Isursuro ni Jehova Agingga Kadagitoy nga Aldaw
“Ni Jehova intedna kaniak ti dila dagiti nasursuruan.”—ISAIAS 50:4.
1, 2. (a) Iti ania nga insagana ni Jehova ti pagay-ayatna nga adalan, ket aniat’ nagbanaganna? (b) Kasano a binigbig ni Jesus ti Gubuayan dagiti sursurona?
NI Jehova a Dios ket maysan a Mannursuro sipud pay idi nagbalin a maysa nga Ama. Sumagmamano a panawen kalpasan nga immalsa ti dadduma kadagiti annakna, insaganana ti pagay-ayatna nga adalan, ti Inaunana, para iti maysa a ministerio ditoy daga. (Proverbio 8:30) Naimpadtuan nga inladawan ti Isaias kapitulo 50 daytoy nga adalan a kunkunana: “Ni Soberano nga Apo Jehova intedna kaniak ti dila dagiti nasursuruan, tapno maammuak koma no kasano ti panangpapigsa kadagiti nabannogan babaen iti sao.” (Isaias 50:4) Kas bunga ti panangyaplikar iti sursuro ni Amana bayat nga adda ditoy daga, nagbalin ni Jesus a gubuayan ti bang-ar kadagiti amin a ‘mabambannogan ken madagdagsenan.’—Mateo 11:28-30.
2 Nangaramid ni Jesus iti adu a mannakabalin nga aramid idi umuna a siglo. Linuktanna ti mata dagiti bulsek ken pinagungarna pay dagiti natay, nupay kasta kangrunaan nga isut’ pagaammo dagiti kasadaranna kas maysa a mannursuro. Kastat’ awag kenkuana dagiti pasurotna kasta met dagiti kabusorna. (Mateo 8:19; 9:11; 12:38; 19:16; Juan 3:2) Nikaanoman a ginun-od ni Jesus ti dayaw gapu iti insurona no di ket sipapakumbaba a binigbigna: “Ti isursurok ket saanko a kukua, no di ket kukua daydiay nangibaon kaniak.” “Kas iti insuro kaniak ni Ama sawek dagitoy a bambanag.”—Juan 7:16; 8:28; 12:49.
Pagulidanan a Relasion ti Mannursuro ken Adalan
3. Kasano nga ipasimudaag ti padto ni Isaias ti interes ni Jehova kadagidiay sursuruanna?
3 Ti nalaing a mannursuro mangipakita iti personal, napasnek, ken naayat nga interes kadagiti adalanna. Ipalgak ti Isaias kapitulo 50 a ni Jehova a Dios addaan iti kasta a kita ti interes kadagidiay sursuruanna. “Isu mangriing a biniganbigat,” kuna ti padto, “isu riingenna ti lapayagko a pagdengngeg a kas kadagiti nasursuruan.” (Isaias 50:4) Ipasimudaag ti sasao ditoy ti maysa nga instruktor a nasapa a mangriing kadagiti adalanna iti bigat tapno suruanna ida. Iti panangkomentona iti pagaplikaran ti padto, kinuna ti maysa nga eskolar iti Biblia: “Ti ideya ket, ti Mannubbot rumbeng a . . . maysa a, no ar-arigen, adda iti eskuelaan ti Dios; ken kualipikado a mangisuro iti sabsabali. . . . Ti Mesias ket kualipikado unay, babaen ti panangisuro ti Dios, nga agbalin a mannursuro iti sangatauan.”
4. Kasano nga impangag ni Jesus ti sursuro ni Amana?
4 Rumbeng koma nga ipangag dagiti adalan ti sursuro ti instruktorda. Kasano nga impangag ni Jesus ti sursuro ni Amana? Ti panagtignayna ket maitunos iti mabasatayo iti Isaias 50:5: “Ni Soberano nga Apo Jehova linuktanna ti lapayagko, ket saanak a nasukir. Diak met timmukiad.” Wen, magagaran ni Jesus nga agsursuro. Inyallingagna dagiti lapayagna. Maysa pay, situtulok a mangaramid iti aniaman a kalikaguman kenkuana ni Amana. Saan a nasukir; imbes ketdi, kinunana: “Saan koma a ti pagayatak, no di ket ti pagayatam ti maaramid.”—Lucas 22:42.
