Pannakipagna iti Dios—Dagiti Umuna nga Addang
“Umadanikayo iti Dios, ket isu umadaninto kadakayo.”—SANTIAGO 4:8.
1, 2. Apay a maikunayo a maysa a dakkel a pribilehio ti panagserbi ken Jehova?
ADU a tawen a nagsagsagaba ti lalaki iti pagbaludan. Kalpasanna, naayaban a dumatag iti agturay ti daga. Napartak dagiti pasamak. Pagammuan la ta agserserbin ti balud iti kabilgan idi nga ari ditoy daga. Naisaad ti sigud a balud a mangannong iti dakkel a responsabilidad ken naipaayan iti naisangsangayan a dayaw. Ni Jose—ti lalaki a sikakawar idi dagiti sakana—ket makipagpagnan iti ari!—Genesis 41:14, 39-43; Salmo 105:17, 18.
2 Iti tiempotayo, addaan dagiti tattao iti gundaway nga agserbi iti daydiay natantan-ok nga amang ngem iti Faraon ti Egipto. Aw-awisennatay amin ti Katan-okan iti uniberso nga agserbi kenkuana. Anian a naindaklan a pribilehio ti agserbi ken maaddaan iti nasinged a relasion ken ni Jehova, ti Dios a mannakabalin-amin! Iti Kasuratan, nainaig kenkuana ti nakaskasdaaw a pannakabalin ken dayag agraman kinatalingenngen, kinapintas, ken kinaimbag. (Ezequiel 1:26-28; Apocalipsis 4:1-3) Nabuyogan iti ayat amin a pannakilangenna. (1 Juan 4:8) Pulos a saan nga agulbod. (Numeros 23:19) Ken pulos a di paayen ni Jehova dagidiay nasungdo kenkuana. (Salmo 18:25) Masagraptayo ti naragsak, makagunggona a biag ita ken ti biag nga agnanayon iti masanguanan no tungpalentayo dagiti nalinteg a bilbilinna. (Juan 17:3) Awan agturay a tao a makaipaay iti uray kapadpada man la koma bassit dagiti kasta a bendision ken pribilehio.
3. Iti ania a wagas a ni Noe ‘nakipagna iti pudno a Dios’?
3 Idi un-unana, inkeddeng ni patriarka a Noe ti agbiag a maitunos iti pagayatan ken panggep ti Dios. Maipapan kenkuana, kuna ti Biblia: “Ni Noe isu idi lalaki a nalinteg ken naan-anay kadagiti kaputotanna: nakipagna ni Noe iti [pudno a, NW] Dios.” (Genesis 6:9) Siempre, saan a literal ti pannakipagna ni Noe ken Jehova, ta awan ti tao a “nakakita [man la] iti Dios uray kaano.” (Juan 1:18) Imbes ketdi, nakipagna ni Noe iti Dios babaen ti panangtungpalna iti imbilin ti Dios kenkuana. Gapu ta inusar ni Noe ti biagna a nagaramid iti pagayatan ni Jehova, tinagiragsakna ti nabara, nasinged a pannakirelasion iti Dios a Mannakabalin-amin. Kas ken Noe, minilion itatta ti ‘makipagpagna iti Dios’ babaen ti panagbiagda a maitunos iti balakad ken pannursuro ni Jehova. Kasano a mairugi nga aramiden dayta ti maysa a tao?
Nasken ti Umiso a Pannakaammo
4. Kasano nga isursuro ni Jehova ti ilina?
4 Tapno mabalintay ti makipagna ken Jehova, masapul nga am-ammuentayo pay nga umuna. Impadto ni propeta Isaias: “Maaramidto kadagiti maudi nga al-aldaw, a ti bantay ti balay ni Jehova mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana. Ket adu dagiti inilin-ili a mapanto ken agkuna, Umaykayo, ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti dalanna, ket magnatayonto kadagiti danana: ta iti Sion ti rumuaranto ti linteg, ket iti Jerusalem ti rumuaranto ti sao ni Jehova.” (Isaias 2:2, 3) Wen, manamnamatayo nga isuro ni Jehova amin dagidiay mangikagumaan a magna kadagiti dalanna. Impaay ni Jehova ti Saona, ti Biblia, ken tulongannatayo a mangtarus iti dayta. Ti maysa a pamay-an a panangtulongna ket babaen ti “matalek ken masirib nga adipen.” (Mateo 24:45-47) Us-usaren ni Jehova ti ‘matalek nga adipen’ a mangipaay iti naespirituan a pannursuro babaen kadagiti naibatay-Biblia a publikasion, Nakristianuan a gimong, ken ti urnos a libre a panangyadal iti Biblia iti pagtaengan. Tultulongan met ti Dios ti ilina a mangtarus iti Saona babaen ti nasantuan nga espirituna.—1 Corinto 2:10-16.
