Naragsak Dagidiay Agtalinaed a Siririing!

“Adtoy! Umayak a kas maysa a mannanakaw. Naragsak daydiay agtalinaed a siririing ket igagana dagiti makinruar a kawesna.”​—APOCALIPSIS 16:15.

1. Yantangay asidegen ti aldaw ni Jehova, aniat’ manamnamatayo?

ASIDEGEN ti dakkel nga aldaw ni Jehova, ket kaipapanan dayta ti gubat! Iti sirmata, nakakita ni apostol Juan kadagiti kasla tukak nga “ebkas nga impaltiing dagiti sairo” a mapmapan kadagiti amin nga “ar-ari,” wenno agtuturay, iti daga. Ania ti aramidenda? “Tapno urnongenda ida a sangsangkamaysa iti gubat ti naindaklan nga aldaw ti Dios a Mannakabalin-amin”! Innayon ni Juan: “Inurnongda ida a sangsangkamaysa iti disso nga iti Hebreo maaw-awagan Har–Magedon.”​—Apocalipsis 16:13-16.

2. Siasino ni Gog ti Magog, ken aniat’ mapasamak inton rautenna ti ili ni Jehova?

² Din agbayag, tignayento ni Jehova ti napolitikaan nga elemento daytoy a sistema a mangdadael iti Babilonia a Dakkel, ti sangalubongan nga imperio ti ulbod a relihion. (Apocalipsis 17:1-5, 15-17) Kalpasanna ni Gog ti Magog, ni Satanas a Diablo a naigarangugongen iti kaparanget ti daga, isaadnanto dagiti buyotna ket naan-anay a rautenda ti natalna, kasla awan gawayna nga ili ni Jehova. (Ezequiel 38:1-12) Ngem agtignayto ti Dios a mangisalakan iti ilina. Daytanto ti mangtanda iti panagbettak “ti dakkel ken nakakigkigtot nga aldaw ni Jehova.”​​—Joel 2:31; Ezequiel 38:18-20.

3. Kasanoyo a deskribiren dagiti pasamak a naipadto iti Ezequiel 38:21-23?

³ Wen, isalakanto ni Jehova ti ilina ken dadaelenna amin a nabatbati a paset ti sistema ni Satanas inton makagtengtayo iti kasasaad ti lubong a maawagan Har–Magedon, wenno Armagedon. Basaenyo ti naimpadtuan a sasao ti Ezequiel 38:21-23, ket sirmataenyo ti eksena. Aramaten ni Jehova ti pannakabalinna a mangyeg kadagiti manglayus a tudo, makarbek nga uraro, panagtudo ti apuy, makapapatay nga angol. Agraira ti panagkullayaw iti sangalubongan bayat ti pannakariribuk dagiti buyot ni Gog, nga aglalabanda iti maysa ken maysa. Maikisap dagiti siasinoman a makalasat a kabusor ti Mannakabalin-amin a Dios bayat nga usaren ni Jehova dagiti karkarna a wagas a pangisalakanna kadagiti adipenna. Inton maileppasen ti naipadto a “dakkel a rigat,” awanto ti mabati iti dakes a sistema ni Satanas. (Mateo 24:21) Nupay kasta, uray iti kanibusananda, maammuanto dagiti nadangkes no siasino ti mangdiddidigra kadakuada. Kuna a mismo ti naballigi a Diostayo: “Maammuandanto a siak ni Jehova.” Maaramid iti kaaldawantayo dagitoy nakaskasdaaw a pasamak, kabayatan ti kaadda ni Jesus.

Umay a Kas Maysa a Mannanakaw

4. Iti ania a wagas nga umay ni Jesus a mangdadael iti daytoy dakes a sistema ti bambanag?

⁴ Kinuna ni naipadayag nga Apo Jesu-Kristo: “Adtoy! Umayak a kas maysa a mannanakaw.” Ti iyaay a kasla maysa a mannanakaw ket kellaat, iti di mapakpakadaan a tiempo, no matmaturog ti kaaduan a tattao. Inton umay ni Jesus a kasla mannanakaw a mangdadael iti daytoy dakes a sistema, isalakannanto dagidiay pudno a siririing. Kinunana ken Juan: “Naragsak daydiay agtalinaed a siririing ket igagana dagiti makinruar a kawesna, tapno saan koma a magna a lamolamo ket dagiti tattao makitada ti ibainna.” (Apocalipsis 16:15) Ania ti kaipapanan dagidiay a sasao? Ken kasanotayo a makapagtalinaed a siririing iti naespirituan?

