BEULAH

[Natagikua a kas Asawa].

Hebreo a sao (Beʽu·lahʹ) a letra-por-letra a naipatarus kas maysa a nagan iti Isaias 62:4 iti sumagmamano a bersion (AS; KJ; Ro), idinto ta iti dadduma naipatarus kas “Naasawaan” (AT; RS), “nayasawa (Le), “inkasarko nga asawak” (Mo), ken “Natagikua a kas Asawa” (NW).

Ti naespirituan a babai a Sion agpasar iti langalang a kasasaad kalpasan a ti Jerusalem dadaelen dagiti taga Babilonia ken naan-anay a malangalang ti Juda. Nupay kasta, ti padto ti pannakaisubli nga impaay ni Jehova babaen ken Isaias (padto a dakkel ti pategna kadagiti destiero a Judio idiay kadaanan a Babilonia ken kadagiti kameng ti naespirituan nga Israel), impasiguradona ti pannakaisubli ken pannakatagitao manen ti daga, maysa a nagbaliw a kasasaad. Ti sigud a langalang a Sion saanton a “maysa a babai a naan-anay a nabaybay-an,” ket ti dagana saanton a langalang, yantangay naikari iti dayta: “No di ket sika maawagankanto Ti Pagragsakak Adda Kenkuana [Heb., Cheph·tsi-vahʹ], ken ti dagam Natagikua a kas Asawa [Heb., Beʽu·lahʹ]. Ta ni Jehova naragsakanton kenka, ket ti bukodmo a daga matagikuanto a kas asawa.” Dagiti agsubli nga “annak” ti Sion, a naluk-atan manipud pannakaidestiero idiay Babilonia, agnaedda manen kenkuana, kasta met ‘isu tagikuaenda a kas asawa.’ Ti pannakaisubli ti Sion, wenno Jerusalem, kaipapananna ti baro a kasasaadna, a naigidiat iti sigud a langalang a kasasaadna. Gapu itoy a naisubli a kasasaad, ni Jehova, a pakaragsakanna ti Sion, indeklarana a ti Sion maawagan iti “Ti Pakaragsakak Adda Kenkuana,” ken ti dagana maawagan iti “Natagikua a kas Asawa.”​—Isa 62; idiligyo ti Isa 54:1, 5, 6; 66:8; Jer 23:5-8; 30:17; Ga 4:26-31.