Dagiti Nabaknang a Bendision Kadagiti “Dagiti Managawit iti Lawag” a Kumbension Distrito
AGARUP 2,700 a tawenen ti napalabas, insurat ni mammadto Isaias: “Adtoy! ti kinasipnget abbungotanna ti daga, ket ti napuskol a kinasipnget kadagiti il-ili.” (Isaias 60:2) Pudno unay dagitoy a sasao! Nupay kasta, adda inanama, ta pinagsilnag ni Jehova ti lawag. Idi napan a tawen, sibabara a naawis dagidiay managayat iti lawag ti Dios a tumabuno iti “Dagiti Managawit iti Lawag” a Kumbension Distrito.
Immuna a naiparang ti programa ti kumbension idi Hunio idiay Makin-amianan nga America. Kadagiti simmaruno a bulan, naiparang met dayta idiay Makindaya ken Makinlaud nga Europa, Sentral ken Makin-abagatan nga America, Africa, Asia, ken kadagiti isla iti taaw. Riniwriw ti timmabuno. Ket anian a nagbaknang a naespirituan a padaya ti tinagiragsakda!
“Abrasaendakayo, Dakayo Amin a Managawit iti Lawag!”
Iti kaaduan a lugar, nangrugi ti kumbension iti Biernes ket nagngudo iti malem ti Domingo. Idi nakasimpan dagiti kumbensionista kadagiti pagtugawanda iti agsapa ti Biernes, naay-ayoda a dimngeg iti ababa a panangsalaysay no kasano nga ad-adda a rimmaniag ti lawag ni Jehova kadagitoy maudi nga al-aldaw. Kalpasanna nagbitla ti tsirman ti kumbension. Impaganetgetna a dagiti pudno a Kristiano rebbeng a managawitda iti lawag ket sibabara a kinunana: “Abrasaendakayo, dakayo amin a managawit iti lawag!” Nairanta ti programa ti kumbension a tumulong kadagiti delegado a mangitultuloy a mangisilnag iti lawag ni Jehova.
Impasdek ti pannulbek a palawag ti kababagas ti intero a kumbension. Impalagip daytoy a managpalawag kadagiti kumbensionista a naiddep ti naraniag a masakbayan ti sangatauan nanipud pay idiay minuyongan ti Eden. Nanipud idin, kinullaapan ni Satanas dagiti tattao tapno saan nga agraniag kadakuada ti lawag ti kinapudno. (2 Corinto 4:4) Nupay kasta, immay ni Jesus kas “maysa a silaw iti nasnasion.” (Isaias 42:1-6) Imbutaktakna dagiti narelihiusuan a kinaulbod, inlasinna dagiti dakes nga ar-aramid ti sipnget, intandudona ti kinasoberano ni Jehova, ken inkasabana ti naimbag a damag ti Pagarian. Kasta met ti inaramid dagiti pasurot ni Jesus—ket ar-aramidenda pay laeng! (Mateo 28:19, 20) Sigagagar a kinuna ti managpalawag: ‘Kas ken Jesus, mabalintay met ti agbalin a managawit iti lawag. Awanen napatpateg pay a trabaho iti kaaldawantayo. Ket awanen dakdakkel pay a pribilehio.’
Sakbay unay a nagngudo ti umuna a sesion ti kumbension, nasurpresa dagiti kumbensionista. Nagsubli ti tsirman ti kumbension iti plataporma ket impakaammona ti pannakairuar ti serie ti uppat a baro a tract. Pinasabatanda iti natibong a palakpak, ket nakagun-od dagiti delegado iti kopia ti tunggal tract.
