Maawagan a Naragsak Dagiti Mensahero ti Nadiosan a Talna
“Dagiti sinubbot ni Jehova agsublidanto, ken umayda idiay Sion a mabuyogan iti kankanta; ket agnanayon a rag-o ti agtaengto iti rabaw dagiti uloda.” ISAIAS 35:10.
1. Ania ti kasapulan unay ti lubong?
AD-ADDA a kasapulan ita ti sangatauan ti mensahero ti naimbag a damag. Kasapulan unay nga adda mangipakaammo iti kinapudno maipapan iti Dios ken dagiti panggepna, maysa a natured a saksi a mangpakdaar kadagiti nadangkes maipapan iti sumungsungad a pannakadadael ken tumulong kadagiti nalinteg panagpuspusona a tattao a makasarak iti nadiosan a talna.
2, 3. Iti kaso ti Israel, kasano a tinungpal ni Jehova ti karina a nailanad iti Amos 3:7?
2 Idi kaaldawan ti Israel, inkari ni Jehova a mangipaay iti kasta a kita dagiti mensahero. Iti arinunos ti maikasiam a siglo K.K.P., kinuna ni mammadto nga Amos: “Awanto ti aramiden ni Apo Jehova a dinto maipalgak ti palimedna kadagiti adipenna, dagiti mammadto.” (Amos 3:7) Kadagiti siglo kalpasan a naibalikas daytoy, adu ti nakaskasdaaw nga inaramid ni Jehova. Kas pagarigan, idi 607 K.K.P., siiinget a dinisiplinana ti ili a pinilina gapu ta nasukir ken nakabasolda iti dara. Dinusana met dagiti kabangibang a nasion a nagrag-o iti panagsagaba ti Israel. (Jeremias, kapitulo 46-49) Sa idi 539 K.K.P., immaniobra ni Jehova ti pannakatnag ti nabileg a Babilonia, a maysa idi a pannakabalin ti lubong, ket kas resultana, idi 537 K.K.P., nagsubli ti natda ti Israel iti dagada tapno bangonenda manen ti templo.—2 Cronicas 36:22, 23.
3 Napateg a pasamak dagitoy, ket maitunos kadagiti sao ni Amos, impalgak ni Jehova dagitoy a nasaksakbay kadagiti mammadto a nagserbi a mensahero, a nangpakdaar iti Israel maipapan iti mapasamak. Idi ngalay ti maikawalo a siglo K.K.P., imbaonna ni Isaias. Idi ngalay ti maikapito a siglo K.K.P., imbaonna ni Jeremias. Sa idi agngudo dayta a siglo, imbaonna ni Ezequiel. Naan-anay a nangpaneknek dagitoy ken dadduma pay a matalek a mammadto maipapan kadagiti panggep ni Jehova.
Panangilasin Kadagiti Mensahero ti Dios Ita
4. Ania ti mangipakita a kasapulan ti sangatauan dagiti mensahero ti talna?
4 Iti ngay kaaldawantayo? Adu ditoy lubong ti madanagan no makitada ti panagrakaya ti kagimongan ti tao. Maldaangan ti puso dagidiay mangipatpateg iti kinalinteg no makitada ti panaginsisingpet ken nakaro a kinadakes ti Kakristianuan. Kas impadto ni Jehova babaen ken Ezequiel, ‘agsasaibbek ken agsangsangitda gapu kadagiti amin a kinarimon a maar-aramid iti nagtengngaanna.’ (Ezequiel 9:4) Nupay kasta, adu ti di makaammo kadagiti panggep ni Jehova. Masapul a mapakaammuanda.
5. Kasano nga impakita ni Jesus nga adda dagiti mensahero iti kaaldawantayo?
5 Adda kadi asinoman ita nga agsasao a situtured a kas kada Isaias, Jeremias, ken Ezequiel? Impasimudaag ni Jesus nga adda. Idi impadtona dagiti pasamak iti kaaldawantayo, kinunana: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14) Siasino ita ti mangtungtungpal iti dayta a padto, nga agserserbi kas mensahero, a mangikaskasaba iti naimbag a damag? Dagiti pagpadaan ti kaaldawantayo ken ti tiempo ti nagkauna nga Israel tulongannatayo a mangsungbat iti dayta a saludsod.
