“No ti Dios Adda Kadatayo, Siasinonto ti Bumusor Kadatayo?”

“Ania, ngarud, ti kunaentayo kadagitoy a banag? No ti Dios adda kadatayo, siasinonto ti bumusor kadatayo?” ​—ROMA 8:31.

1. Asino dagiti kimmuyog idi pimmanaw dagiti Israelita iti Egipto, ket apay a kastat’ inaramidda?

IDI agturongen dagiti Israelita iti pannakawayawayada kalpasan ti 215 a tawen a kaaddada idiay Egipto, a kaaduan iti dayta a panawen ket pannakaadipen, “nakipagsang-at met kadakuada ti maysa a nakadakdakkel a naglalaok a bunggoy.” (Exodo 12:38) Napasaran dagitoy a di Israelita ti sangapulo a nakaam-amak a saplit a nangdidigra iti Egipto ken namagbalin kadagiti didiosenda a pagkakatawaan. Iti isu met laeng a gundaway, naimatanganda​—nangruna manipud iti maikapat a saplit ken agpatpatuloy​—ti abilidad ni Jehova a mangsalaknib iti ilina. (Exodo 8:23, 24) Nupay limitado ti pannakaammoda maipapan kadagiti panggep ni Jehova, maysa a banag ti masiguradoda: Napaay dagiti didios ti Egipto a mangsalaknib kadagiti Egipcio, idinto ta pinaneknekan ni Jehova ti kinapigsana a nangispal kadagiti Israelita.

2. Apay a sinuportaran ni Rahab dagiti espia nga Israelita, ket apay a saan a nagbiddut a nagkompiansa iti Diosda?

² Uppat a pulo a tawen kalpasanna, sakbay la unay a simrek dagiti Israelita iti Naikari a Daga, ni Josue a nangsuno ken Moises, nangibaon iti dua a lallaki tapno agespiada iti daga. Naam-ammoda sadiay ni Rahab, nga agnanaed iti Jerico. Sigun iti nangngeganna maipapan kadagiti nabileg nga aramid ni Jehova a nangsalaknib kadagiti Israelita kabayatan ti 40 a tawen sipud pay idi pinanawanda ti Egipto, ammona a masapul a suportaranna ti ili ti Dios no kayatna ti umawat iti pamendisionna. Gapu iti nainsiriban a pangngeddengna, naispal ni Rahab ken ti sangakabbalayanna idi kinautibo dagiti Israelita ti siudad. Ti namilagruan a pannakaispalda ket di pagduaduaan nga ebidensia nga adda kadakuada ti Dios. No kasta, saan a nagbiddut ni Rahab a nagkompiansa iti Dios dagiti Israelita.​—Josue 2:1, 9-13; 6:15-17, 25.

3. (a) Ania a milagro ti inaramid ni Jesus iti asideg ti naibangon manen a siudad ti Jerico, ket aniat’ reaksion dagiti Judio a klero? (b) Aniat’ nabigbig ti dadduma kadagiti Judio, ken kasta met ti adu a di Judio idi agangay?

³ Sangapulo ket lima a siglo kalpasanna, pinaimbag ni Jesu-Kristo ti maysa a bulsek nga agpalpalama iti asideg ti naibangon manen a siudad ti Jerico. (Marcos 10:46-52; Lucas 18:35-43) Indawat daytoy a lalaki ken Jesus a kaasianna, a mangipasimudaag iti panangbigbigna a ni Jesus ket supsuportaran ti Dios. Iti sabali a bangir, nagkitakit dagiti Judio a panguluen ti relihion ken dagiti pasurotda a mangakseptar kadagiti milagro nga inaramid ni Jesus kas pammaneknek a trabaho ti Dios ti ar-aramidenna. Imbes ketdi, binabalawda ni Jesus. (Marcos 2:15, 16; 3:1-6; Lucas 7:31-35) Uray idi naammuanda a napagungaren ni Jesus kalpasan ti panangpapatayda kenkuana, dida kayat nga admitiren nga aramid ti Dios daytoy. Imbes ketdi, indauluanda ti panangidadanes kadagiti pasurot ni Jesus, a pinadpadasda a lapdan ti trabahoda a ‘mangideklara iti naimbag a damag maipapan ken ni Apo Jesus.’ Ngem ti sumagmamano a Judio, ken adu a di Judio idi agangay, nabigbigda dagitoy a pasamak ket umiso ti panangtingitingda kadagita. Patienda a nabatad a linaksiden ti Dios dagiti aginlilinteg a Judio a panguluen ket supsuportaranna dagiti napakumbaba a pasurot ni Jesu-Kristo.​—Aramid 11:19-21.

