GILGAL
[Panangipatulid; Panangitulid].
1. Maysa a siudad “iti makindaya a ketegan ti Jerico.” (Jos 4:19) Ni Ari Eglon ti Moab, ti manangirurumen iti Israel idi tiempo ni Ehud, nabatad a nagnaed iti asideg dagiti “pagkungkongan” ti Gilgal.—Uk 3:12-26.
Iti naglabas, inanamongan ti kaaduan a geograpo ti Khirbet en-Nitleh kas posible nga ayan ti Gilgal. Nupay kasta, nangnangruna sipud pay 1931, naikuna nga isu ti Khirbet El Mafjir. Ti nagsaadanna (2 km [a. 1 mi] iti amianan a daya ti kadaanan a Jerico [Tell es-Sultan; Tel Yeriho]) ket ad-adda a maitunos kadagiti nagkauna a literatura (kas kadagiti gapuanan da Josephus ken Eusebius) a nangtukoy iti distansia iti nagbaetan ti Jerico ken Gilgal. Kasta met, ti arkeolohikal a panagkabakab idiay Khirbet en-Nitleh awan natakuatanna nga ebidensia a napagnaedan dayta sakbay ti Kadawyan a Panawen. Iti sabali a bangir, kadagiti panagsukimat iti rabaw ti aglawlaw ti Khirbet El Mafjir, adda dagiti natakuatan a ribak ti damili a mangipasimudaag iti kaadda ti komunidad sadiay adu a siglo sakbay ti Kadawyan a Panawen. Nupay daytoy a disso ket awan a mismo iti daya ti kadaanan a Jerico, ti awag ti Biblia a “makindaya a ketegan ti Jerico” mabalin nga iramanna ti amianan a daya.
Ti Gilgal idi ti damo a nagpakarsuan ti Israel kalpasan ti ibaballasiwda iti Jordan idi Abib (Nisan) ti 1473 K.K.P. Kas panglaglagip iti panangpamaga ni Jehova iti dandanum ti Jordan tapno agbalin a posible ti ibaballasiw ti Israel, ditoy a nangipasdek ni Josue iti 12 a bato a naala iti tengnga ti lansad ti karayan. (Jos 4:8, 19-24) Nakugit idiay Gilgal amin nga Israelita a lallaki a nayanak idiay let-ang, a kalpasanna kinuna ni Jehova nga ‘intulidna manipud kadakuada ti panangumsi ti Egipto.’ Idin ti disso napanaganan iti “Gilgal,” a kaipapananna ti “Panangipatulid; Panangitulid,” tapno agserbi kas pammalagip iti daytoy. (Jos 5:8, 9) Idi agangay, dagiti nanglimlimo a Gabaonita manipud katurturodan iti makinlaud a deppaar simmalogda iti Ginget Jordan ket napanda ken Josue idiay Gilgal, a sadiay a nangaramidda iti maysa a tulag iti Israel. (Jos 9:3-15) Idi naraut dagiti Gabaonita kalpasanna, ti buyot ni Josue agpatnag a nagnagnada manipud Gilgal a simmang-at iti siudadda tapno pagtalawenda ti aliansa ti lima nga Amoreo nga ar-ari. (Jos 10:1-15) Nangrugi idiay Gilgal ti pannakaibunong ti daga ti Canaan (Jos 14:6–17:18) ket nairingpas dayta idiay Silo.—Jos 18:1–21:42.
Naipadamag a ti anghel ni Jehova napan “manipud Gilgal agingga iti Boquim.” (Uk 2:1) Mabalin a tumukoy daytoy iti panagparang ti anghel iti asideg ti Gilgal di nagbayag kalpasan a nakaballasiw ti Israel iti Jordan (Jos 5:10-14) ket ngarud maipasimudaag a nagparang idiay Boquim ti isu met laeng nga anghel.
Saan a masigurado no ti nairaman iti tinawen a panagrikus ni Samuel ket isu ti Gilgal nga asideg iti Jordan wenno ti Num. 2. (1Sm 7:15, 16) Sadiay a nagidaton kadagiti sakripisio kalpasan ti pannakapulot ni Saul (1Sm 10:1, 8) ket isu agraman dagiti umili pinatalgedanda manen ti kinaari ni Saul.—1Sm 11:14, 15.