6. (a) Deskribirenyo ti napasaran “ti Israel ti Dios” idi umuna a gubat sangalubongan. (b) Kasano a natungpal ti Ezequiel 11:17 iti nagkauna nga Israel?
6 Kadagiti nalidem nga aldaw ti Gubat Sangalubongan I, nakautibo ti moderno-aldaw nga ili ni Jehova, ti natda iti napulotan nga “Israel ti Dios,” kas ti Israel idiay Babilonia. (Galacia 6:16) Iti naespirituan a pamay-an, nakayawanda iti Babilonia a Dakkel, ti sangalubongan a timpuyog dagiti ulbod a relihion, a ti Kakristianuan ti kalatakan ken kadaksan kadagitoy. Nupay kasta, impakita dagiti sao ni Jehova ken Ezequiel a saanda a nabaybay-an. Kinunana: “Urnongenkayto nga aggapu kadagiti il-ili, ket tiponenkayto nga aggapu kadagiti dagdaga a nakaiwarwarasanyo ket itedkonto kadakayo ti daga ti Israel.” (Ezequiel 11:17) Tapno matungpal dayta a kari iti nagkauna nga Israel, imbaon ni Jehova ni Ciro a Persiano, a nangparmek iti Babilonia a Pannakabalin ti Lubong ken nangiwaya iti panagsubli dagiti natda iti Israel iti dagada. Ngem komusta met ngay iti kaaldawantayo?
7. Ania a pasamak idi 1919 ti nangipakita a nagtignayen ni Jesus maibusor iti Babilonia a Dakkel? Ilawlawagyo.
7 Iti rugrugi daytoy a siglo, adda natibker a pammaneknek nga agtigtignay idi ti Dakdakkel a Ciro. Asino? Awan sabali no di ni Jesu-Kristo, a naitrono manipud idi 1914 iti nailangitan a Pagarian. Pinaraburan daytoy natan-ok nga Ari dagiti napulotan a kakabsatna ditoy daga idi a nawayawayaan dagiti napulotan a Kristiano iti naespirituan a pannakakautibo ket nagsublida iti ‘dagada,’ ti naespirituan a kasasaadda, idi tawen 1919. (Isaias 66:8; Apocalipsis 18:4) No kasta, adda moderno-aldaw a kaitungpalan ti Ezequiel 11:17. Idi ugma, kasapulan a maparmek ti Babilonia tapno makasubli dagiti Israelita iti dagada. Ti pannakaisubli ti moderno-aldaw nga Israel ti Dios ket pammaneknek a natnagen ti Babilonia a Dakkel iti ima ti Dakdakkel a Ciro. Impakaammo ti maikadua nga anghel iti Apocalipsis kapitulo 14 daytoy a pannakatnag, idi impukkawna: “Ti Babilonia a Dakkel narban, isu a nangpainum kadagiti amin a nasion iti arak ti unget ti pannakiabigna!” (Apocalipsis 14:8) Anian a pannakabaliktad ti Babilonia a Dakkel, nangruna ti Kakristianuan! Ket anian a bendision kadagiti pudno a Kristiano!
