Aprobetsarem Kadi ti Tulong ni Jehova?

“Ni Jehova ti katulongak; saanakto nga agbuteng.”​—HEBREO 13:6.

1, 2. Apay a napateg nga aprobetsarentayo ti tulong ken panangigiya ni Jehova iti biagtayo?

PANUNOTEM a magmagnaka iti desdes ti bantay. Ngem saanka nga agmaymaysa ta kaduam ti kasayaatan a giya. Adayo nga ad-adu ti kapadasanna ken naan-andur, ket siaanus a saranayennaka. Madlawna a pasaray maitibkolka. Gapu ta maseknan, iyawatna ti imana tapno tulongannaka a lumasat iti maysa a delikado a lugar. Pagkedkedam kadi ti tulongna? Siempre saan! Agpegpeggad ti kinatalgedmo.

² Kas Kristiano, narigat ti dalan a sursurotentayo. Agmaymaysatayo kadi iti dayta nailet a dalan? (Mateo 7:14) Saan, ipakita ti Biblia a ti kasayaatan a Giyatayo a ni Jehova a Dios ipalubosna a makipagnatayo kenkuana. (Genesis 5:24; 6:9) Tulongan ngata ni Jehova dagiti adipenna bayat ti pannagnada? Kunana: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’” (Isaias 41:13) Kas iti giya a nadakamattayo iti ilustrasion, siaasi a tumulong ken makigayyem ni Jehova kadagidiay mangikagkagumaan a makipagna kenkuana. Sigurado nga awan kadatayo ti agkedked iti tulongna!

3. Ania a salsaludsod ti usigentayo iti daytoy nga artikulo?

³ Iti immuna nga artikulo, napagsasaritaantayo ti uppat a pamay-an no kasano a tinulongan ni Jehova dagiti adipenna idi umuna a tiempo. Kasta met laeng kadi ti panangtulongna kadagiti adipenna ita? Kasanotay a masigurado a maaprobetsartayo ti aniaman kadagita a tulongna? Usigentayo dagita a saludsod tapno ad-adda a makapagtalektayo a ni Jehova ti pudno a Katulongantayo.​—Hebreo 13:6.

Tulong Babaen Dagiti Anghel

4. Apay a dagiti adipen ti Dios ita makapagtalekda iti tulong dagiti anghel?

⁴ Tultulongan kadi dagiti anghel dagiti agdama nga adipen ni Jehova? Wen, tultulonganda. Pudno, saan a kasapulan nga aglasagda tapno maispalda dagiti pudno nga agdaydayaw manipud iti peggad. Uray idi panawen ti Biblia, manmano laeng a bimmallaet dagiti anghel iti kasta a wagas. Kaaduan kadagiti pamay-anda a timmulong ket saan a nakita ti tattao, kas met laeng ita. Kaskasdi, makapabileg kadagidiay agserserbi iti Dios ti pannakaammo a tultulongan ida dagiti anghel. (2 Ar-ari 6:14-17) Adda rasontayo a mamati met iti dayta.

5.Kasano nga ipakita ti Biblia nga adda paset dagiti anghel iti trabaho a panangasaba ita?

⁵ Nangnangruna nga interesado dagiti anghel ni Jehova iti maysa a naisangsangayan a trabaho a nakairamanantayo. Ania dayta a trabaho? Masarakantayo ti sungbat iti Apocalipsis 14:6: “Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili.” Ti “agnanayon a naimbag a damag” ket nalawag a nainaig iti “naimbag a damag ti pagarian” nga impadto ni Jesus a “maikaskasabanto iti intero a mapagnaedan a daga maipaay a pangsaksi kadagiti amin a nasion” sakbay a dumteng ti panungpalan daytoy sistema ti bambanag. (Mateo 24:14) Siempre, saan a dagiti anghel ti mismo a mangaskasaba. Intalek ni Jehova kadagiti tattao dayta a dakkel nga annongen. (Mateo 28:19, 20) Saan kadi a makaliwliwa a maammuan a bayat nga itungtungpaltayo dayta nga annongen, tultulongandatayo dagiti anghel, mamasirib ken mannakabalin nga espiritu a parparsua?

