Apresiarenyo Kadi ti Organisasion ni Jehova?
“Kastoy ti kuna ni Jehova, Ti langit isu ti tronok, ket ti daga isu ti pagbatayan dagiti saksakak.”—ISAIAS 66:1.
1, 2. (a) Ania a makita a pammaneknek iti organisasion ni Jehova ti maitudoyo? (b) Sadino ti pagnanaedan ni Jehova?
MAMATIKAYO kadi nga adda organisasion ni Jehova? No wen, apay a mamatikayo? Nalabit isungbatyo: ‘Ngamin, adda Kingdom Hall-tayo. Adda nasayaat pannakaurnosna a kongregasiontayo nga addaan kadagiti panglakayen. Addaantayo iti nadutokan a manangaywan iti sirkito a regular a bumisbisita kadatayo. Tumabtabunotayo kadagiti organisado nga asamblea ken kombension. Addaantayo iti sanga nga opisina ti Watch Tower Society iti pagiliantayo. Nabatad, amin dagitoy ken adu pay paneknekanda nga adda agtigtignay nga organisasion ni Jehova.’
2 Dagiti kasta a banag ti mangpaneknek iti maysa nga organisasion. Ngem no bin-ig nga adda ditoy daga ti makita ken mailasintayo, saan a naan-anay ti pannakaawattayo iti organisasion ni Jehova. Kinuna ni Jehova ken Isaias a ti daga pagbatayan laeng dagiti sakana, ngem ti langit ti tronona. (Isaias 66:1) Ania a “langit” ti tuktukoyen ni Jehova? Ti tangatang? Ti law-ang? Wenno sabali a tukad ti biag? Dinakamat ni Isaias ti ‘pagtaengan ti kinasanto ken gloria’ ni Jehova, ket kinuna ti salmista a daytoy a langit ti “ayan ti taengna.” No kasta, ti “langit” iti Isaias 66:1 tuktukoyenna ti di makita nga espiritu a pagturayan, a ni Jehova ti mangik-ikut iti katan-okan, wenno kabilgan, a saad.—Isaias 63:15; Salmo 33:13, 14.
3. Kasanotay a maparmek ti panagduadua?
3 Gapuna, no talaga a kayattayo a maawatan ken maapresiar ti organisasion ni Jehova, masapul a kumitatayo iti langit. Narigat dayta para kadagiti dadduma. Tangay di makita ti nailangitan nga organisasion ni Jehova, kasanotay nga ammo a talaga nga adda? Mabalin nga agpangadua pay ketdi dagiti dadduma, a kunada, ‘Kasanotay a makasigurado?’ Bueno, kasano a ti pammati maparmekna ti panagduadua? Ti dua a napateg a pamay-an isu ti napasnek a personal a panagadal iti Sao ti Dios ken regular nga itatabuno ken pannakiraman kadagiti Nakristianuan a gimong. Iti kasta, ti lawag ti kinapudno ikkatenna ti panagduaduatayo. Adda idi dagiti adipen ti Dios a nagduadua. Usigentayo ti maipapan iti adipen ni Eliseo idi a rinaut ti ari ti Siria ti Israel.—Idiligyo ti Juan 20:24-29; Santiago 1:5-8.
Daydiay Nakakita Kadagiti Nailangitan a Buyot
4, 5. (a) Ania idi ti parikut ti adipen ni Eliseo? (b) Kasano nga impangag ni Jehova ti kararag ni Eliseo?
