Tungtungpalenyo Kadi ti Naan-anay a Rebbengenyo iti Dios?
“Ti Dios iyegnanto ti tunggal aramid iti pannakaukom, agraman tunggal nailemmeng a banag, no isu naimbag, wenno dakes.”—ECLESIASTES 12:14.
1. Aniada a probision ti impaay ni Jehova iti ilina?
SARANAYEN ni Jehova dagidiay silalagip kenkuana kas Naindaklan a Namarsua kadakuada. Ti naipaltiing a Saona ti mangted iti pannakaammo a kasapulanda tapno naan-anay a makaay-ayoda kenkuana. Ti nasantuan nga espiritu ti Dios idalanna ida a mangaramid iti pagayatanna ken “agbunga iti tunggal naimbag nga aramid.” (Colosas 1:9,10) Maysa pay, mangipapaay ni Jehova iti naespirituan a taraon ken nateokratikuan a panangiwanwan babaen ti “matalek ken masirib nga adipen.” (Mateo 24:45-47) No kasta, iti adu a pamay-an, bembendisionan ni Jehova a Dios ti ilina bayat nga agserserbida kenkuana ken itungtungpalda ti nagpateg a trabaho a panangikasaba iti naimbag a damag ti Pagarian.—Marcos 13:10.
2. Maipapan iti panagserbi ken Jehova, aniada a saludsod ti tumaud?
2 Naragsak dagiti pudno a Kristiano a naagawa a mangipapaay iti sagrado a panagserbi ken Jehova. Ngem mabalin a maupay dagiti dadduma ket pagarupenda nga awan serserbi ti panagbannogda. No dadduma, kas pagarigan, mabalin a panunoten dagiti dedikado a Kristiano no talaga met laeng a makagunggona ti napasnek a panagreggetda. No utobenna ti panagadal ti pamilia ken dadduma pay nga aktibidad, ti maysa nga ulo ti pamilia mabalin a maisaludsodna dagitoy: ‘Talaga kadi a maragsakan ni Jehova iti ar-aramidenmi? Tungtungpalenmi kadi ti naan-anay a rebbengenmi iti Dios?’ Makatulong dagiti nainsiriban a sasao ti managummong a mangsungbat kadagiti kasta a saludsod.
Ubbaw Kadi Amin a Banag?
3. Maitunos iti Eclesiastes 12:8, ania ti nakaro unay a kinaubbaw?
3 Mabalin a pagarupen ti dadduma a dagiti sasao ti masirib a tao ket makaupay iti asinoman—agtutubo wenno nataengan. “ ‘Ti kadakkelan a kinaubbbaw!’ kinuna ti managummong, ‘Isuamin ket kinaubbaw.’” (Eclesiastes 12:8,) Kinapudnona, nakaro unay a kinaubbaw ti di panangikankano ti maysa a tao iti Naindaklan a Namarsua bayat ti kinaagtutubona, nga aglaklakay lattan a di agserserbi kenkuana, ket ti laeng kinalakayna ti maipakitana a gapuananna. Kinaubbaw wenno awan serserbi ti amin para iti kasta a tao, uray no matay a nabaknang ken nalatak iti daytoy lubong nga iturturayan ti nadangkes a ni Satanas a Diablo.—1 Juan 5:19.
4. Apay a maikuna a saan nga amin ket kinaubbaw?
4 Saan nga amin ket kinaubbaw kadagidiay agurnong kadagiti gameng sadi langit kas matalek nga ad-adipen ni Jehova. (Mateo 6:19, 20) Adu ti aramidenda iti makagunggona a trabaho ti Apo, ket sigurado a saan nga ubbaw dagiti kasta nga aramid. (1 Corinto 15:58) Ngem no dedikadotayo a Kristiano, kanayon kadi nga okupadotayo iti trabaho nga inted ti Dios kadatayo kadagitoy maudi nga al-aldaw? (2 Timoteo 3:1) Wenno ti kadi estilo ti panagbiagtayo ket bassit laeng ti nakaidumaanna iti kabibiag ti kaaduan kadagiti kaarrubatayo? Mabalin a kameng ida ti nagduduma a relihion ken relihiosoda unay, a regular nga addada kadagiti lugar a pagdayawanda ken ikagkagumaanda a tungpalen dagiti iparebbeng ti relihionda. Siempre, saanda nga iwarwaragawag ti mensahe ti Pagarian. Awan umiso a pannakaammoda a daytoyen ti “panawen ti panungpalan” ket saanda a mautob ti kinaganat ti panawen a pagbibiagantayo.—Daniel 12:4.