Asino Itatta Dagiti Supsuportaran ti Dios?

4, 5. (a) Kasanot’ panagrikna ti dadduma a tattao maipapan iti panagpili iti relihion? (b) Aniat’ nasken a saludsod iti panangilasin iti pudno a relihion?

⁴ Maipapan iti pakabigbigan ti pudno a relihion, kinuna ti maysa a klero iti nabiit pay a pannakainterbiuna iti TV: “Patiek a pudno ti relihion no mapagbalinna a naim-imbag ti maysa a tao no isu ket agbibiag a maitunos iti dayta.” Ibagatayon a ti pudno a relihion mapagbalinna a naim-imbag dagiti tattao. Ngem no ti maysa a relihion ket makapataud iti naim-imbag a tattao, umdas kadin a pammaneknek a dayta ket supsuportaran ti Dios? Dayta kadi ti kakaisuna a pangibatayan tapno maikeddeng a pudno ti maysa a relihion?

⁵ Napateg iti tunggal maysa ti wayawaya a mangaramid iti personal a panagpili, a pakairamanan ti panangpili iti relihion a pakitimpuyogan. Ngem ti kaadda ti wayawaya nga agpili saanna a garantisaran nga umiso ti mapili ti maysa a tao. Kas pagarigan, dagiti dadduma a tattao pilienda ti relihion maibatay iti kaadu ti miembrona, kinabaknang, kinagarbo dagiti seremoniana, wenno pannakaisinggalutda iti maysa a pamilia. Saan nga agpannuray kadagitoy ti panangikeddeng no pudno wenno saan ti maysa a relihion. Ti nasken a salsaludsod iti daytoy a banag ket: Ania a relihion ti mangidagdagadag kadagiti pasurotna a mangaramid iti pagayatan ti Dios ken mangpatpataud iti natibker nga ebidensia a dayta ket supsuportaran ti Dios, tapno napnuan panagtalek a maikuna dagiti miembrona, “Ti Dios adda kadatayo”?

6. Ania a sasao ni Jesus ti manglawlawag maipapan iti pudno ken palso a relihion?

⁶ Impasdek ni Jesus ti pagannurotan iti panangilasin iti pudno a panagdaydayaw manipud iti palso idi kinunana: “Siputanyo dagiti ulbod a mammadto nga umay kadakayo iti kawes ti karnero, ngem iti uneg loboda a narawet. Babaen kadagiti bungada mailasinyonto ida.” (Mateo 7:15, 16; Malakias 3:18) Intay repasuen ti dadduma “kadagiti bunga,” wenno tanda a pakabigbigan, ti pudno a relihion tapno sipupudno a maikeddengtayo no asino ita ti supsuportaran ti Dios.

Dagiti Tanda a Pakabigbigan Dagidiay Supsuportaran ti Dios

7. Aniat’ kaipapanan ti panangisuro a naibasar laeng iti Biblia?

⁷ Ibasarda dagiti sursuroda iti Biblia. Kinuna ni Jesus: “Ti isursurok saanko a kukua, no di ket kukua daydiay nangibaon kaniak. No ti asinoman agtarigagay a mangaramid iti pagayatanna, maammuannanto maipapan iti sursuro no dayta ket aggapu iti Dios wenno no agsasaoak manipud iti bukodko a parnuay.” Kasta met: “Ti aggapu iti Dios imdenganna ti sasao ti Dios.” (Juan 7:16, 17; 8:47) Ngarud, tapno suportaran ti Dios, masapul a ti maysa isurona laeng no ania ti ipalgak ti Dios iti Saona ken ilaksidna dagiti sursuro a naibatay iti sirib ti tao wenno tradision.​—Isaias 29:13; Mateo 15:3-9; Colosas 2:8.

8. Apay a nesesita nga usaren ti nagan ti Dios iti panagdaydayaw?

⁸ Usaren ken ipablaakda ti nagan ti Dios a Jehova. Impadto ni Isaias: “Iti dayta nga aldaw sigurado a kunaenyonto: ‘Agyamankayo ken Jehova! Umawagkayo iti naganna. Ipakaammoyo kadagiti ili dagiti pannakilangenna. Dakamatenyo a ti naganna naitan-ok. Mangipaaykayo iti samiweng ken Jehova, ta isu nagaramid a nakaringringbaw. Maipakpakaammo daytoy iti intero a daga.’” (Isaias 12:4, 5) Insuro ni Jesus dagiti adalanna nga ikararagda: “Amami nga adda iti langlangit, masantipikar koma ti naganmo.” (Mateo 6:9) Gapuna, Judio man wenno saan, agserbi dagiti Kristiano kas “ili a maipaay iti nagan [ti Dios].” (Aramid 15:14) Sigurado a maay-ayo ti Dios a mangsuportar kadagidiay ipagpannakkelda ti panagbalinda nga “ili a maipaay iti naganna.”