5. (a) Aniat’ mangipakita nga ammon ni Jesus a nasaksakbay dagiti suot a sagabaenna ditoy daga? (b) Kasano a natungpal ti padto iti Isaias 50:6?
5 Ipasimudaag ti padto nga ammo ti Anak dagiti posible a pagbanagan ti panangaramidna iti pagayatan ti Dios. Naipakita daytoy iti kuna ti maysa a nasursuruan: “Intayak ti bukotko kadagiti mangkabil ket dagiti pingpingko insangok kadagiti agparparut iti buok. Diak inlinged ti rupak iti pannakaibabain ken pannakatupra.” (Isaias 50:6) Kas ipasimudaag ti padto, siuulpit a natrato ni Jesus ditoy daga. “Tinupraanda ti rupana,” insurat ni apostol Mateo. “Dagiti dadduma tinungpada ti rupana.” (Mateo 26:67) Napasamak daytoy iti ima dagiti relihioso a pangulo idi rabii ti Paskua ti 33 K.P. Iti sumuno nga aldaw intaya ni Jesus ti bukotna kadagiti manangkabil, idi nga awanan asi a sinaplit dagiti soldado a Romano sakbay a nailansa iti kayo a pagtutuokan tapno matay.—Juan 19:1-3, 16-23.
6. Aniat’ mangipakita a ni Jesus pulos a di naawanan ti panagtalek iti Mannursurona, ken kasano a nagunggonaan ti panagtalekna?
6 Ti Anak, nga immun-una a nasursuruan a naimbag, pulos a di naawanan ti panagtalek iti Mannursurona. Naipakita daytoy iti sumaganad a sasaona sigun iti padto: “Ni Soberano nga Apo Jehova badangannakto. Iti kasta saanakto a maibabain.” (Isaias 50:7) Sibabaknang a nagunggonaan ti panagtalek ni Jesus iti tulong ti Mannursurona. Isut’ intan-ok ni Amana, a binendisionanna iti nangatngato a saad ngem kadagiti amin a sabsabali pay nga adipen ti Dios. (Filipos 2:5-11) Naindaklan a bendision ti agur-uray met kadatayo no situtulnog nga ipangagtayo ti sursuro ni Jehova ken di ‘agbaw-ing.’ Kitaentayo no kasano a maipapaay dayta a sursuro agingga iti kaaldawantayo.
Maysa a Napalawa a Programa a Panangisuro
7. Kasanot’ panangisuro ni Jehova ditoy daga?
7 Kas nadakamaten, inaramat ni Jehova ti naindagaan a Pannakabagina, ni Jesu-Kristo, a mangitungpal iti nadibinuan a panangisuro idi umuna a siglo. (Juan 16:27, 28) Kanayon nga inaramat ni Jesus ti Sao ti Dios kas autoridad iti panangisurona, a nangipasdek iti ulidan kadagidiay sinursuruanna. (Mateo 4:4, 7, 10; 21:13; 26:24, 31) Kalpasanna, nagtultuloy ditoy daga ti panangisuro ni Jehova babaen ti ministerio dagiti kasta a nasursuruan. Laglagipenyo a binilin ida ni Jesus: “Inkayo ngarud ket mangaramidkayo kadagiti adalan a tattao iti isuamin a nasnasion, . . . nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Idi nakaaramiddan kadagiti adalan, nagbalin dagitoy a paset ti “sangakabbalayan ti Dios, . . . ti kongregasion ti sibibiag a Dios.” (1 Timoteo 3:15) Nabukelda met kadagiti indibidual a kongregasion a pangisuruan ni Jehova kadakuada. (Aramid 14:23; 15:41; 16:5; 1 Corinto 11:16) Nagtultuloy kadi ti nadiosan a panangisuro iti kasta a pamay-an agingga iti kaaldawantayo?