5. Aniat’ urnos iti panagserbi idiay templo idi adda ditoy daga ni Jesus?

⁵ Iti gagangay, saan a malabusan ti maysa nga agbambantay no maturoganna ti trabahona. Ngem napasamak dayta iti templo idiay Jerusalem idi adda ditoy daga ni Jesus ken idi agserserbi dagiti bunggoy ti papadi ken Levita iti templo idiay Jerusalem. Idi maika-11 a siglo K.K.P. nga inurnos ni Ari David dagiti ginasut a papadi ti Israel ken dagiti rinibu a katulonganda a Levita iti maysa nga organisasion a buklen ti 24 a bunggoy. (1 Cronicas 24:1-18) Kada bunggoy a buklen ti nasurok a sangaribu a nasanay a trabahador agsisinnublatda nga agserbi idiay templo iti makalawas a di nakurkurang ngem mamindua iti makatawen. Nupay kasta, iti Piesta dagiti Abong-abong, agtrabaho amin dagiti 24 a bunggoy. Kasapulan met ti kanayonan a tulong kadagiti piesta ti Paskua.

6. Aniat’ mabalin a tuktukoyen ni Jesus idi kinunana, “Naragsak daydiay agtalinaed a siririing ket igagana dagiti makinruar a kawesna”?

⁶ Idi kinuna ni Jesus, “Naragsak daydiay agtalinaed a siririing ket igagana dagiti makinruar a kawesna,” nalabit tuktukoyenna ti pagannurotan a maal-alagad idi a pakairamanan ti panagbantay iti templo. Kuna ti Mishnah dagiti Judio: “Bantayan dagiti papadi ti tallo a lugar iti Templo: iti Siled ni Abtinas, iti Siled ti Apuy, ken iti Siled ti Paginuduan; ket dagiti levita iti duapulo ket maysa a lugar: lima kadagiti lima a ruangan ti Bantay ti Templo, uppat kadagiti uppat a sulina iti uneg, lima kadagiti lima a ruangan ti Paraangan ti Templo, uppat kadagiti uppat a sulina iti ruar, ken maysa iti Siled dagiti Daton, ken maysa iti Siled ti Kurtina, ken maysa iti likudan ti lugar ti Tugaw ti Kaasi [iti ruar ti makinlikud a pader ti Kasasantuan]. Ti opisial ti Bantay ti Templo sursorenna ti kada agbambantay nga adda iti sanguananna ti sumsumged nga aluten, ket no adda guardia a di tumakder ken agkuna kenkuana, ‘O opisial ti Bantay ti Templo, talna koma ti maadda kenka!’ ken nabatad a nakaturog, pang-orenna iti sarukodna, ken adda kalinteganna a mangpuor iti kawesna.”​—The Mishnah, Middoth (“Measurements”), 1, parapo 1-2, nga impatarus ni Herbert Danby.

7. Apay a kasapulan idi a siririing dagiti papadi ken Levita nga agbambantay idiay templo?

⁷ Agpatpatnag a siririing ti adu a Levita ken papadi iti agserserbi a bunggoy tapno agbantay ken lapdanda ti asinoman a narugit a sumrek kadagiti paraangan ti templo. Yantangay sursoren ti “opisial iti Bantay ti Templo,” wenno “ti kapitan ti templo,” amin a 24 a puesto kabayatan ti panagbantay iti rabii, masapul a siririing ti tunggal guardia iti puestona no dina kayat ti maduktalan a nagliway iti annongenna.​—Aramid 4:1.