6, 7. (a) Ania ti mangipamatmat a tumultulong dagiti anghel iti panangasabatayo? (b) Kasanotayo a manamnama ti tulong dagiti anghel ni Jehova?

⁶ Adu ti pammaneknek a tumultulong dagiti anghel iti trabahotayo. Kas pagarigan, masansan a mangngegtayo a bayat ti panangasaba, adda dagiti Saksi ni Jehova a makasarita ti maysa a tao a nabiit pay a nangikararag iti tulong ti Dios tapno masarakanna ti kinapudno. Nagadu ti kasta a kapadasan ket nagrigat a panunoten a naiparparna laeng dagita. Gapu iti kasta a tulong dagiti anghel, umadu nga umadu ti tattao a nakasursuro a mangyaplikar iti ipakpakaammo ti “anghel nga agtaytayab iti nagtangatangan”: “Agbutengkayo iti Dios ket idaydayawyo.”​—Apocalipsis 14:7.

⁷ Kayatyo kadi a tagiragsaken ti tulong dagiti nabileg nga anghel ni Jehova? Aramidenyo ngarud ti amin a kabaelanyo a mangitungpal iti ministerioyo. (1 Corinto 15:58) Bayat nga ipaaytayo ti amin-kararua a panagserbi iti daytoy a naisangsangayan nga annongen nga intalek ni Jehova, manamnamatayo ti tulong dagiti anghel.

Tulong Manipud iti Panguluen Dagiti Anghel

8.Ania a nangato a saad idiay langit ti tagtagiragsaken ni Jesus, ken apay a makaliwliwa dayta kadatayo?

⁸ Ipapaay met ni Jehova ti sabali a kita ti tulong babaen ti anghel. Deskribiren ti Apocalipsis 10:1 ti nakaskasdaaw a “napigsa nga anghel” a ti “rupana kas iti init.” Daytoy nga anghel iti sirmata iladawanna ni naipadayag a Jesu-Kristo iti nailangitan a pannakabalinna. (Apocalipsis 1:13, 16) Talaga kadi a maysa nga anghel ni Jesus? No an-anagen, wen, yantangay isu ket maysa nga arkanghel. (1 Tesalonica 4:16) Ania ti arkanghel? Dayta a sao kaipapananna “kangrunaan nga anghel,” wenno “pangulo nga anghel.” Ni Jesus ti kabilgan kadagiti amin nga espiritu nga annak ni Jehova. Isu ti insaad ni Jehova a mamangulo kadagiti amin a buyot nga anghel. Daytoy nga arkanghel ket pudno a nabileg a gubuayan ti tulong. Kadagiti ania a pamay-an?

9, 10. (a) Kasano nga agbalin a “katulongantayo” ni Jesus no makabasoltayo? (b) Kasano a makatulong ti ulidan ni Jesus?

⁹ Insurat ni lakayen nga apostol Juan: “No ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg.” (1 Juan 2:1) Apay nga impasimudaag ni Juan a ‘katulongantayo’ ni Jesus nangnangruna no ‘makaaramidtayo iti basol’? Bueno, inaldaw a makabasoltayo, ket ti basol mangiturong iti ipapatay. (Eclesiastes 7:20; Roma 6:23) Ngem indatag ni Jesus ti biagna kas daton agpaay iti basbasoltayo. Ken adda isuna iti dasig ti naasi nga Amatayo tapno umararaw maipaay kadatayo. Kasapulantayo amin dayta a tulong. Kasanotay a matagiragsak dayta? Masapul a pagbabawyantayo dagiti basoltayo ken dumawattayo iti pammakawan naibatay iti daton ni Jesus. Masapul met a liklikantayo nga uliten ti nakabasolantayo.

