‘Panangyeg iti Naimbag a Damag ti Maysa a Banag a Nasaysayaat’
“Anian a nagimnas iti rabaw dagiti bantay ti saksaka daydiay . . . mangyeg iti naimbag a damag ti maysa a banag a nasaysayaat.”—ISAIAS 52:7.
1, 2. (a) Ania dagiti nakaam-ames a paspasamak iti inaldaw? (b) Ania ti reaksion ti adu a tattao kadagiti awan patinggana a dakes a damdamag?
DAGITI tattao iti intero a lubong ita mariknada a nagabsuonanda kadagiti dakes a damag. Mangngegda iti radio dagiti nakaam-amak a damag maipapan kadagiti makapapatay a sakit a mangsapsaplit iti daga. Mabuyada iti telebision dagiti narigat a malipatan nga eksena dagiti mabisbisin nga ubbing nga agpakpakaasi. Mabasada kadagiti periodiko dagiti panangbomba a nangdadael kadagiti patakder ken nangpapatay iti adu nga inosente a tattao.
2 Wen, inaldaw ita dagiti nakaam-ames a pasamak. Awan duadua a dumakdakes ti buya daytoy a lubong. (1 Corinto 7:31) Maysa a magasin iti Makinlaud a Europa ti nagkuna a no dadduma, kasla “agturturongen iti naan-anay a pannakadadael” ti intero a daga. Saan ngarud a pakasdaawan nga umad-adu ti madandanagan a tattao! Iti maysa a surbey maipapan kadagiti damdamag iti telebision idiay Estados Unidos, awan duadua a riniwriw ti umanamong iti kinuna ti maysa a tao: ‘Maladingitanak unay kalpasan a mabuyak dagiti damdamag. Dakes amin dagiti damdamag. Nakaad-adu unay.’
Ti Damag a Nasken a Mangngeg ti Isuamin
3. (a) Ania a naimbag a damag ti ipakaammo ti Biblia? (b) Apay nga ipatpategyo ti naimbag a damag ti Pagarian?
3 Iti kastoy a makapaleddaang a lubong, adda kadi nasayaat a damag a mangngegan? Adda! Makaliwliwa a maammuan nga adda naimbag a damag nga ipakaammo ti Biblia. Isu dayta ti damag a ti Pagarian ti Dios pagpatinggaennanto ti sakit, bisin, krimen, gubat, ken amin a kita ti panangirurumen. (Salmo 46:9; 72:12) Saan kadi a dayta ti damag a kasapulan a maammuan ti amin? Kasta ti panangmatmat dagiti Saksi ni Jehova. Gapuna, iti sadinoman, agdindinamag ti agtultuloy a panangikagumaanda a mangiranud iti naimbag a damag ti Pagarian ti Dios kadagiti tattao iti amin a nasion.—Mateo 24:14.
4. Ania nga aspeto ti ministeriotayo ti usigentayo iti daytoy nga artikulo ken iti sumaganad?
4 Ania ti mabalintay nga aramiden tapno agtultuloy a makapnek ken makagunggona ti pannakipasettayo iti panangikasaba iti naimbag a damag—uray kadagiti teritoria a saan unay a mangikankano dagiti tattao? (Lucas 8:15) Sigurado a makatulong ti ababa a panangrepaso kadagiti tallo nga agkakapateg nga aspeto ti trabahotayo a panangasaba. Usigentayo (1) dagiti motibotayo, wenno no apay a mangasabatayo; (2) ti mensahetayo, wenno no ania ti ikasabatayo; (3) ti wagastayo, wenno no kasano ti panangasabatayo. No taginayonentayo a nasin-aw ti motibotayo, nalawag ti mensahetayo, ken epektibo ti wagastayo, nadumaduma a tattao ti maikkantay iti gundaway a makangngeg iti kasayaatan a naimbag a damag—ti naimbag a damag ti Pagarian ti Dios.a
No Apay a Makipasettayo iti Panangikasaba iti Naimbag a Damag
5. (a) Ania ti kangrunaan a makagapu a makipasettayo iti ministerio? (b) Apay a makuna nga ay-ayatentayo ti Dios no tungpalentayo ti bilin ti Biblia a mangasabatayo?