5. No dagiti gagangay nga aramid iti biag ti kangrunaanen a pakaseknantayo, ania koma ti aramidentayo?
5 Maipapan iti napeggad a tiempotayo, kinuna ni Jesu-Kristo: “Kas iti kaaldawan idi ni Noe, kastanto ti kaadda ti Anak ti tao. Ta kas kadakuada idi kadagidiay nga al-aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a ni Noe simrek iti daong; ket dida nangikankano agingga a ti layus immay ket inyanudna amin ida, kastanto ti kaadda ti Anak ti tao.” (Mateo 24:37-39) No saan a nalabes, awan pagdaksanna ti pannangan ken panaginum, ket ti panagasawa maysa nga urnos a naggapu iti Dios a mismo. (Genesis 2:20-24) Ngem no mautobtayo a dagiti gagangay nga aramid iti biag ti kangrunaanen a pakaseknantayo, apay a ditay ikararag daytoy a banag? Matulongannatayo ni Jehova a mangyun-una kadagiti banag nga agpaay iti Pagarian, mangaramid iti umiso, ken mangtungpal iti rebbengentayo kenkuana.—Mateo 6:33; Roma 12:12; 2 Corinto 13:7.
Dedikasion ken ti Rebbengentayo iti Dios
6. Iti ania a napateg a pamay-an a dagiti dadduma a bautisado nga indibidual saanda a tungtungpalen ti rebbengenda iti Dios?
6 Nasken nga agkararag a sipapasnek dagiti dadduma a bautisado a Kristiano gapu ta dida ar-aramiden dagiti inawatda a rebbengen kas ministro idi nagdedikarda iti Dios. Nasurok a 300,000 ti mababautisaran kada tawen iti sumagmamano a tawen itan, ngem saan a kasta ti kaadu ti mainaynayon iti dagup ti bilang dagiti aktibo a Saksi ni Jehova. Adda dagiti nagbalin nga agibumbunannag iti Pagarian a simmardengen a mangiwaragawag iti naimbag a damag. Ngem sakbay a mabautisaran ti asinoman, masapul a maaddaan iti nabunga a pannakipaset iti Nakristianuan a ministerio. No kasta, sipapanunotda iti annongen nga inted ni Jesus kadagiti amin a pasurotna: “Inkayo . . . ket mangaramidkayo kadagiti adalan a tattao iti isuamin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19,20) Malaksid no talaga a limitadon ti maaramidanda gapu iti salun-atda wenno dadduma pay a makagapu a saanda a malapdan, dagiti bautisado nga indibidual a saanen nga agserserbi kas aktibo a Saksi ti Dios ken ni Kristo ket saanda a tungtungpalen ti naan-anay a rebbengenda iti Naindaklan a Namarsua kadatayo.—Isaias 43:10-12.
7. Apay a rumbeng a regular nga agtataripnongtayo tapno agdaydayaw?
7 Ti nagkauna nga Israel ket maysa a nasion a dedikado iti Dios. Iti sidong ti tulag ti Linteg, addaan dagiti umili kadagiti rebbengen ken ni Jehova. Kas pagarigan, amin a lallaki masapul nga aguummongda maipaay iti tallo a tinawen a piesta, ket ‘maipusay’ wenno mapapatay ti lalaki a sipapakinakem a di agngilin iti Paskua. (Numeros 9:13; Levitico 23:1-43; Deuteronomio 16:16) Tapno matungpalda ti rebbengenda iti Dios kas dedikado nga ilina, masapul nga agtataripnong dagiti Israelita tapno agdaydayawda. (Deuteronomio 31:10-13) Awan a pulos ti kastoy a sagudayen ti Linteg, ‘Aramidenyo daytoy no kombeniente kadakayo.’ Kadagidiay dedikado ita ken Jehova, awan duadua nga ipaganetget daytoy ti kinapateg ti sasao ni Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.” (Hebreo 10:24, 25) Wen, ti regular a pannakitaripnong kadagiti kapammatian ket paset ti rebbengen ti maysa a dedikado a Kristiano iti Dios.
