Siasino ti Mapabasol?

Adu ti mangpabasol iti Dios gapu kadagiti pakarigatanda. Kuna ti maysa a proverbio iti Biblia: “Ti mismo a kinamaag ti tao ti mangrakrak iti biagna, ket kalpasanna marurod iti Apo.” (Proverbio 19:3, The New English Bible) Nupay kasta, ti panangipabasol iti Dios kadagiti parikut ti tao ket kas ti panangipabasol iti managpartuat ti kotse kadagiti nasaknap nga aksidente dagiti nabartek nga agmammaneho.

Impaayan ti Dios ti sangatauan iti nagpateg a panangiwanwan iti Saona, ti Biblia. Babaen ti panangadal iti daytoy nadibinuan a libraria ken panagbiag a mayannurot kadagiti linteg ken prinsipio a linaonna, maliklikantayo dagiti adu a parikut iti biag. Iti kasupadina, dakes ti pagbanagan ti di panagpaidalan iti Dios. Kas pagarigan, dagiti aglablabes iti pannangan, mannigarilio, mammartek, wenno agaramid iti imoralidad masansan nga agsagabada kadagiti nakaam-amak a parikut iti salun-at. (Lucas 21:34; 1 Corinto 6:18, 2 Corinto 7:1) Insurat ni Kristiano nga apostol Pablo: “Aniaman nga imulmula ti maysa a tao, daytoyto met ti apitenna; agsipud ta ti agimulmula a maipaay iti lasagna apitennanto ti panagrupsa manipud iti lasagna, ngem ti agimulmula maipaay iti espiritu apitennanto ti agnanayon a biag manipud espiritu.”​—Galacia 6:7, 8.

Anian a nasaysayaat ti agbiag maitunos kadagiti linteg ken prinsipio ti Dios! No aramidentayo ti kasta, mapasarantayto ti kinapudno ti kari ti Dios nga insaona babaen ken mammadto nga Isaias: “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko! Iti kasta ti talnam kas koma iti maysa a karayan, ken ti kinalintegmo kas la koma daldalluyon ti baybay.”​—Isaias 48:17, 18.