Naipakpakauna ti Asidegen a Masanguanantayo

MAIPAPAN iti masanguanan ti tao ken ti daga, kastoy ti insurat ni apostol Pedro: “Adda baro a langlangit ken baro a daga nga ur-urayentayo sigun iti karina [ti Dios], ket kadagitoy agtaeng ti kinalinteg.” (2 Pedro 3:13) Ti damo a kari maipapan iti “baro a langlangit ken baro a daga” ket naited baeten ken mammadto Isaias. (Isaias 65:17; 66:22) Babaen iti panangdakamat ni Pedro iti dayta a padto, impakitana nga idi kaaldawanna, saan pay a naan-anay a natungpal dayta.

Kalpasanna, idi agarup 96 K.P., ti Apocalipsis a naited baeten ken apostol Juan innaigna dayta a “baro a daga” kadagiti bendision nga iyeg ti Pagarian ti Dios. (Apocalipsis 21:1-4) Matungtungpal itan dagiti kinuna ni Jesus agraman dagiti dinakamat ni apostol Pablo maipapan kadagiti sangalubongan a kasasaad sakbay unay ti yaay ti Pagarian ti Dios. Gapuna, manamnamatayo a dayta a Pagarian ket asidegen nga ipaayna ti baro a lubong. Anianto dagiti kasasaad? Maammuantayo dayta iti Isaias a libro iti Biblia.

Dagiti Bendision iti Baro a Lubong

Sangalubongan a Talna ken Nagkaykaysa a Panagdayaw. “Pitpitendanto dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.”​—Isaias 2:2-4.

Talna iti Nagbaetan Dagiti Tattao ken Animal. “Ti lobo pudno a makipagtaengto iti apagbiit iti kalakian a kordero, ket iti urbon a kalding makikaiddanto a mismo ti leopardo, ket ti kigaw a baka ken ti burboran a bumaro a leon ken ti napalukmeg nga animal sangsangkamaysada; ket maysa a bassit nga ubing laeng ti mamangulonto kadakuada. Ket ti baka ken ti oso agarabdanto; dagiti urbonda agkakaiddadanto. Ket uray ti leon manganto iti garami a kas iti toro. . . . Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:6-9.

Nawadwad a Taraon Agpaay iti Amin. “Ni Jehova ti buybuyot pudno unay nga iyaramidannanto dagiti amin nga ili, iti daytoy a bantay, iti maysa a bangkete dagiti nataba unay a putahe, maysa a bangkete ti arak a napagtalinaed kadagiti ared-ed, dagiti nataba unay a putahe a napno iti pata, iti arak a napagtalinaed kadagiti ared-ed, a nasagat.”​—Isaias 25:6.

Awanen ni Patay. “[Ti Dios] pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa. Ket ti pakaumsian ti ilina ikkatennanto iti intero a daga, ta ni met laeng Jehova sinaona dayta.”​—Isaias 25:8.

Mapagungar Dagiti Natay. “Dagiti minataymo agbiagdanto; dagiti bancay . . . bumangondanto. Agriingcayo ken agcantacayo, dakayo nga agnaed iti tapoc . . . ti daga iruarnanto dagiti natnatay.”​—Isaias 26:19, Ti Biblia, PBS.

Ti Mesias a Nalinteg nga Ukom. “Isu saanto a mangukom babaen iti aniaman a makita laeng dagiti matana, wenno uray mangtubngar sigun laeng iti banag a nangngeg dagiti lapayagna. Ket buyogen ti kinalinteg ukomennanto dagidiay nanumo, ket buyogen ti kinapalungdo mangipaayto iti pannubngar maigapu kadagidiay naemma iti daga.”​—Isaias 11:3, 4.

Makakitan Dagiti Bulsek ken Makangngegen Dagiti Tuleng. “Maluktanto ti matmata dagidiay bulsek, ket maluktanto ti mismo a laplapayag dagidiay tuleng.”​—Isaias 35:5.

Nabungan ti Langalang a Lugar. “Ti let-ang ken ti awanan danum a rehion agragsakdanto, ket ti desierto a tanap agrag-onto ken agsabong a kas iti safron. Di bumurong nga agsabongto dayta, ket pudno nga agrag-onto buyogen ti kinarag-o ken buyogen ti naragsak a panagikkis.”​—Isaias 35:1, 2.

Maysa a Baro a Daga. “Mangparsuaak iti baro a langlangit [baro a nailangitan a gobierno] ken baro a daga [nalinteg a baro a kagimongan ti tattao]; ket dagiti immun-una a banag saandanto a maipalagip, saandanto met a tumpuar iti puso. Ngem agragsakkayo ket agrag-okayo iti agnanayon iti daydiay parsuaek. . . . [Dagiti agnaed iti baro a lubong nga inkari ti Dios] pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. Ta kas iti al-aldaw ti maysa a kayo kastanto ti al-aldaw ti ilik; ket ti aramid dagiti bukodda nga ima usarento a naan-anay dagidiay pinilik. Saandanto nga agbannog iti awan kapapay-anna, saandanto met a mangyanak maipaay iti riribuk; agsipud ta isuda ti putot a buklen dagidiay bendito ni Jehova, ken dagiti kaputotanda a maikuyog kadakuada. Ket pudno a mapasamakto a sakbay nga agpukkawda siak sumungbatakto; bayat nga agsasaoda pay laeng, siak denggekto.” “‘No kasano a ti baro a langlangit ken ti baro a daga nga aramidek agtalinaedda iti sanguanak,’ kuna ni Jehova, ‘kasta ti panagtalinaedto ti putotyo ken ti naganyo.’”​—Isaias 65:17-25; 66:22.

Naipakpakauna ti Nakasaysayaat a Masanguanan

Saan laeng a ti Isaias a libro iti Biblia ti nangipakpakauna kadagiti bendision iti masanguanan. Ti Biblia ket aduan kadagiti padto a mangdeskribir kadagiti nagsayaat nga ibanagto ti Dios babaen ti Pagarianna nga iturayan ni Kristo.a Kayatmo kadi ti agbiag iti kasta a paraiso a kasasaad? Mabalinmo ti agbiagto iti kasta a kasasaad! Ammuem no ania a talaga ti isursuro ti Biblia maipapan kadagiti nagsayaat a panggep ti Dios iti masanguanan, ken no kasano nga agbalinka a paset kadagita. Dagiti Saksi ni Jehova ket maragsakan a tumulong kenka.

[Footnote]

[Ladawan iti panid 8]

Addanto talna iti nagbabaetan dagiti tattao ken uray kadagiti animal

[Ladawan iti panid 9]

Agbiagto manen dagiti natay

[Ladawan iti panid 10]

Agbalinto a paraiso ti intero a daga