Dagiti Managawit iti Lawag—Agpaay Ania a Panggep?
“Inkabilka a maysa a silaw dagiti nasion.”—ARAMID 13:47.
1. Kasanot’ panagtignay ni Apostol Pablo iti bilin idiay Aramid 13:47?
“IMBILIN kadakami ni Jehova, ‘Inkabilka a maysa a silaw dagiti nasion, tapno sika ti pakaisalakanan agingga iti ungto ti daga,’” kinuna ni apostol Pablo. (Aramid 13:47) Saanna la a sinao dayta no di ket nailasinna met ti kinaserioso dayta. Kalpasan ti panagbalinna a Kristiano, impamaysa ni Pablo ti biagna a nangtungpal iti dayta a bilin. (Aramid 26:14-20) Naited met aya dayta a bilin kadatayo? No kasta, apay a napateg dayta iti kaaldawantayo?
Idi ‘Naiddep Dagiti Silaw’ iti Sangatauan
2. (a) Bayat a simrek ti lubong iti tiempo ti panungpalanna, aniat’ napasamak a nangapektar la unay iti naespirituan ken moral a kasasaadna? (b) Aniat’ reaksion ti maysa nga estadista a Briton iti nakitana a mapaspasamak idi Agosto 1914?
2 Sakbay a nayanak ti kaaduan a tao a sibibiag ita, simrek daytoy a lubong iti tiempo ti panungpalanna. Napartak ti panagsasaruno dagiti dadakkel a pasamak. Naigarangugong ditoy daga ni Satanas a Diablo, ti kangrunaan a promotor ti naespirituan ken moral a kinasipnget. (Efeso 6:12; Apocalipsis 12:7-12) Naitapugen ti sangatauan iti umuna a sangalubongan a gubatna. Idi karrugi ti Agosto 1914, idi agparang a siguradon ti gubat, ni Sir Edward Grey, ti sekretario ti estado agpaay kadagiti ar-aramid ti ballasiw-taaw ti Britania, ti sitatakder idiay tawa ti opisinana sadi Londres ket kinunana: “Maid-iddepen dagiti silaw iti intero nga Europa; ditayton makita a masindian manen ida bayat ti panagbiagtayo.”
3. Aniat’ nagapuanan dagiti papangulo ti lubong iti panangikagumaanda a mangparaniag iti masakbayan ti sangatauan?
3 Iti reggetda a maisubli manen dagidiay a pagsilawan, pinagandarda ti Liga de Naciones idi 1920. Ngem agkurkuridemdem dagiti silawna. Idi agpatingga ti maikadua a gubat sangalubongan, pinadas manen dagiti pangulo ti lubong, daytoy a gundaway babaen ti organisasion ti Naciones Unidas. Naminsan manen, nakudrep dagiti silawna. Nupay kasta, gapu kadagiti nabiit pay a pasamak, agsasao dagiti pangulo ti lubong maipapan iti “baro a lubong nga urnos.” Ngem saan a nangyeg ti aniaman a a “baro a lubong” a pinarnuayda iti pudno a talna ken talged. Maisupadi ketdi, ti armado a panagsusuppiat, panagririri dagiti tribo, krimen, kinaawan-panggedan, kinapanglaw, polusion iti aglawlaw, ken saksakit ti agtultuloy a mangdaddadael iti panangtagiragsak ti tao iti biag.
4, 5. (a) Kaano ken kasano nga inabbungotan ti kinasipnget ti natauan a pamilia? (b) Aniat’ kasapulan tapno maluk-atanda?
4 Kinaagpaysona, nabayag sakbay pay ti 1914 a naiddep dagiti silaw iti sangatauan. Napasamak daytan ag-6,000 a tawenen ti napalabas idiay Eden, idi pinili dagiti immuna a nagannaktayo nga aramiden ti bukodda a desision a di inkankano ti naiyebkas a pagayatan ti Dios. Dagiti nasaem a kapadasan ti sangatauan nanipud idin ket basta paspasamak laengen iti sidong ti tuktukoyen ti Biblia kas “ti pannakabalin ti sipnget.” (Colosas 1:13) Iti sidong ti impluensia ni Satanas a Diablo a ti immuna a tao, ni Adan, inraremna ti lubong iti basol; ket manipud ken Adan nagsaknap ti basol ken ipapatay iti sangatauan. (Genesis 3:1-6; Roma 5:12) Gapu itoy napukaw ti sangatauan ti anamong ni Jehova, ti Gubuayan ti lawag ken ti biag.—Salmo 36:9.