Bayat nga aguurnong ti puersa dagiti Filisteo iti katurturodan iti aglawlaw ti Micmas, adda ni Ari Saul iti baba iti Ginget Jordan idiay Gilgal. Yantangay mabuteng amangan no sumalog a rumaut kenkuana dagiti kabusor, sidudursok a nagidaton ni Saul iti mapuoran a sakripisio. (1Sm 13:4-15) Idiay met Gilgal a naibaga ken Saul a linaksid ni Jehova kas ari gapu iti saanna a panagtulnog iti bilin ni Jehova a dadaelenna ti amin nga Amalekita ken dagiti arban ken pangenda.—1Sm 15:12-28.
Kalpasan a napaay ti iyaalsa ni Absalom, ti lallaki ti Juda napanda idiay Gilgal tapno itulodda ni David iti ballasiw ti Jordan.—2Sm 19:15, 40.
Babaen ken mammadto Mikias, impalagip ni Jehova iti ilina dagiti pamendisionna kadakuada. ‘Manipud Sittim, agingga iti Gilgal’ linapdanna ti panagregget dagiti Moabita a mamagdakes kadakuada, inyegna ti Israel iti ballasiw ti Jordan, ken intulidna ti panangumsi ti Egipto. Ngem saan a naawatan ti Israel dagitoy “nalinteg nga aramid ni Jehova.”—Mik 6:5; Nu 25:1.
Mabalin a pagaammo met idi ti Gilgal kas Gelilot.—Kitaenyo ti GELILOT.
Ti Bet-gilgal kalpasan ti pannakaidestiero mabalin nga isu met laeng ti Gilgal iti asideg ti Jerico wenno ti Num. 2.—Ne 12:28, 29.
2. Nupay sabali ti panangmatmat ti dadduma, ti Gilgal a nadakamat mainaig kada Elias ken Eliseo ket nabatad a saan nga isu met laeng ti Num. 1. Sakbay a naipangato iti langlangit babaen iti maysa nga allawig, ni Elias, a kinuyog ni Eliseo, simmalog manipud Gilgal a napan idiay Bethel ken kalpasanna idiay Jerico. (2Ar 2:1-5) Daytoy a ruta ipasimudaagna ti maysa a disso iti asideg ti Bethel. Kasta met, ti ‘isasalogda’ ipasimudaagna a daytoy a Gilgal ket adda idi iti kabambantayan a rehion. Ti Gilgal iti Ginget Jordan ket saan a mayanatup iti daytoy a deskripsion. Gapuna, daytoy a Gilgal ket kaaduan a maikunkuna nga isu ti Jil Jiliya, maysa a nalawa a purok iti tapaw ti maysa a turod nga agarup 11 km (7 mi) iti amianan ti Bethel. Idi agangay, ni Eliseo pinagbalinna a di makadangran ti maysa a makasabidong a gisado sadiay. (2Ar 4:38-41) Nalabit daytoy wenno ti sabali pay a Gilgal ti nadeskribir iti Deuteronomio 11:29, 30 nga iti sangona a masarakan ti Bantay Gerizim ken Bantay Ebal.
Kadagiti naud-udi a tiempo, daytoy a siudad (wenno nalabit ti Num. 1) nabatad a nagbalin a sentro ti ulbod a panagdaydayaw. (Os 4:15; 9:15; 12:11) Yantangay nasakbay a nakitana a maidestiero ti makin-amianan a pagarian, ni Jehova (babaen ken mammadtona nga Amos) siuumsi nga imbagana kadagiti din agbalbaliw nga Israelita a ‘sansanenda ti agsalungasing’ idiay Gilgal, kasta met nga impadtona ti pannakaidestiero dagiti agnanaed iti dayta.—Am 4:4; 5:5.
3. Maysa a disso iti laud ti Jordan a nadakamat iti maysa a listaan dagiti panagparmek ti Israel iti panangidaulo ni Josue. (Jos 12:7, 8, 23) Adda dagiti mamati a mabalin a nagbiddut ti eskriba iti daytoy a teksto, gapuna kaykayatda ti patarus a “Galilea” iti Griego a Septuagint, kas iti Revised Standard Version.