Umab-abante nga Agturong iti Naan-anay a Panagballigi!
“Adtoy! maysa a puraw a kabalio; ket daydiay sisasakay iti dayta addaan iti bai; ket naited kenkuana ti maysa a korona, ket rimmuar a mangparmek ken tapno an-anayenna ti panagballigina.”—APOCALIPSIS 6:2.
1. Ania a masanguanan a paspasamak ti nasirmata ni Juan?
BABAEN ti nadiosan a paltiing, nabalinan ni apostol Juan a kitaen ti agarup 1,800 a tawen iti masakbayan ket dineskribirna ti pannakaitrono ni Kristo kas Ari. Kinasapulan ni Juan ti pammati tapno patienna ti nakitana iti sirmata. Addaantay ita iti nalawag nga ebidensia a napasamak idi 1914 daytoy naipadto a pannakaitrono. Babaen kadagiti mata ti pammati, makitatayo a ni Jesus mapmapanen a “mangparmek ken tapno an-anayenna ti panagballigina.”
2. Kasanot’ reaksion ti Diablo iti pannakaipasngay ti Pagarian, ket ebidensia daytoy ti ania?
2 Kalpasan ti pannakaipasngay ti Pagarian, napagtalaw ni Satanas idiay langit, ket gapu iti dayta pinakarona ti ibubusorna a buyogen ti dakdakkel a rungsot. Ngem pulos a saanto nga agballigi. (Apocalipsis 12:7-12) Ti pungtotna ti nangpadegdeg nga ad-adda pay kadagiti kasasaad ditoy lubong. Kasla mawarawaran ti kagimongan ti tao. Kadagiti Saksi ni Jehova, nalawag nga ebidensia daytoy a ti Arida ket umab-abanten “tapno an-anayenna ti panagballigina.”
Mabukbukelen ti Baro a Lubong a Kagimongan
3, 4. (a) Aniada ti naaramid a panagbalbaliw iti organisasion iti kongregasion Kristiano sipud pay pannakaipasngay ti Pagarian, ket apay a nesesita dagita? (b) Aniat’ pagimbagan dagitoy a panagbalbaliw, kas impadto ni Isaias?
3 Apaman a naipasngay ti Pagarian, tiemponan nga itunos a nasingsinged ti napabaro a kongregasion Kristiano—nga addaanen iti ad-adu a responsabilidad para iti Pagarian—iti padron ti kongregasion Kristiano idi umuna a siglo. Gapuna, kadagiti ruarna a Hunio 1 ken 15, 1938, inusig ti The Watchtower no kasano ti rebbeng a panagandar ti Nakristianuan nga organisasion. Kalpasan dayta, iti ruar ti Disiembre 15, 1971, ad-adda pay a silalawag a nailasin ti moderno-aldaw a Bagi a Manarawidwid iti artikulo a “Ti Bagi a Manarawidwid a Naiduma iti Legal a Korporasion.” Idi 1972, nadutokan dagiti bagi dagiti panglakayen a tumulong ken mangiwanwan kadagiti lokal a kongregasion.
4 Kasta unay ti pannakapabileg ti kongregasion Kristiano idi naisubli ti umiso a panangaywan. Nakatulong met dagiti probision nga impaay ti Bagi a Manarawidwid tapno maisuro dagiti panglakayen kadagiti rebbengenda, agraman panangsanay kadakuada iti hudisial a bambanag. Naipadto idiay Isaias 60:17 ti in-inut a pannakapasayaat dagiti urnos ti organisasion ti Dios ditoy daga ken dagiti positibo a resultada: “Imbes a ti gambang mangyegakto iti balitok, ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok; ket dutokakto ti talna kas dagiti manangaywanmo ken ti kinalinteg kas dagiti manangitudingmo iti akem.” Dagitoy a positibo a panagbalbaliw inyanninawna ti pamendision ti Dios ken ebidensia ti anamongna kadagidiay sireregta a mangsupsuportar iti Pagarianna.
5. (a) Kasanot’ reaksion ni Satanas iti panangbendision ni Jehova iti ilina? (b) Maitunos iti Filipos 1:7, kasanot’ reaksion ti ili ni Jehova iti pungtot ni Satanas?