4 Iti maysa a rabii, nangibaon ti ari ti Siria iti dakkel a buyot dagiti soldado a mangtiliw ken Eliseo idiay Dotan. Kabigatanna, idi a bimmangon a nasapa ti adipen ni Eliseo ket rimmuar, nalabit tapno agpariir iti daplat a bubongan ti balayda iti Makintengnga a Daya, anian a pannakakigtotna! Ti intero nga armada dagiti Siriano agraman dagiti kabalio ken karuahe a pakigubat linawlawda ti ili, nga agur-urayda a mangkemmeg iti mammadto ti Dios. Impukkaw ti adipen ken Eliseo: “Ay, apok! Ania ti aramidentayo?” Sitatanang ken sitatalek nga insungbat ni Eliseo: “Dika agbuteng: ta ad-aduda dagiti adda kadatayo ngem kadagiti adda kadakuada.” ‘Ayanda, apok? Diak ida makita!’ kinuna la ketdi ti adipen. Mabalin a kasta met ti parikuttayo no dadduma—ditay makita babaen kadagiti mata ti pannakaawattayo, wenno mailasin, dagiti nailangitan a buyot.—2 Ar-ari 6:8-16; Efeso 1:18.
5 Inkararag ni Eliseo a maluktan koma dagiti mata ti adipenna. Ania ti simmaruno a napasamak? “Ket ni Jehova linuktanna dagiti mata di agtutubo a lalaki; ket kimmita: ket, adtoy, a di bantay napno kadagiti kabkabalio, ken luglugan nga apuy iti aglikmut ken Eliseo.” (2 Ar-ari 6:17) Wen, nakitana dagiti nailangitan a buyot, buyot dagiti anghel a madadaan a mangsalaknib iti adipen ti Dios. Ita maawatannan no apay a natalged ti nakem ni Eliseo.
6. Kasanotay a makagun-od iti nauneg a pannakaawat maipapan iti nailangitan nga organisasion ni Jehova?
6 Kas iti adipen ni Eliseo, adda kadi dagiti banag a ditay maawatan no dadduma? Ti laeng kadi pisikal a benneg dagiti kasasaad a mamagpeligro kadatayo wenno iti Nakristianuan a trabaho iti dadduma a pagilian ti makitatayo? No kasta, manamnamatay kadi ti karkarna a sirmata a manglawlawag kadatayo? Saan, agsipud ta adda banag nga adda kadatayo nga awan idi iti adipen ni Eliseo—maysa a libro a naglaon iti adu a sirmata, ti Biblia, a mangted kadatayo iti nauneg a pannakaawat iti nailangitan nga organisasion. Mangipaay met dayta a naipaltiing a Sao kadagiti mangiwanwan a prinsipio a mangilinteg iti panagpampanunot ken kabibiagtayo. Nupay kasta, masapul a pagreggetantayo a biroken ti pannakaawat ken patanoren ti apresasion iti urnos ni Jehova. Ket maaramidtay dayta babaen ti personal a panagadal, a buyogen ti panagkararag ken panagmennamenna.—Roma 12:12; Filipos 4:6; 2 Timoteo 3:15-17.
Panagadal Tapno Makaawat
7. (a) Ania ti nalabit a parikut dagiti dadduma maipapan iti personal a panagadal iti Biblia? (b) Apay a makagunggona ti personal a panagadal?
7 Kadagiti adu a tattao, kas kadagidiay saanda a pulos narikna ti ragsak ti panageskuela wenno saan a pulos nakapageskuela, saan a natural a makaay-ayo a banag ti personal a panagadal. Nupay kasta, no kayattayo a maawatan ken maapresiar ti organisasion ni Jehova babaen kadagiti mata ti pannakaawattayo, masapul a patanorentayo ti tarigagay nga agadal. Mananamyo kadi ti naimas a taraon no awan ti panagsagana? Kas maibaga kadakayo ti asinoman a kusinero, adu a trabaho ti kasapulan iti panangisagana iti naimas a taraon. Ngem, mabalin a maibus dayta iti kagudua ti oras wenno awan pay. Iti sabali a bangir, mabalin nga agpaut iti unos ti panagbiag dagiti gunggona nga itden ti personal a panagadal. Mabalin a mapatanor ti panaggustotayo iti personal a panagadal no makitatayo a rumangrang-aytayo. Siuumiso a kinuna ni apostol Pablo a kanayon nga asikasuentay koma ti bagbagitayo ken ti isursurotayo ken itultuloytayo nga ipasnek ti agbasa iti publiko. Kasapulan ti agtultuloy a panagporsegi, ngem agnanayon dagiti gunggona.—1 Timoteo 4:13-16.