9. (a) Apay a ti rag-o ipabigbigna dagiti miembro ti pudno a relihion? (b) Kasano a pinagdilig ni Isaias ti pudno ken palso a relihion?

⁹ Iyanninawda ti naragsak a personalidad ti Dios. Kas gubuayan ti “naimbag a damag,” ni Jehova “ti naragsak a Dios.” (1 Timoteo 1:11) Gapuna, kasano koma a di naragsak wenno agtultuloy a negatibo ti panangmatmat dagiti agdaydayaw kenkuana? Iti laksid ti kinariribuk ti lubong ken dagiti personal a parikut, mataginayon dagiti pudno a Kristiano ti naragsak nga espiritu agsipud ta regular nga agpipiestada iti aglaplapusanan a naespirituan a taraon. Idilig ida ni Isaias kadagidiay mangan-annurot iti palso a relihion: “Daytoy ti kinuna ti Soberano nga Apo Jehova: ‘Adtoy! Dagiti bukodko nga adipen mangandanto, ngem dakayo agbisinkayto. Adtoy! Dagiti bukodko nga adipen uminumdanto, ngem dakayo mawawkayto. Adtoy! Dagiti bukodko nga adipen agrag-odanto, ngem dakayo agsagabakayto iti pannakaibabain. Adtoy! Dagiti bukodko nga adipen agdir-idanto a sirarag-o gapu iti nasayaat a kasasaad ti puso, ngem dakayo agsangitkayto gapu iti saem ti puso ket aganug-ogkayto gapu iti bin-ig a pannakarba ti espiritu.’”​—Isaias 65:13, 14.

10. Kasano a dagidiay addaan iti pudno a relihion maliklikanda ti panagsursuro babaen ti panageksperimento?

¹⁰ Ibasarda ti konduktada ken dagiti pangngeddengda kadagiti prinsipio ti Biblia. Balakadannatayo ti mannurat iti Proverbio: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) Suportaran ti Dios dagidiay agpaiwanwan kenkuana imbes nga agpannurayda kadagiti agsusupadi a teoria dagiti tattao a di mangikankano iti nadiosan a sirib. No situtulok nga agbiag ti maysa a tao a mayannurot iti Sao ti Dios, maliklikanna ti agsursuro babaen ti panageksperimento.​—Salmo 119:33; 1 Corinto 1:19-21.

11. (a) Apay a dagiti miembro ti pudno a relihion saanda a nabingay iti klase klero ken pasurot? (b) Ania nga ulidan ti ipakpakita dagidiay mangidadaulo iti ili ti Dios para iti arban?

¹¹ Naorganisarda sigun iti pannakaorganisar ti kongregasion Kristiano idi umuna a siglo. Impasdek ni Jesus ti prinsipio: “Saankayo a maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Saankayo met a maawagan iti ‘papanguluen,’ ta ti Panguluenyo ket maymaysa, ni Kristo. Ngem daydiay kadakkelan kadakayo masapul nga agserbi kadakayo.” (Mateo 23:8-11) Ti maysa a kongregasion dagiti agkakabsat saanna nga iraman dagiti naparammag a klase klero a mangidayaw iti bagina babaen kadagiti naranga a titulo ken mangitan-ok iti bagina iti ngatuen dagiti pasurot. (Job 32:21, 22) Dagidiay mangipaspastor iti arban ti Dios naibaga kadakuada nga aramidenda ti kasta a “saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.” (1 Pedro 5:2, 3) Dagiti pudno a Kristiano a papastor liklikanda a pagbalinen ti bagbagida nga agturay iti pammati ti sabsabali. Kas katrabahuan nga agserserbi iti Dios, ikagumaanda laeng ti mangipasdek iti nasayaat nga ulidan.​—2 Corinto 1:24.

12. Ania a balanse a panangmatmat maipapan kadagiti gobierno ti tao ti kalikaguman ti Dios kadagidiay agtarigagay iti suportana?