5 Naimatangan ni Satanas ti naayat a panangaywan ken panangiwanwan ti Dios iti ilina kalpasan ti pannakaipasngay ti Pagarian. Kas pagarigan, idi 1931, impanayag daytoy bassit a grupo dagiti Kristiano a saanda laeng a basta Estudiante ti Biblia. Maitunos iti Isaias 43:10, isuda dagiti Saksi ni Jehova! Naiparparna man wenno saan, iti intero a globo, inyussuat ti Diablo ti agsasaruno ken nasaknap a panangidadanes. Uray kadagiti pagilian a gagangay a maipalubos ti wayawaya ti relihion, kas iti Estados Unidos, Canada, ken Alemania, maulit-ulit a napilitan dagiti Saksi a makirupir kadagiti korte tapno mapagtalinaedda ti wayawayada nga agdayaw. Idi 1988, adda 71 a kaso a pakainaigan dagiti Saksi ni Jehova ti binista ti Korte Suprema ti Estados Unidos, ket dua a kakatlo kadagita ti nangabak. Iti intero a lubong ita, agtultuloy dagiti legal a pannakidangadang tapno, kas idi umuna a siglo, ‘maidepensa ken legal a maipasdek ti naimbag a damag.’—Filipos 1:7.
6. Dagiti panangipawil ken restriksion nalapdanda kadi ti ili ni Jehova nga umabante? Iyilustraryo.
6 Kabayatan ti dekada 1930, sakbay ti Gubat Sangalubongan II, pinawilan wenno linimitaran dagiti diktador a gobierno ti trabaho dagiti Saksi ni Jehova idiay Alemania, España, ken Japan. Ngem idi tawen 2000, kadagitoy laeng a tallo a pagilian, agarup 500,000 ti bilang dagiti aktibo a manangiwaragawag iti Pagarian ti Dios. Dandani sangapulo a daras nga ad-adu dayta ngem iti bilang dagiti Saksi iti intero a lubong idi 1936! Nabatad a dagiti panangipawil ken restriksion dida malapdan ti ili ni Jehova nga umabante iti sidong ti naballigi a Liderda, ni Jesu-Kristo.
7. Ania a naisangsangayan a pasamak ti naaramid idi 1958, ket ania a dakkel a panagbalbaliw ti naaramid sipud idin?
7 Anian a pannakaiparangarang daytoy nga iyaabante ta, idi 1958, naangay idiay New York City ti kadakkelan pay laeng a kombension dagiti Saksi ni Jehova, ti Divine Will International Assembly, a tinabunuan ti 253,922. Idi 1970, naluktan ti trabahoda kadagiti tallo a nadakamat a pagilian, malaksid idiay maaw-awagan idi iti East Germany. Ngem mapawpawilan pay laeng idi dagiti Saksi iti nalawa a Soviet Union ken kadagiti kaaliadona a nasion iti sidong ti Warsaw Pact. Itatta, addan ti nasurok a kagudua a milion nga aktibo a Saksi kadagita a dati a Komunista a nasion.
8. Ania ti resulta ti pamendision ni Jehova iti ilina, ket aniat’ kinuna ti The Watchtower idi 1950 maipapan iti daytoy?
8 Nabendisionan dagiti Saksi ni Jehova iti irarang-ay agsipud ta intultuloyda a “sapulen nga umuna ti pagarian ken ti kinalinteg [ti Dios].” (Mateo 6:33) Iti literal a pamay-an, natungpalen ti padto ni Isaias: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” (Isaias 60:22) Ngem, saan pay a dita ti pagpatinggaan. Idi laeng napalabas a dekada, nanayonan iti nasurok a 1,750,000 a tattao ti bilang dagiti aktibo a sakup ti turay ti Pagarian. Sibubulos dagitoy a nagbalin a paset ti grupo a maipapan iti dayta kinuna ti 1950 a Watchtower: “Isagsaganan ti Dios ti maysa a baro a lubong a kagimongan. . . . Makalasatto daytoy a grupo inton Armagedon, . . . isudanto ti kauunaan iti ‘baro a daga’ . . . , a maorganisarda iti teokratiko a pamay-an, yantangay ammoda dagiti umiso nga urnos ti organisasion.” Inleppas ti artikulo: “Agtultuloytay ngarud nga umabante, datayo amin, kas maysa a baro a lubong a kagimongan!”