8. Kasano ti panangiladawan ti libro ni Ezequiel iti kinaragsak ti ili ti Dios kalpasan ti pannakawayawayada idi 1919?
8 Iti Ezequiel 11:18-20, mabasatayo ti panangiladawan ti mammadto iti ragsak ti ili ti Dios kalpasan ti pannakaisublida. Ti umuna a kaitungpalan dagiti saona kaipapananna ti pannakadalus ti Israel idi kaaldawan da Esdras ken Nehemias. Kasta met laeng ti kaipapanan ti moderno-aldaw a kaitungpalanna. Kitaentayo no kasano. Kuna ni Jehova: “Umaydanto [iti dagada] ket ikkatendanto dagiti amin a makarurod a bambanagna ken amin dagiti kinarimonna manipud idiay.” Kas naipadto, nangrugi idi 1919, dinalusan ni Jehova ti ilina ken pinabarona ti pigsada tapno agserbida kenkuana. Rinugianna nga inikkat iti naespirituan a lugarda amin a Binababilonia nga aramid ken doktrina a nangrugit kadakuada iti imatangna.
9. Aniada a naisangsangayan a bendision ti inted ni Jehova iti ilina, nangrugi idi 1919?
9 Kalpasanna, sigun iti bersikulo 19, ituloy a kunaen ni Jehova: “Ket itdekto kadakuada ti maysa a puso, ket ikkakto ti unegyo iti baro nga espiritu; ket ikkatekto iti lasagda ti bimmato a puso, ket itedkonto kadakuada ti puso a lasag.” Maitunos kadagitoy a sao, idi 1919, pinagkaykaysa ni Jehova dagiti napulotan nga adipenna, nga inikkanna ida iti “maysa a puso,” no ar-arigen, tapno agserbida a “situtunos” kenkuana. (Sofonias 3:9) Mainayon pay, inikkan ni Jehova ti ilina iti nasantuan nga espiritu a mangpapigsa kadakuada iti trabaho a panangasaba ken mangpataud kadakuada kadagiti nasayaat a bunga a nadeskribir iti Galacia 5:22, 23. Ket imbes a natangken, bimmato a puso, inikkan ida ni Jehova iti nalukneng, natulok, natudio a puso, maysa a puso a mangtungpal iti pagayatanna.
10. Apay a binendisionan ni Jehova ti naisubli nga ilina manipud idi 1919?
10 Apay nga inaramidna daytoy? Ilawlawag ni Jehova a mismo. Mabasatayo iti Ezequiel 11:20: “Tapno magnada koma kadagiti linlintegko, ket salimetmetanda dagiti bilbilinko, ket tungpalenda ida: ket isudanto ti ilik, ket siakto ti Diosda.” Nasursuro ti Israel ti Dios ti agtulnog iti linteg ni Jehova, imbes a dagiti bukodda a kapanunotan ti surotenda. Nasursuroda nga aramiden ti pagayatan ti Dios a di agbuteng iti tao. Gapuna, naidumada unay kadagiti sinsinan a Kristiano iti Kakristianuan. Isuda ti ili ni Jehova. Gapu ta kasta, nakasagana ni Jehova a mangusar kadakuada kas mensaherona, ti “matalek ken masirib nga adipenna.”—Mateo 24:45-47.
Ti Kinaragsak Dagiti Mensahero ti Dios
11. Kasano nga inladawan ti libro ni Isaias ti kinaragsak ti ili ni Jehova?
11 Mailadawanyo kadi ti ragsakda idi nabigbigda ti naparaburan a kasasaadda? Kas grupo, maikunada dagiti sao ti Isaias 61:10: “Siak agragsakakto unay ken ni Jehova, ti kararuak agrag-onto iti Diosko.” Natungpal kadakuada ti kari ti Isaias 35:10: “Dagiti sinubbot ni Jehova agsublidanto, ken umayda idiay Sion a mabuyogan iti kankanta; ket agnanayon a rag-o ti agtaengto iti rabaw dagiti uloda: magun-oddanto ti ragsak ken rag-o, ket ti ladingit ken sasainnek agtalawdanto.” Kasta ti kinaragsak dagiti mensahero ti nadiosan a talna ni Jehova idi 1919 idi rinugianda nga ikasaba ti naimbag a damag iti intero a sangatauan. Manipud idi agingga ita, saanda a simmardeng a mangaramid iti daytoy a trabaho, ket dimmakkel ti ragsakda. Iti Sermonna iti Bantay, kinuna ni Jesus: “Naragsak dagiti mannakikappia, yantangay maawagandanto iti ‘annak ti Dios.’” (Mateo 5:9, footnote iti Ingles.) Pudno dayta iti natda kadagiti napulotan nga “annak ti Dios” manipud idi 1919 agingga ita.