¹² Paiturayanda kadagiti gobierno ti tao ngem agtalinaedda a neutral. Daydiay saan a “paiturayan kadagiti nangatngato nga autoridad” saanna a namnamaen ti panangsuportar ti Dios. Apay? Agsipud ta “dagiti adda nga autoridad impasdek ti Dios kadagiti relatibo a saadda. Gapuna ti bumusor iti autoridad innalana ti takder a maibusor iti urnos ti Dios.” (Roma 13:1, 2) Nupay kasta, ammo ni Jesus nga addanto tumaud a panagsupadi iti pagayatan idi kinunana: “Ibayadyo ken Cesar ti bambanag ni Cesar, ngem iti Dios ti bambanag ti Dios.” (Marcos 12:17) Dagidiay agtarigagay iti suporta ti Dios masapul nga ‘itultuloyda . . . a sapulen nga umuna ti pagarian [ti Dios] ken ti kinalintegna,’ ngem kagiddan dayta agtulnogda kadagiti linteg ti pagilian a maitunos kadagiti dakdakkel a pagrebbenganda iti Dios. (Mateo 6:33; Aramid 5:29) Impaganetget ni Jesus ti neutral a takder idi kinunana maipapan kadagiti adalanna: “Saanda a paset ti lubong, a kas kaniak a saan a paset ti lubong.” Idi agangay, innayonna: “Ti pagariak saan a paset daytoy a lubong.”​—Juan 17:16; 18:36.

13. Aniat’ paset ti ayat iti panangilasin iti ili ti Dios?

¹³ Saanda a mangidumduma iti panangaramid iti “naimbag kadagiti amin.” (Galacia 6:10) Saan a mangidumduma ti Nakristianuan nga ayat, nga awatenna ti amin a tattao uray ania ti kolorda, kasasaadda iti biag wenno edukasion a nadanonda, pagilian, wenno pagsasaoda. Ti panangaramid iti naimbag kadagiti amin ken nangnangruna kadagidiay nainaig kadakuada iti pammati tumulong a mangilasin kadagidiay supsuportaran ti Dios. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35; Aramid 10:34, 35.

14. Dagiti kadi tattao nga anamongan ti Dios ket kankanayon nga akseptaren ida ti kaaduan? Ilawlawagyo.

¹⁴ Situtulokda a maidadanes gapu iti panangaramid iti pagayatan ti Dios. Pinakdaaran ni Jesus dagiti adalanna: “No indadanesdak, idadanesdakayto met; no tinungpalda ti saok, tungpalendanto met ti saoyo.” (Juan 15:20; Mateo 5:11, 12; 2 Timoteo 3:12) Kankanayon a magurgura dagidiay supsuportaran ti Dios, kas ken ni Noe idi, a nangkondenar iti lubong babaen ti pammatina. (Hebreo 11:7) Itatta, dagidiay agtartarigagay iti suporta ti Dios saanda a pakapuyen ti Sao ti Dios wenno ikompromiso dagiti nadiosan a prinsipio tapno laeng makaliklikda iti pannakaidadanes. No la ket ta simamatalekda nga agserbi iti Dios, ammoda a dagiti tattao “masmasdaawda ket itultuloyda ti agsao a sibabassawang” kadakuada.​—1 Pedro 2:12; 3:16; 4:4.

Tiempon a Tingitingen Dagiti Bambanag

15, 16. (a) Ania a salsaludsod ti tumulong kadatayo a mangilasin iti relihion a supsuportaran ti Dios? (b) Ania a konklusion ti nagtengan ti minilion a tattao, ken apay?

¹⁵ Saludsodam ta bagim, ‘Ania a relihioso a grupo ti mabigbigbig gapu iti napasnek a panangannurotda iti Sao ti Dios, uray pay no ti sursuroda ket naiduma kadagiti patpatien ti kaaduan a tattao? Asino dagiti mangipagpaganetget iti kinapateg ti personal a nagan ti Dios, nga us-usarenda pay dayta a pangyam-ammo iti bagbagida? Asino dagiti positibo a mangin-inanama a ti Pagarian ti Dios ti kakaisuna a solusion kadagiti amin a parikut ti tao? Asino dagiti mangitantandudo kadagiti estandarte ti Biblia iti kababalin, uray pay no awagan ida dagiti tattao iti kadaanan? Ania a grupo ti mabigbigbig gapu ta awan iti dayta ti masusuelduan a klero, nga amin dagiti miembrona ket mangaskasabada? Asino dagiti mapadpadayawan gapu ta umilida a managtungpal iti linteg, nupay saanda a makinamnamin iti politika? Asino dagiti siaayat a mangbusbos iti tiempo ken kuartada tapno laeng matulonganda ti sabsabali a mangammo maipapan iti Dios ken kadagiti panggepna? Ket nupay ar-aramidenda amin dagitoy a nagsayaat a banag, asino dagiti maum-umsi, malalais, ken maidaddadanes?’