8. Ania a kababalin ti iparegta ti Proverbio?
8 Kinuna ti maysa a masirib a lalaki idi ugma: “Anakko, no awatemto dagiti saok, ket ipempenmo kenka dagiti bilinko; iti kasta iyallingagmo ta lapayagmo iti kinasirib, ken ikapetmo ita pusom ti pannakaawat; wen, awagam ti kinasaririt; ket idir-im ta timekmo a maipaay iti pannakaawat; no isu birokem a kas pirak, ken tuntonem a kas nalmeng a gamgameng: iti kasta maawatamto ti panagbuteng ken ni Jehova, ken masarakamto ti pannakaammo iti Dios.”—Proverbio 2:1-5.
9. (a) Kasano a maidilig ti pateg ti balitok iti “pannakaammo ti Dios”? (b) Ania dagiti kagawaan a kasapulantayo iti pananggun-od iti umiso a pannakaammo?
9 Mabigbigyo kadi no siasino ti rebbeng a mangikagumaan? Naulit-ulit ti ‘No . . . -mo.’ Ken imutektekanyo ti sasao a, ‘no isu birokem a kas nalmeng a gamgameng.’ Panunotenyo dagiti minero a no mano a siglo a nagkalkalida iti pirak ken balitok idiay Bolivia, Mexico, South Africa, ken dadduma pay a pagilian. Nagbannogda, a nagusarda kadagiti piko ken pala a pangkabakab iti bato a pangalaanda kadagiti agkakapateg a metal. Impategda unay ti balitok ta iti maysa a pagminasan idiay California, E.U.A., nagkalida kadagiti usok a 591 kilometro amin ti kaatiddogda, nga agarup 1.5 kilometro ti kaunegda—tapno laeng agbirok iti balitok. Ngem, makanyo aya ti balitok? Mainumyo aya ti balitok? Mabiagnakay aya idiay disierto no matmataykayon iti bisin ken waw? Saan, ti pategna ket agdepende iti kasasaad ti ekonomia ken ikeddeng dagiti negosiante, nga inaldaw nga agbaliwbaliw kas maanninaw iti sangalubongan a pagtagilakuan. Nupay kasta, adda dagiti tattao a natay gapu iti dayta. Ita, kasano komat’ kapinget ti panangsapultayo iti naespirituan a balitok, “ti pannakaammo ti Dios”? Panunotenyo, ti mismo a pannakaammo maipapan iti Soberano nga Apo ti uniberso, ti organisasionna, ken dagiti panggepna! Iti daytoy a banag, mabalintay ti agusar kadagiti naespirituan a piko ken pala, nga isu dagiti naibatay-Biblia a publikasion a tumulong kadatayo a mangkali iti Sao ni Jehova ken mangtarus iti kaipapananna.—Job 28:12-19.
