BIBIG
Kas paset ti ngiwat ken adu ti maaramidanna iti panangbukel iti sasao, ti “bibig” (Heb., sa·phahʹ; Gr., kheiʹlos) piguratibo a maar-aramat a tumukoy iti panagsao wenno pagsasao (Pr 14:3; 1Co 14:21) ken sagpaminsan a maar-aramat a pumadpada iti “dila” (Sal 34:13; Pr 12:19) ken iti “ngiwat.” (Sal 66:14; Pr 18:7) Sakbay ti pannakariribuk ti pagsasao idiay Babel, “ti intero a daga nagtultuloy nga addaan maymaysa a pagsasao [iti literal, “bibig”] ken addaan maymaysa a pakabuklan ti sasao.” (Ge 11:1, 6-9; ti umasping a pannakausar ket naaramat iti Sal 81:5; Isa 19:18.) Inkari ti Dios babaen ken mammadto Sofonias nga itdenna kadagiti ili ti “panagbalbaliw nga agturong iti nasin-aw a pagsasao [bibig]”; iti kasta agkaykaysada nga agsao iti pakaidaydayawan ni Jehova ken dagiti nalinteg a panggepna babaen ken Kristo Jesus.—Sof 3:9; idiligyo ti Pr 12:19.
Dagiti bibig ket saan a sigurado a pammatuldo no ania ti adda iti puso, yantangay mabalin nga usaren ida ti indibidual a pangyebkas iti managinsisingpet a sasao. (Mt 15:8) Nupay kasta, dagiti bibig saanda a mabalin nga ilemmeng manipud iti Dios ti pudno a kasasaad ti puso (Heb 4:13), ket inton agangay iruarda no ania ti adda iti puso.—Pr 26:23-26; Mt 12:34.
Kayat idi ni Moises nga iliklik ti bagina iti panagsao iti sanguanan ni Faraon gapu ta ‘saan a nakugit dagiti bibigna,’ kayatna a sawen, kasla nakalupkopan dagiti bibigna iti makinsango a kudil ket ngarud nakaat-atiddog ken nakapuspuskol tapno makapagsao a silalaka. Mabalin nga addaan iti maysa a kita ti lapped iti panagsao. (Ex 6:12, 30) Ni Isaias, idi inayaban ni Jehova, tinarigagayanna ti agserbi ngem inyunnoyna nga arigna ti napagulimek agsipud ta isu, maysa a lalaki a narugit dagiti bibigna, nakitana ni Jehova iti sirmata, ket isu di maikari a mangawit iti nadalus a mensahe ti Dios. Idin pinasamak ni Jehova a madalusan dagiti bibig ni Isaias.—Isa 6:5-7; idiligyo ti Jn 15:3; Isa 52:11; 2Co 6:17.
Ti padto ni Oseas pinaregtana ti Israel nga idatonda ken Jehova “dagiti urbon a toro” dagiti bibigda, a mangirepresentar kadagiti sakripisio ti napasnek a panangidaydayaw. (Os 14:2) Iparparipirip ni apostol Pablo daytoy a padto idi bagbagaanna dagiti padana a manamati nga idatonda iti Dios ti “sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.”—Heb 13:15.
Iti piguratibo, ti “nalamuyot a bibig” ipasimudaagna ti mangallilaw a panagsao. (Sal 12:2, 3) Dagiti kasta a bibig, kasta met dagidiay nagubsang wenno agul-ulbod, mabalin a makadadael—mangsugat a siuuneg kas iti kampilan wenno mangsabidong kas iti karasaen. (Sal 59:7; 140:3; Ro 3:13) Ti tao a “manginganga unay kadagiti bibigna” ket maysa nga agsasao a siaaleng-aleng wenno sikukuneng. (Pr 13:3) Mabalin a mangituggod kenkuana dayta iti pannakadadael, ta ti Dios panungsungbatenna ti tunggal maysa kadagiti sawenna.—De 23:23; Nu 30:6-8; Pr 12:13; idiligyo ti Job 2:10; Mt 12:36, 37.