Asino a Pudpudno dagiti Nakatalaw?

“MANAGTALAW manipud iti kinapudno.” Kasta ti imbaga ti maysa a kabagyan idi ti maysa nga agtutubo a ministro immakar idiay South Pacific tapno makiraman iti trabaho ti kinamisionero. Ket adu ti makiraman iti daytoy a panagrikna. Maysa a komentarista ti radio idiay New Zealand, kas pangarigan, ti nabiit pay a nangisingasing a no dagiti ekonomiko a kasasaad kumapuyda, ti dakkel a bilang dagiti tattao ti agturong iti panamati iti Dios kas maysa a langa iti escapisma wenno managtalaw.

Ngem pudno aya a dagidiay mangipapaay kadagiti biagda iti panangsursurot kadagiti naespirituan nga intereses ti makunkuna nga escapist wenno dagiti nagtalaw? Sigun ken ni Jesu-Kristo ket saan. Saanna a minatmatan ti panamati iti Dios kas maysa nga arapaap, imbento, wenno bunga laeng ti kapanunotan. Idiay Juan 7:28 kunana: “Saanak a naggapu kaniak met laeng, ngem ti nangibaon kaniak napudno.”

Iti kaso ni Jesus, nupay kasta, ti panamati iti Dios ti di nangapektar kenkuana iti paspasaray laeng a pamay-an. Isut’ natignay a mangipaay ti biagna iti Dios, a kunkunana: “Adtoy! Umayak . . . tapno aramidek, O Dios, ti pagayatam.” (Hebreo 10:7) Dagiti pudno a Kristiano itatta saanda met a mapilpilit. Kas panangiyilustrar, amadenyo ti balakad nga insurat ni Pablo ken Timoteo, maysa a prominente a panglakayen iti umuna-siglo a kongregasion. Ammo ni Pablo a dadduma nga adda iti kongregasion addaanda iti kalalainganna a material a kinabaknang. Ngem gapu ta ti pammatida naibatay iti kinapudno, matignayda a mangusar kadagitoy a kinabaknangda. Kuna ni Pablo: “Ibagam kadagidiay nabaknang iti daytoy agdama a lubong a dida koma agtangtangsit kadagiti dadduma, ket dida met ikabkabil ti dagsen ti panagtalekda iti aglabas a pannakabalin ti kinabaknang no di ket iti sibibiag a Dios, isu a sipaparabur a mangted kadatayo iti isuamin nga agpaay iti pakaragsakantayo. Ibagam kadakuada nga agaramidda iti naimbag, a nabaknangda koma kadagiti naasi nga ar-aramid, a sisasaganada koma a mangted kadagiti dadduma ken mannakipagriknada kadagiti adda iti pagdukotan. Ti kinatalgedda maisaad koma iti daydiay biag nga umay, tapno makasiguroda iti pannakiraman iti biag a pudpudno ken manayon.”​—1 Timoteo 6:17-19, Phillips.

Gapuna ti Kinakristiano ket saan a maysa a managtalaw manipud kinapudno. Ta ramanen dayta ti panagbalin a lalaki a sumango iti rebbengen. Ti Dios a pagdaydayawantayo ket saan a maysa a bunga iti ar-arapaap; isut’ pudpudno. Ti biag iti panagserbi nga adda kadatayo ket maysa nga addaan iti kaipapanan ken kaitungpalanna. Ti namnamatayo iti masanguanan a gunggona, imbes a daytat’ maysa nga awan pakaibatbatayanna nga ar-arapaap, ti addaan iti natibker a pundasion kadagiti karkari ti Dios a dida mabalin ti agulbod.​—Hebreo 6:18.

Ngem, kasanon, dagidiay mangiliblibak iti pannakasapul iti panagserbi iti Dios ken dagidiay a mangibangon iti panagbiagda iti aglawlaw dagiti namaterialan a sansanikua ken inaagum a karera? Mabalin kadi nga isu dagitoy ti kinapudnona dagiti agtaltalaw?

