GOBERNADOR

Dagiti gobernador kadagidi tiempo ti Biblia gagangay nga addaan iti namilitariaan ken hudisial a pannakabalin ken rebbengenda a kitaen a ti impuesto, buis, wenno sapul nga agpaay iti ari wenno nangatngato nga agturay ket binayadan dagiti masaksakupan a distrito wenno probinsia nga iturturayan dagiti gobernador. (Lu 2:1, 2) Adu kadakuada ti nangikabil iti nadagsen nga awit kadagiti umili a panangabasto iti taraon maipaay kadakuada ken iti dakkel a bagi dagiti agserserbi kadakuada.​—Ne 5:15-18.

Nangdutok ni Ari Solomon iti gobgobernador kadagiti distrito ti Israel. Nadakamat dagita iti 1 Ar-ari 10:15 ken mabalin nga isuda met laeng dagiti 12 a diputado iti 1 Ar-ari 4:7-19, nga annongenda idi ti mangipaay iti taraon iti ari ken iti sangakabbalayanna, a ti tunggal maysa ket maysa a bulan iti tawen.

Gistay amin a kangrunaan a pannakabalin kadagidi tiempo ti Biblia ket naikuna nga addaan kadagiti agturay iti ranggo dagiti gobernador, mabalin a kas lokal a katutubo nga agtuturay wenno kas gobgobernador a mangiturturay kadagiti nasakup a teritoria. (Iti Siria, 1Ar 20:24; iti Asiria, Eze 23:5, 6, 12, 23; iti Babilonia, Jer 51:57; iti Persia, Esd 8:36, Ne 2:7, 9; iti Arabia, 2Co 11:32; iti Roma, Lu 3:1) Ni Jose maysa idi a gobernador iti dakkel a kaipapanan, iti intero nga Egipto, a ti laeng ari ti pagpasakupanna. (Ge 41:40, 41; Ara 7:9, 10) Ni Rabsaque, maysa nga opisial ni Ari Senaquerib ti Asiria, rinurodna ni Ezekias maipapan iti kinakapuy ti Jerusalem, a kinunana a saan a kabaelan dayta a pagtallikuden ti uray maysa kadagiti nababbaba a gobernador ni Senaquerib. Ngem napaay ni Rabsaque a mangikabilangan iti manglapunos a puersa ni Jehova iti dasig ni Ezekias.​—Isa 36:4, 9; 37:36.

Ni Nabucodonosor dinutokanna ni Gedalias a tarawidwidanna dagiti natedda nga Israelita a nabati iti daga ti Juda kalpasan a ti adu kadagiti umili impanna iti pannakaidestiero idi 607 K.K.P. Napapatay ni Gedalias agarup dua a bulan kalpasanna. (2Ar 25:8-12, 22, 25) Bayat nga umad-adani ti panagpatingga ti 70-tawen a periodo ti pannakaidestiero, ni Ari Ciro ti Persia dinutokanna ni Sesbazzar (nalabit ni Zorobabel) kas gobernador dagiti Judio a nagsubli iti Jerusalem idi 537 K.K.P. (Esd 5:14; Hag 1:1, 14; 2:2, 21) Iti sidong ni Ari Artaxerxes ti Persia, ni Nehemias napagbalin a gobernador idi nagsubli tapno bangonenna manen ti pader ti Jerusalem, idi 455 K.K.P.​—Ne 5:14; kitaenyo ti TIRSATA.

Iti sidong ti turay ti Roma, ti Judea ket maysa a probinsia ti imperio; dagiti gobernador sadiay direkta a manungsungbatda iti emperador kadagiti tignayda. Ni Pilato ti maikalima iti linia dagiti gobernador ti Judea. (Mt 27:2; Lu 3:1) Da Felix ken Festo ti maika-11 ken maika-12 a gobernador ti Judea (no saantayo nga ibilang ni Publius Petronius ken ti sunona a ni Marsus, a, nadutokan kas gobgobernador ti Siria, iti isu met laeng a gundaway immatonanda ti ar-aramid dagiti Judio). (Ara 23:24-26; 24:27) Adda pannakabalin dagitoy a Romano a gobernador a mangibilin iti kadagsenan a dusa, kas makitatayo iti kaso ni Jesus, nga inukom ni Pilato.​—Mt 27:11-14; Jn 19:10.

Tinukoy ni Jesus dagiti gobernador ti nasnasion iti pangkaaduan idi imbagana kadagiti pasurotna a maisaklangda iti kakasta a tattao tapno mangipaay iti panangsaksi. Saan a rumbeng a pagbutngan dagiti Kristiano ti kakasta nga agtuturay, nupay mannakabalinda, saanda met a pagdanagan no ania ti sawenda no mangipapaayda iti pammaneknek iti sanguananda. (Mt 10:18-20, 26) Amin a kakasta a gobernador ket paset dagiti nangatngato nga autoridad a nakautangan dagiti Kristiano iti relatibo, saan a naan-anay, a panagpasakup. (Ro 13:1-7; Tit 3:1; 1Pe 2:13, 14; Ara 4:19, 20; 5:29; Mt 22:21) Panagraem a maiparbeng iti saad ti gobernador ti makagapu a ni Pablo inawaganna ni Festo, nga iti sanguananna ti pakaus-usiganna, a kunkunana: “Natan-ok Unay a Festo.” (Ara 26:25) Nupay kasta, maisupadi kadagiti apostol, a nangipaay nga umuna ken Jehova iti panagraem ken dayaw, a mangiturturay iti isuamin, ti nasion ti Israel nakagteng iti punto nga impaayanda dagiti naindagaan a gobernador iti ad-adda a panagraem ngem iti impaayda ken Jehova. Inusar ni Jehova daytoy a kasasaad iti nabileg a panangtubngarna iti nasion babaen ken mammadtona a Malakias.​—Mal 1:6-8; kitaenyo ti NANGATNGATO NGA AUTORIDAD.

Ni Mateo, nga agadaw iti Mikias 5:2, ipakitana a ti Betlehem, nupay nanumo unay no maipapan iti manarawidwid a pannakabalin idiay Juda, agbalin a napateg maigapu iti kinapudno a ti kadakkelan kadagiti gobernador aggapu iti daytoy a siudad tapno ipastoranna ti Israel nga ili ni Jehova. Daytoy a padto natungpal ken Kristo Jesus a Naindaklan a Gobernador iti sidong ti Amana, ni Jehova a Dios.​—Mt 2:6.