Panangbigbig iti Akem ni Kristo iti Urnos ti Dios

“IDI un-unana, pinarsua ti Dios ti langit ken ti daga,” ket “nakasaysayaat” ti amin nga inaramidna. (Gen. 1:1, 31) Inaramid ni Jehova dagiti tattao nga addaan iti nagsayaat a namnama iti masanguanan. Ngem temporario a nagsardeng ti naragsak a kasasaad ti tao gapu iti panagrebelde idiay Eden. Nupay kasta, saan a nagbalbaliw ti panggep ni Jehova para iti daga ken kadagiti tattao. Impakita ti Dios a maisalakanto dagiti natulnog a kaputotan ni Adan. Maisublinto ti pudno a panagdayaw ken dadaelento ti Dios dagiti dakes a tattao agraman dagiti dakes nga ar-aramidda. (Gen. 3:15) Agbalinto manen a “nakasaysayaat” dagiti bambanag. Itungpal daytoy ni Jehova babaen ti Anakna, ni Jesu-Kristo. (1 Juan 3:8) Masapul ngarud a bigbigentayo ti akem ni Kristo iti urnos ti Dios.​—Ara. 4:12; Fil. 2:9, 11.

TI AKEM NI KRISTO

² No maipapan iti urnos ti Dios, masapul a bigbigentayo nga adu ti akem ni Kristo. Agserserbi ni Jesus kas Mannubbot ti sangatauan, Nangato a Padi, Ulo ti kongregasion Kristiano, ket ita, kas Ari iti Pagarian ti Dios. No utobentayo dagitoy nga akemna, ad-adda a maapresiartayo ti urnos ti Dios ken umuneg ti ayattayo ken ni Kristo Jesus. Ilawlawag ti Biblia ti nadumaduma nga akemna.

³ Bayat ti ministerio ni Kristo ditoy daga, nalawag a babaen kenkuana maikappia manen iti Dios ti natulnog a sangatauan. (Juan 14:6) Kas Mannubbot ti sangatauan, impaayna ti bagina kas subbot a kasukat ti adu. (Mat. 20:28) Saan laeng a nagserbi ni Jesus kas ulidan iti nadiosan a kababalin, no di ket nagbalin met a kangrunaan a persona iti pannakaitungpal ti panggep ni Jehova iti sangatauan. Babaen laeng kenkuana a maisubli ti anamong ti Dios. (Ara. 5:31; 2 Cor. 5:18, 19) Gapu iti sakripisio nga ipapatay ni Jesus ken ti panagungarna, masagrapto manen ti natulnog a sangatauan ti agtultuloy a bendision inton agturay ti nailangitan a Pagarian ti Dios.

⁴ Kas Nangato a Padi, ‘maawatan ni Jesus dagiti pagkapuyantayo.’ Maabbonganna met ti basol dagiti dedikado a pasurotna ditoy daga. Inlawlawag ni apostol Pablo: “Maawatan ti nangato a paditayo dagiti pagkapuyantayo. Nasuboken iti amin a banag a kas kadatayo amin, ngem kaskasdi a saan a nagbasol.” Kalpasanna, pinaregta ni Pablo dagidiay addaan iti pammati ken Jesu-Kristo a gundawayanda daytoy nga urnos maipaay iti pannakikappia iti Dios. Kinunana: “Umasidegtayo ngarud iti trono ti nagpaiduma a kinaimbag ken siwayawaya nga agsaotayo iti panagkararagtayo tapno maawattayo ti asi ken magun-odantayo ti nagpaiduma a kinaimbag a makatulong kadatayo iti umiso a tiempo.”​—Heb. 4:14-16; 1 Juan 2:2.

⁵ Ni Jesus met ti Ulo ti kongregasion Kristiano. Kas kadagiti pasurotna idi umuna a siglo, ditay met kasapulan ita ti pangulo a tao. Iwanwanwannatayo ni Jesus babaen ti nasantuan nga espiritu ken kadagiti kualipikado a katulongan a papastor, a manungsungbat kenkuana ken iti nailangitan nga Amana bayat nga ay-aywananda ti arban ti Dios. (Heb. 13:17; 1 Ped. 5:2, 3) Impadto ni Jehova maipapan ken Jesus: “Isu ket inaramidko kas saksi kadagiti nasion, kas lider ken komander kadagiti nasion.” (Isa. 55:4) Pinatalgedan ni Jesus ti kaitungpalan daytoy a padto idi imbagana kadagiti adalanna: “Saankayo met a maawagan iti ‘lider,’ ta maymaysa ti Lideryo, ti Kristo.”​—Mat. 23:10.

⁶ Tapno maammuantayo ti kapanunotanna ken sisasagana a tumulong kadatayo, iyaw-awis ni Jesus: “Umaykayo kaniak, dakayo amin a nabannog ken madagdagsenan, ket pagin-awaenkayto. Alaenyo ti sangolko ken agsursurokayo kaniak, ta naalumamay ken napakumbabaak, ket magin-awaankayto. Ta naasi ti sangolko, ken nalag-an ti awitko.” (Mat. 11:28-30) Babaen ti makapabang-ar ken naalumamay a panangiwanwan ni Jesu-Kristo kadagiti aktibidad ti kongregasion Kristiano, pinaneknekanna nga isu ket “nasayaat a pastor,” kas panangtuladna iti nailangitan nga Amana, ni Jehova a Dios.​—Juan 10:11; Isa. 40:11.