5. Apay a nagpateg ti Nainkasuratan a kinapudno?
5 Nupay saantay a baybayadan ti kinapudno iti Biblia, napateg dayta. Bayat nga ad-adalentayo ti Sao ti Dios, maammuantayo ti maipapan iti Dios a mismo—ti naganna, ti personalidadna, ti panggepna, ken ti wagas a pannakilangenna kadagiti tattao. Maammuantayo met dagiti mangwayawaya a sungbat dagiti napateg a saludsod iti biag: Apay nga addatayo ditoy? Apay nga ipalubos ti Dios ti panagsagaba? Ania ti adda iti masanguanan? Apay a lumakay ken mataytayo? Adda kadi biag kalpasan ti ipapatay? Maysa pay, maammuantayo no ania ti pagayatan ti Dios kadatayo, kayatna a sawen, no kasano ti rumbeng a pannagnatayo tapno naan-anay a maay-ayotayo ti Dios. Maammuantayo a nainkalintegan dagiti bilinna ken agpaay iti pagimbagantayo no tungpalentayo dagitoy. No awan panangiwardas ti Dios, pulos a ditay maawatan dagiti kasta a banag.
6. Ti umiso a pannakaammo iti Biblia tulongannatayo a mangaramid iti ania?
6 Nabileg ti kinapudno iti Biblia. Tignayennatayo a mangbalbaliw iti kabibiagtayo. (Hebreo 4:12) Idi awan pay ammotayo maipapan iti Kasuratan, magmagnatayo laeng a “maitunos iti sistema ti bambanag daytoy a lubong.” (Efeso 2:2) Ngem ti umiso a pannakaammo iti Sao ti Dios ipakitana ti sabali a dalan kadatayo tapno ‘makapagnatayo a maikari ken Jehova maipaay iti panggep a panangay-ayo a naan-anay kenkuana.’ (Colosas 1:10) Anian a makaparagsak dagiti umuna nga addangtayo iti pannakipagna ken Jehova, ti katan-okan a Persona iti intero nga uniberso!—Lucas 11:28.
Dua a Napateg nga Addang —Dedikasion ken Bautismo
7. Bayat nga ad-adalentayo ti Sao ti Dios, ania a kinapudno maipapan iti panangituray ti tao ti maibatad?
7 No rumang-ay ti pannakaawattayo iti Biblia, mautobtayo ti kasasaad ti sangatauan ken ti mismo a biagtayo babaen ti naespirituan a lawag nga itden ti Sao ti Dios. Iti kasta, maibatad ti maysa a napateg a kinapudno. Dayta a kinapudno ket inyebkas iti nabayagen a tiempo ni propeta Jeremias idi nga insuratna: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) Datayo amin a tattao kasapulantayo ti panangiturong ti Dios.
8. (a) Ania ti mangtignay kadagiti tattao nga agdedikar iti Dios? (b) Ania ti Nakristianuan a dedikasion?
8 Ti pannakatarus iti daytoy napateg a kinapudno gutugotennatayo nga agpaidalan ken Jehova. Ket ti panagayat iti Dios tignayennatayo a mangidedikar iti biagtayo kenkuana. Ti panagdedikar iti Dios kaipapananna ti iyaadani kenkuana iti kararag ket sipapasnek nga ikaritayo nga usarentay ti biagtayo nga agserbi kenkuana ken simamatalek a magna kadagiti dalanna. Iti kasta, tultuladentayo ti inaramid ni Jesus, nga indatagna ti bagina ken Jehova buyogen ti natibker a determinasion nga aramidenna ti pagayatan ti Dios.—Hebreo 10:7.
9. Apay nga idedikar dagiti tattao ti biagda ken Jehova?
9 Saan a pilpiliten ni Jehova a Dios ti asinoman nga agdedikar kenkuana. (Idiligyo ti 2 Corinto 9:7.) Maysa pay, saan a namnamaen ti Dios ti asinoman a mangidedikar iti biagna Kenkuana gapu iti apagbiit laeng nga emosion. Sakbay a mabautisaran ti maysa a tao, masapul a nagbalinen nga adalan, ket kalikaguman dayta ti napasnek a pananggun-od iti pannakaammo. (Mateo 28:19, 20) Indawat ni Pablo kadagidiay nabautisaranen nga ‘iparangda ti bagbagida a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinda nga agrason.’ (Roma 12:1) Iti panagdedikartayo ken Jehova a Dios, usarentayo met ti pannakabalintayo nga agrason. Kalpasan a naammuantayo ti ramanen ti panagdedikar ken pinanunottayo a naimbag dayta a banag, situtulok ken sirarag-o nga idedikartayo ti biagtayo iti Dios.—Salmo 110:3.