12, 13. (a) Siasino ti timmipon iti Israel ti Dios nga agserbi ken Jehova, ket ania a trabaho ti inaramidda? (b) Ania a dakkel a rag-o ti sagsagrapen dagiti napulotan nga adipen ni Jehova?
12 Iti panaglabas dagiti tawen, immadu ti bilang ti Israel ti Dios agingga iti dekada ti 1930 idi dandanin maturpos ti pannakaurnong ti natda kadagiti napulotan. Simmardeng kadi idin ti panagadu dagiti mangikaskasaba iti naimbag a damag? Saan a pulos. Nangrugi a nagparang idin ti dakkel a bunggoy dagiti Kristiano nga addaan naindagaan a namnama, ket timmipon dagitoy kadagiti napulotan a kakabsatda iti trabaho a panangasaba. Nakita ni apostol Juan daytoy dakkel a bunggoy iti sirmata, ket nabatad ti panangiladawanna kadakuada: “Addada iti sanguanan ti trono ti Dios; ket mangipapaayda ti sagrado a panagserbi kenkuana iti aldaw ken rabii.” (Apocalipsis 7:15) Wen, ginanetgetan ti dakkel a bunggoy ti nagserbi iti Dios. Kas resultana, idi mangrugin a bumassit ti bilang dagiti napulotan, kalpasan ti 1935, dagitoy a matalek a kakadua ti nangyabante iti trabaho a panangasaba a buyogen ti naparayray a regget.
13 Iti kastoy a wagas, natungpal ti Isaias 60:3, 4: “Dagiti nasnasion umaydanto ita lawagmo, ken dagiti ar-ari iti raniag ta ileleggakmo. Itangadmo dagita matam iti aglikmut ket kumitaka: isuda amin aguurnongda, umayda kenka; dagiti annakmo a lallaki umaydanto nga aggapuda iti adayo, ket dagiti annakmo a babbai masakroydanto kadagiti taktakkiag.” Nagpintas ti pannakailadawan ti ragsak nga inyeg dagitoy a pasamak iti Israel ti Dios iti Isaias 60:5, nga iti dayta mabasatayo: “Iti kasta makitamto ket agraniagka, ket ta pusom agrag-onto ken mapadakkelto; agsipud ta ti kinawadwad ti taaw agturongdanto kenka, ti sanikua dagiti nasnasion umayto kenka.”
Umab-abante ti Organisasion ni Jehova
14. (a) Ania a nailangitan a bambanag ti nakita ni Ezequiel iti sirmata, ket ania ti naibilin kenkuana? (b) Ania ti naawatan ti ili ni Jehova iti moderno a panawen, ket ania nga obligasion ti nariknada?
14 Idi 613 K.K.P., nakita ni Ezequiel iti sirmata ti nailangitan, kasla karuahe nga organisasion ni Jehova nga umab-abante. (Ezequiel 1:4-28) Kalpasanna, kinuna ni Jehova kenkuana: “Anak ti tao, inka, dumtengka iti balay ti Israel, ket isaom dagiti saok kadakuada.” (Ezequiel 3:4) Iti daytoy tawen 1997, makitatayo nga umab-abante pay laeng a di sumarsardeng ti nailangitan nga organisasion ni Jehova a mangibanag kadagiti panggep ti Dios. Gapuna, kasapulan pay latta nga ipakaammotayo kadagiti sabsabali dagidiay a panggep. Idi kaaldawanna, insao ni Ezequiel dagiti sao a direkta nga impaltiing ni Jehova. Iti kaaldawantayo, isasaotayo dagiti sao a naggapu iti naipaltiing a Sao ni Jehova, ti Biblia. Ket anian a mensahe ti adda iti dayta a libro a maipaay iti sangatauan! Bayat nga adu ti madandanagan iti masanguanan, ipakita ti Biblia a nakarkaro nga adayo dagiti bambanag—ken maigiddato iti dayta, nasaysayaat nga adayo—ngem iti ipagarupda.