Iti malem ti Biernes, nangipaay ti programa ti kumbension iti napateg a pammagbaga kadagiti managawit-lawag a Kristiano. Nangted ti umuna a dua a palawag iti nasayaat a balakad no kasano a maliklikan ti kinasipnget ti lubong. Yantangay mapagparang ni Satanas ti bagina a kasla anghel ti lawag, nasken a salimetmetantayo ti naespirituan a panangmatmat tapno saandatay a masulisog dagiti kinarugit ti lubong. (2 Corinto 11:14) Impatigmaan ni Pablo: “Idianyo ti pannakiabuloy iti daytoy sistema dagiti bambanag, no di ket agbalbaliwkayo babaen ti pannakapabaro ti isipyo, tapno mapaneknekanyo no ania ti nasayaat ken makaay-ayo ken naan-anay a pagayatan ti Dios.” (Roma 12:2) Naawatan dagiti kumbensionista a ti panagbalbaliw ti maysa a Kristiano ket agtultuloy. Kankanayon a mapasin-aw ken masukog ti isiptayo bayat nga adalentayo ti Sao ti Dios ken iyaplikar dagiti masursurotayo. Iti kasta, ad-adda a matuladtayo ni Jesus, isu a “napno iti di kaikarian a kinamanangaasi ken kinapudno.”—Juan 1:14.
Dagiti Agtutubo a Managawit iti Lawag
Naiturong kadagiti agtutubo ti nabati a programa iti malem ti Biernes. Pinadayawan ti umuna a palawag (“Agtutubo—Aniat’ Sursurotenyo?”) dagiti mapagulidanan a matalek nga agtutubo a Kristiano. Ngem pinalagipanna ida nga isuda ti kangrunaan a puntiria ni Satanas. No kasano a kasapulan ti nalaing nga atleta ti coach, kasta met a kasapulan dagiti agtutubo ti tulong dagiti dadakkelda ken ti kongregasion tapno makapagtultuloyda a magna iti lawag.
Naipaganetget daytoy iti nagsayaat a drama a Panangaramid ti Nalinteg iti Imatang ni Jehova, a nanggibus iti programa iti Biernes. Naitampok ti ulidan ni Ari Josias. Uray ubing pay laeng, determinado nga agserbi ken Jehova. Nalikmut kadagiti dakes nga impluensia, ngem babaen ti panangidalan ti nangato a padi a ni Hilkias ken gapu met laeng iti panangayatna iti Linteg ti Dios, inaramid ni Josias ti nalinteg iti imatang ni Jehova. Kasta met koma dagiti agtutubo a Kristiano ita.
Pagsilnagenyo ti Silaw
Kalpasan ti panaginanada iti rabii, immay dagiti delegado iti kumbension iti agsapa ti Sabado a nakasagana nga umimdeng iti kanayonan a makapabileg a Nainkasuratan a balakad. Saanda a napaay. Kalpasan ti pannakasalaysay ti teksto iti aldaw, nagtultuloy ti programa babaen ti simposium a nangibinsabinsa iti nadumaduma a wagas a mapaglawag ti maysa a Kristiano ti silawna. (Mateo 5:14-16) Ti panangasaba ket maysa a napateg a wagas, ket napateg met ti paset ti nasayaat a kababalin. Kas kinuna ti managpalawag, “ti panangasaba ibagana kadagiti dadduma no aniat’ patpatientayo, ngem ti panagayat ipakitana dayta.”
Kalpasanna naiturong iti imatang dagiti kumbensionista ti nagpateg a tulong iti panangasaba—dagiti tract. Silalagipda pay laeng iti pannakaiyanunsio dagita iti napalabas nga aldaw, nangngeg dagiti delegado dagiti kapadasan a mangipakita no kasano kabileg dagitoy babassit nga instrumento. Naparegta dagiti delegado a maaddaan a kanayon kadagiti tract, a nakasagana iti amin a gundaway.
Simmaruno a naiturong ti atension kadagiti payunir, dagidiay amin-tiempo a manangiwaragawag ti Pagarian a nagaget a mangaw-awit iti lawag. Anian ti panangapresiartayo kadagiti nagaget a payunirtayo! Ket umad-adu ti bilangda. Uray kadagiti pagilian a nabiit pay a naipasdek ti wayawaya ti panagdayaw, umad-adu dagiti payunir. Napabileg dagiti payunir a mangipateg iti pribilehioda. Naidagadag kadagiti saan pay a payunir nga utobenda ti situasionda. Nalabit maipamuspusanda met a pagsilnagen ti silawda iti amin-tiempo a serbisio.
