Agbalinkayo a Nasantuan iti Panagbuteng iti Dios

IPAKITA ti Biblia a ni Jehova a Dios ti kasasantuan: “Santo, santo, santo ni Jehova.” (Isa. 6:3; Apoc. 4:8) Dagiti Hebreo ken Griego a sao maipapan iti “kinasanto” ipasimudaagda ti kinasin-aw wenno narelihiosuan a kinadalus, pulos a di namulitan. Ti kinasanto ti Dios tukoyenna ti naan-anay a kinadalusna iti moral.

Ti kadi nasantuan a Dios a ni Jehova namnamaenna kadagidiay agdayaw kenkuana nga agbalinda met a nasantuan, kayatna a sawen, agbalinda a nadalus iti pisikal, moral, ken naespirituan? Nalawag nga ipakita ti Biblia a kayat ni Jehova nga agbalin a nasantuan ti ilina. Mabasatayo iti 1 Pedro 1:16: “Masapul a nasantuankayo, agsipud ta nasantuanak.” Mabalin kadi a tuladen dagiti imperpekto a tattao ti kinasanto ni Jehova? Wen, nupay saantayo a matulad a naan-anay. Maibilangtayo a nasantuan iti imatang ti Dios no nadalus ti panagdayawtayo ken nasingedtayo kenkuana.

Kasano ngarud a makapagtalinaedtayo a nadalus iti tengnga ti lubong a narugit iti moral? Ania dagiti ar-aramid a masapul a liklikantayo? Ania a panagsasao ken kababalin ti masapul a baliwantayo? Kitaentayo no ania ti masursurotayo manipud kadagiti impaannurot ti Dios kadagiti Judio a nagsubli iti daga a nakayanakanda idi 537 K.K.P.

‘Addanto Sadiay ti Dalan ti Kinasanto’

Impakpakauna ni Jehova a ti ilina a naidestiero idiay Babilonia maisublidanto iti dagada. Kastoy ti pammatalged a linaon ti padto maipapan iti pannakaisubli: “Maaddanto sadiay ti maysa a kangrunaan a kalsada, maysa a dalan a mismo; ket maawaganto iti Dalan ti Kinasanto.” (Isa. 35:8a) Ipakita dagitoy a sasao a saan laeng a linuktan ni Jehova ti dalan tapno makaawid dagiti Judio no di ket impanamnamana a salaknibanna ida iti dalanda.

Iti kaaldawantayo, linuktan ni Jehova kadagiti adipenna ditoy daga ti “Dalan ti Kinasanto” tapno makaruarda manipud iti Babilonia a Dakkel, ti sangalubongan nga imperio ti palso a relihion. Idi 1919, winayawayaanna dagiti napulotan a Kristiano manipud iti naespirituan a panangadipen ti palso a relihion, ket in-inut a dinalusanda ti panagdayawda babaen ti panangiwaksida iti amin a palso a sursuro. Kas ad-adipen ni Jehova ita, tagtagiragsakentayo ti naespirituan a kinatalinaay iti kongregasionna a sadiay ket makapagdayawtayo kenkuana. Addaantayo met iti natalna a relasion iti Dios ken kadagiti padatayo a tao.

Dagiti kameng ti “bassit nga ipastoran” a napulotan a Kristiano ken ti umad-adu a “dakkel a bunggoy” dagiti “sabsabali a karnero” pinilida ti magna iti nasantuan a dalan ket aw-awisenda ti dadduma a makikadua kadakuada. (Luc. 12:32; Apoc. 7:9; Juan 10:16) Ti “Dalan ti Kinasanto” ket silulukat kadagiti amin a situtulok a ‘mangiparang iti bagbagida kas maysa a sakripisio a sibibiag, nasantuan, makaay-ayo iti Dios.’​—Roma 12:1.