Panangkali iti Nauneg a Pannakaawat
10. Ania ti nakita ni Daniel iti sirmata?
10 Agkalitayo iti naespirituan tapno mairugitayo ti gumun-od iti pannakaammo maipapan iti nailangitan nga organisasion ni Jehova. Ti kangrunaan nga ammuentayo isu ti sirmata ni Daniel maipapan iti Dati a Lakay a nakatugaw iti tronona. Insurat ni Daniel: “Binuybuyak agingga iti naisaad dagiti trono, ket ti dati a lakay nagtugaw: ti kawesna napudaw a kas la niebe, ket ti buok ti ulona, kasla nadalus a dutdot ti karnero; ti tronona sumsumged a gilgil-ayab, ket dagiti pilpilidna apuy a dumardarang. Maysa nga umap-apuy nga ayus timpuar ken rimmuar iti sangona: rinibribu a ribu dagiti nagserbi kenkuana, ket sangalaksa a laksa ti nagtatakder iti saklangna: ti panangukom naikeddeng, ket dagiti liblibro naluktanda.” (Daniel 7:9, 10) Siasino dagitoy rinibu nga agserserbi ken Jehova? Dagiti reperensia iti marhin ti New World Translation, a mausar kas “pikpiko” ken “palpala,” iturongdatayo kadagiti reperensia a kas iti Salmo 68:17 ken Hebreo 1:14. Wen, dagiti agserserbi isu dagiti anghel sadi langit!
11. Kasano a matulongannatayo ti sirmata ni Daniel a mangtarus iti sasao ni Eliseo?
11 Saan nga ibaga ti salaysay ni Daniel a nakitana amin dagiti matalek nga anghel nga adda iti babaen ti Dios. Mabalin nga adda riniwriw pay. Ngem sigurado a maawatantay itan no apay a naikuna ni Eliseo: “Ad-aduda dagiti adda kadatayo ngem kadagiti adda kadakuada.” Ad-adu dagiti nailangitan a buyot ni Jehova ngem ti buyot ti ari ti Siria, uray pay no binadangan dagiti di matalek nga anghel, dagiti demonio!—Salmo 34:7; 91:11.
12. Kasano nga ad-adu pay ti maammuanyo maipapan kadagiti anghel?
12 Nalabit kayatyo a maammuan ti ad-adu pay maipapan kadagitoy nga anghel, kas ti akemda iti panagserbida ken Jehova. Manipud iti Griego a sao para iti anghel, maawatantayo a mensaheroda agsipud ta kaipapananna met dayta ti “mensahero.” Nupay kasta, saan la a dayta ti akemda. Ngem tapno maammuanyo no ania pay dagitoy, masapul nga agkalikayo. No addaankayo iti Insight on the Scriptures, mabalinyo nga adalen ti artikulo nga “Angels,” wenno mabalinyo a kitaen dagiti napalabas nga artikulo iti Pagwanawanan maipapan kadagiti anghel. Masdaawkayto iti kaadu ti maammuanyo maipapan kadagitoy a nailangitan nga adipen ti Dios ken maapresiaryo ti suportada. (Apocalipsis 14:6, 7) Nupay kasta, iti nailangitan nga organisasion ti Dios, addada naisangsangayan a panggep a pagpaayan dagiti dadduma nga espiritu a parsua.
Ti Nakita ni Isaias
13, 14. Ania ti nakita ni Isaias iti sirmata, ket kasano a nakaapektar daytoy kenkuana?
13 Ita agkalitayo iti sirmata ni Isaias. No basaenyo ti kapitulo 6, bersikulo 1 agingga iti 7, rumbeng a masdaawkayo. Kuna ni Isaias a ‘nakitana ni Jehova a situtugaw iti maysa a trono,’ ket “iti ngatona nagtakder dagiti serapin.” Ipukpukkawda ti dayag ni Jehova, nga itantan-okda ti kinasantona. Ti panangbasa laengen iti daytoy a salaysay rebbeng nga apektarannakayo. Ania ti reaksion ni Isaias? “Idin kinunak, Asiak pay! Ta madadaelak [idiay Sheol]; agsipud ta taoak a narugit dagiti bibigna ket makipagtaengak kadagiti tattao a narugit dagiti bibigda, ta dagiti matak nakitada ti Ari, a ni Jehova dagiti buybuyot.” Anian a pannakaibuyogna iti dayta a sirmata! Kastakay met kadi?