8. Kasano nga impakita ni Jesus a ti trabaho a panangasaba ket maiwanwan ditoy daga sakbay a dumteng ti panungpalan?
8 Wen, nagtultuloy! Tallo nga aldaw sakbay ti ipapatayna, impadto ni Jesus a sakbay ti panungpalan daytoy a sistema ti bambanag, addanto dakkel a trabaho a panangasaba. “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion,” kinunana, “ket iti kasta umayton ti panungpalan.” Dineskribir met ni Jesus ti pamay-an ti pannakaipatungpal daytoy sangalubongan a programa a panangasaba ken panangisuro. Dinakamatna ti “matalek ken masirib nga adipen” nga agserbi kas maysa a kalasugan, wenno instrumento, tapno maipaayan dagiti adipenna iti naespirituan a taraon. (Mateo 24:14, 45-47) Us-usaren ni Jehova daytoy nga “adipen” a mangaywan kadagiti interes ti Pagarian iti intero a daga.
9. Siasino ti mangbukel iti matalek ken masirib nga adipen?
9 Itatta, ti matalek ken masirib nga adipen ket buklen dagiti natda iti agtawid ti Pagarian. Dagitoy ket napulotan a Kristiano, dagiti natda iti 144,000, a “kukua ni Kristo” ken paset ti “bin-i ni Abraham,” nga adda pay la ditoy daga. (Galacia 3:16, 29; Apocalipsis 14:1-3) Kasanoyo a mailasin ti matalek ken masirib nga adipen? Kangrunaanna babaen ti trabahoda ken ti nainget a panagtulnogda iti Sao ti Dios, ti Biblia.
10. Aniada nga instrumento ti ar-aramaten ti klase adipen tapno maitandudo dagiti sursuro ni Jehova?
10 Ar-aramaten ni Jehova daytoy nga “adipen” kas instrumentona a mangisuro kadagiti tattao itatta. Inawat dagidiay kameng ti klase adipen ti nagan a Saksi ni Jehova idi 1931. Manipud idin riniwriw ti nakitimpuyog kadakuada ken immawat iti dayta a nagan ken nakiraman iti panangiwaragawag iti Pagarian ti Dios. Daytoy a magasin, Ti Pagwanawanan Mangibumbunannag ti Pagarian ni Jehova, ti kangrunaan nga instrumento nga us-usaren ti “adipen” iti trabaho a panangisuro. Nupay kasta, maaramat met dagiti dadduma pay a publikasion, a pakairamanan dagiti libro, bokleta, broshur, tract, ken ti magasin nga Agriingkayo!
11. Aniada nga eskuelaan ti iwanwanwan ti “adipen,” ken aniat’ panggep ti tunggal maysa kadagitoy nga eskuelaan?
11 Mainayon pay, iwanwanwan ti “adipen” ti nadumaduma nga eskuelaan. Mairaman kadagitoy ti Watchtower Bible School of Gilead, a maysa a lima-bulan a kurso a mangisagana kadagiti agkabannuag a ministro nga agserbi kas misionero iti sabali a pagilian, ken ti dua-bulan a kurso iti Ministerial Training School, a mangsanay kadagiti awanan asawa a panglakayen ken ministerial nga adipen para kadagiti naisangsangayan a teokratiko nga annongen. Adda met ti Kingdom Ministry School, a pakasursuruan dagiti Kristiano a panglakayen ken ministerial nga adipen kadagiti responsabilidadda iti kongregasion iti kada panawen, ken ti Pioneer Service School, a mangkabal kadagiti amin-tiempo nga ebanghelisador tapno agbalin a nasigsigo iti trabahoda a panangasaba.
12. Ania ti maysa a nagpateg a paset ti programa a panangisuro a linawas a maang-angay?
12 Ti maysa pay a nagpateg a paset ti programa a panangisuro isu ti lima a linawas a gimong a maang-angay iti nasurok a 75,500 a kongregasion iti ili ni Jehova iti intero a lubong. Naan-anay kadi a magunggonaankayo kadagitoy a gimong? Iti panangipamaysayo kadagiti sursuro a maipapaay, ipakpakitayo kadi a talaga a mamatikayo a dakayo, no ar-arigen, ket adda iti eskuelaan ti Dios? Ti kadi irarang-ayyo iti naespirituan silalawag nga ipakitana kadagiti sabsabali nga addaankayo iti “dila dagiti nasursuruan”?—Isaias 50:4; 1 Timoteo 4:15, 16.