¹⁰ Malaksid iti ipapatayna maipaay kadatayo, impasdek ni Jesus ti perpekto nga ulidan a tuladentayo. (1 Pedro 2:21) Makaisuro ti ulidanna, a tumulong a mangilinteg iti danatayo tapno maliklikantayo dagiti nakaro a basol ken maay-ayotayo ni Jehova a Dios. Saantay kadi a maragsakan iti kasta a tulong? Inkari ni Jesus kadagiti pasurotna nga adda sabali pay a maipaay a katulongan.

Ti Tulong ti Nasantuan nga Espiritu

11, 12. Ania ti espiritu ni Jehova, kasano kabileg, ken apay a kasapulantayo dayta ita?

¹¹ Inkari ni Jesus: “Agkiddawakto iti Ama ket ikkannakayto iti sabali a katulongan tapno adda kadakayo iti agnanayon, ti espiritu ti kinapudno, a saan a mabalin nga awaten ti lubong.” (Juan 14:16, 17) Dayta nga “espiritu ti kinapudno,” wenno nasantuan nga espiritu, ket saan a persona no di ket maysa a puersa​—ti mismo nga aktibo a puersa ni Jehova. Awan limitasionna dayta a pannakabalin. Isu dayta ti puersa nga inusar ni Jehova a nangparsua iti uniberso, a nangaramid kadagiti nakaskasdaaw a milagro, ken nangipaay kadagiti sirmata a nangipalgak iti pagayatanna. Gapu ta saan nga us-usaren ni Jehova ti espirituna kadagiti kasta nga espesipiko a pamay-an ita, kayatna kadi a sawen a ditay kasapulanen dayta?

¹² Saan! Kadagitoy “napeggad a tiempo a narigat a pakilangenan,” ad-adda a kasapulantayo ti espiritu ni Jehova. (2 Timoteo 3:1) Pabilgennatayo nga agibtur iti sidong dagiti pakasuotan. Tulongannatayo a mangpatanor kadagiti agkakaimbag a galad a mangpasinged iti relasiontayo ken ni Jehova ken kadagiti kakabsattayo iti pammati. (Galacia 5:22, 23) Kasanotay ngarud a magunggonaan iti dayta a nagsayaat a tulong ni Jehova?

13, 14. (a) Apay a makasiguradotayo a sidadaan nga ipaay ni Jehova ti nasantuan nga espirituna kadagiti adipenna? (b) Ania a tignay ti mangipakita a talaga a ditay ap-aprobetsaren ti sagut a nasantuan nga espiritu?

¹³ Umuna, masapul nga ikararagtayo ti tulong ti nasantuan nga espiritu. Kinuna ni Jesus: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:13) Wen, ni Jehova ti kasayaatan a matarigagayan nga Ama. No buyogen ti pammati ket sipapasnek a kiddawentayo kenkuana ti nasantuan nga espiritu, sigurado nga ipaayna dayta kadatayo. Ti saludsod ngarud ket, Kidkiddawentayo kadi dayta? Nasken nga ikararagtayo dayta iti inaldaw.

¹⁴ Maikadua, maaprobetsartayo dayta a sagut babaen ti pannakitunos iti dayta. Kas pagarigan: Makidangdangadang ti maysa a Kristiano iti pagannayasan nga agbuya iti pornograpia. Inkararagna ti nasantuan nga espiritu tapno agpatulong a mangliklik iti dayta a narugit nga aramid. Nagpabalakad kadagiti Kristiano a panglakayen, ket binalakadanda nga agtignay a dagus, a liklikanna ti umassibay kadagiti kasta a narugit a material. (Mateo 5:29) Ania ngay no iyaleng-alengna ti balakadda ken itultuloyna ti agbuya kadagiti kasta a material? Agtigtignay kadi maitunos iti kararagna nga isu ket tulongan ti nasantuan nga espiritu? Wenno agpegpeggad ketdi a mapagleddaangna ti espiritu ti Dios ken mapukawna dayta a sagut? (Efeso 4:30) Wen, masapul nga aramidentayo ti amin a kabaelantayo a mangsigurado nga agtultuloy nga agayus kadatayo dayta a nagsayaat a tulong manipud ken ni Jehova.

