‘Inkayo Mangaramid iti Ad-adalan, a Bautisaranyo Ida’
“Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida . . . , nga isuroyo kadakuada a tungpalenda ti amin a bambanag nga imbilinko kadakayo.”—MATEO 28:19, 20.
1. Ania ti inkeddeng ti nasion ti Israel idi addada iti sakaanan ti Bantay Sinai?
AGARUP 3,500 a tawen ti napalabas, maysa a nasion ti nagsapata iti Dios. Bayat a naummongda iti sakaanan ti Bantay Sinai, publiko nga indeklara dagiti Israelita: “Isuamin a sinao ni Jehova situtulokkami a mangaramid.” Sipud idin, nagbalin ti Israel kas maysa nga ili a naidedikar iti Dios, ti ‘naisangsangayan a sanikuana.’ (Exodo 19:5, 8; 24:3) Sigagagar a pinadpadaananda ti panangsagrapda iti pannalaknibna ken ti kinapkaputotan a panagbiagda iti daga a “pagay-ayusan ti gatas ken diro.”―Levitico 20:24.
2. Ania a relasion iti Dios ti mabalin a tagiragsaken ita dagiti tattao?
2 Ngem kas iti binigbig ni salmista nga Asaf, dagiti Israelita “saanda a sinalimetmetan ti tulag ti Dios, ket iti lintegna nagkitakitda a magna.” (Salmo 78:10) Dida sinalimetmetan ti kari a sinapataan dagiti ammada ken ni Jehova. Idi agangay, napukaw ti nasion ti naisangsangayan a relasionna iti Dios. (Eclesiastes 5:4; Mateo 23:37, 38) Gapuna, ti Dios “inturongna ti asikasona kadagiti nasion tapno mangala kadakuada iti ili a maipaay iti naganna.” (Aramid 15:14) Kadagitoy maudi nga al-aldaw, um-ummongenna ti “maysa a dakkel a bunggoy, nga awan ti tao a nakabael a mangbilang manipud kadagiti amin a nasion ken kadagiti tribu ken kadagiti ili ken kadagiti pagsasao,” a sirarag-o nga agkunkuna: “Ti pannakaisalakan utangmi iti Diostayo, a situtugaw iti trono, ken iti Kordero.”—Apocalipsis 7:9, 10.
3. Ania ti rumbeng nga aramiden ti maysa tapno maaddaan iti personal a relasion iti Dios?
3 Tapno matagiragsak dayta a napateg a relasion iti Dios, nasken nga idedikar ti maysa ti biagna ken ni Jehova ken isimbolona dayta babaen ti publiko a panagpabautisarna iti danum. Maysa dayta a panagtulnog iti direkta a bilin ni Jesus kadagiti adalanna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Immimdeng dagiti Israelita bayat ti pannakaibasa “ti libro ti tulag.” (Exodo 24:3, 7, 8) Gapuna, naawatanda dagiti obligasionda ken ni Jehova. Kasta met ita, sakbay nga agpabautisar ti maysa, masapul a manggun-od iti umiso a pannakaammo maipapan iti pagayatan ti Dios a masarakan iti Saona, ti Biblia.
4. Ania ti nasken nga aramiden ti maysa sakbay a makualipikar nga agpabautisar? (Iramanyo ti kahon iti ngato.)
4 Nalawag a kayat ni Jesus a maaddaan dagiti adalanna iti natibker a pundasion ti pammati sakbay nga agpabautisarda. Binilinna dagiti pasurotna a saanda laeng a mapan ken mangaramid kadagiti adalan no di ket isuroda kadakuada a ‘tungpalenda ti amin nga imbilinna.’ (Mateo 7:24, 25; Efeso 3:17-19) Gapuna, dagidiay kualipikado nga agpabautisar ket kaaduanna a nagadal iti Biblia iti sumagmamano a bulan wenno makatawen wenno dua a tawen pay ketdi, iti kasta saan a dinadarasudos wenno arigna a nakusel ti desisionda. Iti mismo nga aldaw ti bautismo, dagiti kandidato sungbatanda iti wen dagiti dua a napateg a saludsod. Yantangay impaganetget ni Jesus a ‘ti saotayo a Wen kaipapananna ti Wen, ti saotayo a Saan, Saan,’ makatulong kadatayo amin no repasuentayo a siaannad ti kaipapanan dagita a dua a saludsod ti bautismo.―Mateo 5:37.