5 Usigentayo ti umuna nga aspeto—dagiti motibotayo. Apay nga ikasabatayo ti naimbag a damag? Kas met laeng iti rason a nangasaba ni Jesus. Kinunana: “Ay-ayatek ti Ama.” (Juan 14:31; Salmo 40:8) Mangaskasabatayo kangrunaanna gapu ta ay-ayatentayo ti Dios. (Mateo 22:37, 38) Sigun iti Biblia, ti panagayat iti Dios ket nainaig iti ministerio: “Daytoy ti kaipapanan ti ayat iti Dios, a tungpalentayo dagiti bilinna.” (1 Juan 5:3; Juan 14:21) Dagita kadi a bilin ti Dios iramanna ti bilin nga ‘inkayo ket mangaramidkayo iti ad-adalan’? (Mateo 28:19) Wen. Pudno, ni Jesus ti nangisawang kadagita a sasao, ngem ni Jehova a talaga ti naggubuayanna. Kasano? Inlawlawag ni Jesus: “Awan ti aramidek iti bukodko a nakem; no di ket kas iti insuro kaniak ni Ama sawek dagitoy a banag.” (Juan 8:28; Mateo 17:5) No kasta, no tungpalentayo ti bilin a mangasaba, ipakpakitatayo nga ay-ayatentayo ni Jehova.
6. Apay a ti panagayat ken ni Jehova tignayennatayo a mangasaba?
6 Kanayonanna, ti panagayat ken ni Jehova tignayennatayo a mangasaba gapu ta kayattay a paneknekan nga ulbod dagiti pammabasol ni Satanas maibusor iti Dios. (2 Corinto 4:4) Kinuna ni Satanas a saan a nalinteg ti panangituray ti Dios. (Genesis 3:1-5) Kas Saksi ni Jehova, kayattay ti makipaset iti panangibutaktak kadagiti pammardaya ni Satanas ken iti panangsantipikar iti nagan ti Dios iti sangatauan. (Isaias 43:10-12) Maysa pay, makipasettayo iti ministerio gapu ta naammuantayo dagiti galad ken dana ni Jehova. Mariknatayo a nasingedtayo kenkuana ket magagarantayo a mangisarita iti maipapan iti Diostayo. Kinapudnona, pagrag-oantayo unay dagiti nalinteg a dana ni Jehova ken ti kinaimbagna isu a ditay malapdan nga isarita ti maipapan kenkuana. (Salmo 145:7-12) Matignaytayo a mangidaydayaw kenkuana ken mangisarita kadagiti ‘kinatan-okna’ kadagidiay dumngeg.—1 Pedro 2:9; Isaias 43:21.
7. Malaksid iti panagayat iti Dios, ania pay ti napateg a rason a makipasettayo iti trabaho a panangasaba?
7 Adda sabali pay a napateg a rason nga itultuloytayo ti makipaset iti ministerio: Sipapasnek a kayattay a mabang-aran dagiti tattao a malmalpay gapu kadagiti awan sardayna a dakes a damdamag ken dagidiay agsagsagaba gapu iti nagduduma a rason. No maipapan iti panangtulong kadagiti sabsabali, ikagumaantayo a tuladen ni Jesus. Usigenyo, kas pagarigan, ti nadakamat iti Marcos kapitulo 6.
8. Ania ti ipakita ti salaysay ti Marcos kapitulo 6 maipapan iti panagrikna ni Jesus kadagiti tattao?
8 Kalpasan a nangasaba dagiti apostol, insalaysayda ken ni Jesus ti amin nga inaramid ken insuroda. Nadlaw ni Jesus a nabannog dagiti apostol, ket inyawisna nga ‘aginanada iti apagbiit.’ Nagsakayda ngarud iti barangay ket napanda iti maysa a naulimek a lugar. Simmurot kadakuada dagiti tattao, a nagtataray kadagiti aplaya, ket nakamakamda ida. Ania ti inaramid ni Jesus? “Nakitana ti maysa a dakkel a bunggoy,” kuna ti salaysay, “ngem simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida iti adu a banag.” (Marcos 6:31-34) Gapu iti asi, natignay ni Jesus a mangitultuloy a mangiranud iti naimbag a damag nupay isu ket nabannog. Nalawag, maseknan unay ni Jesus kadagita a tattao.