15. Apay a nakarkaro dagiti kasasaad ngem iti ipagarup ti adu ita?
15 Nakarkaro dagiti bambanag agsipud ta, kas naadaltayo kadagiti napalabas nga artikulo, din agbayag madadaelto a naan-anay ti Kakristianuan ken amin a dadduma pay nga ulbod a relihion, kas iti Jerusalem idi 607 K.K.P. Kanayonanna, ti intero a sangalubongan a napolitikaan a sistema, a nailadawan iti libro nga Apocalipsis kas atap nga animal nga addaan pito nga ulo ken sangapulo a sara, ket asidegen a maikisap, kas kadagiti adu a pagano a kabangibang ti Jerusalem. (Apocalipsis 13:1, 2; 19:19-21) Idi kaaldawan ni Ezequiel, napatak ti panangiladawan ni Jehova iti buteng a pinarnuay ti sumungsungad a pannakadadael ti Jerusalem. Ngem dakdakkel nga adayo ti kaipapanan dagiti saona no makita dagiti tattao ti umad-adani a pannakadadael daytoy a lubong. Kinuna ni Jehova ken Ezequiel: “Agsaibbekka ngarud, sika anak ti tao; iti pannakaspak dagiti lomom ket sipapait agsaibbekkanto iti imatangda. Ket maaramidto, no kunada kenka, Apay agsaibbekka? a sika kunamto, Gapu kadagiti damdamag, ta umay; ket amin a puso malunagto, ket amin nga im-ima kumapuyto, ket amin nga espiritu matalimudawto, ket amin a tumtumeng kumapsutto a kas ti danum; adtoy, umay, ket maaramidto, kuna ni Apo Jehova.” (Ezequiel 21:6, 7; Mateo 24:30) Dandanin dumteng dagiti makapakullayaw a pasamak. Ti napasnek a pannakaseknantayo kadagiti padatayo a tattao gutugotennatayo a mangpakdaar, mangipakaammo iti “damag” maipapan iti um-umay a pungtot ni Jehova.
16. Kadagiti naemma, apay a nasaysayaat dagiti bambanag ngem iti ipagarup ti adu?
16 Maigiddato iti dayta, kadagiti nasingpet panagpuspusona, nasaysayaat nga adayo dagiti bambanag ngem iti ipagarup ti kaaduan a tattao. Kasano a kasta? Agsipud ta natay ni Jesu-Kristo gapu kadagiti basoltayo ken agturturayen a kas Ari ti Pagarian ti Dios. (1 Timoteo 1:15; Apocalipsis 11:15) Din agbayag, marisutto dagiti kasla di masolbar a parikut ti sangatauan babaen iti dayta a nailangitan a Pagarian. Awanton ti ipapatay, sakit, kinadakes, bisin, ken krimen, ket agturayto ti Pagarian ti Dios iti paraiso a daga nga awan ti bumusor. (Apocalipsis 21:3, 4) Tagiragsakento ti sangatauan ti nadiosan a talna—natalna a relasion ken Jehova a Dios ken iti maysa ken maysa.—Salmo 72:7.