5 Ti kakaisuna a pamuspusan a ti silaw malawaganna manen ti asinoman iti sangatauan isu ti pananggun-odda ti anamong ni Jehova a Dios, ti Namarsua iti sangatauan. Ket, “ti abbong a mangabbong kadagiti isuamin nga inilin-ili,” ti pannakailunod gapu iti basol, maikkatton. Kasano a posible daytoy?—Isaias 25:7.
Daydiay Naited “kas Silaw Dagiti Nasion”
6. Aniada a naindaklan a namnama ti intuyang kadatayo ni Jehova babaen ken Jesu-Kristo?
6 Uray idi sakbay a napagtalaw da Adan ken Eva iti Paraiso, impadto ni Jehova ti maysa a “bin-i” a mangispal kadagiti managayat iti kinalinteg. (Genesis 3:15) Kalpasan ti natauan a pannakaiyanak dayta naikari a Bin-i, tinignay ni Jehova ni lakayen a Simeon, idiay templo sadi Jerusalem, a nangipabigbig [iti Bin-i] kas “maysa a silaw a mangikkat ti abbong kadagiti nasion.” (Lucas 2:29-32) Babaen ti pammati iti daton a perpekto a natauan a biag ni Jesus, maluk-atan dagiti tao iti lunod a bunga ti nakaiyanakan a basol. (Juan 3:36) Maitunos iti pagayatan ni Jehova, mabalinda itan a mangnamnama iti biag nga agnanayon iti kinaperpekto kas paset ti nailangitan a Pagarian wenno kas iturayan dayta iti paraiso a daga. Anian a nakaay-ayat a sagana dayta!
7. Apay a dagiti kari idiay Isaias 42:1-4 ken ti umuna-siglo a kaitungpalanda punnuennatayo iti namnama?
7 Ni Jesu-Kristo mismo ti garantia ti kaitungpalan dagitoy naindaklan a namnama. Mainaig iti panangpaimbag ni Jesus kadagiti masakit, inyaplikar ni apostol Mateo kenkuana ti naisurat idiay Isaias 42:1-4. Kunaen dayta a kasuratan iti pasetna: “Adtoy! Ti adipenko, isu a salaknibak! Ti pinilik, a pagay-ayatan toy kararuak! Inkabilko ti espirituk kenkuana. Isu yegnanto ti kinalinteg kadagiti nasnasion.” Ket saan aya a daytoy ti kasapulan ti tattao iti amin a nasion? Ituloy a kunaen ti padto: “Isu saanto nga agikkis, ket dina met ipigsa ti timekna, ket dina met ipangngeg iti kalsada. Ti maysa a runo a naparpar dinanto bungtolen; ket ti maysa a mitsa a sumsumged a silulubed, dinanto iddepen.” Maitunos itoy, saan a nagubsang ni Jesus kadagiti tattao a marigrigatanen. Kinaasianna ida, sinursuruanna ida kadagiti panggep ni Jehova, ken pinaimbagna ida.—Mateo 12:15-21.
8. Iti ania a pamay-an a ni Jehova intedna ni Jesus “kas maysa a tulag kadagiti tattao” ken “kas silaw iti nasnasion”?
8 Ti Nangted itoy a padto sawenna maipapan iti bagina iti Adipenna, ken Jesus, ket kunana: “Siak, ni Jehova, inayabanka iti kinalinteg, ken pinetpetak ta imam. Ken aywanankanto, ken itedkanto a maipaay a maysa a tulag kadagiti tattao, a maipaay a maysa a silaw iti nasnasion, tapno luktam dagiti bulsek a mata, tapno iruarmo dagiti nabalud iti nailet a pagbaludan, ken dagiti agtugtugaw iti nasipnget a pagbaludan iruarmo ida.” (Isaias 42:6, 7) Wen, inted ni Jehova ni Jesu-Kristo kas maysa a tulag, kas maysa a kari a sinapataan. Anian a makaparegta dayta! Nangipakita ni Jesus ti pudno a pannakaseknan iti sangatauan idi adda ditoy daga; intedna pay ti biagna nga agpaay iti sangatauan. Isu daytoy ti nangitalkan ni Jehova ti panagturay iti amin a nasion. Isu met la a tinukoy ni Jehova kas silaw iti nasnasion. Kinuna ni Jesus a mismo: “Siak ti silaw ti lubong.”—Juan 8:12.