9. Ania ti maadaltayo iti salaysay ti Marcos kapitulo 6 maipapan iti umiso a motibo iti panangasaba?
9 Ania ti maadaltayo iti daytoy a salaysay? Kas Kristiano, mariknatayo ti obligasiontayo a mangikasaba iti naimbag a damag ken mangaramid kadagiti adalan. Bigbigentayo ti responsabilidadtayo a mangipakaammo iti naimbag a damag, yantangay pagayatan ti Dios a “maisalakan koma dagiti amin a kita ti tattao.” (1 Timoteo 2:4) Ngem saan laeng a gapu iti obligasion nga itungpaltayo ti ministeriotayo no di ket gapu iti asi. No maasiantayo kadagiti tattao a kas iti narikna ni Jesus, matignaytayo a mangaramid iti amin a kabaelantayo nga agtultuloy a mangiranud kadakuada iti naimbag a damag. (Mateo 22:39) No addaantayo kadagiti kasta a nasin-aw a motibo bayat a makipaspasettayo iti ministerio, matignaytayo a mangikasaba nga awan sarday iti naimbag a damag.
Ti Mensahetayo—Ti Naimbag a Damag Maipapan iti Pagarian ti Dios
10, 11. (a) Kasano a dineskribir ni Isaias ti mensahe nga ikaskasabatayo? (b) Kasano a nangyeg ni Jesus iti naimbag a damag ti maysa a banag a nasaysayaat, ket kasano a dagiti moderno-aldaw nga adipen ti Dios tinuladda ti ulidan ni Jesus?
10 Ti ngay maikadua nga aspeto ti ministeriotayo—ti mensahetayo? Ania ti ikasabatayo? Kastoy ti nagsayaat a panangdeskribir ni mammadto nga Isaias maipapan iti mensahe nga iwarwaragawagtayo: “Anian a nagimnas iti rabaw dagiti bantay ti saksaka daydiay mangip-ipan iti naimbag a damag, daydiay mangipabpablaak iti talna, daydiay mangyeg iti naimbag a damag ti maysa a banag a nasaysayaat, daydiay mangipabpablaak iti pannakaisalakan, daydiay agkunkuna iti Sion: ‘Ti Diosmo nagbalinen nga ari!’”—Isaias 52:7.
11 Ti napateg nga ebkas iti dayta a teksto, a “ti Diosmo nagbalinen nga ari,” ipalagipna kadatayo ti mensahe a nasken nga ipakaammotayo, ti naimbag a damag maipapan iti Pagarian ti Dios. (Marcos 13:10) Imutektekanyo met ta ipakita daytoy a teksto ti makaay-ayo a linaon ti mensahetayo. Inusar ni Isaias dagiti termino a “pannakaisalakan,” “naimbag a damag,” “talna,” ken “maysa a banag a nasaysayaat.” Sinigsiglo kalpasan ni Isaias, idi umuna a siglo K.P., mapagulidanan ti panangtungpal ni Jesu-Kristo iti dayta a padto babaen ti naregta a panangiwaragawagna iti nasaysayaat a damag—ti mapaspasungadan a Pagarian ti Dios. (Lucas 4:43) Iti moderno a panawen, nangnangruna sipud idi 1919, tinulad dagiti Saksi ni Jehova ti ulidan ni Jesus babaen ti sireregta a panangipakaammoda iti naimbag a damag maipapan iti naipasdeken a Pagarian ti Dios ken kadagiti bendision nga iburayna.
