Ania a pagannurotan ti naibalabala iti 1 Timoteo 5 maipapan iti panangaywan kadagiti natataengan?
Nupay ibaklay dagiti kamkameng ti pamilia ti kangrunaan a responsabilidad, dagiti parikut dagiti natataengan ket pakaseknan ti intero a kongregasion; rebbeng a maiyurnos a naimbag ti panangaywan; ti kasta a panangaywan wenno panangtaripato ti makedngan laeng kadagiti pudpudno nga addaan pagkasapulan.—6/1, panid 9, 10.
◻ Kadagiti ania nga uppat a kangrunaan a pamay-an a ginugoran ni Jehova ti ilina bayat dagiti napalabas a 69 a tawtawen?
(1) Iti organisasion; (2) pannakiraman iti tay-ak ti ministerio; (3) iti rumangrang-ay a lawag ti kinapudno; (4) panangparmek kadagiti narugit nga ar-aramid.—6/15, panid 17-20.
◻ Iti ania a dua a pamay-an a nausar ti sao nga “agtakder” maipapan ken ni Miguel idiay Daniel 12:1?
Maisalsalaysay a ni Miguel ket kas “agtakder a maipaay kadagiti annak ti ilim.” Ni Kristo Jesus ti mangwatwatwat iti autoridadna iti daytoy a pamay-an iti ilina ditoy daga nanipud pay 1914 idi isut’ naitrono kas ti agturturayen nga Ari ti Pagarian ti Dios. Kuna pay met ni Daniel: “Ket iti dayta a panawen agtakderto ni Miguel.” Kaipapananna daytoy ti iseserrek ti panagturayna iti maysa a baro a paset inton isut’ agtignay pay iti naisalsalumina a pamay-an a maipaay iti ili ni Daniel. Iti kasta, saandanto a maikisap babaen kadagiti natauan a gobierno “iti panawen ti panungpalan” a maipaay iti ari iti amianan ken iti ari iti abagatan. (Daniel 11:40-45)—7/1, panid 18, 19.