Masursuruan Kadagiti Gimong ti Kongregasion
13. (a) Ania ti maysa a napateg a pamay-an a panangisuro ni Jehova iti ilina itatta? (b) Kasanotay a maipakita ti panangapresiartayo iti Pagwanawanan?
13 Nangnangruna a sursuruan ni Jehova ti ilina babaen ti linawas a panagadal iti Biblia, a maaramat ti Pagwanawanan kas katulongan iti panangisuro. Matmatmatanyo kadi daytoy a gimong kas maysa a lugar a sadiay masursuruannakay ni Jehova? Nupay agaplikar ti Isaias 50:4 kangrunaanna ken Jesus, mabalin met nga agaplikar daytoy kadagiti amin nga umawat kadagiti probision ti Dios tapno maaddaan iti “dila dagiti nasursuruan.” Ti maysa a pamay-an a maipakitayo nga apresiarenyo ti Pagwanawanan ket babaen ti panangbasayo iti tunggal ruar apaman a maawatyo daytoy no mabalbalin. Kalpasanna, inton mapagadalan ti Pagwanawanan iti kongregasion, maipakitayo ti panagyamanyo ken Jehova babaen ti kaaddayo ken kasta met babaen ti madadaan a panangipaduyakyak ti namnamayo iti publiko.—Hebreo 10:23.
14. (a) Apay a napateg unay a pribilehio ti panagkomento kadagiti gimong? (b) Ania a kita ti komento dagiti agtutubo ti pudpudno a makaparegta?
14 Mabigbigyo kadi a babaen kadagiti komentoyo kadagiti gimong, maaddaankay iti paset iti naindaklan a programa a panangisuro ni Jehova? Awan duadua, ti panagkomento kadagiti gimong ket maysa a napateg a pamay-an tapno makapagpipinnaregtatayo iti “ayat ken nasayaat nga ar-aramid.” (Hebreo 10:24, 25) Mabalin kadi a maaddaan met ti paset dagiti ubbing iti daytoy a programa a panangisuro? Wen. Masansan a makaparegta kadagiti natataengan ti naimpusuan a komento dagiti agtutubo. No dadduma, ti komento dagiti ubbing gutugotenna dagiti kabbaro kadagiti gimongtayo a mangipakita iti napaspasnek nga interes iti kinapudno ti Biblia. Dadduma nga ubbing iyugalida a basaen dagiti komentoda a direkta manipud iti parapo wenno uliten ti sungbat nga iyarasaas kadakuada ti maysa a nataengan. Nupay kasta, makaparegta unay no naisagana a naimbag dagiti komentoda. Ti kasta a panagkomento ket pudpudno a pakaidayawan ti Naindaklan nga Instruktortayo ken ti natan-ok a programana a panangisuro.—Isaias 30:20, 21.
15. Aniat’ maaramidan dagiti nagannak tapno matulongan dagiti annak nga agkomento a siiepektibo?
15 Makaparagsak a makita dagiti ubbing nga agtarigagay a makiraman iti panangidayaw iti Diostayo. Impateg ni Jesus dagiti ebkas ti panagdayaw manipud kadagiti ubbing. (Mateo 21:15, 16) Kuna ti maysa a Kristiano a panglakayen: “Idi ubingak pay, kayatko ti agkomento iti Panagadal ti Pagwanawanan. Kalpasan a matulongannak a mangisagana iti komento, idawat ni tatang a sanayek ti komento iti di nakurkurang ngem pito a daras.” Nalabit bayat ti panagadalyo iti Biblia kas pamilia, dakayo a nagannak mabalinyo a tulongan dagiti annakyo a mangisagana kadagiti komento iti bukodda a sasao kadagiti piniliyo a parapo iti Pagwanawanan. Tulonganyo ida a mangipateg iti naindaklan a pribilehioda a makiraman iti programa a panangisuro ni Jehova.
