Dagiti Leksion Manipud kadagiti Kasuratan: Sofonias 1:1–3:20

Sapulenyo ni Jehova ket Agserbikayo Kenkuana a Naimpusuan

AGARUP 50 a tawenen sakbay ti panangdadael dagiti taga Babilonia iti apostata a Juda, impakaammo ni Jehova iti mammadtona a ni Sofonias: “Siak ikisapkonto dagiti isuamin a bambanag iti rabaw ti daga.” (1:1, 2) Ngem impakita met ti Dios iti ilina ti dalan iti kinatalged. (2:3; 3:9) Maipapan itoy, ti libro a Sofonias naglaon kadagiti napapateg a leksion para kadagiti amin a mangsangsango itan “iti dakkel nga aldaw ti Dios a Mannakabalin-amin.”​—Apocalipsis 16:14.

Asidegen ti Aldaw ni Jehova

Agsipud ta asideg unayen ti aldaw ni Jehova, siasinoman a simmiasi iti Dios masapul nga agsublida a madaras kenkuana. Mairaman kadagidiay “ikisap” ti Dios isu “dagidiay simmiasi iti panangsurot ken ni Jehova.” Nagsanudda ket saandan a maseknan iti panangaramid iti pagayatan ti Dios. Anian a nagpeggad a kasasaad! Daytat’ masapul a makorehir a dagdagus.​—Sofonias 1:3-11.

Saan a makaipaay iti kinatalged ti namaterialan a kinabaknang iti aldaw ni Jehova. Dadduma kadagiti agkunkuna nga agserserbida ken ni Jehova okupadoda kadagiti namaterialan a bambanag, a nakanamnam-ayen ti kasasaadda. Ngem anian a pannakaallilawda! Awan ti kinatalged nga ipaay dagiti sanikuada kabayatanna iti “dayta nga aldaw.”​—Sofonias 1:12-18.

Posible ti Pannakaisalakan

Tapno maitalimeng iti aldaw ni Jehova, saan laeng a ti narabaw a pannakaammo iti Kasuratan ti kasapulan. “Dagiti naemma” a “nagtungpal kadagiti bilbilinna” nabalakadanda a ‘mangsapul ken Jehova, mangsapul iti kinalinteg, mangsapul iti kinaemma.’ Dagidiay laeng “agibtur iti panungpalan” maisalakanto.​—Sofonias 2:1-3; Mateo 24:13.

Dagiti nasion a nangilupitlupit iti ili ni Jehova itatta agsagabadanton iti pannakadadael. Mapadasandanto ti isu met laeng a kapadasan a kas ti Moab, Ammon, Asiria, ken dagiti dadduma a nasnasion iti aglawlaw ti Juda. Ti pannakadadael agur-uray met iti Babilonia a Dakkel. (Apocalipsis 18:4-8) Anian ti panangparegta daytoy kadatayo a mangitultuloy a mangiwaragawag iti panangukom ti Dios!​—Sofonias 2:4-15.

Ti Naisubli nga Ili

Isagsaganan ni Jehova ti ilina a maipaay iti pannakaisalakan. Binaybay-anyon aya dagiti Binababilonia a kapanunotan ket rinugianyon ti nagsao iti “nadalus a pagsasao” a napateg a kinapudno iti Biblia? ‘Immawag[kayon] aya iti nagan ni Jehova’ babaen ti panangidedikaryo iti bagiyo kenkuana? ‘Mangipapaay[kayo] aya iti sagut,’ kayatna a sawen, “ti agaon kadagiti bibig a mangipaduyakyak ti naganna”? Maipaay iti pannakaisalakan, masapul nga agserbikayo a “makikaykaysa” iti dedikado nga ili ni Jehova.​—Sofonias 3:1-10; Roma 10:13-15; Hebreo 13:15.

Maipaay iti pannakaisalakan, masapul a birukentayo ni Jehova ken salimetmetantayo a natan-ok ti nasantuan a naganna. Ti kinatangsit, kinakillo, ken ti panagulbod awan ti lugarda iti ilina. (Efeso 4:25-32) Dagiti laeng “napakumbaba ken naemma” ti maisalakanto inton santifikarenna ti naganna.​—Sofonias 3:11-20.

Dagiti Leksion Manipud kadagiti Kasuratan: Haggeo 1:1–2:23

TI LIBRO ni Haggeo ipannatayo iti 520 K.K.P., 17 a tawtawen kalpasan ti panagsubli dagiti natda a Judio idiay Jerusalem a mangibangon iti templo ni Jehova. (Haggeo 1:1) Dayta ket tiempo para iti tunggal maysa a mangipapuso iti trabaho ti Dios. Kaskasdi, nasarakan ni Jehova a nasken nga ibaonna ni mammadto Haggeo a mangipalagip iti ilina kadagiti obligasionda. Addada leksion iti daytoy a maipaay kadatayo?

