No Natay Kaipapananna a Natayen
“Ti maysa a nabiag nga aso naim-imbag ngem iti maysa a natay a leon. Ta dagiti sibibiag ammoda a mataydanto: ngem dagiti natay dida ammo ti aniaman, isuda awananda iti gunggona; ta ti pakalaglagipan kadakuada nalipatanen.”—Eclesiastes 9:4, 5.
SAAN a nalawag ti pannakaammo ti adu a tattao maipapan iti kararua nga agtultuloy nga agbiag kalpasan ti ipapatay wenno aglasat iti siklo ti reinkarnasion. Patien pay ketdi dagiti dadduma a makapagbiag manen ti maysa kalpasan a natay. Nabiit pay a napagsaludsodan ni Thomas Lynch, maysa a mortician, maipapan iti kapanunotanna iti panagbiag kalpasan ti ipapatay. Kinunana: “Dagidiay tattao a nakakita iti nakapatpatak a silaw ken dadduma pay, saanda a nagungar—naibilangda laeng a natay agsipud ta ditay kabaelan nga ammuen dagiti pagilasinan iti kasasaad ti nabiag. Agsipud ta no ‘nataykan,’ saankan nga agbiag manen.”—The New York Times Magazine.
Rinibun a tawen nga imbaga ti Biblia ti kinapudno. “Ti maysa a nabiag nga aso naim-imbag ngem iti maysa a natay a leon. Ta dagiti sibibiag ammoda a mataydanto: ngem dagiti natay dida ammo ti aniaman, isuda awananda iti gunggona; ta ti pakalaglagipan kadakuada nalipatanen.” (Eclesiastes 9:4, 5) Ti apagbiit a panangpasiar iti aniaman a kadaanan a pagitaneman ti mangpasingked iti dayta a kinapudno.
Kaipapanan kadi dayta nga awan a pulosen ti namnama dagiti natay? Sigurado nga awan ti ipaay ti Biblia a pagibasaran iti panamati iti di matay a kararua nga agbiag latta kalpasan ti ipapatay. (Genesis 2:7; Ezequiel 18:4, 20) Nupay kasta, inkasaba ni Jesu-Kristo ti panagungar iti biag idiay naisublin a paraiso a daga. Ti Judio a pasurotna a ni Marta, a kabsatna ti nabiit pay idi a natay a ni Lazaro, pinatina ti panagungar, ta kinunana maipapan ken ni Lazaro: “Ammok a bumangonto inton panagungar iti kamaudianan nga aldaw.” (Juan 11:24) Gapu iti daytoy, simmungbat ni Jesus: “Siak ti panagungar ken ti biag. Ti mangalagad iti pammati kaniak, uray no matay, agbiagto; ket tunggal maysa a sibibiag ken alagadenna ti pammati kaniak saanto a pulos matay. Mamatika kadi iti daytoy?” (Juan 11:25, 26) Sakbayna, kinunana: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuardanto, dagidiay nagaramid kadagiti naimbag a bambanag iti panagungar iti biag, dagidiay nangyugali kadagiti nakadakdakes a bambanag iti panagungar iti pannakaukom.” Ngem usigem ta awan ti nadakamat ni Jesus a di matay a kararua!—Juan 5:28, 29; Lucas 23:43.
[Blurb iti panid 31]
“‘No nataykan,’ saankan nga agbiag manen.” Thomas Lynch, maysa a mortician