Tingitingenyo a Naimbag Dagiti Desisionyo!
8. Apay a sipapasnek nga utoben koma ti maysa a dedikado nga agtutubo ti sagrado a panagserbina?
8 Nalabit maysaka nga agtutubo a dedikado ken Jehova. Nabaknang a bendision ti sagrapem no iyun-unam iti biagmo dagiti banag a maipaay iti Pagarian. (Proverbio 10:22) Buyogen ti kararag ken naannad a panagplano, mabalin a kabaelam ti agserbi iti amin a tiempo ita ta agtutuboka pay. Maysa dayta a nasayaat a pamay-an tapno maipakitam a silalagipka iti Naindaklan a Namarsua kenka. Ta no saan, mabalin a dagiti material a pagimbagan ti kangrunaan a pakausaran ti panawenmo ken pakakumikomam. Kas iti kaaduan a tattao, mabalin a nasapaka a mangasawa ket umutangka tapno magun-odmo dagiti material a banag. Mabalin a maibus ti panawen ken pigsam iti karera a pagbaknangan. No addanton annakmo, adda dagiti responsabilidad iti pamilia a nasken nga ibaklaymo iti adu a dekada. (1 Timoteo 5:8) Mabalin a saanmo a nalipatan ti Naindaklan a Namarsua kenka, ngem nainsiriban a panunotem koma a ti antemano a panagplano, wenno ti di panagplano, ti mabalin a mangikeddeng iti panagbiagmo inton nataengankan. Inton lumakayka, mabalin a taliawem ti napalabas ket mautobmo a ginundawayam la koman ti nagserbi a naan-anay iti Naindaklan a Namarsua kadatayo idi kabambannuagam pay laeng. Apay a dimo ipasnek a panunoten ita met laeng dagiti mabalinmo nga aramiden tapno mapnekka iti sagrado a panagserbim ken Jehova ita ta agtutuboka pay?
9. Ania ti mabalin nga aramiden ti maysa a lumakayen ken dati nga addaan iti nadagsen a responsabilidad iti kongregasion?
9 Usigenyo ti sabali pay a kasasaad—ti kasasaad ti maysa a lalaki a dati nga agserserbi kas pastor ti “arban ti Dios.” (1 Pedro 5:2,3) Adda rason a sibubulos nga inlusulosna dagiti kasta a pribilehio. Pudno, lumakayen ket mabalin a narigrigat itan a makapagserbi iti Dios. Ngem kabaelanna ngata manen a ragpaten dagiti nateokratikuan a pribilehio? Anian a bendision ti maipaay ti kasta a tao kadagiti sabsabali no makaibaklay iti ad-adu a responsabilidad iti kongregasion! Ket tangay awan ti agbiag a maipaay iti bagina laeng, maragsakan dagiti gagayyem ken patpatgenna no maparang-ayna ti panagserbina, a pakaidayawan ti Dios. (Roma 14:7,8) Kangrunaan iti amin, dinto lipatan ni Jehova dagiti aramid ti asinoman nga agserserbi kenkuana. (Hebreo 6:10-12) No kasta, ania ti makatulong kadatayo a manglaglagip iti Naindaklan a Namarsua kadatayo?
