No Kasano a ti Bagi a Manarawidwid Naiduma iti Legal a Korporasion
SIPUD idi Enero 1885, maang-angay ti tinawen a miting ti Watch Tower Bible and Tract Society of Pennsylvania. Kabayatan ti pannakaurnong dagiti napulotan a Kristiano idi arinunos ti maika-19 a siglo, nailangitan ti namnama dagiti nagserbi kas direktor ken opisial iti daytoy a korporasion. Kinapudnona, gistay kanayon a kasta.
Ngem adda naminsan a saan a kasta ti napasamak. Idi 1940, naisaad kas direktor iti Sosiedad ni Hayden C. Covington—ti agdama idi nga abogado ti Sosiedad ken maysa kadagiti “sabsabali a karnero,” a mangnamnama nga agbiag ditoy daga. (Juan 10:16) Nagserbi kas bise-presidente iti Sosiedad nanipud 1942 agingga idi 1945. Iti daydi a tiempo, naglusulos ni Kabsat Covington kas direktor tapno agtungpal iti maipagarup idi a pagayatan ni Jehova—nga amin a direktor ken opisial iti Pennsylvania a korporasion ket napulotan a Kristiano koma. Ni Lyman A. Swingle ngarud ti simmukat ken Hayden C. Covington kas kameng ti board of directors ti Sosiedad, ket ni Frederick W. Franz ti naisaad kas bise-presidente.
Apay nga impapan dagiti agserserbi ken Jehova a nasken a napulotan a Kristiano ti amin nga agbalin a direktor ken opisial ti Watch Tower Bible and Tract Society of Pennsylvania? Agsipud ta iti daydi a tiempo, dagiti direktor ken opisial iti Pennsylvania a korporasion ket nainaig unay iti Bagi a Manarawidwid dagiti Saksi ni Jehova, a kanayon a buklen ti lallaki a napulotan iti espiritu.
Ti Nakallalagip a Tinawen a Miting
Iti tinawen a miting a naangay idi Oktubre 2, 1944 idiay Pittsburgh, dagiti kameng ti Pennsylvania a korporasion inyussuatda ti innem a resolusion a nangbalbaliw iti karta ti korporasion. Sigun iti karta idi, maikkan iti kalintegan nga agbotos dagidiay mangmangted iti kontribusion para iti trabaho ti Sosiedad, ngem dayta a probision ti inikkat ti maikatlo a resolusion. Kinuna ti report mainaig iti dayta a tinawen a miting: “Agingga 500 laeng ti mabalin nga agmiembro iti Sosiedad . . . Dagiti mapili ket masapul nga amin-tiempo nga agserserbi iti Sosiedad wenno paset-tiempo nga agserserbi iti maysa a grupo [kongregasion] dagiti saksi ni Jehova ken nasken a mangiparparangarang iti espiritu ti Apo.”
Nanipud idin, dagiti tattao a naan-anay a dedikado ken Jehova ti mangisaad kadagiti direktor ti Sosiedad, aniaman ti gatad ti kontribusionda a pangyadelantar iti trabaho mainaig iti Pagarian. Maitunos daytoy iti in-inut a pannakagugor a naipadto iti Isaias 60:17 (NW), a kastoy ti mabasa: “Imbes a ti gambang mangyegakto iti balitok, ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok; ket dutokakto ti talna kas dagiti manangaywanmo ken ti kinalinteg kas dagiti manangitudingmo iti akem.” Iti panangtukoyna ‘kadagiti manangaywan’ ken ‘kadagiti manangituding iti akem,’ ipampamatmat daytoy a padto nga adda panagrang-ay kadagiti urnos ti organisasion iti ili ni Jehova.
Daytoy a napateg nga addang a namagbalin nga ad-adda a teokratiko ti organisasion ket napasamak iti ngudo ti “dua ribu ket tallo gasut a malem ken bigat,” a nadakamat iti Daniel 8:14. Iti dayta a tiempo, ‘naiyeg iti umiso a kasasaad’ ti “nasantuan a disso.”
