Dagiti Saludsod Manipud Kadagiti Managbasa

◼ Ti kadi Linteg ti tulag nagpatingga idi natay ni Jesus iti kayo, ken kaanot’ pannakasukat dayta babaen iti baro a tulag?

Adut’ mangisalsaludsod kadagitoy, a silalagipda kadagiti tallo a pasamak: ti ipapatay ni Jesus iti kayo a pagtutuokan iti malem ti Nisan 14, 33 K.P., ti panangidatagna ti pateg ti darana idiay langit, ken ti panangiparukpokna ti nasantuan nga espiritu idi aldaw ti Pentecostes 33 K.P. Iti kasuratan, agparang a ti Linteg ti tulag nagpatingga ken nasukatan iti baro a tulag idi Pentecostes. Kitaentayo no apay a kasta.

Impadto ni Jehova nga, iti tiempona, sukatannanto ti Linteg ti tulag iti “maysa a baro a tulag” a mangipalubosto iti pannakapakawan a naan-anay ti basol, a saan a posible iti sidong ti Linteg. (Jeremias 31:31-34) Kaano ti pannakaaramidto dayta a panangsukat?

Ti dadaan a tulag, ti Linteg ti tulag, ti kasapulan nga umuna a maikkat iti dalan kas nakaitungpalen iti panggepna. (Galacia 3:19, 24, 25) Insurat ni apostol Pablo: “[Ti Dios] pinunasna a maibusor kadatayo ti surat a nakailanadan dagiti bilbilin, a nangparigat kadatayo idi; ket Isu pinukawna nga inlansana iti kayo a pagtutuokan.” (Colosas 2:13, 14) Kayat kadi a sawen dayta nga iti kanito a natay ni Jesus, nasukatanen ti Linteg ti tulag iti baro a tulag?

Saan, ta ti baro a tulag ket masapul a maisibbo babaen iti dara iti maiyanatup a daton ken iti maysa a baro a nasion, ti naespirituan nga Israel. (Hebreo 8:5, 6; 9:15-22) Napagungar ni Jesus idi Nisan 16, ket 40 nga al-aldaw kamaudiananna isut’ immuli sadi langit. (Aramid 1:3-9) Sangapulo nga aldaw kalpasan ti iyuulina, wenno iti aldaw ti Pentecostes, imparukpok ni Jesus kadagiti adalanna “ti naikari a nasantuan nga espiritu” nga inawatna ken ni Amana, ket napaadda ti naespirituan nga Israel. (Aramid 2:33) Babaen iti Manangibabaet, a ni Jesu-Kristo, inaramid ti Dios ti baro a tulag iti naespirituan nga Israel.

Gapu kadagitoy agkakasilpo a bambanag, iti ania a panawen a ti Linteg ti tulag sinukatan ti baro a tulag?

Ti maysa saanna a maibaga a ti Linteg nagpatingga iti ipapatay ni Jesus. Bayat ti 40 nga al-aldaw kalpasan a napagungar ni Jesus iti espiritu a biag ngem nagtalinaed ditoy daga, dagiti adalanna ti kaskasdi a mangal-alagad iti Linteg. Mainayon pay, ti importante a paset ti Linteg isut’ iseserrek ti nangato a padi iti Kasasantuan a maminsan kada tawen. Iladladawan dayta ti panagungar ni Jesus a napan kadagiti langit. Sadiay, iti saklang ti Dios, isu, kas Manangibabaet ti baro a tulag, maidatagnan ti pateg ti subbot a datonna. (Hebreo 9:23, 24) Daytoy ti nanglukat ti dalan ti pannakaisibbo ti baro a tulag kas kaitungpalan ti Jeremias 31:31-34.

Ti baro a tulag ti nagepekto idi ni Jehova nagtignay iti panangawatna iti daton a subbot. Imparukpokna ti nasantuan nga espirituna kadagiti matalek nga adalan ni Jesus tapno mapaaddana ti baro a nasion, ti naespirituan nga Israel, a buklen dagidiay adda iti tulag a maipaay ti Pagarian. (Lucas 22:29; Aramid 2:1-4) Daytoy ti mangipakita a kinanselaren ti Dios ti Linteg ti tulag, babaen ti piguratibo a panangilansana iti dayta iti kayo a nakatayan ni Jesus. Gapuna ti Linteg ti tulag nagpatingga idi a ti panagandar, wenno pannakaisibbo, ti baro a tulag napasamaken iti pannakaiyanak ti baro a nasion, ti naespirituan nga Israel, idi Pentecostes 33 K.P.​—Hebreo 7:12; 8:1, 2.

Iti labes dayta kangrunaan a sungbat iti saludsod, makitatayo a ti Dios saanna a naan-anay a tinallikudan ti Israel iti lasag idi nagpatinggan ti Linteg ti tulag ken iti kaawatan a panangrugin ti baro a tulag idi Pentecostes 33 K.P. Kas pangarigan, maitunos iti tulag ken Abraham, impakita ni Jesus ti naisangsangayan a pabor kadagiti Judio, dagiti proselita, ken kadagiti Samaritano bayat ti maika-70 a “lawas” a nagpatingga idi 36 K.P. (Genesis 12:1-3; 15:18; 22:18; Daniel 9:27; Aramid 10:9-28, 44-48) Innalana ti nabayag bassit a tiempo para iti sumagmamano a napulotan a Kristiano a Judio a nangawat iti kinapudno a kalpasan ti 33 K.P. saanen a nesesita ti panangsalimetmet iti Linteg; makitatayo daytoy manipud iti saludsod a naiyeg iti bagi a manarawidwid idi 49 K.P. (Aramid 15:1, 2) Ti naan-anay a pannakatallikuden iti Linteg ti napaneknekanen a naan-anay idi 70 K.P., idi a ti templo ken dagiti rekord ti kapuonan maipapan iti Linteg ket nagpukawen, a dinadael dagiti Romano.​—Mateo 23:38.

[Picture Credit Line iti panid 31]

Pictorial Archive (Near Eastern History) Est