URARO
Maysa a porma ti tudo a buklen dagiti nagtutukel a yelo, wenno nagyelo a tudo. Dagiti panangtukoy ti Biblia iti makadadael nga epekto ti uraro ket patalgedan ti napasamak iti nadumaduma a paset ti daga iti naglabas a tawtawen. Idi 1985, maysa a bagyo ti uraro idiay Brazil ti nakatayan ti nasurok a 20 a tattao ken 300 ti nadangran. Dagiti napigsa a bagyo nga addaan iti gurruod ket mabalin a makapataud iti uraro a kadakkel ti itlog wenno lukban pay ketdi. Maysa a dakkel a nagtukel nga uraro ti napidut kalpasan ti maysa a bagyo idiay Kansas (E.U.A.) idi Setiembre 3, 1970, ket agarup 15 cm (6 pul.) ti diametrona. Dagitoy dadakkel nga uraro ket agtinnag iti kapartak nga agarup 160 km/oras (100 mko). Ti uraro ket nangnangruna a makadadael iti mulmula, a no dadduma mabalin a minilion a doliar ti mapukaw gapu laeng iti maysa a bagyo ti uraro.
Inaramat ni Jehova. No dadduma, maysa ti uraro kadagiti puersa nga inaramat ni Jehova tapno itungpalna ti saona ken tapno iparangarangna ti naindaklan a pannakabalinna. (Sal 148:1, 8; Isa 30:30) Ti damo a nailanad a pagarigan maipapan itoy ket ti maikapito a saplit iti nagkauna nga Egipto, maysa a makadadael a bagyo ti uraro a gapu iti dayta nadadael ti adu a mulmula, nasip-ak dagiti kayo, ken natay ti tattao ken an-animal nga adda iti tay-ak nupay saan a naapektaran dagiti Israelita idiay Gosen. (Ex 9:18-26; Sal 78:47, 48; 105:32, 33) Idi agangay, iti Naikari a Daga, yantangay agpegpeggad dagiti Gabaonita gapu iti aliansa ti lima nga ar-ari dagiti Amoreo, timmulong kadakuada dagiti Israelita babaen ti panangidaulo ni Josue, ket inaramat ni Jehova ti dadakkel nga uraro maibusor kadagiti rumaraut nga Amoreo. Iti daytoy a gundaway, ad-adu ti natay kadagiti nagtinnag nga uraro ngem ti pinapatay ti Israel.—Jos 10:3-7, 11.
Simboliko. Nupay kasta, saan a salakniban ni Jehova ti di matalek nga Israel manipud makadadael nga epekto ti uraro. (Hag 2:17) Kasta met, babaen ken mammadtona nga Isaias, impadto ni Jehova a dupraken dagiti Asirio ti sangapulo-tribu a pagarian, nga inyaspingna dagiti manangparmek a puersa dagiti Asirio iti “nakagurgurruod a bagyo ti uraro.” (Isa 28:1, 2) Umasping iti dayta, punasen dagiti Babilonio, a kas iti uraro, ti ‘ulbod a kamang’ ti Juda, awan sabali, ti pannakialiansa ti Juda iti Egipto maipaay iti namilitariaan a tulong.—Isa 28:14, 17; 31:1-3.
Iti libro ti Apocalipsis, natukoy ti uraro mainaig iti panangpuyot iti trumpeta ti umuna kadagiti pito nga anghel nga addaan trumpeta, ken mainaig iti pannakalukat ti nailangitan a santuario ti templo ti Dios. (Apo 8:2, 7; 11:19) Kalpasanna, iti pannakaibuyat ti maikapito a malukong ti unget ti Dios, dagiti simboliko a bato nga uraro nga agdagsen iti agarup maysa a talento (20.4 kg; 45 lb) ket agtinnagda kadagiti nadangkes a tattao.—Apo 16:1, 17, 21.
‘Maipaay iti aldaw ti gubat.’ Idi nagsao ni Jehova ken Job babaen iti allawig, imbagana a nangisagana kadagiti kamalig ti uraro maipaay iti “aldaw ti dangadang ken gubat.” (Job 38:1, 22, 23) Gapuna, mayanatup unay a nadakamat ti uraro a karaman kadagiti elemento a maaramat maibusor kadagiti rumaraut a puersa ni “Gog.”—Eze 38:18, 22.