9. Apay a di pinagreggetan ni Jesus a pinasayaat daydi agdama a sistema dagiti bambanag?
9 Agpaay ania a panggep a nagserbi ni Jesus kas silaw ti lubong? Sigurado a di agpaay iti aniaman a nailubongan wenno materialistiko a panggep. Dina pinadas a palintegen daydi agdama a napolitikaan a sistema ken dina inawat ti kinaari manipud ken Satanas man, ti agturay ti lubong, wenno manipud kadagiti tattao. (Lucas 4:5-8; Juan 6:15; 14:30) Nangipakita ni Jesus ti dakkel a pannakipagrikna kadagidiay masakit ken binang-aranna ida iti wagas a di naaramidan dagiti sabsabali. Ngem ammona nga awan permanente a bang-ar iti uneg ti sangal ti natauan a kagimongan nga adda iti sidong ti nadiosan a lunod gapu iti nakaiyanakan a basol ken iturturong dagiti di makita a dakes nga espiritu a puersa. Buyogen nadiosan a pannakaawat, insentro ni Jesus ti intero a biagna iti panangaramid iti pagayatan ti Dios.—Hebreo 10:7.
10. Kadagiti ania a pamay-an ken agpaay ania a panggep a nagserbi ni Jesus kas silaw ti lubong?
10 Kadagiti ania a wagas ken agpaay ania a panggep, ngarud, a nagserbi ni Jesus kas silaw ti lubong? Impamaysana ti biagna iti panangikaskasaba ti naimbag a damag ti Pagarian ti Dios. (Lucas 4:43; Juan 18:37) Babaen ti panangpaneknekna ti kinapudno maipapan iti panggep ni Jehova, intan-ok [met ni Jesus] ti nagan ti nailangitan nga Amana. (Juan 17:4, 6) Mainayon pay, kas silaw ti lubong, imbutaktak [ni Jesus] dagiti narelihiusuan a kinaulbod ket iti kasta winayawayaanna iti naespirituan dagidiay adda iti narelihiusuan a pannakaadipen. Imbutaktakna ni Satanas kas ti di makita a mangiturturong kadagidiay ipalpalubosda ti bagida a pausar kenkuana. Silalawag nga inlasin [met ni Jesus] dagiti aramid ti kinasipnget. (Mateo 15:3-9; Juan 3:19-21; 8:44) Kangrunaanna, pinaneknekanna nga isut’ silaw ti lubong babaen ti panangtedna ti perpekto a natauan a biagna kas subbot, a nangilukat ti gundaway kadagidiay mamati iti daytoy a probision a makagun-od ti pammakawan iti basbasol, ti naanamongan a pannakirelasion iti Dios, ken ti namnama a biag nga agnanayon kas paset ti sapasap a pamilia ni Jehova. (Mateo 20:28; Juan 3:16) Ken kamaudiananna, babaen ti panangsalimetmetna iti naan-anay a nadiosan a debosion iti unos ti panagbiagna, intandudo [ni Jesus] ti kinasoberano ni Jehova ken pinaneknekanna nga ulbod ti Diablo, iti kasta nagbalin a posible dagiti agnanayon a gunggona kadagiti managayat iti kinalinteg. Ngem ni laeng Jesus aya ti managawit iti lawag?
“Dakayo ti Silaw ti Lubong”
11. Tapno agbalinda a managawit iti lawag, aniat’ masapul nga aramiden dagiti adalan ni Jesus?
11 Idiay Mateo 5:14, kinuna ni Jesus kadagiti adalanna: “Dakayo ti silaw ti lubong.” Masapul a surotenda dagiti addangna. Agpadpada iti panagbiag ken panangaskasabada, iturongda dagiti dadduma ken Jehova kas ti Gubuayan ti pudpudno a pannakalawag. Iti panangtuladda ken Jesus, ipakaammoda ti nagan ni Jehova ken itandudoda ti kinasoberanona. Kas ti inaramid ni Jesus, iwaragawagda ti Pagarian ti Dios kas ti kakaisuna a namnama ti sangatauan. Ibutaktakda met dagiti narelihiusuan a kinaulbod, dagiti aramid ti kinasipnget, ken daydiay managdakdakes nga adda iti likudan dagitoy. Ipakaammo dagiti pasurot ni Kristo kadagiti tattao iti isuamin a disso ti naayat a probision ni Jehova a pakaisalakanan babaen ken Jesu-Kristo. Anian a regta ti panangaramid dagidi immuna a Kristiano iti dayta a trabaho, a nangrugi nga umuna idiay Jerusalem ken Judea ket kalpasanna idiay Samaria, kas imbilin ni Jesus!—Aramid 1:8.
