Malagipyo Pay Kadi?

Nagustuanyo met la kadi a binasa dagiti nabiit pay a ruar Ti Pagwanawanan? Bueno, padasenyo a sungbatan dagiti sumaganad a saludsod:

• Kasano a ti “pannakabael nga agpanunot” napaneknekan a mangsaluad? (Proverbio 1:4)

Mapagbalinnatayo nga alerto kadagiti naespirituan a peggad ken tignayennatayo nga agplano iti nainsiriban a tignay, kas iti panangliklik kadagiti seksual a sulisog iti pagtrabahuan. Tulongannatayo a mangbigbig nga imperpekto dagiti pada a Kristiano, a mangtignay kadatayo a di agdarasudos no makaaramidda iti kamali. Matulongannatayo met a mangliklik kadagiti materialistiko a pananggargari a mabalin a mamagpeggad iti espiritualidadtayo.​—8/15, panid 21-4.

• Kasano nga agbalin a nasayaat a kaarruba ti maysa a tao?

Ti dua a pamay-an tapno agbalin a nasayaat a kaarruba ket babaen ti panagbalin a naparabur ken manangapresiar nga umawat. Nagpateg ti agbalin a nasayaat a kaarruba no dumteng ti pakarigatan. Ikagumaan dagiti Saksi ni Jehova nga agbalin a nasayaat a kaarruba babaen ti panangballaagda iti sabasabali maipapan iti asidegen a pasamak, ti pananggibus ti Dios iti kinadakes.​—9/1, panid 4-7.

• Sigun iti Biblia, siasino dagiti pudno a santo, ken kasano a tulonganda ti sangatauan?

Pudno a sasanto ti amin a nagkauna a Kristiano. Ti Dios ti nangaramid kadakuada a santo, saan a dagiti tao wenno organisasion. (Roma 1:7) Apaman a mapagungarda iti biag idiay langit, dagiti santo makiramanda ken Kristo iti panangbendision kadagiti matalek ditoy daga. (Efeso 1:18-21)​—9/15, panid 5-7.

• Ania ti mabalin a masursuro dagiti Kristiano kadagiti atletiko a pasalip iti nagkauna a Grecia?

Dagiti surat da apostol Pedro ken Pablo ket naglaon kadagiti ilustrasion a naibatay wenno mangipasimudaag kadagiti nagkauna a pasalip. (1 Corinto 9:26; 1 Timoteo 4:7; 2 Timoteo 2:5; 1 Pedro 5:10) Para iti maysa a nagkauna nga atleta, napateg ti maaddaan iti nalaing a manangsanay, panagteppel, ken umiso a panangikagumaan. Pudno met dayta no iti panangikagumaan dagiti Kristiano ita maipaay iti espiritualidadda.​—10/1, panid 28-31.

• Ania dagiti karit ken gunggona iti panangpadakkel kadagiti annak iti sabali a pagilian?

Adu nga annak ti nalaklaka a makasursuro iti baro a lenguahe ngem kadagiti nagannakda, a mabalin a marigatan a mangtarus iti panagpampanunot ken tigtignay dagiti annakda. Ken mabalin a saan a nalaka a matarusan dagiti annak dagiti sursuro iti Biblia no mausar ti lenguahe dagiti nagannakda. Kaskasdi, mabalin a mapabileg ti singgalut ti pamilia bayat nga isuro dagiti nagannak ti lenguaheda kadagiti annakda, iti kasta, masursuro dagitoy ti dua a lenguahe ken mariknada a pasetda iti dua a kultura.​—10/15, panid 22-6.

• Apay a napateg a sursuruen ti agpadispensar?

Masansan a ti napasnek a panagpadispensar ti maysa a pamay-an tapno maisubli ti nadadael a relasion. Mangipaay ti Biblia kadagiti pagarigan maipapan iti kinaepektibo ti panagpadispensar. (1 Samuel 25:2-35; Aramid 23:1-5) Masansan a no di nagkinnaawatan ti dua a tao, agpadada a nagbiddut. Gapuna, agpadada a masapul a mangbigbig iti kamalida ken agpadispensar iti maysa ken maysa.​—11/1, panid 4-7.

• Apay a dakes ti panagsugal, uray bassit laeng ti pusta?

Mangituggod ti panagsugal iti panagpasindayaw, mannakikompetensia a kababalin, ken kinaagum, a kondenaren ti Biblia. (1 Corinto 6:9, 10) Adu a mannugal ti nangrugi idi ubingda pay babaen ti panagpustada iti bassit a kantidad.​—11/1, panid 31.

• Yantangay naisurat iti Griego ti adu a libro ti Biblia, apay a naipatarus ti Biblia iti Griego, ken ania dagiti resultana?

Dakkel ti nakaidumaan ti moderno a Griego iti Griego ti Septuagint a patarus ti Hebreo a Kasuratan ken iti Kristiano a Griego a Kasuratan. Kadagiti naglabas a siglo, adu ti panangikagumaan a mangipatarus iti paset wenno intero a Biblia iti moderno a Griego. Ita, adda agarup 30 a patarus ti Biblia, intero man wenno pasetna, a nalaka a matarusan dagiti ordinario a Griego. Ti maysa a nalatak isu ti Baro a Lubong a Patarus ti Nasantuan a Kasuratan, a naipablaak idi 1997.​—11/15, panid 26-9.

• Apay a saan a naikalikagum kadagiti Kristiano ti apagkapullo?

Iti sidong ti Linteg a naited iti nagkauna nga Israel, nakiddaw ti apagkapullo tapno masuportaran ti tribu ni Levi ken dagiti agkasapulan. (Levitico 27:30; Deuteronomio 14:28, 29) Ti sakripisio nga ipapatay ni Jesus winaswasna ti Linteg a pakaibilangan ti panangikalikagum iti apagkapullo. (Efeso 2:13-15) Iti nagkauna a kongregasion, mangted ti tunggal Kristiano sigun iti kabaelanna ken iti inkeddeng ti pusona. (2 Corinto 9:5, 7)​—12/1, panid 4-6.

• Ti kadi Apocalipsis 20:8 kaipapananna nga iti maudi a suot, mayaw-awan ni Satanas ti adu unay a tao?

Ti teksto kunana a ti kaadu dagidiay mayaw-awan ket “kas iti darat ti baybay.” Iti Biblia, dayta nga ebkas masansan a kaipapananna ti di masierto a bilang, a dina isingasing nga adu unay. Ti bin-i ni Abraham, a nagbalin a “kas kadagiti binukel ti darat nga adda iti aplaya,” ket naammuan idi agangay a 144,000 a tattao, malaksid pay ken Jesu-Kristo. (Genesis 22:17; Apocalipsis 14:1-4)​—12/1, panid 29.