DIAMANTE
Narimat a napateg a bato, ti katangkenan a nainkasigudan a mineral a natakuatan pay laeng ken karaman kadagiti kapatgan a saniata. Nupay gagangay nga awan maris dagiti diamante, ti sumagmamano addaan iti bursi kas iti duyaw, berde, nalabaga, kayumanggi, asul, ken nangisit. Kaaduan a di natabas a diamante ket kristal a walo ti sikiganna nga aganninaw wenno nasin-aw ken buklen ti gistay bin-ig a karbon. Naipagarup a nabayagen a naparnuay dagiti diamante idi a ti karbon ti daga kasta unay ti pannakasensen ken pannakapapudotna. Dagiti nagkauna a diamante ket nasarakan kadagiti lansad ti waig, ngem kadagiti agdama a tiempo gagangay a maminas dagita manipud kabatuan iti uneg ti daga.
Ti Hebreo a sao a sha·mirʹ (namindua a naipatarus a “diamante,” naminsan nga “esmeril a bato” iti NW) ket nabatad a nainaig iti Akkadiano a sao nga ashmur, kaipapananna ti “esmeril.” Isingasing ti sumagmamano a ti sha·mirʹ mabalin nga agaplikar iti maysa a nakatangtangken a mineral a di nalawag a nayam-ammo babaen iti pangkaaduan a termino nga “adamant” (manipud Gr. a·daʹmas, kaipapananna ti “di maparmek”), a mabalin a tumukoy iti diamante wenno iti sumagmamano a nakatangtangken a banag, kas iti corundum ken esmeril.
Tinukoy ni Jehova ti pannakaaramat dagiti diamante a pangkur-it wenno pangkitikit kadagiti natangken a material idi kinunana: “Ti basol ti Juda naisurat babaen ti pagyurit a landok. Babaen iti tirad ti diamante naikitikit dayta iti tapi ti pusoda, ken kadagiti sara ti al-altarda.” (Jer 17:1, 2) Ti balay ti Israel nagbalin met a nasubeg ken natangken ti panagpuspusona. Gapuna, ni Jehova kinunana ken Ezequiel: “Adtoy! Pinagbalinko ta rupam nga apag-isu a katangtangken dagiti rupada ken ta mugingmo nga apag-isu a katangtangken dagiti mugingda. Pinagbalinko ti mugingmo a kas iti diamante, a natangtangken ngem iti pamulinawen.” (Eze 3:7-9) Umasping iti dayta, gapu iti kinasungit dagiti Judio, indeklara ni Jehova babaen ken Zacarias: “Ti pusoda insaadda kas maysa nga esmeril a bato [Heb., sha·mirʹ] tapno saan nga agtulnog iti linteg ken iti sasao nga impatulod ni Jehova ti buybuyot babaen iti espirituna, babaen kadagiti immun-una a mammadto.”—Zac 7:12; kitaenyo ti AL-ALAHAS KEN NAPATEG A BATBATO.