16. Aniat’ pagimbagan ti Teokratiko nga Eskuelaan ti Panagministro, ken siasino ti mabalin nga agpalista iti eskuelaan?
16 Rumbeng met nga ipaayan iti napasnek a panangusig ti sursuro kadagiti dadduma pay a Nakristianuan a gimong, agpadpada babaen kadagidiay addaan pribilehio a mangipaay ti impormasion ken kadagidiay agim-imdeng iti naidatag a sursuro. Iti las-ud ti nasurok a 50 a tawenen, ar-aramaten ni Jehova ti linawas a Teokratiko nga Eskuelaan ti Panagministro tapno masanay ti minilion a lallaki ken babbai a nasigsigo a mangiparang iti mensahe ti Pagarian. Mabalin nga agpalista dagidiay aktibo a makitimtimpuyog iti kongregasion, agraman dagiti tattao a nabiit pay a nangrugi a tumabuno kadagiti gimong, no la ket agbibiagda a maitunos kadagiti Nakristianuan a prinsipio.
17. (a) Iti ania a panggep a kangrunaanna a naipasdek ti Miting Publiko? (b) Aniada a bambanag ti rumbeng a laglagipen dagiti agpalpalawag iti publiko?
17 Ti maysa pay a nabayagen a nagpateg a paset ti programa a panangisuro isu ti Miting Publiko. Kas ipasimudaag ti naganna, naipasdek daytoy a gimong kangrunaanna tapno maammuan dagiti di-Saksi dagiti pamunganayan a sursuro ti Biblia. Iti kasta, kasapulan nga iparang ti agpalpalawag ti impormasion iti pamay-an a maawatan dagidiay dumngeg iti mensahe iti umuna a gundaway. Kaipapanan daytoy ti panangilawlawag kadagiti termino a kas iti “sabsabali a karnero,” “kakabsat,” ken “natda,” dagiti termino a mabalin a di matarusan dagiti di-Saksi. Yantangay dagiti tao a tumabuno iti Miting Publiko ket nalabit addaan kadagiti pammati wenno estilo ti panagbiag a naan-anay a maikaniwas iti Kasuratan—nupay maawat iti kagimongan itatta—kanayon a nataktika koma ti agpalpalawag ken pulos a dina uyawen dagiti kasta a pammati wenno estilo ti panagbiag.—Idiligyo ti 1 Corinto 9:19-23.
18. Aniada pay a gimong ti linawas a maang-angay iti kongregasion, ket ania ti panggep dagitoy?
18 Ti Panagadal ti Libro ti Kongregasion ket maysa a gimong a sadiay dagiti publikasion a naisagana iti sidong ti panangiwanwan ti matalek ken masirib nga adipen ket linawas a maadal agraman ti Biblia. Ti libro nga Apocalipsis—Ti Grande a Tampokna Asidegen! isut’ agdama a maad-adal iti adu a daga. Nadisenio ti Gimong ti Serbisio tapno makabalan ti ili ni Jehova a makiraman a naan-anay iti panangikaskasaba ti naimbag a damag ti Pagarian ken panangaramid kadagiti adalan.—Mateo 28:19, 20; Marcos 13:10.
Masursuruan Kadagiti Daddadakkel a Gimong
19. Ania a daddadakkel a panagtataripnong ti iyur-urnos ti “adipen” tunggal tawen?
19 Iti las-ud ti nasurok a sangagasut a tawenen, mangyur-urnos ti ‘matalek nga adipen’ kadagiti kombension ken asamblea para iti panangisuro ken naisangsangayan a panangparegta kadagiti pudno a Kristiano. Tallo kadagiti kasta a daddadakkel a panagtataripnong ti maar-aramid ita kada tawen. Adda maysa-aldaw nga asamblea a tabtabunuan ti maysa a grupo dagiti kongregasion a mangbukel iti maysa a sirkito. Iti maysa a tawen, addaan met ti tunggal sirkito iti dua-aldaw a panagtataripnong a maaw-awagan asamblea sirkito. Mainayon pay, adda maysa a panagtataripnong a maaw-awagan kombension distrito, a tabtabunuan ti sumagmamano a sirkito. Adda met no dadduma dagiti internasional a kombension. Dagitoy dadakkel a panagtataripnong nga addaan kadagiti sangaili a Saksi manipud iti adu a pagilian ket pudno a makapabileg pammati kadagiti tattao ni Jehova!—Idiligyo ti Deuteronomio 16:16.