¹⁶ Minilion a tattao iti intero a lubong ti nangtingiting kadagiti bambanag ket nakombinsirda a dagiti Saksi ni Jehova laeng ti mangan-annurot iti pudno a relihion. Daytoy a konklusionda ket imbasarda iti isursuro dagiti Saksi ni Jehova ken iti wagas ti panagbiagda, kasta met kadagiti gunggona nga inyeg ti relihionda. (Isaias 48:17) No ar-arigen, minilion ti mangibagbaga iti kas naipadto idiay Zacarias 8:23: “Kumuyogkaminto kadakayo, ta nangngegmi a ti Dios adda kadakayo.”

17. Apay a saan a kinakuspag ti panangibaga a dagiti Saksi ni Jehova ti addaan iti pudno a relihion?

¹⁷ Kinakuspag kadi ti panangibaga a dagiti Saksi ni Jehova laeng ti supsuportaran ti Dios? Kinapudnona, kasta met laeng ti napasamak idi imbaga dagiti Israelita idiay Egipto nga isuda ti supsuportaran ti Dios iti laksid ti patpatien dagiti Egipcio, wenno idi imbaga dagiti Kristiano idi umuna a siglo nga isuda ti supsuportaran ti Dios, saan ket a dagiti Judio a relihionista. Dagiti pudno a kasasaad ti mangpaneknek iti dayta. Iti 235 a daga, ar-aramiden dagiti Saksi ni Jehova ti trabaho nga impadto ni Jesus nga aramiden dagiti pasurotna iti tiempo ti panungpalan: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.

18, 19. (a) Apay nga awan ti rason nga isardeng dagiti Saksi ni Jehova ti panangaskasabada, uray pay no maipasangoda iti ibubusor? (b) Kasano a ti Salmo 41:11 pasingkedanna ti kinapudno a dagiti Saksi ket supsuportaran ti Dios?

¹⁸ Agtultuloy nga itungpal dagiti Saksi ni Jehova daytoy a rebbengenda, ket pulos a saanda nga ipalubos a ti pannakaidadanes wenno ibubusor ti mangpasardeng iti trabahoda. Masapul a maaramid ken maitungpal ti trabaho ni Jehova. Amin a pananggandat ti sabsabali a manglapped iti pannakairingpas ti trabaho ti Dios bayat ti naglabas a siglo ket nagbanag laeng iti pannakapaay, ta inkari ni Jehova: “Aniaman nga igam a mabukelto maibusor kenka saanto nga agballigi, ket aniaman a dila a tumakderto a bumusor kenka iti panangukom kondenaremto. Daytoy ti pagtatawidan a sanikua dagiti adipen ni Jehova, ket ti kinalintegda aggapu kaniak.”​—Isaias 54:17.

¹⁹ Ti kinapudno a nabilbileg ken mas aktibo itan dagiti Saksi ni Jehova uray pay iti laksid ti sangalubongan nga ibubusor ket pammaneknek a maragsakan ni Jehova iti ar-aramidenda. Kinuna ni Ari David: “Babaen iti daytoy ammok a naragsakanka kaniak, agsipud ta ti kabusorko saan nga agdir-i a sibaballigi kaniak.” (Salmo 41:11; 56:9, 11) Dagiti kabusor ti Dios saandanto pulos nga agdir-i a sibaballigi maibusor iti ili ni Jehova, ta ti Liderda, ni Jesu-Kristo, ket umab-abanten nga agturong iti naan-anay a panagbiktoriana!

Masungbatanyo Kadi?

• Ania ti sumagmamano a nagkauna a pagarigan ti tattao a sinuportaran ti Dios?

• Ania ti sumagmamano a tanda a pakabigbigan ti pudno a relihion?

• Apay a kombinsidoka a mismo a dagiti Saksi ni Jehova ket supsuportaran ti Dios?

[Ladawan iti panid 13]

Dagidiay agtarigagay iti panangsuportar ti Dios ket masapul nga ibasarda laeng ti sursuroda iti Saona

[Ladawan iti panid 15]

Dagiti Kristiano a panglakayen agserbida a pagulidanan iti arban