Ti panagbalin a managawit iti lawag kadarato a ramanenna ti panagsakripisio, ket naitampok daytoy iti sumaruno a palawag, “Panagserbi ken Jehova a Buyogen ti Espiritu ti Panagsakripisio.” Dinawat ni Pablo: “Ipaayyo dagiti bagbagiyo kas daton a sibibiag, nasantuan, makaay-ayo iti Dios.” (Roma 12:1) Ipakpakita dagidiay mangib-ibtur iti pannakaidadanes ti espiritu ti panagsakripisio. Inaldaw nga agsaksakripisio dagiti payunir tapno makapagtalinaedda iti amin-tiempo a serbisio. Pudno unay, agsaksakripisio dagiti amin a pudno a Kristiano, a naagawada iti serbisio ni Jehova imbes a kadagiti agimbubukod, materialistiko a kalat daytoy a lubong. Mangibunga ti kasta a kurso kadagiti nabaknang a bendision nga aggapu ken Jehova.
Nagserbi dayta a diskurso kas maitutop nga introduksion iti sumaruno a paset—ti palawag iti bautismo. Saan la ketdi a malipatan dagidiay nabautisaran iti “Dagiti Managawit iti Lawag” a Kumbension Distrito daytoy a palawag. Ti bautismoda ti kankanayonto a tampok iti biagda. Naipalagip kadakuada a sursurotenda ti ulidan ni Jesu-Kristo, a nabautisaran idi agtawen iti 30. Mainayon pay, naragsakan dagiti kandidato iti bautismo a nanglagip nga “inwagsakdan dagiti ar-aramid ti sipnget” ken inkeddengdan ti ‘agpaadipen ken Jehova.’ (Roma 12:11; 13:12) Siraragsak a timmakderda iti imatang ti dakkel a tallaong ket sipipigsa a nangaramidda iti publiko a panangipaduyakyak sakbay a nabautisaranda. (Roma 10:10) Ikararagtayo a bendisionan koma ni Jehova dagidiay amin a nangisimbolo ti dedikasionda kenkuana babaen ti pannakabautisarda iti danum bayat ti “Dagiti Managawit iti Lawag” a Kumbension Distrito.
Iti malem ti Sabado naited dagiti prangka a ballaag. Naiparang dagitoy kadagiti palawag a napauluan “Liklikanyo Dagiti Silo ti Kinaagum,” “Adda Kadi Mangdaddadael Kadagiti Naimbag nga Ugaliyo?” ken “Adayuanyo ti Amin a Kita ti Idolatria.” Inlasin dagitoy tallo a palawag ti sumagmamano a taktika nga ipakpakat ni Satanas a mangpakapsut iti maysa a Kristiano. Maysa nga apostol ni Judas Iscariote, ngem liniputanna ni Jesus gapu iti pirak. Dimmakkel ni ubing a Samuel iti mismo a sentro ti panagdayaw ken Jehova, ngem nalikmut kadagiti dakes a kakadua. (1 Samuel 2:12, 18-20) Ti idolatria saklawenna dagiti bambanag kas ti seksual nga imoralidad ken kinagaramugam. (Efeso 5:5; Colosas 3:5) Wen, ti agum, dakes a pannakikadkadua, ken idolatria ket napeggad ken masapul nga adayuan.
Kalpasanna naiparang ti naiduma a kita ti impormasion. Nangibangon ti sumaruno a palawag iti sumagmamano a makapainteres a salsaludsod iti Biblia ken sinungbatanna ida. Kas pangarigan, mailawlawagyo kadi no mapagungarto dagiti tattao a di mangawat ti kinapudno ken matay sakbay ti dakkel a rigat? Aniat’ maaramidan ti maysa a Kristiano no saan a makabiruk iti maitutop nga asawa? Tapno umuneg ti pannakaammoda iti Biblia, naparegta dagiti delegado a mangaprobetsar iti Watch Tower Publications Index, nangruna iti babaen ti paulo a “Questions From Readers.”