Inus-usar ti masirib a tao a ni Salomon dagiti sasao a “barengbareng” ken “panagagawa iti angin” a mangilawlawag iti biag a sadiay maipangpangruna dagiti material a bambanag ken nailasagan a ragragsak. Insalaysayna ti pagtungpalanna a kunkunana: “Ket aniaman a kinalikaguman dagiti matak diak impaidam kadakuada. Diak insina ti pusok iti aniaman a rag-o, ta ti pusok nagrag-o gapu iti amin nga ar-aramidko ket daytoy isu idi ti biangko iti amin nga aramidko. Idin kinitak dagiti amin nga ar-aramid a pinataud dagiti im-imak ken ti aramid a nagbannogak nga inaramid, ket, adtoy! isuda amin barengbarengda ken maysa a panagagawa iti angin, ket awan idi ti gunggona iti babaen ti init.”​—Eclesiastes 2:10, 11.

Wen, uray met ti materialistiko a wagas ti panagbiag ti nangyeg iti maysa a kita ti panagragsak. Ngem ti pudpudno a kaitungpalan ken manayon a kinaragsak awan. Ti kasta a biag ket naan-anay a “barengbareng.” Pudno unay, ti sao a Hebreo a maipaay iti “barengbareng” ket addaan iti literal a kaipapanan nga “anges” ket ngarud tuktukoyenna daydiay maysa a banag nga agkurang iti kinatibker ken kinamanayon. Gapuna ti The New English Bible us-usarenna ti sao a “kinaongaong.”

Gapuna daydiay kadi tao nga addaan iti kita ti panagbiag nga inladawan ni Salomon a “barengbareng” adda iti saad a mangikuna a ti maysa a Kristiano ket agtaltalaw nga agturong iti maysa a kasasaad iti ar-arapaap laeng a pannakapnek? Narigat a kasta. Kinapudnona, intuloy nga impakita pay ni apostol Pablo a “ti buya daytoy a lubong ket agbalbaliwen.” (1 Corinto 7:31) Ditoy inyarigna ti nadangkes a lubong kas maysa nga intablado nga adda dagiti kanayon nga agbaliwbaliw a buyana. Daydiay agparang ita a naranga, nakaay-ayat, a nakaskasdaaw pay, ti mabalin nga awanen inton bigat. Dagiti agdama a “managpabuyana” iti agangay masuktandanton kadagiti dadduma. Kaskasdi kadagiti isuamin a patauden ti panagbannogda iti biagda ket awan ti permanente a pategna. Awananda ti pudpudno a namnama a maipaay iti masanguanan.

Daytat’ kas siuumiso a kinuna ni Philip Chesterfield, maysa nga Ingles a katulongan iti korte ken orador idi maika-18 a siglo: “Natarayko aminen dagiti linuluko a panagragragsak, ket naglabasak amin dagitan. Naramanak aminen a ragragsak ti lubong, ket mabalinko ida a tingitingenen iti pudpudno a pategda, a ti kinapudnona ti nakababbabada . . . No pampanunotek dagiti innak nakita, . . . ken dagiti banag a naar-aramidko, narigatko nga allukoyen ti bagik nga amin dayta awan kukuentana a panaggangganat ken panagap-apura iti ragsak ti lubong ti addaan aniaman a pategna.”

Dagiti Kristiano, nupay kasta, ti kas da la ken Abraham nga “inur-urayna ti siudad nga adda pudpudno a pamuonna, a ti mangbalabala ken mangipatakder iti dayta a siudad isu ti Dios.” (Hebreo 11:10) Gapu ta ti pammatida ket sigurado, awan pannakasapul ti panagtalawda no di ket punnuenda dagiti bibiagda kadagiti makapnek nga ar-aramid. Komosta ti panagbiagyo? Dayta kadi ti maysa laeng a panagtalaw, wenno dayta kadi ti sititibker, naibangon iti kinapudno?

[Dagiti Footnote]