“Ti Narugit Saanto a Lumasat iti Dayta”

Idi 537 K.K.P., adda napateg a kalikagum a masapul a tungpalen dagiti nagsubli a Judio. Kuna ti Isaias 35:8b maipapan kadagidiay kualipikado a magna “iti Dalan ti Kinasanto”: “Ti narugit saanto a lumasat iti dayta. Ket agpaayto iti daydiay magmagna iti dalan, ket awanto dagiti maag nga agallaalla iti dayta.” Tangay ti panggep ti panagsubli dagiti Judio ket tapno ipasdekda manen ti nadalus a panagdayaw idiay Jerusalem, awan ngarud ti lugar dagiti naagum, awan panagraemda kadagiti sagrado a bambanag, wenno dagiti narugit iti naespirituan. Masapul a dagidiay agsubli taginayonenda ti nangato a moral a pagalagadan ni Jehova. Kasta met laeng ti maikalikagum ita kadagidiay agtarigagay iti anamong ti Dios. Masapul nga agbalinda a ‘nasantuan iti panagbuteng iti Dios.’ (2 Cor. 7:1) Ania ngarud dagiti narugit nga ar-aramid a masapul a liklikantayo?

“Maiparangarang dagiti aramid ti lasag,” insurat ni apostol Pablo, “ket dagita ti pannakiabig, kinarugit, nalulok a kababalin.” (Gal. 5:19) Ti pannakiabig ket aniaman a seksual nga aramid a pakairamanan ti panangusar iti mabagbagi iti nagbaetan dagiti saan nga agassawa. Ti nalulok a kababalin ramanenna ti “kinagartem; kinaderrep; nakababain a kababalin; naalas a kababalin.” Nalawag a ti pannakiabig ken ti nalulok a kababalin ket agpada a maikontra iti kinasanto ni Jehova. Gapuna, dagiti agtultuloy nga agaramid kadagita saanda a mapalubosan nga agbalin a paset ti kongregasion Kristiano wenno mailaksidda. Kasta met laeng dagidiay agaramid iti aglablabes a kinarugit, kayatna a sawen, “tunggal kita ti kinarugit buyogen ti kinaagum.”​—Efe. 4:19.

Saklawen ti “kinarugit” ti adu a kita ti basol. Ti Griego a sao dayta tukoyenna ti aniaman a kita ti kinarugit​—iti kababalin, panagsasao, ken iti narelihiosuan a pannakilangen kadagiti di manamati. Dayta ramanenna dagiti narugit nga ar-aramid a saan nga agkasapulan iti hudisial nga aksion.a Ngem dagiti kadi agaramid iti kasta a kinarugit itultuloyda ti magna iti dalan ti kinasanto?

Ipapantayon a ti maysa a Kristiano sililimed a mangrugi nga agbuya iti pornograpia. No matignay dagiti narugit a tarigagayna, in-inut a kumapuy ti determinasionna nga agtalinaed a nadalus iti imatang ni Jehova. Ti kababalinna mabalin a saan pay a nakagteng iti punto a maibilang nga aglablabes a kinarugit, ngem insardengnan nga usigen laeng ti ‘aniaman a bambanag a nadalus, naimbag ti pakasarsaritaanda, addaan kinasingpet, ken nadayaw.’ (Fil. 4:8) Narugit ti pornograpia ket talaga a dadaelenna ti relasion ti maysa a tao iti Dios. Ti aniaman a kita ti kinarugit saan koma a madakamat uray iti nagtetengngaantayo.​—Efe. 5:3.

Usigenyo ti sabali pay a pagarigan. Ipapantayo a masansan nga agar-aramid iti masturbasion ti maysa a Kristiano​—nga igaggagarana a gargarien ti bagina tapno maabbukay ti seksual a gagarna​—​agusar man iti pornograpia wenno saan. Nupay awan iti Biblia ti termino a “masturbasion,” sigurado a mangmulit iti isip ken puso ti kasta nga aramid, di ngamin? Saan kadi a ti agtultuloy a pannakamulit iti daytoy dadaelenna ti relasion ti maysa a tao kenni Jehova ket pagbalinenna dayta a tao a narugit iti imatang ti Dios? Ipapusotayo koma ti pammagbaga ni apostol Pablo a “dalusantayo . . . ti bagbagitayo iti tunggal pakatulawan iti lasag ken iti espiritu” ken ‘papatayentayo dagiti kameng ti bagitayo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum.’​—2 Cor. 7:1; Col. 3:5.