12. Ania ti epekto ti naimbag a damag ti Pagarian kadagidiay mangipangag iti dayta?
12 Ania ti epekto ti naimbag a damag ti Pagarian kadagidiay mangipangag iti dayta? Kas idi kaaldawan ni Jesus, ti naimbag a damag ket mangyeg iti namnama ken liwliwa. (Roma 12:12; 15:4) Mangted dayta iti namnama kadagidiay napudno ti panagpuspusoda gapu ta maammuanda nga adda dagiti natalged a rason tapno patienda nga adda naraniag a masakbayan. (Mateo 6:9, 10; 2 Pedro 3:13) Dakkel ti maitulong ti kasta a namnama kadagidiay managbuteng iti Dios tapno mataginayonda ti positibo a panangmatmat. Kuna ti salmista a ‘saandanto a mabuteng uray iti dakes a damag.’—Salmo 112:1, 7.
Maysa a Mensahe a “Mangpatapat iti Nasnaayan ti Pusona”
13. Kasano ti panangiladawan ni mammadto nga Isaias kadagiti madagdagus a magunggona dagidiay mangipangag iti naimbag a damag?
13 Kanayonanna, ti naimbag a damag nga ikaskasabatayo ket mangyeg iti madagdagus a bang-ar ken gunggona kadagidiay mangipangag iti dayta. Kasano? Impasimudaag ni Isaias ti dadduma a gunggona idi impadtona: “Ti espiritu ti Soberano nga Apo Jehova adda kaniak, gapu ta ni Jehova pinulotannak a mangibaga iti naimbag a damag kadagidiay naemma. Imbaonnak a mangpatapat iti nasnaayan ti pusona, a mangiwaragawag iti wayawaya kadagidiay nakautibo ken iti pannakalukat a naimbag ti matmata uray kadagiti balud; a mangiwaragawag iti tawen ti naimbag a nakem iti biang ni Jehova ken ti aldaw ti pammales iti biang ti Diostayo; a mangliwliwa kadagidiay amin nga agledleddaang.”—Isaias 61:1, 2; Lucas 4:16-21.
14. (a) No maipapan iti mensahe ti Pagarian, ania ti ipasimudaag ti ebkas a “mangpatapat iti nasnaayan ti pusona”? (b) Kasanotay a matulad ti pannakaseknan ni Jehova kadagidiay nasnaayan ti pusoda?
14 Sigun iti dayta a padto, ti panangikasaba ni Jesus iti naimbag a damag ket “mangpatapat iti nasnaayan ti pusona.” Anian a naglawag a ladawan ti inusar ni Isaias! Sigun iti maysa a diksionario ti Biblia, ti Hebreo a sao a naipatarus kas ‘patapaten’ “masansan a tukoyenna ti ‘panangpatapat’ tapno umimbag ti sugat.” Ti maysa a naayat a nars mabalin a patapatenna ti nadangran a paset ti bagi ti biktima kas suporta. Umasping iti dayta, no ikasabada ti mensahe ti Pagarian, dagiti naayat nga agibumbunannag saranayenda ti amin a manangipangag nga agsagsagaba iti nadumaduma a pamay-an. Babaen ti panangsaranayda kadagidiay agkasapulan, tultuladenda ti pannakaseknan ni Jehova. (Ezequiel 34:15, 16) Kuna ti salmista maipapan iti Dios: “Paimbagenna dagidiay nasnaayan ti pusona, ket bedbedanna dagiti naut-ot a pasetda.”—Salmo 147:3.
No Kasano a Makatulong ti Mensahe ti Pagarian
15, 16. Ania dagiti pudno a kapadasan a mangipakita no kasano a mangsaranay ken mangpabileg ti mensahe ti Pagarian kadagidiay agkasapulan?