Ti Kaadda ken Pannakaipalgak ni Kristo
Naisentro iti padto ti panggibus a paset ti programa iti Sabado babaen ti simposium a napauluan “Panangisilnag ti Lawag iti Kaadda ken Pannakaipalgak ni Kristo.” Narepaso dagiti tampok “ti pagilasinan” a mangpaneknek iti kaadda ni Jesu-Kristo. (Mateo 24:3) Iti maikadua a paset, naisalaysay dagiti moderno-aldaw nga aramid “ti matalek ken naannad nga adipen.” (Mateo 24:45-47) Naipakita a nanipud idi 1919 simamatalek nga idadauluan ti klase adipen ti trabaho a panangasaba ti naimbag a damag ti Pagarian. Kalpasanna naurnong ti dakkel nga umariwekwek manipud iti amin a nasion tapno makitimpuyogda kadagiti napulotan a Kristiano iti panangisilnag ti lawag ni Jehova. Ingngudo ti managpalawag: “Amin koma sireregta nga itultuloyda a suportaran ti matalek ken naannad nga adipen. Babaen laeng ti panangaramid iti daytoy a dumtengto ti aldaw iti mabiiten nga amin dagiti kasla karnero mangngegdanto ti naragsak a sasao: ‘Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.’”—Mateo 25:34.
Sinalaysay ti maudi a managpalawag ti kaipapanan ken saklawen ti pannakaipalgak ni Jesu-Kristo. (1 Corinto 1:7) Anian a naindaklanto dayta a pannakaipalgak! Maduprakto ti Babilonia a Dakkel. Aggibusto ti dakkel a dangadang iti nagbaetan ti lubong ni Satanas ken ni Jesus ken dagiti anghelna iti pannakadadael daytoy a sistema. Kamaudiananna, maigarangugongto ni Satanas iti mangliwengliweng nga abut ken maparautan. Ngem mabang-aranto ti ili ti Dios inton agkasar ti Kordero idiay langit ken maparsua ti baro a daga. Naragsakan dagiti managdengngeg idi inruar ti managpalawag ti baro a broshur a Pudno Aya a Maseknan ti Dios Kadatayo? Anian a nagsayaat a tulong dayta kadagiti napakumbaba a tattao a nasken a makaammo iti manangigaga a Namarsuatayo ken iti pangpanggepna agpaay kadatayo!
Dagiti Nakristianuan a Sangakabbalayan
Dimtengen ti Domingo, ti maudi nga aldaw ti kumbension. Nupay kasta, adu pay ti naiparang. Kalpasan ti pannakasalaysay ti teksto iti aldaw, naiturong ti atension iti Nakristianuan a pamilia babaen ti simposium a “Pannakaseknan iti Maysa ken Maysa iti Nakristianuan a Sangakabbalayan.” Ti umuna a paset tinulonganna dagiti kumbensionista a makakita iti tulbek iti naballigi a Nakristianuan a pamilia: panangiyun-una kadagiti naespirituan a banag. Pinaregta ti maikadua a paset dagiti pamilia a mangaramid kadagiti bambanag a sangsangkamaysa, iti man pannakigimong, panangasaba, panagadal ti pamilia, wenno panaglinglingay. Ket ti maikatlo a paset ti simposium pinalagipanna dagiti delegado iti pribilehio ken annongenda a mangaywan kadagiti nataenganen. “Napateg iti kongregasion dagiti kakabsattayo a lallakay ken babbaket,” kinuna ti managpalawag. Ipategtay koma ti kapadasanda ken tuladentay ti kinatarnawda.
Ti kayulogan ti ebkas a “nasimbeng nga isip” ti simmaruno a nasukimat. (1 Pedro 4:7) Ti tao a nasimbeng ti isipna ket natimbeng, nanakman, rasonable, napakumbaba, ken nainkalintegan. Mailasinna ti naimbag ken dakes, ti pudno ken ulbod. Mainayon pay, pagreggetanna a salimetmetan ti nasayaat a naespirituan a salun-at.