17. Aniada a panagrang-ay ti mangparag-o iti puso dagiti mensahero ti nadiosan a talna?
17 Iti dadduma a paset ti lubong, nakaad-adu dagiti naemma a tattao a mangipangpangag iti daytoy a mensahe ti nadiosan a talna. Kas panangdakamat iti sumagmamano laeng a pagarigan, idi napan a tawen, nagreport ti Ukraine iti 17 porsiento nga iyaadu dagiti agibumbunannag. Nagreport ti Mozambique iti 17 porsiento a panagrang-ay, ti Lithuania, 29 porsiento a panagrang-ay. Naaddaan ti Russia iti 31 porsiento a panagrang-ay, bayat a 52 porsiento ti nginatuan ti bilang dagiti agibumbunannag idiay Albania. Dagitoy a panagrang-ay irepresentarda ti pinullo a ribu a nasingpet panagpuspusona a tattao a mayat a mangtagiragsak iti nadiosan a talna ken dimmasig iti kinalinteg. Pagrag-oan dagiti amin a Kristiano ti kasta a napartak a panagrang-ay.
18. Dumngeg man dagiti tattao wenno saan, ania koma ti kababalintayo?
18 Madadaan kadi a dumngeg dagiti tattao iti lugar a pagnanaedanyo? No wen, makipagrag-okami kadakayo. Nupay kasta, iti dadduma a teritoria, kasapulan ti adu nga oras ti naregget a panagtrabaho sakbay a makasarak iti uray maysa nga interesado a tao. Simmadut wenno naupay kadin dagidiay agserserbi kadagita a teritoria? Saan. Silalagip dagiti Saksi ni Jehova kadagiti sao ti Dios ken Ezequiel idi damo nga imbaonna ti agkabannuag a mammadto a mangasaba kadagiti Judio a kailianna: “Isuda, uray dumngegdanto, wenno madidanto (ta isuda nasukirda a balay), nupay kasta ammodanto nga addan mammadto kadakuada.” (Ezequiel 2:5) Kas ken Ezequiel, itultuloytayo nga isarsarita kadagiti tattao ti maipapan iti nadiosan a talna, dumngegda man wenno saan. No dumngegda, maragsakantayo. No saandatayo nga ikankano, laisen, idadanesdatayo pay ketdi, aganustayo. Ay-ayatentayo ni Jehova, ket kuna ti Biblia: “Ti ayat . . . anusanna ti isuamin a bambanag.” (1 Corinto 13:4, 7) Gapu ta mangaskasabatayo a buyogen ti panagibtur, ammo dagiti tattao no siasino dagiti Saksi ni Jehova. Ammoda ti mensahetayo. Inton dumteng ti panungpalan, ammoda nga inkagumaan dagiti Saksi ni Jehova a tulongan ida a mangtagiragsak iti nadiosan a talna.
19. Kas ad-adipen ti pudno a Dios, ania a dakkel a pribilehio ti ipatpategtayo?
19 Adda kadi dakdakkel a pribilehio ngem iti panagserbi ken Jehova? Awan! Agtaud ti kadakkelan a ragsaktayo iti relasiontayo iti Dios ken iti pannakaammo nga ar-aramidentayo ti pagayatanna. “Bendito ti umili a nakaammo iti nakaay-ayo a kanta: magnada, O Jehova, iti silnag ta langam.” (Salmo 89:15) Sapay koma ta ipategtayo a kanayon ti rag-otayo kas mensahero ti talna nga imbaon ti Dios iti sangatauan. Sapay koma ta sigaganetget nga aramidentayo ti pasettayo iti daytoy a trabaho agingga nga ibaga ni Jehova a nalpasen.
Malagipyo Kadi?
◻ Siasino dagiti mensahero ti talna nga imbaon ti Dios ita?
◻ Kasanotay nga ammo a natnag ti Babilonia a Dakkel idi 1919?
◻ Ania ti kangrunaan a pakaseknan ti “dakkel a bunggoy”?
◻ Apay a dakdakes ti masanguanan ngem iti ipagarup ti kaaduan a tattao ita?
◻ Kadagiti nalinteg panagpuspusona, apay a nasaysayaat ti masanguanan ngem iti ipagarupda?
[Dagiti Ladawan iti panid 21]
Adu ti madanagan no makitada ti panagrakaya ti kagimongan ti tao
[Dagiti Ladawan iti panid 23]
Dagiti mensahero ti nadiosan a talna ti kararagsakan a tattao ditoy daga ita