10. Kasano a nainaig ti dedikasion iti bautismo?
10 No nayebkastayon iti Dios babaen ti pribado a kararag ti determinasiontayo a magna kadagiti dalanna, aramidentayo ti sumaganad nga addang. Ipakaammotayo kadagiti sabsabali a nagdedikartayon babaen ti panagpabautisartayo iti danum. Maysa daytoy a publiko a panangipaduyakyak a nagkaritayo a mangaramid iti pagayatan ti Dios. Iti rugrugi ti ministeriona ditoy daga, nagpabautisar ni Jesus ken Juan, iti kasta nangipasdek iti pagtuladantayo. (Mateo 3:13-17) Idi agangay, imbaon ni Jesus dagiti pasurotna a mangaramid kadagiti adalan ken bautisaranda ida. No kasta, napateg nga addang ti dedikasion ken bautismo para iti asinoman a mayat a makipagna ken Jehova.
11, 12. (a) Kasano a mayarig ti bautismo iti kallaysa? (b) Ania ti pagpadaan ti relasiontayo ken ni Jehova ken ti relasion ti agassawa?
11 Ti panagbalin a dedikado ken bautisado nga adalan ni Jesu-Kristo ket mayarig iti pannakiasawa. Iti adu a pagilian, adda sumagmamano nga addang a maaramid sakbay ti aldaw ti kallaysa. Agkita ti lalaki ken babai, aginnammoda ket inton agangay aginnayatda. Kalpasanna, agtulagda. Ti panagkallaysada ipakaammona iti publiko ti nagnumuanda a dua—nga agkasarda sada agtipon kas agassawa. Ti kallaysa ti mangipamatmat iti publiko a nangrugin dayta a naisangsangayan a relasion. Dayta nga aldaw ti pangrugian ti panagasawada. Umasping iti dayta, ti bautismo isu ti pangrugian ti biag a naipamaysa iti pannakipagna ken Jehova iti sidong ti dedikado a pannakirelasion kenkuana.
12 Usigenyo ti maysa pay a pangyaspingan. Kalpasan ti aldaw ti kallaysada, umuneg ken tumibker ti panaginnayat ti agassawa. Tapno ad-adda a sumingedda iti tunggal maysa, masapul nga awanan panagimbubukodan nga ikagumaan ti agassawa a taginayonen ken patibkeren ti relasionda kas agassawa. Nupay saantay a makikallaysa iti Dios, kalpasan ti bautismotayo masapul nga ikagumaantay a taginayonen ti nasinged a pannakirelasiontayo ken Jehova. Makita ken apresiarenna ti panagreggettayo a mangaramid iti pagayatanna ket suminged kadatayo. “Umadanikayo iti Dios,” insurat ni adalan a Santiago, “ket isu umadaninto kadakayo.”—Santiago 4:8.
Panangsurot Kadagiti Addang ni Jesus
13. Iti pannakipagna iti Dios, makin-ulidan ti tuladentayo?
13 Iti pannakipagna ken Jehova, masapul a tuladentayo ti pagwadan nga impasdek ni Jesu-Kristo. Insurat ni apostol Pedro: “Naayabankayo iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.” (1 Pedro 2:21) Tangay perpekto ni Jesus ket imperpektotayo, saantay a matulad a naan-anay ti pagwadan nga impasdekna. Nupay kasta, namnamaen ni Jehova nga aramidentay ti amin a kabaelantayo. Usigentayo ti lima a benneg ti biag ken ministerio ni Jesus nga ikagumaan koma a tuladen dagiti dedikado a Kristiano.
14. Ania ti nairaman iti panangammo iti Sao ti Dios?
14 Addaan idi ni Jesus iti umiso ken naan-anay a pannakaammo iti Sao ti Dios. Iti ministeriona, masansan a nagadaw ni Jesus iti Hebreo a Kasuratan. (Lucas 4:4, 8) Siempre, nagadaw met iti Kasuratan dagiti rinuker a papanguluen ti relihion kadagidi a tiempo. (Mateo 22:23, 24) Ti nagdumaanna, naawatan ni Jesus ti kaipapanan dagiti Kasuratan, ket inyaplikarna dagitoy iti panagbiagna. Ammona saan laeng a ti sagudayen ti Linteg no di pay ket ti kababagasna. Bayat a sursurotentayo ti ulidan ni Kristo, ikagumaantay met koma a tarusan ti Sao ti Dios, nga alaentayo ti kaipapanan wenno kababagasna. Iti kasta, anamongannatayo ti Dios kas trabahador a makabael a ‘mangaramat a siuumiso iti sao ti kinapudno.’—2 Timoteo 2:15.