14 Kasano ngarud a nadaeran ni Isaias daytoy a nadayag a buya? Inlawlawagna nga immay ti maysa a serapin a mangalaw kenkuana ket kinunana: “Ti kinadakesmo naikkat, ken ti basolmo napakawan.” (Isaias 6:7) Nagtalek ni Isaias iti asi ti Dios ken immimdeng iti sasao ni Jehova. Ita, diyo kadi kayat a maammuan ti ad-adu pay maipapan kadagitoy a natatan-ok nga espiritu a parsua? No kasta, ania ti masapul nga aramidenyo? Agkalikayo iti ad-adu pay nga impormasion. Ti maysa a kagawaan a mabalinyo nga usaren isu ti Watch Tower Publications Index, a kitaenyo dagiti adu a reperensia a manglawlawag iti impormasion.
Ania ti Nakita ni Ezequiel?
15. Ania ti mangipasimudaag a mapagtalkan ti sirmata ni Ezequiel?
15 Umallatiwtayo iti sabali a kita ti espiritu a parsua. Naparaburan ni Ezequiel iti makaliwliwa a sirmata bayat nga adda a nakayawan idiay Babilonia. Luktanyo ti Bibliayo iti Ezequiel kapitulo 1, iti umuna a tallo a bersikulo. Kasano ti panangrugi ti salaysay? Kunana kadi, ‘Idi un-unana, iti adayo a daga . . .’? Saan, saan daytoy a sarsarita a pinarparbo ti panawen a pannakapasamakna. Kuna ti bersikulo 1: “Naaramid idi maikatlopulo a tawen, iti bulan a maikapat, iti maikalima nga aldaw ti bulan, idi addaak kadagiti nakayawan iti denna ti karayan a Kebar, a dagiti langlangit naluktanda, ket nakitak dagiti sirmata ti Dios.” Ania ti madlawyo iti daytoy a bersikulo? Ipaayna ti eksakto a petsa ken masnup a lugar. Tuktukoyen dagitoy a detalye ti maikalima a tawen ti pannakakayaw ni Ari Joakim, idi tawen 613 K.K.P.
16. Ania ti nakita ni Ezequiel?
16 Ti ima ni Jehova adda idi ken Ezequiel, ket iti nakaskasdaaw a sirmata nakitana ni Jehova a situtugaw iti maysa a trono iti nagdakkelan a nailangitan a karuahe nga addaan nagdadakkel a pilid. Dagiti rueda dagiti pilid napnoda iti matmata iti aglikmut. Ti detalye a paginteresantayo ditoy ket adda uppat a parsua, a saggaysa a nakatakder iti abay ti tunggal pilid. “Daytoy idi ti langada: Adda kadakuada ti kaasping ti tao; ket tunggal maysa adda uppat a rupana, ket tunggal maysa kadakuada adda idi uppat a payakna. . . . No maipapan iti langa dagiti rupada, adda idi kadakuada rupa ti tao; ket isuda nga uppat adda idi rupa ti maysa a leon iti makinkannawan; ket isuda nga uppat adda idi ti rupa ti baka iti makinkattigid; ket isuda nga uppat adda met idi ti rupa ti maysa nga agila.”—Ezequiel 1:5, 6, 10.
17. Ania ti itakderan ti uppat a rupa dagiti kerubin?
17 Ania dagitoy nga uppat a sibibiag a parsua? Ibaga kadatayo a mismo ni Ezequiel a dagitoy ket kerubin. (Ezequiel 10:1-3, 14) Apay nga uppat ti rupada? Tapno itakderanda dagiti uppat a kangrunaan a galad ni Soberano nga Apo Jehova. Ti rupa ti agila isimbolona ti di matukod a sirib. (Job 39:27-29) Ania ti itakderan ti rupa ti baka? Babaen ti nakaskasdaaw a pigsa ti tengnged ken dagiti abagana, kabaelan ti makirangranget a toro nga ipallangatok ti maysa a kabalio ken ti nakasakay iti dayta. Nalawag a ti baka isimbolona ti di maibus a pannakabalin ni Jehova. Nausar ti leon kas simbolo ti natured a kinahustisia. Kamaudiananna, ti rupa ti tao maitutop nga itakderanna ti ayat ti Dios, tangay ti tao ti kakaisuna nga addaan saririt a parsua ditoy daga a makaiparangarang iti daytoy a galad.—Mateo 22:37, 39; 1 Juan 4:8.