8. Ania dagiti piguratibo a makinruar a kawes dagiti Kristiano?

⁸ Masapul nga agtalinaed a siririing dagiti napulotan a Kristiano ken dagiti padada nga adipen ken igagada dagiti piguratibo a makinruar a kawesda. Dagitoy ti makinruar a pammaneknek iti pannakadutoktayo iti ministerio iti naespirituan a templo ni Jehova. Iti panangbigbig iti daytoy, addaantayo iti nasantuan nga espiritu ti Dios, wenno aktibo a puersa, a tumulong kadatayo a mangaramid kadagiti annongentayo ken mangitungpal kadagiti pribilehiotayo kas manangiwaragawag iti Pagarian. Ti panagtuglep iti puestotayo kas ministro ti Dios pagpeggadennatayo iti pannakaduktal kadatayo ni Jesu-Kristo, ti Kapitan ti naindaklan a naespirituan a templo. No matmaturogtayo iti naespirituan iti dayta a tiempo, malabusantayo iti piguratibo a pamay-an ket mapuoran dagiti simboliko a kawestayo. Gapuna kasanotayo a makapagtalinaed a siririing iti naespirituan?

No Kasanotayo a Makapagtalinaed a Siririing

9. Apay a nakapatpateg ti panagadal iti Biblia iti tulong dagiti Nakristianuan a publikasion?

⁹ Ti naanep a panagadal iti Kasuratan iti tulong dagiti Nakristianuan a publikasion ket manggutugot iti panagbalin a siririing iti naespirituan. Ti kasta a panagadal kabalannatayo iti ministerio, tulongannatayo a mangsaranget kadagiti pakarigatan, ken ipakitana kadatayo ti dana nga agturong iti agnanayon a kinaragsak. (Proverbio 8:34, 35; Santiago 1:5-8) Rumbeng a naanep ken progresibo ti panagadaltayo. (Hebreo 5:14–6:3) Ti regular a pannangan iti nasayaat a taraon matulongannatayo nga agtalinaed a siririing ken naridam. Malapdanna ti panagdungsa a mabalin a pagilasinan iti malnutrision. Awan rasontayo a mabisinan ken agtuglep iti naespirituan, ta mangipapaay ti Dios iti nawadwad a probision a naespirituan a taraon babaen ti napulotan a “matalek ken masirib nga adipen.” (Mateo 24:45-47) Ti regular a pannangan iti naespirituan a taraon babaen ti personal ken sangapamiliaan a panagadal ket maysa a pamay-an tapno agtalinaedtayo a siririing ken agbalin a ‘nasalun-at iti pammati.’​—Tito 1:13.

10. Kasano a matulongannatayo dagiti Nakristianuan a gimong, asamblea, ken kombension nga agtalinaed a siririing iti naespirituan?

¹⁰ Dagiti Nakristianuan a gimong, asamblea, ken kombension tulongannatayo nga agtalinaed a siririing iti naespirituan. Mangipaayda iti pammabileg ken gundaway nga ‘agpipinnaregta iti ayat ken nasayaat nga ar-aramid.’ Nangnangruna a masapul nga agtataripnongtayo a regular ta ‘makitatayo a ti aldaw umas-asidegen.’ Pudno nga asidegen dayta nga aldaw. Dayta ti “aldaw ni Jehova,” inton alangonenna ti kinasoberanona. No pudno a napateg kadatayo dayta nga aldaw​—ken rumbeng a kasta​—“saantay a baybay-an ti panagtataripnongtayo a sangsangkamaysa.”​—Hebreo 10:24, 25; 2 Pedro 3:10.

11. Apay a maikuna a napateg ti Nakristianuan a ministerio iti panagtalinaed a siririing iti naespirituan?

¹¹ Ti naimpusuan a pannakiraman iti Nakristianuan a ministerio ket napateg iti panagbalin a siririing iti naespirituan. Pagridamennatayo ti regular ken naregta a panangikasaba iti naimbag a damag. Ti ministeriotayo ikkannatayo iti adu a gundaway a makisarita kadagiti tao maipapan iti Sao ti Dios, iti Pagarianna, ken kadagiti panggepna. Makapnek ti mangasaba iti binalaybalay, agsarungkar, ken mangyadal iti Biblia kadagiti pagtaengan babaen kadagiti publikasion a kas ti Pannakaammo a Mangiturong iti Biag nga Agnanayon. Masaksian dagiti panglakayen iti nagkauna nga Efeso nga insuro ida ni Pablo iti “publiko ken iti binalay-balay.” (Aramid 20:20, 21) Siempre, adda nakaro a sakit ti dadduma a matalek a Saksi ni Jehova a medio makalapped iti ministerioda, ngem ipamuspusanda nga ibaga kadagiti sabsabali ti maipapan ken Jehova ken ti kinaarina ket maragsakanda unay iti panangaramidda iti kasta.​—Salmo 145:10-14.