9. Kasano a makagunggona dagiti banag a nasursuro dagiti Saksi ni Jehova iti panaglabas dagiti tawen?
9 Kabayatanna, nasursuro daytoy dumakdakkel a baro a lubong a kagimongan no kasano a siaannayas nga imanehar ti bambanag. Napateg dayta ken nalabit kabayatanto pay ti trabaho a panagpabaro kalpasan ti Armagedon. Kas pagarigan, nasursuro dagiti Saksi nga organisaren dagiti dadakkel a kombension, alisto a panangipaay iti tulong no adda didigra, ken napardas a panangbangon kadagiti patakder. Gapu iti daytoy, adu ita ti mangpadpadayaw ken mangraraem kadagiti Saksi ni Jehova.
Panangkorehir Kadagiti Di Umiso nga Impresion
10, 11. Iyilustraryo no kasano a nakorehir dagiti di umiso nga impresion kadagiti Saksi ni Jehova.
10 Nupay kasta, adda tattao nga agakusar a dagiti Saksi ni Jehova kumonkontrada iti kagimongan ti tao. Ti kangrunaan a makagapu isut’ naibatay iti Biblia a takder dagiti Saksi kadagiti banag a kas iti panangyalison iti dara, neutralidad, panagsigarilio, ken moralidad. Ngem umad-adun ti tattao a mangadmitir nga adda kaimudingan dagiti panangmatmat dagiti Saksi. Kas pagarigan, tineleponuan ti maysa a doktor idiay Poland ti administratibo nga opisina dagiti Saksi ni Jehova ket kinunana nga adu nga oras a nagdedebateda ken dagiti kaduana idiay ospital maipapan iti panangyalison iti dara. Narugian dayta a diskusion gapu iti maysa nga artikulo a nagparang iti pagiwarnak ti Poland a Dziennik Zachodni. “Pagladingitak ta sobra ti pannakausar ti dara iti tay-ak ti medisina,” inamin ti doktor. “Masapul a mabaliwan daytoy, ket maragsakanak ta adda nangilukat iti daytoy a suheto. Kayatko ti ad-adu pay nga impormasion.”
11 Iti maysa a komperensia itay kallabes a tawen, nagsasaritaan dagiti autoridad iti medisina manipud Canada, Estados Unidos, Europa, ken Israel ti maysa a material a nadisenio a tumulong kadagiti doktor nga agagas kadagiti pasiente a saanda nga agusar iti dara. Napagminar iti daytoy a miting, a naangay idiay Switzerland, a maisupadi iti opinion ti kaaduan, ad-adu ti matmatay a pasiente a nayalisonan iti dara ngem dagidiay di nayalisonan. Gagangayen a nasapsapa a rummuar iti ospital dagiti pasiente a Saksi ngem dagidiay naagasan babaen ti dara, iti kasta basbassit ti magastosda nga agpaagas.
12. Mangtedkayo iti ehemplo no kasano nga indayaw dagiti prominente nga indibidual ti neutral a takder dagiti Saksi ni Jehova mainaig iti politika?
12 Adu met dagiti nagkomento a pabor iti neutral a takder dagiti Saksi ni Jehova sakbay ken kabayatan ti Gubat Sangalubongan II idi inibturanda ti narungsot nga ibubusor dagiti Nazi. Adu a nasayaat a komento ti pinataud ti video a Jehovah’s Witnesses Stand Firm Against Nazi Assault nga inaramid dagiti Saksi ni Jehova ken maitutop a naipabuya iti kaunaan a gundaway idiay Ravensbrück a kampo konsentrasion idiay Alemania idi Nobiembre 6, 1996. Iti panglukat ti umasping a presentasion iti agdindinamag a kampo konsentrasion ti Bergen-Belsen idi Abril 18, 1998, inadmitir ni Dr. Wolfgang Scheel, direktor ti Center for Political Education idiay Lower Saxony: “Ti maysa kadagiti kinapudno iti historia a nakababain isut’ panangilaksid dagiti Saksi ni Jehova iti Sosialismo Nasional buyogen ti determinasion a napingpinget ngem kadagiti Kristiano nga iglesia. . . . Uray man no kasano ti panagriknatayo maipapan iti sursuro ken kinarelihioso dagiti Saksi ni Jehova, maikari a raemen ti kinatibkerda kabayatan ti panagturay ti Nazi.”