15 Adu a pudno a kapadasan ti mangipakita no kasano a ti mensahe ti Pagarian ket nangipaay iti saranay ken pammabileg kadagidiay masmasnaayan ti pusoda. Usigenyo ni Oreanna, maysa a baket iti Makin-abagatan nga America a nauman iti biagna. Maysa a Saksi ni Jehova ti nangrugi a mangsarungkar ken ni Oreanna ken mangibasa kenkuana iti Biblia ken iti publikasion a Ti Librok Dagiti Estoria iti Biblia.b Idi damo, dumngeg ti malmaldaangan a baket iti maibasbasa kenkuana bayat a nakaidda ken nakakidem, a pasaray agsennaay. Ngem di nagbayag, inkagumaannan ti agtugaw iti kamana bayat a maibasbasaan. Idi agangay, agtugawen iti sala, bayat nga ur-urayenna ti mangyad-adal kenkuana iti Biblia. Kalpasanna, rinugian ti baket ti tumabuno kadagiti Nakristianuan a gimong iti Kingdom Hall. Gapu ta napabileg kadagiti maad-adalna kadagiti gimong, rinugianna ti mangitukon kadagiti literatura ti Biblia iti siasinoman a lumabas iti sanguanan ti balayna. Idi agtawen iti 93, nabautisaran ni Oreanna kas maysa a Saksi ni Jehova. Napabaro ti tarigagayna nga agbiag gapu iti mensahe ti Pagarian.—Proverbio 15:30; 16:24.
16 Dakkel ti maitulong ti mensahe ti Pagarian uray kadagidiay mabilbilangen ti aldawda gapu iti sakit. Alaentayo a pagarigan ni Maria manipud iti Makinlaud a Europa. Adda makapapatay a sakitna ket naawananen iti namnama. Nakaro ti leddaangna idi nakasarita dagiti Saksi ni Jehova. Nupay kasta, idi naadalna ti maipapan kadagiti panggep ti Dios, naaddaan manen iti namnama ti biagna. Nabautisaran ken nagbalin nga aktibo iti trabaho a panangasaba. Iti naudi a dua a tawen ti biagna, makita kadagiti matana ti naraniag a namnama ken rag-ona. Natay ni Maria nga addaan iti natalged a namnama iti panagungar.—Roma 8:38, 39.
17. (a) Kasano a ti mensahe ti Pagarian tultulonganna dagidiay mangipangag iti dayta? (b) Kadagiti ania a pamay-an a personal a napadasanyo ti ‘panangpatakder ni Jehova iti isuamin a maparukob’?
17 Paneknekan dagita a kapadasan a ti mensahe ti Pagarian matulonganna dagidiay agbirbirok kadagiti kinapudno iti Biblia. Dagidiay pimmusay dagiti ing-ingungotenda napabaro manen ti pigsada idi naadalda ti maipapan iti namnama a panagungar. (1 Tesalonica 4:13) Dagidiay napanglaw ken mangikagkagumaan a mangtaraon iti pamiliada napakired manen ti nakem ken dignidadda idi naadalda a di pulos baybay-an ni Jehova dagidiay nasungdo kenkuana. (Salmo 37:28) Babaen ti tulong ni Jehova, adu a linapunos ni leddaang ti in-inut a naaddaan iti bileg a kasapulan tapno maanduranda ti sakit—ket iti dadduma a kasasaad, napagballigianda pay dayta a sakit. (Salmo 40:1, 2) Kinapudnona, babaen ti pannakabalin nga ipapaayna babaen ti Saona, ‘patpatakderen ni Jehova ti isuamin a maparukob.’ (Salmo 145:14) Bayat a mapalpaliiwtayo ti panangliwliwa ti naimbag a damag ti Pagarian kadagidiay nasnaayan ti pusona nga adda iti teritoriatayo ken iti kongregasion Kristiano, mapalpalagipantayo nga adda kadatayo ti kasayaatan a damag a mabalin a mangngegan ita!—Salmo 51:17.