12, 13. Ania dagiti rason a rumbeng a liklikantayo ti kinamanaglablabes iti taraon ken inumen?

¹² Ti panangliklik iti kinamanaglablabes tulongannatayo nga agtalinaed a siririing iti naespirituan. Idi agsasao maipapan iti kaaddana, indagadag ni Jesus kadagiti apostolna: “Asikasuenyo ti bagbagiyo tapno dagiti pusoyo dida pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo a kas maysa a silo. Ta dumtengto dayta kadagidiay amin nga agnanaed iti rabaw ti intero a daga.” (Lucas 21:7, 34, 35) Saan a maitunos kadagiti prinsipio ti Biblia ti kinarawet ken panagbarbartek. (Deuteronomio 21:18-21) Kuna ti Proverbio 23:20, 21: “Dika makitipon kadagiti mangnginum iti arak; kadagiti narawet nga agsida iti lasag: Ta ti mammartek ken nabuklis pumanglawdanto; ket ti saguyepyep kawesannanto ti tao iti rutayrutay.”​—Proverbio 28:7.

¹³ Nupay kasta, uray pay saan a nakagteng iti dayta ti nalabes a pannangan ken nakaro a panaginum, mapagtuglepda ti maysa a tao, a mamagbalin pay kenkuana a nasadut ken naliway iti panagaramid iti pagayatan ti Dios. Kadawyanna, addanto dagiti pakaringgoran mainaig iti biag ti pamilia, salun-at, ken dadduma pay. Ngem, agbalintayo a naragsak no ipangpangrunatayo dagiti interes ti Pagarian ken agtalektayo nga aywanannatayo ti nailangitan nga Amatayo. (Mateo 6:25-34) Ta no saan, “dayta nga aldaw” umayto kadatayo kas “maysa a silo,” nalabit kas iti makaallilaw a palab-og a kellaat a mangkemmeg kadatayo wenno kas maysa a palab-og nga adda appanna, a kas kadagidiay manggargari ket kalpasanna mangkemmeg kadagiti di nakasagana nga animal. Saan a mapasamak daytoy no agtalinaedtayo a siririing, a naan-anay a sipapanunot nga agbibiagtayo iti “panawen ti panungpalan.”​—Daniel 12:4, NW.

14. Apay a rumbeng nga agkararagtayo a sipapasnek?

¹⁴ Ti napasnek a panagkararag ket maysa pay a tulong iti panagbalin a siririing iti naespirituan. Iti naindaklan a padtona, indagadag pay ni Jesus: “Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a bambanag a naikeddeng a mapasamak, ken iti panagtakder iti sanguanan ti Anak ti tao.” (Lucas 21:36) Wen, ikararagtayo a sapay koma ta kanayon nga addatayo iti dasig ni Jehova ken tagiragsakentayo ti naanamongan a takder inton umay ni Jesus, ti Anak ti tao, a mangdadael iti daytoy dakes a sistema ti bambanag. Para iti pagimbagantayo a mismo ken kadagiti kapammatian nga ikarkararagantayo, masapul nga ‘agtalinaedtayo a siririing iti panagkararag.’​—Colosas 4:2; Efeso 6:18-20.