Ngem kalpasan ti nakallalagip a tinawen a miting idi 1944, nagtalinaed ti maysa a napateg a saludsod. Yantangay ti Bagi a Manarawidwid idi ti mangbukel iti pito a miembro ti board of directors ti Pennsylvania a korporasion, kayat kadi a sawen daytoy a di mabalin a buklen ti nasursurok ngem pito a napulotan a Kristiano ti Bagi a Manarawidwid? Maysa pay, gapu ta dagiti miembro ti korporasion ti mangisaad kadagiti direktor, dagiti miembro ti korporasion kadi ti mangpili no siasino dagiti agbalin a kameng ti Bagi a Manarawidwid bayat ti tinawen a miting kada tawen? Dagiti kadi direktor ken opisial ti Watch Tower Bible and Tract Society of Pennsylvania isuda met laeng dagiti kameng ti Bagi a Manarawidwid, wenno agdumada?
Maysa Manen a Nakallalagip a Tinawen a Miting
Nasungbatan dagitoy a saludsod iti tinawen a miting a naangay idi Oktubre 1, 1971. Iti dayta a gundaway, kinuna ti maysa kadagiti ispiker a ginasut a tawenen nga agan-andar ti bagi a manarawidwid ti “matalek ken masirib nga adipen” sakbay pay a naadda ti Watch Tower Bible and Tract Society of Pennsylvania. (Mateo 24:45-47) Nabukel ti maysa a bagi a manarawidwid idi Pentecostes ti 33 K.P., nasurok a 18 a siglo sakbay ti pannakabuangay ti Pennsylvania a korporasion. Idi damo, 12 nga apostol, saan a 7 a lallaki, ti nangbukel iti bagi a manarawidwid. Idi agangay, nalawag nga immadu ti bilangda, agsipud ta adda idi a mangidadaulo ‘dagiti apostol ken lallakay idiay Jerusalem.’—Aramid 15:2.
Idi 1971, inlawlawag ti isu met laeng nga ispiker a saan a mabalin a dagiti miembro ti Watch Tower Society ti mangpili no siasino ti agbalin a kameng ti napulotan a Bagi a Manarawidwid. Apay? Kinunana: “Agsipud ta saan a tao ti mangdutok iti bagi a manarawidwid ti klase ‘adipen.’ Ti mangdutok ket . . . ni Jesu-Kristo, ti Ulo ti pudno a kongregasion Kristiano ken ti Apo ken Makinkukua iti klase ‘matalek ken masirib nga adipen.’” Nalawag ngarud a di mabalin a dagiti miembro ti aniaman a legal a korporasion ti mangpili no siasino dagiti agbalin a kameng ti Bagi a Manarawidwid.
Kastoy ti nagpateg nga innayon ti ispiker: “Ti bagi a manarawidwid ket saan a kas iti Board of Directors ti Sosiedad nga addaan kadagiti opisial, kas iti presidente, bise-presidente, sekretario-tesorero ken katulongan ti sekretario-tesorero. Addaan laeng daytoy iti tserman.” Adu a tawenen a no siasino ti presidente ti Pennsylvania a korporasion, isuna ti kangrunaan a kameng ti Bagi a Manarawidwid. Ngem saanen a kasta ita. Nupay saan nga agpapada ti kapadasan wenno abilidad dagiti kameng ti Bagi a Manarawidwid, agpapada ti rebbengenda. Innayon ti ispiker: “Mabalinen nga ag-tserman ti asinoman a kameng ti bagi a manarawidwid uray saan nga isu ti presidente ti . . . Sosiedad . . . Agdepende daytoy iti panagrikos ti kinatserman kadagiti bagi a manarawidwid.”
Iti dayta a nakallalagip a tinawen a miting idi 1971, nailawlawag ti nagdumaan dagiti kameng ti Bagi a Manarawidwid a napulotan iti espiritu ken dagiti direktor ti Pennsylvania a korporasion. Kaskasdi, dagiti kameng ti Bagi a Manarawidwid nagtultuloyda a nagserbi kas direktor ken opisial ti Sosiedad. Ngem kastoy ti saludsod ita: Adda kadi aniaman a Nainkasuratan a rason a mangipakita a masapul a kameng ti Bagi a Manarawidwid dagiti direktor ti Watch Tower Bible and Tract Society of Pennsylvania?