Tulong Babaen ti Sao ti Dios

15. Kasanotay a maipakita a ditay iyaleng-aleng ti Biblia?

¹⁵ Ti Biblia ket maysa a gubuayan ti tulong kadagiti matalek nga adipen ni Jehova iti adun a siglo. Imbes nga iyaleng-alengtayo ti Nasantuan a Kasuratan, nasken a laglagipentayo a nagbileg dayta a gubuayan ti tulong. Tapno magun-odtayo dayta a tulong, masapul nga agreggettayo. Masapul nga iramantayo ti panagbasa iti Biblia iti regular a rutinatayo.

16, 17. (a) Kasano nga inladawan ti Salmo 1:2, 3 dagiti gunggona nga iyeg ti panagbasa iti linteg ti Dios? (b) Kasano nga impamatmat ti Salmo 1:3 a kasapulantayo ti panagregget?

¹⁶ Kuna ti Salmo 1:2, 3 maipapan iti nadiosan a tao: “Ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii. Ket sigurado nga agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.” Makitayo kadi ti punto dayta a teksto? Naglaka a basaen dagita a sasao ken panunoten nga iladawanda laeng ti maysa a makaay-ayo a buya ti kinatalinaay​—maysa a nalinong a kayo iti igid ti karayan. Nagsayaat la ketdi ti agpariir iti kasta a lugar! Ngem saan a ti panaginana ti ipagpaganetget kadatayo ti salmista. Adda sabali a kayatna nga iladawan kadatayo, maysa nga agkalikagum iti panagregget. Kasano?

¹⁷ Kitaenyo ta ti kayo a nadakamat ditoy ket saan a basta nalinong a kayo a naiparna a nagtubo iti igid ti karayan. Agbungbunga daytoy a kayo, a nairanta a “naimula” iti maysa a napili a disso​—“iti igid dagiti pagayusan ti danum.” Kasano a dimmakkel dayta a kayo iti asideg ti adu a pagayusan ti danum? Bueno, ti makinkukua iti maysa a minuyongan mabalin nga agkali kadagiti irigasion a pagpadanum kadagiti kayo a napateg kenkuana. No kasta, nalawag ti punto! No iti naespirituan nga anag ket agrangpayatayo a kas iti dayta a kayo, maigapu dayta iti dakkel a panagsakripisio dagidiay timmulong kadatayo. Naitimpuyogtayo iti maysa nga organisasion a direkta a mangipapaay kadatayo iti nasin-aw a danum ti kinapudno, ngem masapul nga aramidentayo ti pasettayo. Nasken nga agsepentayo dayta a nagpateg a danum babaen ti panagmennamenna ken panagsukimat tapno umukuok iti isip ken pusotayo dagiti kinapudno iti Sao ti Dios. Iti kasta, makapataudtayo met kadagiti agkakaimbag a bunga.

18. Ania ti kasapulan tapno masarakantayo dagiti sungbat ti Biblia kadagiti saludsodtayo?

¹⁸ Awan ti maitulong kadatayo ti Biblia no adda laeng dayta iti estante ket ditay met basaen. Saan met nga anting-anting dayta​—nga uray ikidemtay ti matatayo, bukbukodna nga aglukat ti Biblia iti panid nga ayan ti sungbat ti saludsodtayo. No maipasangotayo iti panagdesision, masapul a kalientayo ti “pannakaammo ti Dios” a kasla nakatalimeng a gameng. (Proverbio 2:1-5) Ti naanep ken naannad a panagsukimat ket masansan a kasapulan tapno masarakan ti Nainkasuratan a balakad a maitutop kadagiti espesipiko a kasapulantayo. Adu ti naibatay iti Biblia a publikasiontayo a makatulong iti panagsiraraktayo. No usarentayo dagitoy tapno sigagagar nga agkali kadagiti agkakapateg a sirib a masarakan iti Sao ti Dios, ap-aprobetsarentayo ti tulong ni Jehova.