Panagbabawi ken Panagdedikar
5. Ania a dua a napateg nga addang ti ipaganetget ti umuna a saludsod ti bautismo?
5 Ti umuna a saludsod a mayimtuod iti kandidato ti bautismo ket no nagbabawyannan ti dati a wagas ti panagbiagna ken indedikarnan ti biagna ken ni Jehova tapno aramidenna ti pagayatan ti Dios. Daytoy a saludsod ipaganetgetna ti dua a napateg nga addang a nasken a maaramid sakbay ti bautismo―ti panagbabawi ken panagdedikar.
6, 7. (a) Apay a napateg ti panagbabawi kadagiti amin a kandidato ti bautismo? (b) Ania a panagbalbaliw ti nasken nga aramiden ti maysa kalpasan a nagbabawi?
6 Apay a nasken nga agbabawi ti maysa sakbay nga agpabautisar? Ilawlawag ni apostol Pablo: “Datayo amin idi naminsan nagbibiagtayo maitunos kadagiti derrep ti lasagtayo.” (Efeso 2:3) Sakbay a naaddaantayo iti umiso a pannakaammo iti pagayatan ti Dios, nagbiagtayo sigun kadagiti kababalin ken pagalagadan ti lubong. Nagbiagtayo iti sidong ti impluensia ti dios daytoy a sistema, ni Satanas. (2 Corinto 4:4) Ngem idi naammuantayon ti pagayatan ti Dios, inkeddengtayo ti agbiag “saanen nga agpaay iti tartarigagay dagiti tattao, no di ket agpaay iti pagayatan ti Dios.”—1 Pedro 4:2.
7 Nangyeg iti adu a gunggona daytoy a baro a wagas ti panagbiag. Kangrunaan iti amin, mabalinen a maaddaan ti maysa iti napateg a relasion ken ni Jehova, nga inyasping ni David iti maysa nga awis a sumrek iti ‘tolda’ ti Dios ken iti ‘nasantuan a bantay’―pudno a maysa a naindaklan a pribilehio. (Salmo 15:1) Nainkalintegan a ti laeng awisen ni Jehova ket dagidiay ‘magmagna nga awan pagkuranganda ken mangan-annurot iti kinalinteg ken agsasao iti kinapudno iti pusoda.’ (Salmo 15:2) Maigapu iti nagduduma a kasasaadtayo sakbay a naadaltayo ti kinapudno, ti panangragpat kadagitoy a kualipikasion ti mabalin a mangkalikagum a mangaramidtayo iti sumagmamano a panagbalbaliw―agpadpada iti kondukta ken iti personalidadtayo. (1 Corinto 6:9-11; Colosas 3:5-10) Matignaytayo nga agbalbaliw gapu ta makariknatayo iti panagbabawi―ti napasnek a panagladingittayo gapu iti naglabas a wagas ti panagbiagtayo ken ti nabileg a determinasiontayo a mangay-ayo ken ni Jehova. Dayta ti mangituggod iti naan-anay a panagbalbaliw―ti panangiwaksi iti managimbubukodan, nailubongan a wagas ti panagbiag ken panagtultuloy a pannagna iti dana a makaay-ayo iti Dios.—Aramid 3:19.
8. Kasanotayo nga aramiden ti panagdedikar, ken ania ti pakainaiganna iti bautismo?
8 Ti maikadua a paset ti umuna a saludsod ti bautismo ket mangyimtuod kadagiti kandidato no indedikardan ti biagda ken ni Jehova tapno aramidenda ti pagayatanna. Ti panagdedikar ket maysa a napateg nga addang a nasken nga aramiden sakbay ti panagpabautisar. Maaramid dayta babaen ti kararag, nga iyebkastayo ti tarigagaytayo a mangidedikar iti biagtayo ken ni Jehova babaen ken Kristo. (Roma 14:7, 8; 2 Corinto 5:15) Iti kasta, ni Jehova ti agbalin nga Apo ken Makinkukua kadatayo, ket kas ken ni Jesus, pakaragsakantayo nga aramiden ti pagayatan ti Dios. (Salmo 40:8; Efeso 6:6) Maminsan laeng a maaramid daytoy a sagrado a panagkari ken ni Jehova. Ngem gapu ta pribado ti panagdedikartayo, ti publiko a panangiparangarangtayo iti dayta iti aldaw ti bautismo ket panangipakita kadagiti isuamin nga adda inaramidtayo a naulimek a panagdedikar iti nailangitan nga Amatayo.―Roma 10:10.