18. Kasano a nayonan ni apostol Juan ti pannakaawattayo iti nailangitan nga organisasion?
18 Adda dadduma pay a sirmata a makatulong kadatayo a mangkompleto iti ladawan. Karaman kadagitoy dagiti sirmata ni Juan a naisalaysay iti libro ti Biblia nga Apocalipsis. Kas ken Ezequiel, nakitana ni Jehova a nakatugaw iti nadayag a trono a kaduana dagiti kerubin. Ania ti ar-aramiden dagiti kerubin? Ul-ulitenda ti inwaragawag dagiti serapin iti Isaias kapitulo 6, a kunkunada: “Santo, santo, santo ni Jehova a Dios, ti Mannakabalin-amin, nga adda idi ken adda ita ken um-umay.” (Apocalipsis 4:6-8) Nakita met ni Juan ti maysa a kordero iti abay ti trono. Asino ngata ti itakderanna? Ti mismo a Kordero ti Dios, ni Jesu-Kristo.—Apocalipsis 5:13, 14.
19. Babaen iti daytoy a panagadal, ania ti naawatanyo maipapan iti organisasion ni Jehova?
19 Isu a babaen kadagitoy a sirmata, ania ti naawatantayo? A ti kangatuan ti saadna iti nailangitan nga organisasion isu ni Jehova a Dios a nakatugaw iti tronona a kaduana ti Kordero, ni Jesu-Kristo, ti Sao, wenno Logos. Kalpasanna nakitatayo ti nailangitan a buyot dagiti anghel, a pakairamanan dagiti serapin ken kerubin. Paset ida ti maysa a nakadakdakkel, nagkaykaysa nga organisasion nga agserserbi a mangibanag kadagiti panggep ni Jehova. Ket ti maysa kadagita a panggep isu ti pannakaikaskasaba ti naimbag a damag iti intero a lubong iti daytoy panawen ti panungpalan.—Marcos 13:10; Juan 1:1-3; Apocalipsis 14:6, 7.
20. Ania a saludsod ti masungbatan iti sumaganad nga artikulo?
20 Kamaudiananna, dagiti Saksi ni Jehova ditoy daga aggigimongda kadagiti Kingdom Hall-da tapno sursuruenda nga aramiden ti pagayatan ti Soberano nga Apo. Sigurado a maawatantay itan nga ad-aduda dagiti adda kadatayo ngem kadagidiay adda ken Satanas ken dagiti bumusbusor iti kinapudno. Agtalinaed ti saludsod nga, Ania ti pakainaigan ti nailangitan nga organisasion iti pannakaikaskasaba ti naimbag a damag ti Pagarian? Dayta ken dadduma pay a banag ti usigen ti sumaganad nga artikulo.
Dagiti Pangrepaso a Saludsod
◻ Tapno maapresiartayo ti organisasion ni Jehova, ania ti masapul a maawatantayo?
◻ Ania ti napasaran ti adipen ni Eliseo, ket kasano a pinaregta ti mammadto?
◻ Kasano koma ti panangmatmattayo iti personal a panagadal?
◻ Kasano a mangipaay da Daniel, Isaias, ken Ezequiel kadagiti detalye ti nailangitan nga organisasion?
[Ladawan iti panid 13]
Ad-adu nga amang dagiti gunggona nga itden ti personal a panagadal ngem iti itden ti nasayaat pannakaisaganana a taraon
[Ladawan iti panid 15]
Ti sirmata maipapan kadagiti nailangitan a buyot ti sungbat ni Jehova iti kararag ni Eliseo