Awan. Saan laeng a ti Pennsylvania a korporasion ti legal nga instrumento nga us-usaren dagiti Saksi ni Jehova. Adda pay dadduma. Ti maysa isu ti Watchtower Bible and Tract Society of New York, Incorporated. Tumultulong daytoy iti trabahotayo idiay Estados Unidos. Nalawag a bembendisionan ni Jehova dayta a korporasion numan pay kameng ti “sabsabali a karnero” ti kaaduan kadagiti direktor ken opisialna. Maus-usar idiay Britania ti International Bible Students Association. Dadduma a legal nga ahensia ti maus-usar a mangidur-as kadagiti interes ti Pagarian iti dadduma a pagilian. Agtutunos a tumulong amin dagitoy tapno maikasaba ti naimbag a damag iti intero a daga. Sadinoman ti ayan dagitoy nga ahensia wenno asinoman ti agserbi kas direktor ken opisialda, nateokratikuan nga idaldalan ken us-usaren ida ti Bagi a Manarawidwid. No kasta, adda akem dagitoy nga ahensia no maipapan iti panangidur-as kadagiti interes ti Pagarian.
Pagimbagantayo no adda dagiti legal nga ahensiatayo. Mangipakita nga agpaspasakuptayo kadagiti paglintegan ti komunidad ken pagilian, kas imbilin ti Sao ti Dios. (Jeremias 32:11; Roma 13:1) Papartaken dagiti legal nga ahensia ti pannakairakurak ti mensahe ti Pagarian babaen ti panangyimprentada kadagiti Biblia, libro, magasin, broshur, ken dadduma pay a material. Agserbida met kas legal nga instrumento a mangtaming kadagiti bambanag a mainaig kadagiti pananggun-od iti sanikua, panangipaay iti relief, kontrata ti pannakausar dagiti pasilidad a pagkombensionan, ken dadduma pay. Pagyamanantayo dagiti serbisio a maipapaay dagiti kasta a legal nga ahensia.
Panangitandudo iti Nagan ni Jehova
Idi 1944, nabaliwan ti Artikulo II ti karta ti Watch Tower Bible and Tract Society of Pennsylvania tapno ad-adda a maitampok dagiti panggep daytoy a korporasion. Sigun iti karta, kastoy ti kangrunaan a panggep ti Sosiedad: “Tapno maikasaba iti amin a nasion ti ebanghelio ti pagarian ti Dios iti sidong ni Kristo Jesus kas panangsaksi iti nagan, sasao ken kalintegan a mangituray ti Mannakabalin-amin a Dios a ni JEHOVA.”
Sipud idi 1926, itantandudo ti ‘matalek nga adipen’ ti nagan ni Jehova. Ad-adda a nakadidillaw idi 1931, idi a dagiti Estudiante ti Biblia inaramatda ti nagan a Saksi ni Jehova. (Isaias 43:10-12) Dadduma kadagiti publikasion a nangitandudo iti nagan ti Dios isu dagiti libro a Jehovah (1934), “Let Your Name Be Sanctified” (1961), ken “The Nations Shall Know That I Am Jehovah”—How? (1971).
Naisangsangayan ti New World Translation of the Holy Scriptures, a kompleto a naipablaak iti Ingles idi 1960. Iti daytoy a patarus, adda ti nagan ni Jehova iti amin a teksto a nagparangan ti Tetragrammaton iti Hebreo a Kasuratan, ken 237 a daras iti Kristiano a Griego a Kasuratan a napaneknekan a nagparangan ti nagan ti Dios maibatay iti naannad a panagsukimat. Anian a yamantayo ta iti nadumaduma a pamay-an, impausar ni Jehova iti “adipen” ken iti Bagi a Manarawidwidna dagiti alikamenda a mangipablaak ken legal nga ahensia tapno maipakaammo ti naganna iti intero a daga!