9, 10. (a) Ania dagiti nasken nga aramidentayo tapno maitungpaltayo ti pagayatan ti Dios? (b) Kasano nga uray dagiti opisial ti Nazi binigbigda ti dedikasiontayo?
9 Ania ti nasken nga aramidentayo tapno matungpaltayo ti pagayatan ti Dios kas iti inaramid ni Jesus? Kinuna ni Jesus kadagiti adalanna: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mateo 16:24) Imbalabalana ditoy ti tallo a banag a rumbeng nga aramidentayo. Umuna, ‘paglikudantayo’ ti bagitayo. Iti sabali a pannao, iwaksitayo dagiti managimbubukodan, imperpekto a pagannayasantayo ket pagtulnogantayo ti balakad ken panangiwanwan ti Dios. Maikadua, ‘bagkatentayo ti kayotayo a pagtutuokan.’ Idi kaaldawan ni Jesus, ti pagtutuokan a kayo ket maysa a simbolo ti pannakaibabain ken panagsagaba. Kas Kristiano, bigbigentayo nga agsagabatayo maigapu iti naimbag a damag. (2 Timoteo 1:8) Nupay umsien wenno babalawennatayo ti lubong, ‘umsientayo ti bain’ kas inaramid ni Kristo, kayatna a sawen, naragsaktayo gapu ta ammotayo a maay-ayotayo ti Dios. (Hebreo 12:2) Maikatlo, “agtultuloy” a surotentayo ni Jesus.―Salmo 73:26; 119:44; 145:2.
10 Makapainteres ta uray ti dadduma a bumusbusor bigbigenda ti dedikasion dagiti Saksi ni Jehova a mangipamaysa iti panagserbida iti Dios. Kas pagarigan, iti Buchenwald a kampo konsentrasion ti Nazi nga Alemania, dagiti Saksi a nagkedked a mangtallikud iti pammatida ket nakalikaguman a mangpirma iti daytoy a nakayimprenta a sasao: “Maysaak latta a dedikado nga Estudiante iti Biblia ken diak pulos tallikudan ti kari nga insapatak ken ni Jehova.” Awan duadua a kasta met ti panagrikna ti amin a dedikado, matalek nga adipen ti Dios!―Aramid 5:32.
Maibilang a Saksi ni Jehova
11. Ania a pribilehio ti matagiragsak ti maysa nga agpabautisar?
11 Ti maikadua a saludsod iyimtuodna iti kandidato, umuna iti amin, no maawatanna a ti bautismona ti mangipabigbig nga isu ket maysan a Saksi ni Jehova. Kalpasan a maitaneb, isu ket agbalinen a maysa nga ordinado a ministro a mangaw-awit iti nagan ni Jehova. Maysa dayta a naindaklan a pribilehio ken serioso a responsabilidad. Matagiragsakna met ti namnama nga agnanayon a pannakaisalakan, la ketdi ta agtalinaed a matalek ken ni Jehova.―Mateo 24:13.
12. Ania nga obligasion ti kakuyog ti panangawit iti nagan ni Jehova?
12 Awan duadua a maysa a naisangsangayan a dayaw ti mangawit iti nagan ti mannakabalin-amin a Dios, ni Jehova. Kinuna ni propeta a Mikias: “Amin dagiti ili, iti biangda, magnadanto tunggal maysa iti nagan ti diosna; ngem datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.” (Mikias 4:5) Nupay kasta, kakuyog dayta a dayaw ti maysa nga obligasion. Nasken nga ikagumaantayo ti agbiag iti wagas a pakaidayawan ti nagan nga awittayo. Kas impalagip ni Pablo kadagiti Kristiano idiay Roma, ‘matabbaawan’ wenno maibabain ti nagan ti Dios no saan nga annuroten ti maysa ti isursurona.―Roma 2:21-24.