“Ti Ararawko iti Dios Maipaay Kadakuada”
18. Ania ti epektona ken ni Pablo ti panangyaleng-aleng dagiti Judio iti naimbag a damag, ken apay?
18 Nupay naglaon ti mensahetayo iti kasayaatan a damag, adu ti mangyaleng-aleng iti dayta. Ania ti mabalin nga epektona kadatayo? Kas met laeng iti epektona ken ni apostol Pablo. Masansan a kinasabaanna dagiti Judio, ngem inyaleng-aleng ti kaaduan kadakuada ti mensahe ti pannakaisalakan. Nasnaayan ni Pablo. Inadmitirna: “Addaanak iti dakkel a ladingit ken di agressat nga ut-ot iti pusok.” (Roma 9:2) Naasian ni Pablo kadagidi a Judio a kinasabaanna. Maladingitan iti panangilaksidda iti naimbag a damag.
19. (a) Apay a kadawyan laeng a makariknatayo iti pannakaupay no dadduma? (b) Ania ti nakatulong ken ni Pablo nga agtultuloy a mangasaba?
19 Ikaskasabatayo met ti naimbag a damag gapu iti asi. Gapuna, kadawyan laeng a makariknatayo iti pannakaupay no laksiden ti adu a tattao ti mensahe ti Pagarian. Ti kasta a reaksion ipakitana a pudpudno a maseknantayo iti naespirituan a pagimbagan dagidiay kaskasabaantayo. Ngem nasken a laglagipentayo ti ulidan ni apostol Pablo. Ania ti timmulong kenkuana nga agtultuloy a mangasaba? Nupay nakarikna ni Pablo iti ladingit ken ut-ot gapu iti panangilaksid dagiti Judio iti naimbag a damag, saanna a pinanunot nga agpapada ti amin a Judio, nga awanen ti posibilidad a matulonganda. Saan a naawanan iti namnama nga adda dagidiay mangawat ken ni Kristo. Gapuna, no maipapan iti panangmatmatna iti tunggal Judio, insurat ni Pablo: “Ti naimbag a tarigagay ti pusok ken ti ararawko iti Dios maipaay kadakuada ket, kinapudnona, maipaay iti pannakaisalakanda.”—Roma 10:1.
20, 21. (a) No maipapan iti ministeriotayo, kasanotay a matulad ti ulidan ni Pablo? (b) Ania nga aspeto ti ministeriotayo ti mausig iti sumaganad nga artikulo?
20 Siputanyo ti dua a banag nga intampok ni Pablo. Tinarigagayanna nga adda koma dagidiay maisalakan, ket dayta ti impakpakaasina iti Dios. Iti kaaldawantayo, tuladentayo ti ulidan ni Pablo. Taginayonentayo ti naimpusuan a tarigagay a mangbirok iti asinoman a mabalin a siuumiso nga agannayas iti naimbag a damag. Itultuloytayo nga ikararag ken ni Jehova a masarakantayo koma dagita a tattao tapno matulongantay ida a mangsurot iti dana nga agturong iti pannakaisalakanda.—Proverbio 11:30; Ezequiel 33:11; Juan 6:44.
21 Ngem tapno maidanontayo ti mensahe ti Pagarian iti ad-adu pay a tattao, masapul nga ipaayantayo iti atension saan laeng a no apay a mangasabatayo ken no ania ti ikasabatayo no di ket no kasano ti panangasabatayo. Dayta ti mausig iti sumaganad nga artikulo.
[Footnotes]
a Mausig iti daytoy nga artikulo ti umuna a dua nga aspeto. Iti maikadua nga artikulo, mausig ti maikatlo nga aspeto.
b Impablaak dagiti Saksi ni Jehova.
Ania ti Naadalyo?
• Ania dagiti rason a makipasettayo iti ministerio?
• Ania ti kangrunaan a mensahe nga ikasabatayo?
• Ania dagiti bendision a matagiragsak dagidiay mangipangag iti mensahe ti Pagarian?
• Ania ti tumulong kadatayo nga agtultuloy iti ministeriotayo?
[Dagiti Ladawan iti panid 18]
Ti mensahe ti Pagarian pabilgenna ti nasnaayan ti pusona
[Dagiti Ladawan iti panid 20]
Ti kararag tulongannatayo nga agibtur iti ministeriotayo