No Ania ti Tumulong Kadatayo a Manglaglagip iti Naindaklan a Namarsua Kadatayo
10. Apay a maikari unay ti managummong a mamagbaga maipapan iti pananglaglagip iti Naindaklan a Namarsua kadatayo?
10 Maikari unay ti managummong a mamagbaga maipapan iti pananglaglagip iti Naindaklan a Namarsua kadatayo. Impangag idi ni Jehova dagiti naimpusuan a kararagna babaen ti panangitedna kenkuana iti naisangsangayan a sirib. (1 Ar-ari 3:6-12) Inutob a naimbag ni Solomon ti amin nga aramid ti tao. Kanayonanna, isu ket pinaltiingan ti Dios a mangisurat kadagiti natakuatanna a pakagunggonaan dagiti sabsabali. Insuratna: “Ket maysa pay, agsipud ta nagbalin a masirib ti managummong, insursurona met ti pannakaammo kadagiti umili, ket nagutob ken nagsukimat a naimbag, tapno maurnosna ti adu a proverbio. Inkagumaan ti managummong ti nangbirok kadagiti makaay-ayo a sasao ken iti pannakaisurat ti umiso a sasao ti kinapudno.”—Eclesiastes 12:9,10.
11. Apay nga awatentay koma ti nainsiriban a pammagbaga ni Solomon?
11 Kastoy ti pannakaipatarus dagitoy a sasao iti Griego a Septuagint: “Ket maysa pay, gapu ta masirib ti manangaskasaba, gapu ta insurona ti sirib iti sangatauan; tapno makasarak koma ti lapayag iti makaay-ayo manipud kadagiti pangngarig, nagsukimat a naimbag ti manangaskasaba tapno makasarak kadagiti makaay-ayo a sasao ken iti pannakaisurat ti kinalinteg—dagiti sasao ti kinapudno.” (The Septuagint Bible, impatarus ni Charles Thomson) Inkagumaan ni Solomon a danonen ti puso dagiti agbasa babaen kadagiti makaay-ayo a sasao ken pudno a makapainteres ken makagunggona a suheto. Tangay impaltiing ti nasantuan nga espiritu dagiti sasaona a masarakan iti Kasuratan, mabalintay nga awaten nga awan panagduadua dagiti natakuatanna ken ti nainsiriban a pammagbagana.—2 Timoteo 3:16, 17.
12. Iti bukodyo a sasao, kasanoyo nga iyebkas ti kinuna ni Solomon a nailanad iti Eclesiastes 12:11, 12?
12 Uray awan pay idi dagiti moderno a pamay-an ti panagimprenta, nawadwad dagiti libro idi tiempo ni Solomon. Kasanotay koma a matmatan dagiti kasta a literatura? Kinunana: “Dagiti sasao ti mamasirib kakasda la kadagiti pagduyok; ken kakasla kadagiti lansa a naipalok a naimbag dagiti sasao dagiti appuen dagiti gimgimong [“dagidiay agur-urnong iti sasao,”] a maited nga aggapu iti maysa a pastor. Ket maysa pay, anakko, mabalakadanka: iti panagaramid kadagiti adu a liblibro awan ti gibusna; ken ti adu nga adal [“napalaus a debosion kadakuada,”] isu ti maysa a bantot ti lasag.”—Eclesiastes 12:11, 12.
13. Kasano a mayarig kadagiti pagduyok ti sasao dagidiay addaan nadiosan a sirib, ken siasino dagiti kakasla “lansa a naipalok a naimbag”?
13 Mayarig kadagiti pagduyok ti sasao dagidiay addaan nadiosan a sirib. Kasano a kasta? Dagdagenda dagiti agbasa wenno agdengngeg nga agbalbaliw maitunos iti nainsiriban a sasao a mabasa wenno mangngegda. Maysa pay, dagidiay makumikom nga ‘agurnong iti sasao,’ wenno pudno a nainsiriban ken makagunggona a pagsasao, ket mayarig kadagiti “lansa a naipalok,” wenno di magaraw. Mabalin a pudno dayta agsipud ta dagiti agkakaimbag a sao dagiti kasta a tattao iyanninawda ti sirib ni Jehova, ket iti kasta, patalgeden ken saluadanda dagiti agbasa wenno agdengngeg. No maysaka a managbuteng-Dios nga ama wenno ina, saan kadi a rebbengna nga ikagumaam nga itukit ti kasta a sirib iti isip ken puso ti anakmo?—Deuteronomio 6:4-9.