13. Apay a dagiti dedikado nga adipen ni Jehova addaanda iti responsabilidad a mangsaksi maipapan iti Diosda?
13 No ti maysa ket agbalin a Saksi ni Jehova, inawatna met ti responsabilidad a mangsaksi maipapan iti Diosna. Inawis ni Jehova ti dedikado a nasion ti Israel nga agbalin a saksina tapno paneknekanda nga isu ti agnanayon a Dios. (Isaias 43:10-12, 21) Ngem napaay ti nasion a nangtungpal iti dayta nga annongen, agingga a naan-anay a napukawda ti anamong ni Jehova. Iti kaaldawantayo, maipagpannakkel dagiti pudno a Kristiano ti pribilehioda a mangsaksi ken ni Jehova. Ar-aramidentayo dayta gapu ta ay-ayatentayo ti Dios ken kayattayo a masantipikar ti naganna. Apay koma nga agulimektayo idinto ta ammotayo ti kinapudno maipapan iti nailangitan nga Amatayo ken iti panggepna? Mariknatayo ti narikna ni apostol Pablo idi kinunana: “Ti panagkasapulan naipabaklay kaniak. Pudno unay, asiak pay no diak indeklara ti naimbag a damag!”—1 Corinto 9:16.
14, 15. (a) Ania ti paset ti organisasion ni Jehova no iti naespirituan a panagrang-aytayo? (b) Ania dagiti adda a probision a tumulong kadatayo iti naespirituan?
14 Ti maikadua a saludsod ipalagipna met iti kandidato ti responsabilidadna a makitunos iti organisasion nga iturturong ti espiritu ni Jehova. Saantayo nga agmaymaysa iti panagserbitayo iti Dios, ket kasapulantayo ti tulong, saranay, ken pammaregta ti “intero a timpuyog dagiti kakabsat.” (1 Pedro 2:17; 1 Corinto 12:12, 13) Dakkel ti paset ti organisasion ti Dios no iti naespirituan a panagrang-aytayo. Mangipapaay dayta iti aglaplapusanan a naibatay iti Biblia a publikasion a tumulong kadatayo a rumang-ay iti umiso a pannakaammo, nga agtignay a nainsiriban no maipasango kadagiti parikut, ken maaddaan iti nasinged a relasion iti Dios. Kas iti maysa nga ina a siguraduenna a mataraonan a naimbag ken maaywanan ti anakna, “ti matalek ken masirib nga adipen” ipapaayna ti naintiempuan a naespirituan a taraon tapno rumang-aytayo iti naespirituan.—Mateo 24:45-47; 1 Tesalonica 2:7, 8.
15 Kadagiti linawas a gimong, maipapaay kadagiti adipen ni Jehova ti kasapulanda a pannakasanay ken pammaregta tapno agtalinaedda a matalek a Saksi ni Jehova. (Hebreo 10:24, 25) Ti Teokratiko nga Eskuelaan ti Panagministro suruannatayo no kasano ti agsao iti publiko, ken ti Gimong ti Serbisio sanayennatayo no kasano a sieepektibo a mayallatiwtayo ti mensahetayo. Kadagiti gimong ken iti personal a panagadaltayo kadagiti publikasion a naibatay iti Biblia, makitatayo no kasano nga agtigtignay ti espiritu ni Jehova, nga iturturongna ti organisasionna. Babaen kadagitoy a regular a probision, ti Dios pakdaarannatayo kadagiti peggad, sanayennatayo nga agbalin nga epektibo a ministro, ken tulongannatayo nga agtalinaed a siririing iti naespirituan.—Salmo 19:7, 8, 11; 1 Tesalonica 5:6, 11; 1 Timoteo 4:13.
Ti Pakatignayan nga Agpabautisar
16. Ania ti mangtignay kadatayo a mangidedikar iti biagtayo ken ni Jehova?
16 No kasta, dayta a dua a saludsod ti bautismo ipalagipna kadagiti kandidato ti kaipapanan ti panagpabautisar iti danum ken dagiti responsabilidad a kakuyogna. Ania ngarud ti rumbeng a mangtignay kadakuada nga agpabautisar? Nagbalintayo a bautisado nga adalan, saan a gapu ta adda nangpilit kadatayo, no di ket gapu ta ni Jehova ‘inyadaninatayo’ kenkuana. (Juan 6:44) Yantangay “ti Dios ket ayat,” iturturayanna ti uniberso buyogen ti ayat, saan a babaen ti panangpilit. (1 Juan 4:8) Sumingedtayo ken ni Jehova gapu kadagiti agkakaimbag a galadna ken gapu iti wagas ti panangtratona kadatayo. Inted ni Jehova ti bugbugtong nga Anakna maigapu kadatayo, ken ituktukonna ti kasayaatan a masakbayan. (Juan 3:16) Gapuna, matignaytayo a mangidaton wenno mangidedikar kenkuana iti biagtayo.―Proverbio 3:9; 2 Corinto 5:14, 15.