13, 14. (a) Ania a nainkalintegan a kapaliiwan kadagiti immuna a Kristiano ti inyebkas ti maysa a di ninamnama a gubuayan? (b) Mangtedkayo kadagiti ehemplo dagiti paborable a komento maipapan iti ili ti Dios itatta.
13 No dagiti prominente nga indibidual wenno desision iti korte ket pabor kadagiti Saksi ni Jehova kadagiti kontrobersial nga isyu, mabalin a pabassiten dayta ti panagilem ken nasaysayaat ti panangmatmat dagiti tattao kadagiti Saksi. Masansan a luktan daytoy ti gundaway a makasaoda dagiti tattao a dati a saan a dumngeg. Siraragsak a maawat dagita a tignay, ket talaga nga apresiaren ida dagiti Saksi ni Jehova. Ipalagip daytoy kadatayo ti napasamak idi umuna a siglo idiay Jerusalem. Idi a ti Sanhedrin, ti nangato a pangukoman dagiti Judio, kayatda a papatayen dagiti Kristiano gapu iti naregta a panangaskasabada, namakdaar ni Gamaliel, “maysa a mannursuro iti Linteg nga ipatpateg ti amin a tattao,” ket kinunana: “Lallaki a taga Israel, agaluadkayo maipapan iti panggepyo nga aramiden mainaig kadagitoy a tattao. . . . Dikay makibiang kadagitoy a tattao, no di ket baybay-anyo ida; (agsipud ta, no daytoy a gandat wenno daytoy nga aramid ket aggapu kadagiti tattao, maduprakto dayta; ngem no aggapu iti Dios, saanyonto a kabaelan a dupraken ida;) ta no saan, amangan ta iti kinaagpaysuanna masarakankayo a mannakilaban iti Dios.”—Aramid 5:33-39.
14 Kas ken Gamaliel, inyebkas dagiti prominente nga indibidual iti nabiit pay ti panangpaborda iti wayawaya iti relihion para kadagiti Saksi ni Jehova. Kas pagarigan, kastoy ti inkalintegan ti dati a tserman ti International Academy for Freedom of Religion and Belief: “Saan koma a maipaidam ti narelihiosuan a kalintegan ti maysa a relihion gapu laeng ta dagiti sursurona ket matmatan ti kagimongan kas mababbabalaw wenno naidumduma.” Ket ti maysa a propesor iti sientipiko a panagadal iti relihion iti unibersidad idiay Leipzig imbangonna ti mainaig a saludsod maipapan iti maysa a komision ti Aleman a gobierno a naipasdek a mangimbestigar kadagiti makunkuna a sekta ti relihion, a kunkunana: “Apay a dagiti laeng relihion a minoria ti masuksukimat ket saan a mairaman dagiti dua a dadakkel nga iglesia [ti Iglesia Romana Katolika ken ti Iglesia a Luterano]?” Umdasen a masungbatantay dayta babaen ti sasao ti maysa a dati nga opisial ti Alemania, a nangisurat: “Awan duadua a dagiti panatiko iti iglesia ti nangimaniobra iti napolitikaan a turongen ti komision ti gobierno.”
Siasino ti Pagpannurayantayo iti Saranay?
15, 16. (a) Apay a limitado ti kinaepektibo ti tignay ni Gamaliel? (b) Apay a limitado laeng ti maaramidan dagiti tallo a naturay nga indibidual para ken Jesus?
15 Ti kinuna ni Gamaliel ipaganetgetna laeng a di pulos mapaay ti trabaho a supsuportaran ti Dios. Sigurado a nabenepisiaran dagiti Kristiano iti sasaona iti Sanhedrin, ngem dida linipatan a pudno met ti sasao ni Jesus a maidadanes dagiti pasurotna. Ti inaramid ni Gamaliel pinasardengna ti gakat dagidi a panguluen ti relihion a mangpapatay kadakuada, ngem saanna a naikkat a namimpinsan ti panangidadanes, ta mabasatayo: “Gapu itoy isu impangagda, ket inayabanda dagiti apostol, sinaplitda ida, ket binilinda ida nga isardengda ti agsasao maipuon iti nagan ni Jesus, ket binulosanda ida.”—Aramid 5:40.