Tulong Babaen Kadagiti Kapammatian

19. (a) Apay a mabalin a matmatan dagiti artikulo iti Ti Pagwanawanan ken Agriingkayo! kas tulong a naipaay babaen dagiti kapammatian? (b) Kasano a natulongannakayo ti maysa nga artikulo iti maysa kadagiti pagbasaantayo?

¹⁹ Kanayon nga agtitinnulong dagiti adipen ni Jehova. Nagbalbaliw kadi dayta a pamay-an ni Jehova? Saan a pulos. Awan duadua a malagip ti tunggal maysa kadatayo dagiti gundaway a tinulongandatayo dagiti kapammatiantayo iti umiso a tiempo. Kas pagarigan, malagipyo kadi ti sumagmamano nga artikulo iti Ti Pagwanawanan wenno Agriingkayo! a nangipaay iti kasapulanyo a liwliwa wenno timmulong a nangrisut iti parikut wenno simmaranget iti maysa a karit iti pammatiyo? Impaay ni Jehova dayta a tulong kadakayo babaen “ti matalek ken masirib nga adipen” a nadutokan a mangipaay ‘iti taraon iti umiso a tiempo.’​—Mateo 24:45-47.

20. Kadagiti ania a wagas a maipakita dagiti Kristiano a panglakayen a ‘sagutda a tattao’?

²⁰ Ngem masansan a mas direkta ti tulong nga ipaay kadatayo dagiti kapammatian. Maysa a Kristiano a panglakayen ti nangted iti palawag a nangtukay iti pusotayo, wenno nagaramid iti panagipastor a panagsarungkar a timmulong kadatayo a nangibtur iti narigat a kasasaad, wenno nangipaay iti naayat a balakad a timmulong kadatayo a mangbigbig ken mangdaer iti maysa a pagkapuyantayo. Maysa nga agyamyaman a Kristiano ti nagsurat maipapan iti panangtulong kenkuana ti maysa a panglakayen: “Bayat ti panangasabami, pinabilegnak a mangyebkas iti riknak. Iti rabii sakbay unay dayta, nagkararagak ken ni Jehova, a kiniddawko nga adda koma maysa a mabalinko a pangipeksaan iti riknak. Kabigatanna, sidudungngo a kinasaritanak daytoy a kabsat. Tinulongannak a mangkita no kasano a nabayagen a tultulongannak ni Jehova. Agyamanak ken ni Jehova ta tinignayna daytoy a panglakayen a tumulong kaniak.” Iti amin a wagas, dagiti Kristiano a panglakayen ipakitada a ‘sagutda a tattao,’ nga impaay ni Jehova babaen ken ni Jesu-Kristo tapno tulongandatayo a makapagtultuloy iti dalan ti biag.​—Efeso 4:8.

21, 22. (a) Ania dagiti resultana no iyaplikar dagiti kameng ti kongregasion ti balakad a masarakan iti Filipos 2:4? (b) Apay a napateg uray dagiti simple nga aramid ti kinamanangngaasi?