Sinalaysay ti maudi a palawag iti programa iti agsapa ti Domingo ti panagpasakoptayo iti Dios ken ni Kristo. “Ti kinapateg ti nasungdo a panagpasakop ken Jehova a Dios ken ni Jesu-Kristo nga Anakna ket di maipaganetget iti aglablabes,” kinuna ti managpalawag. Impakitana no kasano nga apektarannatay daytoy iti amin a benneg ti panagbiagtayo. Aniat’ makatulong kadatayo nga agpasakop? Uppat a galad: ayat, nadiosan a buteng, pammati, ken kinapakumbaba.
Malem ti Domingo
Di napupuotan nga immay ti malem ti Domingo ket panawen daytan ti maudi a session iti kumbension. Kadagiti adu, kasla karugrugina pay laeng ti kumbension, ket ita mapanen iti paggibusanna.
Napauluan ti palawag publiko iti “Surotenyo ti Silaw ti Lubong.” Tinagiragsak dagiti kumbensionista ti dimngeg iti makapainteres a pannakailawlawag ti pateg ti pisikal a lawag iti panangtaginayon ti biag. Kalpasanna impakita ti managpalawag ti dakdakkel a pateg ti naespirituan a lawag. Ti pisikal a lawag biagennatayo iti sumagmamano laeng a dekada, ngem ti naespirituan a lawag biagennatayo iti agnanayon. Ti tampok ti palawag isu ti bersikulo-por-bersikulo a panangsalaysay iti Juan 1:1-16, a sadiay ni Jesus ti naipabigbig kas silaw ti lubong. Itatta, iti maudi a tawtawen daytoy rinuker a sistema, ad-adda a kasapulan unay a surotentayo ni Jesus kas silaw.
Kalpasan ti pannakasumario ti material iti Panagadal ti Pagwanawanan para iti dayta a lawas simmaruno ti panggibus a palawag. Makaparagsak, impakaammo ti managpalawag nga adu a banag ti padaanan iti masanguanan. Kas pangarigan, inyanunsiona ti baro nga audiocassette, ti drama a Doing God’s Will With Zeal. Saan la a dayta. Addanto met baro a serie dagiti videocassette a napauluan The Bible—A Book of Fact and Prophecy, ti umuna maipapan iti tema a The Bible—Accurate History, Reliable Prophecy.
Kamaudiananna, impakaammo ti managpalawag nga iti 1993 addanto dagiti uppat-aldaw a kumbension distrito, agraman dagiti espesial nga internasional a panagtitipon iti deppaar ti Africa, Asia, Europa, ken Makin-abagatan nga America. Malmalpas pay laeng ti “Dagiti Managawit iti Lawag” a Kumbension Distrito, ngem agsagsaganan dagiti delegado para iti sumaruno a tawen.
Kalpasanna panawenen nga agawid dagiti kumbensionista. Ad-adda a determinadoda la ketdi a mangitultuloy a mangisilnag ti lawag iti daytoy nasipngetan a lubong. Kalpasan ti tallo nga aldaw a napusek kadagiti naespirituan a nasayaat a bambanag, napaneknekan a dakkel ti kaipapanan ti sasao ti maudi a kasuratan a naadaw iti panggibus a palawag: “Ni Jehova isu ti Dios, ket ikkannatayo iti silaw. . . . Agyamankayo ken Jehova, dakayo nga umili, ta isu naimbag; ta ti naayat a kinamanangaasina agnanayon.”—Salmo 118:27, 28.
[Ladawan iti panid 15]
Programa ti kumbension iti Ruso
[Dagiti ladawan iti panid 16, 17]
Nagpalawag dagiti kameng ti Bagi a Manarawidwid iti adu a kumbension
Karaman kadagidiay naguummong idiay St. Petersburg, Russia dagiti delegado a Hapones
Impaganetget ti makagutugot a drama iti Biblia ti panangaramid ti nalinteg iti imatang ni Jehova
Insimbolo dagiti kabbaro a managawit iti lawag ti dedikasionda ken Jehova babaen ti panagpabautisarda
Kasta unay ti panagimdeng dagiti kumbensionista iti programa idiay St. Petersburg
[Ladawan iti panid 18]
Naragsakan dagiti delegado iti baro a broshur a “Pudno Aya a Maseknan ti Dios Kadatayo?”