⁷ Iti umuna a suratna kadagiti taga-Corinto, inlawlawag ni Pablo ti sabali pay nga aspeto ti akem ni Jesu-Kristo kadagitoy a sasao: “Masapul nga agturay kas ari agingga a maikabil ti Dios ti amin a kabusorna iti baba dagiti sakana. Ngem inton naipasakupen kenkuana ti amin a banag, agpasakupto metten ti Anak iti Daydiay nangipasakup kenkuana iti amin a banag, tapno ti Dios ti mangituray iti amin a banag.” (1 Cor. 15:25, 28) Kas immuna a pinarsua ti Dios, nagserbi ni Jesus kas “eksperto a trabahador” ti Dios sakbay nga immay ditoy daga. (Prov. 8:22-31) Idi imbaon ti Dios ni Jesus ditoy daga, kanayon nga inaramidna ti pagayatan ti Dios. Inibturanna ti karirigatan a pannubok ken natay a matalek iti Amana. (Juan 4:34; 15:10) Gapu iti dayta, isu ket pinagungar ti Dios ken naikkan iti kalintegan nga agbalin nga Ari iti nailangitan a Pagarian. (Ara. 2:32-36) Kas Ari ti Pagarian, inted ti Dios ken Kristo Jesus ti naisangsangayan nga annongen a mangidaulo iti nakaad-adu a mannakabalin nga espiritu a parsua a mangikkat kadagiti turay ti tao ken amin a kinadakes ditoy daga. (Prov. 2:21, 22; 2 Tes. 1:6-9; Apoc. 19:11-21; 20:1-3) Kalpasanna, ti agturayto laengen iti intero a daga ket ti nailangitan a Pagarian ti Dios nga idauluan ni Kristo.​—Apoc. 11:15.

TI KAIPAPANAN TI PANANGBIGBIG ITI AKEMNA

⁸ Perpekto ti Ulidantayo a ni Jesu-Kristo. Isu ti nadutokan a mangaywan kadatayo. Tapno magunggonaantayo iti naayat a panangaywanna, masapul nga agtalinaedtayo a matalek ken Jehova ken makidanggaytayo iti rumangrang-ay nga organisasionna.

⁹ Dagiti pasurot ni Jesus idi umuna a siglo naan-anay a binigbigda ti akem ni Kristo iti urnos ti Dios. Inaramidda dayta babaen ti panagtrabahoda a sangsangkamaysa iti panangidaulo ni Kristo. Nagpaidalanda met iti panangiwanwan ni Jesus babaen ti nasantuan nga espiritu. (Ara. 15:12-21) Dinakamat ni apostol Pablo ti panagkaykaysa ti kongregasion dagiti napulotan a Kristiano idi insuratna: “Bayat a sawentayo ti kinapudno, ti koma ayat ti mangtignay kadatayo nga agmataengan iti amin a banag maitunos ken Kristo nga ulotayo. Babaen kenkuana, agtutunos ti panagkokonektar ti amin a paset ti bagi ken agtitinnulongda a mangipaay kadagiti kasapulan ti bagi. No aramiden a naimbag ti tunggal paset ti akemna, dumakkel ti intero a bagi ket tumibker babaen ti ayat.”​—Efe. 4:15, 16.

¹⁰ No agtitinnulong ti tunggal maysa iti kongregasion ken agtrabahoda a sangsangkatunos babaen iti panangidaulo ni Kristo, rumang-ay ti kongregasion ken adda nabara nga ayat a “perpekto a singgalut ti panagkaykaysa.”​—Juan 10:16; Col. 3:14; 1 Cor. 12:14-26.

¹¹ Nalawag a paneknekan dagiti pasamak iti lubong a matungtungpalen dagiti padto ti Biblia sipud idi 1914. Iti dayta met la a tawen, nagbalin ni Jesu-Kristo kas Ari ti Pagarian ken agturturayen iti tengnga dagiti kabusorna. (Sal. 2:1-12; 110:1, 2) Ania ti kaipapanan daytoy kadagiti agnanaed ita ditoy daga? Asidegen nga usaren ni Jesus ti pannakabalinna kas Ari ti ar-ari ken Apo dagiti apo tapno ipakatna ti panangukom ti Dios kadagiti kabusorna. (Apoc. 11:15; 12:10; 19:16) Iti kasta, ti inkari ni Jehova a pannakaisalakan idi rugrugi ti panagrebelde ti tao ket matungpalton kadagiti anamonganna nga adda iti makannawan ni Kristo. (Mat. 25:34) Makaparagsak ta binigbigtayo ti akem ni Kristo iti urnos ti Dios! Agkaykaysatayo koma ngarud a mangitungpal iti ministeriotayo iti intero a lubong babaen ti panangidaulo ni Kristo kadagitoy maudi nga al-aldaw.