MANANGYUNA

Daydiay mapan nga umun-una tapno isaganana ti iyaay ti sabali. Mabalin a ramanen daytoy ti panagsawar ken panagsimisim, panangwaya iti dalan, panangiwaragawag ken panangipaay iti pakaammo iti iyaadani ti sabali, wenno panangipakita iti dalan a suroten ti sabsabali. Gagangay, ngem saan a kanayon, a ti manangyuna basbassit ti pategna ngem daydiay tao a sumarsaruno.

Kaugalian dagiti taga Daya a dagiti tumataray mapanda iti sanguanan ti naarian a karuahe tapno isagana ken ipakaammoda ti iyaay ti ari ken kaaduanna a tapno isu badanganda. (1Sm 8:11) Ti kasta a naarian a kinatan-ok ti tinulad ni Absalom, ken kasta met ni Adonias idi agangay, tapno manayonan ti pannakaidayaw ti panagrebelde ti tunggal maysa kadakuada, ken tapno agparang a kasla adda iyaannugot iti kasta a panagrebelde. Ngarud, nangisaadda iti 50 a tumataray iti sanguanan dagiti mismo a karuaheda.​—2Sm 15:1; 1Ar 1:5; kitaenyo ti TUMATARAY.

Iti kinapudnona, ni Juan a Manangbautisar ti manangyuna ni Kristo, kas kaitungpalan ti Isaias 40:3 ken Malakias 3:1 ken 4:5, 6: “Adda mangipukpukkaw idiay let-ang: ‘Wayaanyo ti dalan ni Jehova. Palintegenyo ti kangrunaan a kalsada.’” “Ibaonko ti mensaherok, ket masapul a mangwaknit iti maysa a dalan iti sanguanak.” Ngarud, ti pakauna a waragawag ni Juan ginutugotna dagiti tattao a mangsegga, manginanama, ken aguray ken Jesus, tapno dagitoy met ket umimdengda kenkuana, nga isu padayawanda, ken surotenda. (Mt 3:1-12; 11:7, 10, 14; Mr 9:11-13; Lu 1:13-17, 76; Jn 1:35-37) Iti umasping a pamay-an, naibaon dagiti mensahero nga umun-una ngem ni Jesus, ket simrek dagitoy iti maysa a purok dagiti Samaritano “tapno agsaganada a maipaay kenkuana.”​—Lu 9:52.

Nupay kasta, ni Jesus a mismo daydiay natukoy iti kakaisuna a teksto iti Kasuratan a nakaaramatan ti sao a “manangyuna.” (Heb 6:19, 20) Isu saan a maysa a manangyuna iti anag a nababbaba ngem dagidiay simmaruno kenkuana. Imbes ketdi, isu ti kaunaan a simrek iti nailangitan a dayag, a linuktan ken insaganana ti dalan maipaay iti nailangitan a kongregasion dagiti sumursurot iti addangna. (Jn 14:2, 3) Gapuna, addaanda iti kinatured nga umadani iti Dios babaen iti dalan a linuktan ti Manangyunada.​—Heb 10:19-22.