Nayussuat ti Pannakaiwaras ti Sao ti Dios
Awan sardayna nga ipakpakaammo ti ili ni Jehova ti naganna ken intandudoda ti Saona babaen ti panangipablaak ken panangiwarasda iti minilion a naibatay iti Biblia a publikasion agraman ti mismo a Biblia. Idi rugrugi ti dekada 1900, ti Watch Tower Society ti nakaitedan ti kalintegan a mangyimprenta iti The Emphatic Diaglott, ti Griego-Ingles nga interlinear nga edision ti Kristiano a Griego a Kasuratan ni Benjamin Wilson. Impablaak ti Sosiedad ti inaramid dagiti Estudiante ti Biblia nga edision ti King James Version, nga addaan iti 500 nga apendise. Idi 1942, impablaakna ti King James Version nga addaan kadagiti marginal reference. Sa idi 1944, inyimprenta ti Sosiedad ti 1901 nga American Standard Version, a nangusar iti nagan ti Dios. Adda met ti nagan ni Jehova iti The Bible in Living English, ni Stephen T. Byington, nga impablaak ti Sosiedad idi 1972.
Timmulong dagiti legal nga ahensia nga us-usaren dagiti Saksi ni Jehova tapno mayimprenta ken maiwaras dagitoy a patarus ti Biblia. Ngem nakakadkadlaw ti naannayas a panagtinnulong ti Watch Tower Society ken ti grupo dagiti napulotan a Saksi ni Jehova a mangbukel iti New World Bible Translation Committee. Pagrag-oantayo ta iti agdama, kompleto man wenno pasetna laeng, nasurok a 106,400,000 a kopia daytoy a patarus ti nayimprentan iti 38 a pagsasao. Pudno a ti Watch Tower Bible and Tract Society of Pennsylvania ket maysa a sosiedad a naipamaysa iti Biblia!
‘Ti matalek nga adipen’ ti ‘nakaitalkan ti amin a sanikua ni apona.’ Karaman kadagitoy dagiti pasilidad ti hedkuarter idiay New York State, E.U.A., ken ti 110 a sanga nga opisina nga agan-andar ita iti intero a lubong. Ammo dagiti kameng ti klase adipen a manungsungbatdanto no kasanoda nga inusar dagiti naitalek kadakuada. (Mateo 25:14-30) Ngem saan a rason daytoy tapno ti ‘adipen’ dina ipabaklay dagiti legal ken administratibo nga annongen kadagiti kualipikado a manangaywan a paset ti “sabsabali a karnero.” Kinapudnona, daytoy ti mangted gundaway kadagiti kameng ti Bagi a Manarawidwid a mangbusbos iti ad-adu a tiempo para “iti panagkararag ken iti ministerio iti sao.”—Aramid 6:4.
Agingga nga ipalubos ti kasasaad daytoy a lubong, agusar kadagiti legal nga ahensia ti Bagi a Manarawidwid, a mangirepresentar iti “matalek ken masirib nga adipen.” Nupay makatulong dagitoy nga ahensia, adda limitasionda. No ti gobierno ti mangpasardeng kadagitoy, agtultuloy latta ti trabaho a panangasaba. Uray ita, kadagiti pagilian a mangiparit wenno awan ti maus-usar a legal nga ahensia, maipakpakaammo latta ti mensahe ti Pagarian, adda dagiti agbalbalin nga adalan, ken agtultuloy ti nateokratikuan nga irarang-ay. Resulta dayta ti panagmula ken panagsibug dagiti Saksi ni Jehova, ken ti ‘agtultuloy a panangpadakkel ti Dios.’—1 Corinto 3:6, 7.
Bayat a kumitatayo iti masanguanan, makapagtalektayo nga ipaay ni Jehova dagiti naespirituan ken material a kasapulan ti ilina. Itultuloyda ken Jesu-Kristo nga Anakna ti mangipaay manipud langit iti panangiwanwan ken saranay a kasapulan tapno mairingpas ti trabaho a panangikasaba iti Pagarian. Siempre, aniaman ti maibanagtayo kas ad-adipen ti Dios, dayta ket ‘saan a babaen iti puersa militar, wenno uray babaen iti bileg, no di ket babaen ti espiritu ni Jehova.’ (Zacarias 4:6) Ikararagtay ngarud ti tulong ni Jehova, nga ammotayo a babaen ti kired nga itdenna, mairingpastayo ti trabaho nga intedna kadatayo iti daytoy tiempo ti panungpalan!