Iyun-unayo ti trabaho ni Jehova

Dikay pulos ipangpangruna dagiti namaterialan a pagimbagan ngem kadagiti naespirituan a rebbengen. Dagiti Judio a nagsubli iti dagada adda rasonda a maseknan iti mapagduaduaan nga ekonomia, nauyong a kaarruba, ken dadduma pay. Ngem saan a dagitoy ti nakagapu iti panagliwayda, gapu iti nabaknang a kasasaad ti panagbiagda. Kalpasan laeng ti panangtignay ni Haggeo kadakuada a rinugianda ti nagibangon iti templo. Kasta met itatta, masapul nga ‘ipapusotayo dagiti daldalantayo’ ket siguraduentayo a naan-anay a suportarantayo ti trabaho ti Dios aginggat’ kabaelantayo.​—Haggeo 1:2-15.

Bendisionan ni Jehova ti panangikagumaan dagidiay a mangaramid iti trabahona a naimpusuan. Bendisionan ni Jehova ti trabaho ni Zerubbabel ken dagiti dadduma a Judio iti panangturposda iti templo, ket ti dayagna lab-awanna ti immuna a balay. Babaen ti isusungbat ti “dakkel a bunggoy” iti mensahe ti Pagarian itatta, “dagiti napapateg a bambanag kadagiti amin a nasion” um-umaydan iti naespirituan a templo, ket ‘pumpunnuenda ti balayna iti dayag.’​—Haggeo 2:1-9; Apocalipsis 7:9.

Kasapulan ti Naimpusuan a Panagserbi

Napateg laeng ti panagdayawtayo no nadalustayo, dagiti motibotayo ket nadalus, ken agserserbitayo ken Jehova a buyogen iti naan-anay a puso. Ti panangbaybay-a iti balay ti Dios ti namagbalin kadagiti Judio a narugit, ngem bendisionanna ida apaman a marugian ti panagtrabaho iti templo. Gapuna, tapno matagiragsaktayo ti bendision ni Jehova, masapul a korehirentayo ti aniaman a makasapul iti panangtamingtayo ket ipapusotayo ti trabahona. (Idiligyo ti Numeros 19:11-13.) Bayat ti panaguraytayo iti Dios a manggunggon iti langlangit ken ti daga, a mangituang kadagiti pagpagarian, surotentayo ti antitipiko a Zerubbabel, ni Jesu-Kristo, ket makiramantayo a naimpusuan iti trabaho ni Jehova.​—Haggeo 2:10-23.

[Kahon iti panid 30]

MAUSIG DAGITI TEKSTO TI BIBLIA

o Sofonias 1:5​—Ti Malcam, a nalabit isu met laeng ti Milcom, Molec, wenno Moloc, isu ti kangrunaan nga ulbod a dios dagiti Ammonitas. (1 Ar-ari 11:5, 7) Ti panagdayaw ken ni Moloc ramanenna ti makarimon a panangidaton iti ubing ket daytat’ kondenaren ti Linteg.​—Levitico 20:2-5; Aramid 7:42, 43.

o Sofonias 2:14​—Kas naipadto, ti narbek a sarikedked ti nalangalang a Nineve ken dagiti kabiserada nagbalin a pagapunan dagiti tumatayab ken an-animal. Dagiti tumatayab ken mabalin a ti angin ‘agkantada’ kadagiti nalangalang a tawtawa. Dagiti ruangan ken uray pay ti makin-uneg a kuarto ti palacio nadadaelda.

o Sofonias 3:9​—Ti gagangay a pagsasao ti tao dina ipanamnama ti panagkaykaysa, kas impakita dagiti gubgubat a nagdadangadangan dagiti tattao nga agpapada ti pagsasaoda. Ti “nadalus a pagsasao” isu ti Nainkasuratan a kinapudno, “ti pagwadan dagiti nasayaat a sasao.” (2 Timoteo 1:13) Dayta pabassitenna ti kinatangsit, itan-okna ti Dios, ken pagkaykaysaenna dagiti amin nga agsao iti dayta.

o Haggeo 1:6​—Yantangay binaybay-an dagiti Judio ti templo ni Jehova, dida nagun-odan ti bendisionna. Gapuna, nawadwad ti immulada ngem bassit ti apitda ket kurang ti taraonda ken inumenda a mangpennek iti kasapulanda. Saan nga umdas ti pagan-anayda wenno nakapuy ti kalidadna a mangpabara kadakuada, ket dagiti agsapsapul kasla ikabkabilda dagiti pundo iti supot ti kuarta a napno ti lussok. Ditay tuladen dagidiay a Judio, ditay koma baybay-an dagiti nadiosan a pagayatan.​—Proverbio 10:22; Nehemias 10:39.

o Haggeo 2:9​—Nupay “ti immuna” a templo, nga imbangon ni Salomon, nagpaut iti 420 a tawen, ti “naud-udi a balay” ket nausar iti 584 a tawen (515 K.K.P.-70 K.P.). Gapuna ti maikadua a templo napapaut. Ad-adu a managdaydayaw ti nagturong iti dayta, kas idi Pentecostes idi 33 K.P., idi dagiti Judio ken dagiti proselita naguurnongda iti dayta manipud iti labes pay ti Judea. Kasta met, ti Mesias, ni Jesu-Kristo, nangisuro iti “naud-udi a balay.” Dagitoy a bambanag ti nangipaay ti dadakkel a relihiuso a dayag iti dayta.