16 Idi maus-usig ni Jesus, pinadas a ruk-atan ni Poncio Pilato ta awan masarakanna a basolna. Ngem di nagballigi. (Juan 18:38, 39; 19:4, 6, 12-16) Uray ti dua a miembro ti Sanhedrin, da Nicodemo ken Jose ti Arimatea, a nangpabor ken Jesus, limitado ti naaramidanda tapno lapdanda ti korte a mangngeddeng maibusor ken Jesus. (Lucas 23:50-52; Juan 7:45-52; 19:38-40) Limitado laeng ti saranay a maipaay dagiti tattao no idepensada ti ili ni Jehova—aniaman ti rasonda a mangaramid iti kasta. Agtultuloy a guraen ti lubong dagiti pudno a pasurot ni Kristo, kas iti pananggura ti lubong idi kenkuana. Aggapu laeng ken Jehova ti naan-anay a saranay.—Aramid 2:24.
17. Ania a realistiko a panangmatmat ti adda kadagiti Saksi ni Jehova, ngem apay a saan a kumapuy ti determinasionda nga agtultuloy a mangikasaba iti naimbag a damag?
17 Realistiko a namnamaen dagiti Saksi ni Jehova nga agtultuloy ti pannakaidadanes. Mamingganto laeng ti ibubusor no naan-anayton a naparmek ti sistema ni Satanas. Ngem, nupay di makaparagsak daytoy a pannakaidadanes, saanna a mapasardeng dagiti Saksi a mangtungpal iti rebbengenda a mangikasaba iti Pagarian. Pulos a saanda a sumardeng ta supsuportaran ida ti Dios. Tultuladenda ti natured a Liderda, ni Jesu-Kristo, kas ti umiso nga ulidanda.—Aramid 5:17-21, 27-32.
18. Ania pay a pakarigatan ti agur-uray iti ili ni Jehova, ngem kombinsidoda iti ania a pagbanagan?
18 Manipud punganayna, mabusbusoren iti kasta unay ti pudno a relihion. Din agbayag, puntirianto dayta ti sapasap nga iraraut ni Gog, a ni Satanas iti naipababa a kasasaadna sipud pay pannakapaksiatna manipud langit. Ngem makalasatto ti pudno a relihion. (Ezequiel 38:14-16) Dagiti “ar-ari iti intero a mapagnaedan a daga,” iti sidong ti panangiturong ni Satanas, “makibakaldanto iti Kordero, ngem, agsipud ta isu ti Apo ti ap-appo ken Ari ti ar-ari, parmekento ida ti Kordero.” (Apocalipsis 16:14; 17:14) Wen, umab-abanten ti Aritayo nga agturong iti naan-anay a panagbiktoriana ket din agbayag, ‘an-anayennanton ti panagballigina.’ Anian a pribilehio ti makidanggay kenkuana, yantangay ammotayo nga iti mabiiten, awanton ti kumontra manen kadagiti managdaydayaw ni Jehova inton kunaenda: “Ti Dios adda kadatayo”!—Roma 8:31; Filipos 1:27, 28.
Mailawlawagyo Kadi?
• Aniat’ inaramid ni Jehova a mangpabileg iti kongregasion Kristiano sipud pay idi naipasngay ti Pagarian?
• Aniat’ inaramid ni Satanas a mangpasardeng ken Kristo a mangan-anay iti panagballigina, ket ania dagiti resultana?
• Ania a balanse a panangmatmat ti rebbeng nga adda kadatayo maipapan iti paborable a tignay dagiti di Saksi?
• Ania ti aramiden ni Satanas iti mabiiten, ket anianto ti pagbanaganna?
[Ladawan iti panid 18]
Dagiti kombension iparangarangda ti panagabante ti ili ni Jehova
[Dagiti Ladawan iti panid 20]
Ti neutral a takder dagiti Saksi kabayatan ti Gubat Sangalubongan II ket pakaidaydayawan pay laeng ni Jehova