12. (a) Aginggat’ sadino a maisaknap ti naespirituan a lawag? (b) Aniat’ impaawat ti espiritu ni Jehova ken Pablo maipapan iti Isaias 42:6, ket kasano koma nga apektaran dayta a padto ti biagtayo?
12 Nupay kasta, saan a nakedngan ti panangikaskasaba ti naimbag a damag iti dayta a tay-ak. Binilin ni Jesus dagiti pasurotna a “pagbalinen[da] nga ad-adalan dagiti tattao iti isuamin a nasion.” (Mateo 28:19) Idi pannakakumberte ni Saulo a taga Tarso, espesipiko nga impakita ti Apo a ni Saulo (a nagbalin a ni apostol Pablo) mangaskasabanto saan laeng a kadagiti Judio no di ket kadagiti pay Gentil. (Aramid 9:15) Babaen ti tulong ti nasantuan nga espiritu, naawatan ni Pablo ti saklawen dayta. Gapuna nailasinna a ti padto idiay Isaias 42:6, a direkta a natungpal ken Jesu-Kristo, ket naipaawat met a bilin kadagiti amin a mamati ken Kristo. Gapuna, idiay Aramid 13:47, idi nagadaw manipud Isaias, kinuna ni Pablo: “Imbilin kadakami ni Jehova, ‘Inkabilka a maysa a silaw dagiti nasion, tapno sika ti pakaisalakanan agingga iti ungto ti daga.’” Dakayo ngay? Impapusoyo aya dayta nga obligasion nga agbalin a managawit iti lawag? Kas ken Jesus ken ni Pablo, isensentroyo aya ti biagyo iti panangaramid iti pagayatan ti Dios?
Ti Lawag ken Kinapudno nga Aggapu iti Dios Iturongnatayo
13. Maitunos iti Salmo 43:3, ania ti napasnek a kararagtayo, ken maibusor iti ania a salaknibannatay daytoy?
13 No, babaen dagiti bukodtayo a pamay-an, padpadasentayo a ‘pagsublien dagiti lawag,’ tapno paraniagen ti masakbayan ti sangatauan, maikapkapistay la unay iti punto ti naipaltiing a Sao ti Dios. Nupay kasta, uray pay ania ti ar-aramiden ti kaaduan ditoy lubong, kumita dagiti pudno a Kristiano ken Jehova kas ti pudno a Gubuayan ti lawag. Ti kararagda ket kas iti nailanad idiay Salmo 43:3, a kunana: “Ibaonmo ti silawmo ken ti kinapudnom. Dagitoy koma ti mangiturong kaniak. Isuda koma ti mangipan kaniak iti nasantuan a turodmo ken iti nadayag a tabernakulom.”
14, 15. (a) Kadagiti ania a pamay-an nga ibabaon itan ni Jehova ti lawag ken kinapudnona? (b) Kasanotay a maipakita a pudpudno nga iturturongdatayo ti lawag ken kinapudno ti Dios?
14 Agtultuloy ti panangsungbat ni Jehova iti dayta a kararag dagiti nasungdo nga adipenna. Mangibabaon ti silaw babaen ti panangiwaragawag ti panggepna, babaen ti panangipaawatna iti dayta kadagiti adipenna, ken babaen ti panangtungpalna iti inwaragawagna. No agkararagtayo iti Dios, saan a basta pormalidad dayta, nga ar-aramiden laeng tapno agparang a nakasansanto. Sipapasnek a tarigagayantayo nga iturongnatay koma ti lawag nga aggapu ken Jehova, kas kuna ti salmo. Akseptarentayo ti responsabilidad a kakuyog ti panangawat iti lawag nga ited ti Dios. Kas ken apostol Pablo, maawatantayo a ti kaitungpalan ti Sao ni Jehova addaan met iti naipaawat a bilin kadagidiay amin a mamati iti dayta. Mariknatayo a kasla adda utangtayo kadagiti dadduma agingga a naitedtayon ti naimbag a damag nga intalek ti Dios kadatayo agpaay iti dayta a panggep.—Roma 1:14, 15.