15. Kasano a nangipasdek ni Jesus iti ulidan iti panangisarsarita iti maipapan iti Dios?
15 Insarsarita ni Kristo Jesus kadagiti sabsabali ti maipapan iti nailangitan nga Amana. Saan a binukodan ni Jesus ti pannakaammona maipapan iti Sao ti Dios. Uray dagiti kabusorna inawaganda kas “Mannursuro,” agsipud ta uray sadino idi ti papananna insarsaritana kadagiti sabsabali ti maipapan ken Jehova ken kadagiti panggepna. (Mateo 12:38) Nangaskasaba ni Jesus idiay templo, kadagiti sinagoga, kadagiti siudad, ken iti away. (Marcos 1:39; Lucas 8:1; Juan 18:20) Naasi ken naanus ti panangisurona, nga impakitana ti ayat kadagidiay tinulonganna. (Mateo 4:23) Dagidiay sumursurot iti ulidan ni Jesus makasarakda met iti adu a lugar ken pamay-an a mangisuro kadagiti sabsabali maipapan ken Jehova a Dios ken kadagiti nakaskasdaaw a panggepna.
16. Kasano kasinged ti relasion ni Jesus kadagiti padana nga agdaydayaw ken Jehova?
16 Nasinged ni Jesus kadagiti sabsabali pay nga agdaydayaw ken Jehova. Naminsan, idi a kasasao ni Jesus dagiti adu a tattao, immay nakisarita kenkuana ti inana ken dagiti di manamati a kakabsatna. Kuna ti salaysay ti Biblia: “Kinuna ti maysa kenkuana: ‘Adtoy! Ni inam ken dagiti kakabsatmo agtaktakderda iti ruar, a tartarigagayanda ti makisao kenka.’ Kas sungbat kinunana iti daydiay mangibagbaga kenkuana: ‘Asino ti inak, ken asino dagiti kakabsatko?’ Ket idi inyunnatna ti imana a naiturong kadagiti adalanna, kinunana: ‘Adtoy! Ti inak ken dagiti kakabsatko! Ta siasinoman a mangaramid iti pagayatan ni Amak nga adda sadi langit, dayta met laeng ti kabsatko a lalaki, ken kabsatko a babai, ken inak.’” (Mateo 12:47-50) Di kayat a sawen daytoy nga inwaksi ni Jesus ti pamiliana, ta paneknekan dagiti naud-udi a pasamak a dina inaramid ti kasta. (Juan 19:25-27) Kaskasdi, ipaganetget daytoy a salaysay ti ayat ni Jesus kadagiti kapammatianna. Iti met kaaldawantayo, tarigagayan dagidiay makipagpagna iti Dios ti makikadua kadagiti dadduma pay nga adipen ni Jehova ket masursuroda ida nga ipateg unay.—1 Pedro 4:8.
17. Kasano ti panagrikna ni Jesus maipapan iti panangaramid iti pagayatan ti nailangitan nga Amana, ket kasanonatay nga apektaran koma dayta?
17 Impakita ni Jesus ti panagayatna iti nailangitan nga Amana babaen ti panangaramidna iti pagayatan ti Dios. Tinungpal ni Jesus ti amin nga imbilin ni Jehova. Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Kinuna pay ni Kristo: “Kankanayon nga aramidek dagiti bambanag a makaay-ayo [iti Dios].” (Juan 8:29) Gapu iti kasta unay a panagayat ni Jesus iti nailangitan nga Amana, “impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” (Filipos 2:8) Iti kasta, pinaraburan ni Jehova ni Jesus, nga inikkanna iti natan-ok a saad ken dayaw a maikadua laeng ken ni Jehova a mismo. (Filipos 2:9-11) Kas ken Jesus, maipakitatayo ti ayattayo iti Dios babaen ti panangtungpal kadagiti bilinna ken panangaramid iti pagayatanna.—1 Juan 5:3.