Maib-ibusen ti Tiempo

15. Aniat’ maaramidan ti panagserbitayo kas manangaskasaba iti kinalinteg?

¹⁵ Bayat nga ur-urayentayo ti dakkel nga aldaw ni Jehova, sigurado a tarigagayantayo nga aramiden amin a kabaelantayo nga agserbi kenkuana. No sipapasnek nga ikararagtayo daytoy kenkuana, nalabit maluktan kadatayo ti “maysa a dakkel a ruangan a mangiturong iti panagaramid.” (1 Corinto 16:8, 9) Iti naikeddeng a tiempo ti Dios, mangukomto ni Jesus ken ilasinna dagiti nalinteg a “karnero” a maikari nga agbiag nga agnanayon manipud kadagiti dakes a “kalding” a maikari iti agnanayon a pannakadadael. (Juan 5:22) Saan a datayo ti mamaglalasin kadagiti karnero ken kalding. Ngem ti panagserbitayo ita kas manangaskasaba iti kinalinteg ipapaayanna dagiti tao iti gundaway a mangpili iti biag a panagserbi iti Dios ket iti kasta maaddaanda iti namnama a mailasin iti biag inton “dumteng [ni Jesus] iti dayagna.” Ti kinaababa ti tiempo a nabati iti daytoy a sistema ti bambanag degdeganna ti pannakasapul iti naimpusuan a trabaho bayat a birokentayo dagidiay “siuumiso a maikari iti agnanayon a biag.”​—Mateo 25:31-46; Aramid 13:48.

16. Apay a rumbeng nga agbalintayo a naregta a manangiwaragawag iti Pagarian?

¹⁶ Nagpatingga ti tiempo para iti lubong idi kaaldawan ni Noe, ket dandanin agpatingga iti daytoy a sistema ti bambanag. Agbalintay ngarud a naregta a manangiwaragawag iti Pagarian. Rumangrang-ay ti trabahotayo a panangasaba, ta kada tawen ginasut a ribu ti mababautisaran kas simbolo ti dedikasionda iti Dios. Agbalbalinda a paset ti naparaburan nga organisasion ni Jehova​—“ti ilina, ken karkarnero ti pagpaarabanna.” (Salmo 100:3) Anian a rag-o ti makiraman iti trabaho a panangikasaba iti Pagarian a mangyeg iti namnama kadagiti adu sakbay “ti dakkel ken nakakigkigtot nga aldaw ni Jehova”!

17, 18. (a) Bayat a mangasabatayo, aniat’ rumbeng a namnamaentayo a reaksion dagiti dadduma? (b) Aniat’ sigurado a mapasamak kadagiti managuy-uyaw?

¹⁷ Kas ken Noe, tultulongan ken salsalaknibannatayo ti Dios. Wen, dagiti tao, dagiti naglasag nga anghel, ken dagiti Nefilim rinabrabakda la ketdi ti mensahe ni Noe, ngem saan a dayta ti nangpasardeng kenkuana. Ita, mangrabrabak dagiti dadduma no ipakitatayo ti nakaad-adu a pammaneknek nga agbibiagtayo “kadagiti maudi nga al-aldaw.” (2 Timoteo 3:1-5) Ti kasta a pananglais ket kaitungpalan ti padto ti Biblia maipapan iti kaadda ni Kristo, ta insurat ni Pedro: “Kadagiti maudi nga al-aldaw umaydanto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.’”​—2 Pedro 1:16; 3:3, 4.

¹⁸ Nalabit ipagarup dagiti agdama a managuy-uyaw: ‘Awan nagbalbaliw sipud idi panamarsua. Agtultuloy ti biag, a mangmangan dagiti tao, umin-inum, makias-asawa, ken agpampamilia. Uray pay no adda ni Jesus, saan a mangukom iti kaaldawak.’ Anian a panagbiddutda! No dida matay ita iti dadduma pay a pakaigapuan, ti nakakigkigtot nga aldaw ni Jehova ti mangdadaelto kadakuada, a kas met ti panagpatingga ti nadangkes a kaputotan idi kaaldawan ni Noe babaen ti nakaap-aprang a pannakadadael iti Layus.​—Mateo 24:34.

Rumbeng nga Agtalinaedtayo a Siririing!