15 Ipalgak ti lawag ken kinapudno nga imbaon ni Jehova iti kaaldawantayo a siaaktibo nga agturturayen ni Jesu-Kristo iti nailangitan a tronona. (Salmo 2:6-8; Apocalipsis 11:15) Impadto ni Jesus a bayat ti naarian a kaaddana, maikaskasaba daytoy naimbag a damag ti Pagarian iti amin a mapagnaedan a daga kas pammaneknek. (Mateo 24:3, 14) Sibabara unay a maar-aramiden dayta a trabaho iti intero a daga. No pagbalbalinentay dayta a trabaho a kapapatgan iti biagtayo, ngarud iturturongnatayo ti lawag ken kinapudno ti Dios, kas kinuna ti salmista.
Simmilnag ti Dayag ni Jehova
16, 17. Kasano a pinaltuad ni Jehova ti dayagna iti kas babai nga organisasionna idi 1914, ket aniat’ imbilinna kenkuana?
16 Iti makatignay-puso a sao, iladawan ti Kasuratan ti pannakaisaknap ti nadiosan a lawag kadagiti tattao iti isuamin a disso. Ti Isaias 60:1-3, a naiturong iti “babai” a kukua ni Jehova, wenno ti nailangitan nga organisasion dagiti nasungdo nga adipenna, kunana: “Tumakderka, O babai, agraniagka, ta ti lawagmo immayen ket ti dayag ni Jehova limgaken kenka. Ta, adtoy! ti kinasipnget abbungotanna ti daga, ket ti napuskol a kinasipnget dagiti il-ili; ngem ni Jehova lumtuadto kenka, ket ti dayagna makitanto iti rabawmo. Ket dagiti nasion umaydanto ita lawagmo, ken dagiti ar-ari iti raniag ta ileleggakmo.”
17 Simmilnag ti dayag ni Jehova iti nailangitan a kas babai nga organisasionna idi tawen 1914 idi, kalpasan ti nabayag a panagur-uray, isut’ nangipasngay iti Mesianiko a Pagarian, a ni Jesu-Kristo ti Ari. (Apocalipsis 12:1-5) Agraniag ti nadayag a lawag ni Jehova buyogen anamong iti dayta a gobierno kas ti nainkalintegan para iti intero a daga.
18. Apay nga abbungotan ti kinasipnget ti daga, kas naipadto idiay Isaias 60:2? (b) Kasano a maispal dagiti indibidual manipud iti kinasipnget ti daga?
18 Maisupadi iti dayta, ti kinasipnget abbungotanna ti daga ken ti napuskol a kinasipnget dagiti il-ili. Apay? Linaksid ngamin dagiti nasion ti gobierno ti ingungoten nga Anak ti Dios a kinaykayatda ti natauan a turay. Ipatoda a no maidianda ti maysa a porma ti gobierno ti tao sada awaten ti sabali, marisutda dagiti parikutda. Ngem di mangyeg daytoy iti pakabang-aran nga inanamaenda. Saanda a makita no asinot’ adda iti likudan a mangimanmaniobra iti nasnasion manipud disso dagiti espiritu. (2 Corinto 4:4) Linaksidda ti Gubuayan ti pudno a lawag, gapuna addada iti kinasipnget. (Efeso 6:12) Nupay kasta, uray pay ania ti aramiden dagiti nasion, mabalin a maispal dagiti indibidual manipud iti dayta a kinasipnget. Kasano? Babaen ti naan-anay a panagtalek iti Pagarian ti Dios ken panagpasakop iti dayta.
19, 20. (a) Apay ken kasano a rimmaniag ti dayag ni Jehova kadagiti napulotan a pasurot ni Jesus? (b) Agpaay ania a panggep a pinagbalin ni Jehova dagiti napulotan a managawit iti lawag? (c) Kas naipadto, kasano a naallukoy dagiti “ar-ari” ken “nasnasion” iti inted-Dios a lawag?