18. Kasano a nangipasdek ni Jesus iti pagtuladan no maipapan iti panagkararag?
18 Managkararag a tao ni Jesus. Nagkararag idi a nagpabautisar. (Lucas 3:21) Sakbay ti panangpilina kadagiti 12 nga apostolna, nagpatpatnag a nagkararag. (Lucas 6:12, 13) Insuro ni Jesus dagiti adalanna no kasano ti agkararag. (Lucas 11:1-4) Iti rabii sakbay ti ipapatayna, inkararaganna dagiti adalanna ken nakipagkararag kadakuada. (Juan 17:1-26) Napateg a paset iti biag ni Jesus ti panagkararag, a kas met koma kadatayo, tangay pasurotnatayo. Anian a dayaw ti makisao iti Soberano ti Uniberso babaen ti kararag! Maysa pay, sungbatan ni Jehova dagiti kararag, ta insurat ni Juan: “Daytoy ti adda kadatayo a panagtalek kenkuana, nga, uray no ania ti dawatentayo maitunos iti pagayatanna, denggennatayo. Kanayonanna, no ammotayo a denggennatayo maipapan iti aniaman a dawdawatentayo, ammotayo a maaddaantayonto kadagiti bambanag a dinawattayo yantangay dinawattayo ida kenkuana.”—1 Juan 5:14, 15.
19. (a) Aniada a galad ni Jesus ti tuladentay koma? (b) Kadagiti ania a pamay-an a magunggonaantayo iti panangadal iti biag ken ministerio ni Jesus?
19 Nakaad-adu ti maadaltayo iti panangusig a naimbag iti biag ken ministerio ni Jesu-Kristo ditoy daga! Utobenyo dagiti galad nga imparangarangna: ayat, pannakipagrikna, asi, kired ti pakinakem, kinatimbeng, kinanainkalintegan, kinapakumbaba, kinatured, ken di panagimbubukodan. No ad-adu ti ammotayo maipapan ken Jesus, rumayray ti tarigagaytayo nga agbalin a matalek a paspasurotna. Ti pannakaammo ken Jesus iyadaninatay met ken Jehova, ta ni Jesus ti perpekto a ladawan ti nailangitan nga Amana. Gapu ta nasinged unay ken Jehova, naikunana: “Ti nakakita kaniak nakitana met ti Ama.”—Juan 14:9.
Agtalekkayo iti Dios a Saranayennakayo
20. Kasano a mabalintay ti makipagna a sitatalged ken Jehova?
20 No agsursuro pay laeng a magna dagiti ubbing, saan a nalinteg dagiti addangda. Kasanoda a makasursuro a magna a sitatalged? Babaen laeng ti panagsanay ken panagporsegi. Bueno, dagidiay makipagpagna ken Jehova ikagumaanda ti magna a sitatalged ken sititibker. Kalikaguman met daytoy ti panawen ken panagporsegi. Impakita ni Pablo ti kinapateg ti panagporsegi iti pannakipagna iti Dios idi nga insuratna: “Kamaudiananna, kakabsat, kiddawenmi kadakayo ken bagbagaandakayo babaen ken Apo Jesus, kas iti panangawatyo ti pammilin manipud kadakami no kasano ti rebbengyo a pannagna ken panangay-ayo iti Dios, kinapudnona kas iti pannagnayo, nga itultuloyyo nga aramiden dayta nga ad-adda pay a naan-anay.”—1 Tesalonica 4:1.
21. Bayat a makipagpagnatayo ken Jehova, aniada a bendision ti masagraptayo?
21 No talaga a napudnotayo iti Dios, tulongannatayo nga agtultuloy a makipagna kenkuana. (Isaias 40:29-31) Awan ti maipaay daytoy a lubong a pumada kadagiti bendision nga ipapaayna kadagidiay magmagna kadagiti dalanna. Isu ti ‘mangisuro kadatayo a maipaay iti pagimbagantayo, a mangiturong kadatayo iti dalan a rumbeng a pagnaantayo. Ket no ipangagtayo dagiti bilinna, ti talnatayo agbalin a kasla maysa a karayan, ket ti kinalintegtayo kasla kadagiti dalluyon ti baybay.’ (Isaias 48:17, 18, NW) No awatentayo ti awis a makipagna iti Dios ken simamatalek nga aramidentay dayta, masagraptayo ti pannakikappia kenkuana iti agnanayon.
Kasanoyo a Sungbatan?
◻ Apay a maysa a dayaw ti pannakipagna iti pudno a Dios?
◻ Apay nga umuna nga addang iti pannakipagna ken Jehova ti panagadal, panagdedikar, ken panagpabautisar?
◻ Kasanotay a masurot dagiti addang ni Jesus?
◻ Kasanotay nga ammo a saranayennatayo ni Jehova bayat a makipagpagnatayo kenkuana?
[Dagiti Ladawan iti panid 13]
Umuna nga addang iti pannakipagna iti Dios ti panagadal, panagdedikar, ken panagpabautisar