19. Kasanot’ rumbeng a panangmatmattayo iti trabahotayo a panagaramid iti adalan?

¹⁹ No dedikadotayo ken Jehova, sapay koma ta saantayo a mailibay babaen ti di umiso a panagrasrason. Panawen daytoy ti panagsalukag, panangipakita iti pammati iti nadibinuan a padto, ken panangtungpal iti komisiontayo nga ‘agaramid kadagiti adalan a tattao iti isuamin a nasnasion.’ (Mateo 28:19, 20) Bayat nga umad-adani ti panagpatingga daytoy a sistema, awanen ti dakdakkel pay a pribilehiotayo no di ti panagserbi ken Jehova a Dios iti sidong ti panangidaulo ni Jesu-Kristo ken pannakiraman iti sangalubongan a trabaho a panangikasaba iti “daytoy naimbag a damag ti pagarian” sakbay nga umay ti panungpalan.​—Mateo 24:14; Marcos 13:10.

20. Ania nga ulidan ti impakita da Caleb ken Josue, ken aniat’ masursurotayo iti inaramidda?

²⁰ Dadduma iti ili ni Jehova ti nagserserbi kenkuana iti adun a dekada, nalabit iti unos ti panagbiagda. Ket uray nabiit pay nga inabrasatayo ti pudno a panagdayaw, sapay koma ta agbalintayo a kas ken Israelita a Caleb, a “sinurotna a naan-anay ni Jehova.” (Deuteronomio 1:34-36) Naan-anay a sisasaganada idi ken ni Josue a sumrek iti Naikari a Daga di nagbayag kalpasan ti pannakaluk-at ti Israel iti panangadipen dagiti Egipcio. Nupay kasta, awan pammati ti kaaduan a nataengan nga Israelita ket kasapulan a busbosenda idi ti 40 a tawen idiay let-ang, a sadiay ti nakatayanda. Inibturan da Caleb ken Josue dagiti pakarigatan a napasaranda iti dayta a tiempo, ngem idi agangay nakastrek dagidiay a dua a lallaki iti naikari a daga. (Numeros 14:30-34; Josue 14:6-15) No ‘surotentayo a naan-anay ni Jehova’ ken agtalinaed a siririing iti naespirituan, makapagrag-otayto a sumrek iti naikari a baro a lubong ti Dios.

21. Anianto ti mapasarantayo no agtalinaedtayo a siririing iti naespirituan?

²¹ Nabatad a pasingkedan ti ebidensia nga agbibiagtayo iti panawen ti panungpalan ken asidegen ti dakkel nga aldaw ni Jehova. Saan nga ita ti panawen a panagtuglep ken panagliway iti panagaramid iti pagayatan ti Dios. Maparaburantayo laeng no agtalinaedtayo a siririing iti naespirituan ken igagatayo dagiti kawes a pakabigbigantayo kas Kristiano a ministro ken ad-adipen ni Jehova. Sapay koma ta determinadotayo nga ‘agtalinaed a siririing, agtakder a sititibker iti pammati, agmaingel kas lallaki, bumileg.’ (1 Corinto 16:13) Kas ad-adipen ni Jehova, sapay koma ta agbalintayo amin a natibker ken natured. Iti kasta karamantayto kadagidiay sisasagana inton dumteng ti dakkel nga aldaw ni Jehova, a simamatalek nga agserserbi a kadua dagiti naragsak a tattao a siririing.

Kasanoyo a Sungbatan?

◻ Kasanoyo a depinaren ti piguratibo a makinruar a kawestayo, ken kasanotayo a masalimetmetan dagitoy?

◻ Aniat’ sumagmamano a wagas a panagtalinaed a siririing iti naespirituan?

◻ Apay a namnamaentayo ti kaadda dagiti managuy-uyaw, ket kasanot’ rumbeng a panangmatmattayo kadakuada?

◻ Kasano ti rumbeng a panangmatmattayo iti trabahotayo a panagaramid iti adalan kadagitoy maudi nga al-aldaw?

[Blurb iti panid 16]

Addaan dagiti Kristiano iti nasantuan nga espiritu ti Dios a tumulong kadakuada nga agtalinaed a siririing ken mangitungpal kadagiti annongenda

[Ladawan iti panid 15]

Determinadokayo kadi nga agtalinaed a siririing iti naespirituan ken mangsalimetmet kadagiti piguratibo a makinruar a kawesyo?