17. Iti ania a ditay indedikar ti biagtayo?
17 Idedikartayo ti biagtayo, saan nga iti maysa a panggep wenno iti maysa a trabaho, no di ket ken ni Jehova a mismo. Uray agbaliwbaliw ti trabaho nga ipaannong ti Dios kadagiti adipenna, saanto nga agkupas ti dedikasionda kenkuana. Kas pagarigan, dakkel ti nagdumaan ti impaaramidna ken ni Abraham no idilig iti impaaramidna ken ni Jeremias. (Genesis 13:17, 18; Jeremias 1:6, 7) Kaskasdi, agpada nga intungpalda ti espesipiko nga annongen a naipabaklay kadakuada gapu ta ay-ayatenda ni Jehova ken tarigagayanda nga aramiden a simamatalek ti pagayatanna. Kabayatan daytoy tiempo ti panungpalan, amin a bautisado a pasurot ni Kristo pagreggetanda nga itungpal ti bilinna nga ikasabada ti naimbag a damag ti Pagarian ken mangaramidda kadagiti adalan. (Mateo 24:14; 28:19, 20) Ti naimpusuan a panangaramid iti dayta a trabaho ket maysa a nagsayaat a wagas a maipakitatayo nga ay-ayatentayo ti nailangitan nga Amatayo ken pudno a dedikadotayo kenkuana.―1 Juan 5:3.
18, 19. (a) Ania kinapudnona ti ibagbagatayo iti publiko no agpabautisartayo? (b) Ania ti mausig iti sumaruno nga artikulo?
18 Awan duadua a luktan ti bautismo ti adu a bendision, ngem serioso a banag dayta. (Lucas 14:26-33) Dayta ti mangipakita no ania ti kapatgan a responsabilidad ti maysa. (Lucas 9:62) No agpabautisartayo, kinapudnona ibagbagatayo iti publiko: “Daytoy a Dios isu ti Diostayo agingga iti tiempo a di nakedngan, iti mismo nga agnanayon. Isu ibagnosnatayto agingga a mataytayo.”—Salmo 48:14.
19 Ti sumaruno nga artikulo sukimatenna dagiti kanayonan a saludsod a mabalin a tumaud mainaig iti bautismo iti danum. Adda kadi dagiti nainrasonan a makagapu tapno agkitakit nga agpabautisar ti maysa? Makalapped kadi ti edad? Kasano a makatulong ti isuamin tapno mataginayon ti dignidad ti pannakaangay ti bautismo?
Mailawlawagyo Kadi?
• Apay a nasken nga agbabawi ti tunggal Kristiano sakbay nga agpabautisar?
• Ania ti iraman ti panagdedikar iti Dios?
• Nupay maysa a dayaw ti panangawit iti nagan ni Jehova, ania dagiti responsabilidad a kakuyogna?
• Ania ti nasken a mangtignay kadatayo nga agpabautisar?
[Kahon/Ladawan iti panid 22]
Ti Dua a Saludsod ti Bautismo
Maibatay iti daton ni Jesu-Kristo, nagbabawyanyo kadin dagiti basolyo ken indedikaryon ti bagiyo ken ni Jehova tapno aramidenyo ti pagayatanna?
Matarusanyo kadi a ti panagdedikar ken panagpabautisaryo ipabigbignakayo kas maysa kadagiti Saksi ni Jehova a naitimpuyog iti iturturong ti espiritu nga organisasion ti Dios?
[Ladawan iti panid 23]
Ti panagdedikar ket maysa a sagrado a panagkari ken ni Jehova babaen ti kararag
[Ladawan iti panid 25]
Ti panangasabatayo ipakitana ti dedikasiontayo iti Dios