14. (a) Ania a kita dagiti libro ti saan a nasayaat nga ipaayan iti “napalaus a debosion”? (b) Ania a literatura ti kangrunaan koma a basaentayo, ken apay?
14 Ngem apay a kinuna ni Solomon a “maysa a bantot ti lasag” no mapalaluan ti maysa a tao ti agadal kadagiti libro? Bueno, no idilig iti Sao ni Jehova, natauan a panagrasrason laeng ti linaon ti nakaad-adu a libro daytoy lubong. Iyanninaw ti kaaduan iti kastoy a panagpampanunot ti panunot ni Satanas a Diablo. (2 Corinto 4:4) Gapuna, bassit laeng ti manayon a pagsayaatan nga itden ti “napalaus a debosion” kadagiti kasta a nailubongan a pagbasaan. Kinapudnona, adu kadagita ti makadangran iti naespirituan a pamay-an. Kas ken Solomon, utobentayo ti ibagbaga ti Sao ti Dios maipapan iti biag. Daytoy ti mangpatibker iti pammatitayo ken ad-adda nga iyadaninatayo ken ni Jehova. Mabalin a mapaksuyantayo no mapalaluantayo ti agbasa iti dadduma a libro wenno gubuayan ti sursuro. Saan a nasayaat ken makadadael iti pammati iti Dios ken kadagiti panggepna dagiti kasta a libro nangruna no produkto dagitoy ti nailubongan a panagrasrason a maikontra iti nadiosan a sirib. No kasta, laglagipentay ngarud a dagiti kasayaatan a libro idi tiempo ni Solomon ken iti tiempotayo ket dagidiay mangyanninaw iti sirib ti “maysa a pastor,” ni Jehova a Dios. Impaayna ti 66 a libro ti Nasantuan a Kasuratan, ket dagitoy koma ti nangnangruna a basaentayo. Ti Biblia ken dagiti makatulong a publikasion ti ‘matalek nga adipen’ tulongannatayo a gumun-od iti “mismo a pannakaammo ti Dios.”—Proverbio 2:1-6.
Ti Naan-anay a Rebbengentayo iti Dios
15. (a) Kasanoyo nga ilawlawag ti sasao ni Solomon maipapan iti “naan-anay a rebbengen ti tao”? (b) Ania ti masapul nga aramidentayo tapno matungpaltayo ti rebbengentayo iti Dios?
15 Kas pananggupgop iti panangutobna kadagiti bambanag, kastoy ti kuna ti managummong a ni Solomon: “Daytoy isu ti pagbanagan ti panggep: amin nangngegan: Agbutengka iti Dios, ket salimetmetam dagiti bilbilinna; ta daytoy isu ti dagup ti rebbeng ti tao [“naan-anay a rebbengen ti tao,” ]. Ta ti Dios iyegnanto ti tunggal aramid iti pannakaukom, agraman tunggal nailemmeng a banag, no isu naimbag, wenno dakes.” (Eclesiastes 12:13, 14) Ti umno a panagbuteng wenno panagraem iti Naindaklan a Namarsua kadatayo salaknibannatayo, ken uray ti pamiliatayo, tapno ditay suroten ti minamaag a wagas ti panagbiag a mabalin a mangyeg iti nakaro a rigat ken ladingit kadatayo ken kadagiti patpatgentayo. Nasin-aw ti umno a panagbuteng iti Dios ken dayta ti punganay ti sirib ken pannakaammo. (Salmo 19:9; Proverbio 1:7) No addaantayo iti nauneg a pannakaawat a naibatay iti naipaltiing a Sao ti Dios ken iyaplikartayo ti balakadna iti amin a banag, matungpaltayo ti “naan-anay a rebbengentayo” iti Dios. Dina kayat a sawen nga ilistatayo dagiti rebbengentayo. Imbes ketdi, ti kasapulan isu ti panagpaiwanwan iti Kasuratan no risutentayo dagiti parikut iti biag ken ti kanayon a panangaramid kadagiti bambanag sigun iti wagas ti Dios.