Daytoy lubong nga iturturayan ni Satanas panuynoyanna ti narugit a kababalin, iparegtana pay ketdi. Talaga a narigat a pagkedkedan ti sulisog a makiraman iti maysa a narugit nga aramid. Ngem dagiti pudno a Kristiano masapul a saanda a “magna a kas iti pannagna met dagiti nasion iti kinaawan magunggona iti pampanunotda.” (Efe. 4:17) Ipalubos ni Jehova nga agtultuloytayo a magna iti “Dalan ti Kinasanto” no liklikantayo ti narugit a kababalin, nalimed man dayta wenno saan.

“Awanto Sadiay ti Leon”

Tapno matagiragsak ti anamong ti nasantuan a Dios a ni Jehova, masapul a dadduma mangaramidda iti dakkel a panagbalbaliw iti kababalin ken panagsasaoda. Kuna ti Isaias 35:9: “Awanto sadiay ti leon, ket ti nagaramugam a kita dagiti atap nga animal saanto a sumang-at iti dayta,” kayatna a sawen, “iti Dalan ti Kinasanto.” Iti piguratibo a pamay-an, dagiti tattao a naranggas ken narungsot ti kababalin ken panagsasaoda maipadada kadagiti atap nga animal. Sigurado nga awan ti lugarda iti nalinteg a baro a lubong ti Dios. (Isa. 11:6; 65:25) Nasken ngarud a dagidiay agtarigagay iti anamong ti Dios ikkatenda dagiti inaanimal nga ugali ket itultuloyda ti magna iti dalan ti kinasanto.

“Maikkat koma kadakayo ti isuamin a makadangran a kinapait ken unget ken pungtot ken panagririaw ken nabassawang a panagsasao agraman ti isuamin a kinadakes,” ibalakad kadatayo ti Kasuratan. (Efe. 4:31) Iti Colosas 3:8, mabasatayo: “Iwaksiyo amin dagita manipud kadakayo, pungtot, unget, kinadakes, nabassawang a sasao, ken naalas a sasao manipud iti ngiwatyo.” Ti ebkas a “nabassawang a sasao” a nausar kadagitoy dua a bersikulo tukoyenna a nangnangruna dagiti makadangran, mangipababa a sasao, wenno panagtabbaaw.

Gagangayen ita dagiti makapasakit, dakes a panagsasao, uray iti uneg ti pagtaengan. Dagiti agassawa agisawangda kadagiti makapasakit, naranggas, wenno mangipababa a sasao iti maysa ken maysa ken kadagiti annakda. Awan koma ti kastoy a makapasakit a panagsasao iti pagtaengan dagiti Kristiano a pamilia.​—1 Cor. 5:11.

Ti Panagbalin a ‘Nasantuan iti Panagbuteng iti Dios’​—Maysa a Bendision!

Anian a pribilehio ti agserbi iti nasantuan a Dios a ni Jehova! (Jos. 24:19) Nakapatpateg ti naespirituan a paraiso a nangyegan ni Jehova kadatayo. Sigurado a ti panangtaginayontayo iti nasantuan a kababalin iti imatang ni Jehova ti kasayaatan a wagas ti biag.

Iti mabiiten, matungpalton ti kari ti Dios a Paraiso a daga. (Isa. 35:1, 2, 5-7) Dagidiay mangsegsegga iti dayta ken agtultuloy nga agbiag iti nadiosan a wagas maparaburandanto nga agnaed sadiay. (Isa. 65:17, 21) Ikagumaantayo koma ngarud ti agtultuloy nga agdayaw iti Dios iti nadalus a naespirituan a kasasaad ken taginayonentayo ti nasinged a relasiontayo kenkuana.

[Footnote]

[Ladawan iti panid 26]

Ania ti maikalikagum idi kadagiti Judio tapno makapagnada “iti Dalan ti Kinasanto”?

[Ladawan iti panid 27]

Ti pornograpia dadaelenna ti relasion ti maysa a tao kenni Jehova

[Ladawan iti panid 28]

“Maikkat koma kadakayo ti isuamin a . . . panagririaw ken nabassawang a panagsasao”