20. Ania ti kanayon a maipagpaganetget iti daddadakkel a panagtataripnong dagiti Saksi ni Jehova?
20 Idi 1922, idi nga agarup 10,000 ti nagtataripnong idiay Cedar Point, Ohio, E.U.A., napabileg dagiti delegado iti pammaregta ti nagpalawag: “Daytoyen ti aldaw kadagiti isuamin nga aldaw. Adtoy, agturturayen ti Ari! Dakayo dagiti ahentena a mangipablaak. Gapuna, iwaragawagyo, iwaragawagyo, iwaragawagyo, ti Ari ken ti pagarianna.” Kanayon a maipaganetget iti kakasta a dadakkel a kombension ti trabaho a panangasaba. Kas pagarigan, iti internasional a kombension idiay Siudad ti Nueva York idi 1953, nayanunsio ti pannakaipasdek kadagiti amin a kongregasion ti maysa a programa a panagsanay iti panagbalaybalay. Dakkel ti naitulong ti panangipakat iti daytoy iti panangikasaba ti Pagarian iti adu a daga.
Isursuro ti Dios a Mangisuro
21. Ania a pribilehio ti kayattay nga awaten ken ipateg?
21 Awan duadua, ni Jehova ket addaan iti nakaskasdaaw a programa a panangisuro ditoy daga itatta! Amin a mangaprobetsar iti daytoy ket masursuruan ti Dios, wen, mabalin a mairaman kadagidiay naikkan kadagiti “dila dagiti nasursuruan.” Anian a pribilehio ti agadal, no ar-arigen, iti eskuelaan ti Dios! Ngem, no awaten daytoy a pribilehio, ipategtay koma ti panggepna. Sinursuruan ni Jehova ni Jesus tapno makaisuro iti sabsabali, ken sinursuruan ni Jesus dagiti adalanna tapno maaramidda ti kas iti inaramidna ngem iti nasaksaknap. Kasta met, masansanaytayo iti naindaklan a programa a panangisuro ni Jehova tapno masursuruantay met dagiti dadduma.—Juan 6:45; 14:12; 2 Corinto 5:20, 21; 6:1, 2; 2 Timoteo 2:2.
22. Aniat’ parikut idi da Moises ken Jeremias, ngem kasano a narisut dayta? (b) Aniat’ panginanamaantayo a siguraduen ti Dios a maitungpal ti pannakaikasaba ti Pagarian?
22 Kunaenyo kadi, kas ken Moises, “Saanak a tao a sumasao,” wenno kas kinuna ni Jeremias, “Saanko nga ammo ti agsao”? Tulongannakay ni Jehova a kas iti panangtulongna kadakuada. “Addaakto iti ngiwatmo.” imbagana ken Moises. Ket ken ni Jeremias, kinunana: “Saanka nga agbuteng . . . addaak kenka.” (Exodo 4:10-12; Jeremias 1:6-8) Idi kayat dagiti relihioso a papangulo a pagulimeken dagiti adalanna, kinuna ni Jesus: “No dagitoy nagtalinaedda a siuulimek, dagiti batbato agikkisdanto.” (Lucas 19:40) Ngem dagiti bato saanen a kasapulan pay nga agikkis idi, ken saanda a kasapulan nga aramiden dayta ita agsipud ta ar-aramaten ni Jehova ti dila dagiti sinursuruanna a mangipakaammo iti mensahe ti Pagarianna.
Masungbatanyo Kadi?
◻ Ania a pagulidanan a relasion ti Mannursuro ken adalan ti naitampok iti Isaias kapitulo 50?
◻ Kasano nga itungtungpal ni Jehova ti maysa a nasaknap a programa a panangisuro?
◻ Ania ti sumagmamano a paset ti programa a panangisuro ni Jehova?
◻ Apay a maysa a dakkel a pribilehio ti pannakiraman iti programa a panangisuro ni Jehova?
[Ladawan iti panid 16]
Masansan a makapabileg kadagiti natataengan ti naimpusuan a komento dagiti agtutubo