16. No maipapan iti panangukom, anianto ti aramiden ni Jehova?
16 Laglagipentay koma nga awan ti mailimed iti imatang ti Naindaklan a Namarsua kadatayo. (Proverbio 15:3) “Iyegnanto ti tunggal aramid iti pannakaukom.” Wen, ti Kangatuan ukomennanto amin a banag, agraman dagidiay nailemmeng iti mata ti tao. Ti pananglaglagip iti dayta gutugotennatayo a mangsalimetmet kadagiti bilin ti Dios. Ngem ti kangrunaan koma a pakagutugotantayo ket ti panagayat iti nailangitan nga Amatayo, ta insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Ket tangay nairanta dagiti bilin ti Dios nga agpaay iti manayon a pagimbagantayo, awan duadua a saan laeng nga umiso no di pay ket pudno a nainsiriban ti panangsalimetmet kadagita. Saan daytoy a makapadagsen kadagiti mangay-ayat iti Naindaklan a Namarsua. Kayatda a tungpalen ti rebbengenda kenkuana.
Tungpalenyo ti Naan-anay a Rebbengenyo
17. Ania ti aramidentayo no talaga a kayattayo a tungpalen ti naan-anay a rebbengentayo iti Dios?
17 No masirib ken talaga a kayattayo a tungpalen ti naan-anay a rebbengentayo iti Dios, malaksid iti panangsalimetmet kadagiti bilinna, mabutengtayo a mangaramid iti aniaman a kagurana gapu iti panagraemtayo kenkuana. Pudno a “ti panagbuteng ken Jehova isu ti pangrugian ti kinasirib,” ket dagidiay mangsalimetmet kadagiti bilinna addaanda iti “nasayaat ken nauneg a pannakaawat.” (Salmo 111:10; Proverbio 1:7) Gapuna, agtignaytay koma a nainsiriban ket agtulnogtayo ken Jehova iti amin a banag. Nasken daytoy nangruna ita, ta addan ni Ari Jesu-Kristo, ken asidegen ti aldaw a panangukomna kas Ukom a dinutokan ti Dios.—Mateo 24:3; 25:31, 32.
18. Ania ti ibungana no tungpalentayo ti naan-anay a rebbengentayo ken ni Jehova a Dios?
18 Suksukimaten itan ti Dios ti tunggal maysa kadatayo. Agduyostayo kadi kadagiti naespirituan a banag, wenno impalubostay kadi a pakapsuten dagiti nailubongan nga impluensia ti relasiontayo iti Dios? (1 Corinto 2:10-16; 1 Juan 2:15-17) Agtutubo man wenno nataengan, aramidentayo ti amin a kabaelantayo a mangay-ayo iti Naindaklan a Namarsua kadatayo. No agtulnogtayo ken ni Jehova ken tungpalentayo dagiti bilinna, iwaksitayo dagiti ubbaw a banag ti daan a lubong nga aglabas. Iti kasta mainanamatayo ti agbiag nga agnanayon iti baro a sistema ti bambanag nga inkari ti Dios. (2 Pedro 3:13) Anian a naindaklan a namnama daytoy para kadagidiay mangtungtungpal iti naan-anay a rebbengenda iti Dios!
Kasanoyo a Sungbatan?
◻ Apay a maikunayo a saan nga amin ket kinaubbaw?
◻ Apay a sipapasnek nga utoben koma ti maysa nga agtutubo a Kristiano ti panagserbina iti Dios?
◻ Ania a kita dagiti libro ti saan a makagunggona nga ipaayan iti “napalaus a debosion”?
◻ Ania ti “naan-anay a rebbengen ti tao”?
[Ladawan iti panid 20]
Saan nga amin ket kinaubbaw kadagidiay agserserbi ken Jehova
[Ladawan iti panid 23]
Saan a kas iti adu a libro daytoy a lubong, makapabang-ar ken makagunggona ti Sao ti Dios