²¹ Malaksid kadagiti panglakayen, amin a matalek a Kristiano kayatda nga iyaplikar ti naipaltiing a bilin a ‘kitaenda, saan a ti personal a panaginteres iti laeng bukodda a bambanag, no di ket kasta met ti personal a panaginteres iti bambanag ti sabsabali.’ (Filipos 2:4) No dayta a balakad ket iyaplikar dagiti kameng ti kongregasion Kristiano, agresulta dayta kadagiti naasi nga aramid. Kas pagarigan, maysa a pamilia ti nagsagaba iti di ninamnama, naggigiddan a trahedia. Inkuyog ti ama ti balasitangna iti maysa a pagtagilakuan. Idi agawidda, naaksidenteda iti lugan. Natay ti balasitang; nakaro ti pannakadunor ti ama. Idi karuruarna iti ospital, napalalo ti pannakabaldadona a dina matulongan ti bagina. Kasta unay ti panagleddaang ni baketna a dina kabaelan nga aywanan a bukbukodna ni lakayna. Gapuna, maysa nga agassawa iti kongregasionda ti nangyawid kadagitoy nga agpaspasanaang nga agassawa ket inaywananda iti sumagmamano a lawas.

²² Siempre, saan nga amin nga ebkas ti kinamanangngaasi ket nainaig iti trahedia ken personal a panagsakripisio. Adda met dagiti simple a tulong a maawattayo. Ngem kasano man kasimple dayta a kinamanangngaasi, apresiarentayo dayta, di ngamin? Adda kadi malagipyo a gundaway a nakatulong kadakayo ti maysa a kabsat babaen ti naayat a sasao wenno tignayna? Masansan a tulongannatayo ni Jehova kadagiti kasta a wagas.​—Proverbio 17:17; 18:24.

23. Ania ti panangmatmat ni Jehova no ikagumaantayo ti agtitinnulong?

²³ Kayatyo kadi nga usarennakayo ni Jehova a tumulong iti sabsabali? Nakalukat kadakayo dayta a pribilehio. Kinapudnona, apresiaren ni Jehova ti kasta a panagreggetyo. Kuna ti Saona: “Daydiay mangipakpakita ti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.” (Proverbio 19:17) Dakkel ti rag-otayo no agsakripisiotayo maigapu kadagiti kakabsattayo. (Aramid 20:35) Dagidiay sipapakinakem a mangiputong iti bagida dida masagrap ti rag-o a marikna ti maysa a timmulong wenno ti pannakapabileg a marikna ti maysa a natulongan. (Proverbio 18:1) Gapuna, itultuloytayo koma a tabunuan dagiti Nakristianuan a gimong tapno makapagpipinnaregtatayo.​—Hebreo 10:24, 25.

24. Apay a ditay panunoten a naikapistayo gapu laeng ta ditay naimatangan dagiti nakaskasdaaw a milagro nga inaramid idi ni Jehova?

²⁴ Saan kadi a makaay-ayo nga utoben dagiti wagas ti panangtulong ni Jehova kadatayo? Nupay saantayon nga agbibiag iti panawen a mangiparparangarang ni Jehova kadagiti nakaskasdaaw a milagro tapno maibanagna dagiti panggepna, ditay koma panunoten a naikapistayo. Ti napateg ket ipapaay ni Jehova ti amin a tulong a kasapulantayo tapno makapagtalinaedtayo a matalek. Ken no sangsangkamaysa nga agibturtayo iti pammati, makitatayto ti katan-okan ken kadayagan nga aramid ni Jehova iti intero a historia! Determinadotayo koma a naan-anay a mangaprobetsar iti naayat a tulong ni Jehova tapno makapagbiagtayo a maitunos iti tekstotayo para iti tawen 2005: “Ti tulongko aggapu ken Jehova.”​—Salmo 121:2.

Ania ti Kapanunotanyo?

Kasano nga ipapaay ni Jehova ti kasapulantayo a tulong ita​—

• babaen dagiti anghel?

• babaen ti nasantuan nga espirituna?

• babaen ti naipaltiing a Saona?

• babaen dagiti kapammatian?

[Ladawan iti panid 18]

Makapabileg a panunoten a supsuportaran dagiti anghel ti trabaho a panangasaba

[Ladawan iti panid 21]

Mabalin nga usaren ni Jehova ti maysa kadagiti kapammatiantayo tapno ipaayna ti kasapulantayo a liwliwa