19 Saan a nagtalek ken nagpasakop ti Kakristianuan iti Pagarian ti Dios. Ngem dagiti napulotan-espiritu a pasurot ni Jesu-Kristo nagpasakopda. Kas resultana, simmilnag ti nadiosan nga anamong ni Jehova kadagitoy makitkita a pannakabagi ti nailangitan a babai, ken limtuad kadakuada ti dayagna. (Isaias 60:19-21) Tagtagiragsakenda ti naespirituan a lawag a di maiddep ti aniaman a panagbalbaliw iti politika ken ekonomia ditoy lubong. Inispal ida ni Jehova manipud Babilonia a Dakkel. (Apocalipsis 18:4) Tagtagiragsakenda ti anamongna ta inawatda ti disiplinana ken sisusungdo nga intandudoda ti kinasoberanona. Naraniag ti namnamada iti masanguanan, ket agrag-oda iti namnama nga inkabilna iti sanguananda.
20 Ngem agpaay ania a panggep a nakilangen ni Jehova kadakuada iti kastoy a pamay-an? Kas kinunana a mismo idiay Isaias 60:21, tapno “maidaydayaw,” tapno maitan-ok ti naganna ken maallukoy dagiti dadduma kenkuana kas ti maymaysa a pudno a Dios—iti agnanayon a pagimbaganda. Maitunos itoy, idi 1931, inawat dagitoy a managdaydayaw iti pudno a Dios ti nagan a dagiti Saksi ni Jehova. Kas bunga ti panangaskasabada, naallukoy kadi “dagiti ar-ari” iti lawag nga insilnagda, kas impadto ni Isaias? Wen! Ngem saan a dagiti napolitikaan nga agtuturay iti daga, no di ket ti natda kadagidiay makipagturay ken Kristo kas ar-ari iti nailangitan a Pagarianna. (Apocalipsis 1:5, 6; 21:24) Ket dagiti ngay “nasnasion”? Naawisda kadi itoy a lawag? La ketdi! Awan indibidual a napolitikaan a nasion ti naawis, no di ket maysa a dakkel nga umariwekwek a naggapu kadagiti amin a nasion ti dimmasig iti Pagarian ti Dios, ket sigagagar nga ur-urayenda ti pannakaispal nga agturong iti baro a lubong ti Dios. Maysa dayta a pudpudno a baro a lubong a pagtaenganto ti kinalinteg.—2 Pedro 3:13; Apocalipsis 7:9, 10.
21. Kasanotay a maipakita a saantay a naikapis iti panggep ti di kaikarian a kinamanangaasi ni Jehova iti panangipaawatna kadatayo iti pagayatanna?
21 Maysakay aya iti dayta dumakdakkel a bunggoy dagiti managawit iti lawag? Inikkannatay ni Jehova ti pannakaawat iti pagayatanna tapno datayo, kas ken Jesus, ket agbalin a managawit iti lawag. Babaen ti panagbalin a naregta iti trabaho nga intalek ni Jehova kadagiti adipenna iti kaaldawantayo, sapay koma ta ipakitatayo a saantay a naikapis iti panggep ti di kaikarian a kinamanangaasi nga impakita ti Dios kadatayo. (2 Corinto 6:1, 2) Awanen trabaho a napatpateg pay iti kaaldawantayo. Ken awanen dakdakkel a pribilehiotayo ngem iti panangipadayag ken Jehova babaen ti panangisilnag kadagiti dadduma ti nadayag a lawag nga aggapu kenkuana.
Kasanoyo a Sungbatan?
◻ Ania dagiti ramut dagiti nakaro a parikut ti sangatauan?
◻ Kagiti ania a pamay-an nga agpadpada a ni Jesus ken dagiti pasurotna ket “silaw ti lubong”?
◻ Kasano nga iturturongdatayo ti lawag ken kinapudno ni Jehova?
◻ Kasano a pinaraniag ni Jehova ti dayagna iti organisasionna?
◻ Agpaay ania a panggep a pinagbalin ni Jehova dagiti tattaona a managawit iti lawag?
[Dagiti ladawan iti panid 9]
Ti pasamak idiay Eden tulongannatayo a mangtarus kadagiti nakaro a parikut ti sangatauan ita
[Dagiti Credit Line]
Tom Haley/Sipa
Paringaux/Sipa