Maysa a Panangaywan Agpaay iti Pannakatungpal ti Panggep ti Dios

“[Ti Dios ti] mamagtignay iti amin a bambanag maitunos iti pamay-an nga ipatigmaan ti pagayatanna.”​—EFESO 1:11.

1. Apay a ti amin a kongregasion dagiti Saksi ni Jehova agtataripnongda inton Abril 12, 2006?

INTON rabii ti Mierkoles, Abril 12, 2006, agarup 16 milion a tattao ti agtataripnong tapno rambakanda ti Pangrabii ti Apo. Iti amin a pagtataripnonganda, maidasar ti awan lebadurana a tinapay, a mangisimbolo iti bagi ni Kristo, ken nalabaga nga arak, a mangisimbolo iti naiparukpok a darana. Iti ngudo ti palawag a mangibinsabinsa iti kaipapanan ti Panglaglagip iti ipapatay ni Jesus, maipasanto dagita nga emblema―umuna ti tinapay, kalpasanna ti arak. Iti sumagmamano a kongregasion dagiti Saksi ni Jehova, maysa wenno nasursurok pay ti makipasetto kadagita nga emblema. Ngem iti adu a kongregasion, awan kadagiti tumabuno ti makipaset kadagiti emblema. Apay a manmano laeng ti makipaset a Kristiano, dagidiay mangnamnama nga agbiag idiay langit, ket saan a makipaset ti kaaduanna, dagidiay mangnamnama nga agbiag nga agnanayon ditoy daga?

2, 3. (a) Ania dagiti pinarsua ni Jehova maitunos iti panggepna? (b) Iti ania a panggep a pinarsua ni Jehova ti daga ken ti sangatauan?

² Ni Jehova ket Dios a manangtungpal kadagiti panggepna. Iti panangtungpalna iti panggepna, ‘tignayenna ti amin a bambanag maitunos iti pamay-an nga ipatigmaan ti pagayatanna.’ (Efeso 1:11) Pinarsuana nga umuna ti bugbugtong nga Anakna. (Juan 1:1, 14; Apocalipsis 3:14) Kalpasanna, babaen ti Anakna, nangparsua ni Jehova iti maysa a pamilia dagiti anghel ken kalpasanna ti pisikal nga uniberso, agraman ti daga ken ti sangatauan.―Job 38:4, 7; Salmo 103:19-21; Juan 1:2, 3; Colosas 1:15, 16.

³ Saan a pinarsua ni Jehova daytoy daga kas lugar a pangsubokanna kadagiti tattao no siasino ti agbalin a kualipikado a mainayon kadagiti espiritu nga annakna idiay langit, kas isursuro ti adu a simbaan ti Kakristianuan. Pinarsuana ti daga nga adda masinunuo a panggepna iti dayta, “tapno mapagnaedan.” (Isaias 45:18) Ti Dios pinarsuana daytoy daga agpaay iti tao ken ti tao agpaay iti daga. (Salmo 115:16) Panggepna nga agbalin a paraiso ti intero a daga, a napno kadagiti nalinteg a tattao, isuda a mangsukay ken mangaywan iti dayta. Awan a pulos ti naipanamnama kada Adan ken Eva a mapandanto idiay langit.―Genesis 1:26-28; 2:7, 8, 15.

Nakuestion ti Panggep ni Jehova

4. Kasano a nakuestion ti wagas ti panangusar ni Jehova iti kinasoberanona idi rugrugi ti pakasaritaan ti tao?

⁴ Maysa nga espiritu nga anak ti Dios ti immalsa ken determinado a mangkeltay iti panggep ni Jehova. Inabusona ti insagut ti Dios a wayawaya a mangikeddeng. Kiniburna ti talna a tagtagiragsaken dagiti amin a siaayat nga agpaspasakup iti kinasoberano ni Jehova. Intuggod ni Satanas ti umuna nga agassawa tapno agbiagda a naisina iti Dios. (Genesis 3:1-6) Bigbigenna ti pannakabalin ni Jehova, ngem kinuestionna ti wagas ti panangusar ti Dios iti kinasoberanona, ti kalinteganna a mangituray. Gapuna, idi rugrugi pay laeng ti pakasaritaan ti tao, timmaud ditoy daga ti napateg nga isyu maipapan iti kinasoberano ni Jehova.

5. Ania a segundario nga isyu ti timmaud, a nangkarit iti kinamatalek dagiti siasino?

⁵ Malaksid iti kangrunaan nga isyu ti sapasap a kinasoberano, nainaig iti dayta ti segundario nga isyu a pinataud ni Satanas idi kaaldawan ni Job. Kinuestion ni Satanas ti motibo dagiti parsua ni Jehova no apay nga agpaspasakup ken agserserbida Kenkuana. Imparipirip ni Satanas nga ar-aramidenda dayta gapu laeng kadagiti managimbubukodan a rason, ngem sigurado a tallikudanda ti Dios no maipasangoda iti pannubok. (Job 1:7-11; 2:4, 5) Nupay timmaud dayta a karit maigapu kadagiti tattao nga adipen ni Jehova, nairaman met iti dayta dagiti espiritu nga annak ti Dios, uray ti bugbugtong nga Anak ni Jehova.

6. Kasano a pinaneknekan ni Jehova nga isu ket matalek no maipapan iti panggep ken iti kaipapanan ti naganna?

⁶ Gapu ta matalek no maipapan iti panggepna ken iti kaipapanan ti naganna, nagbalin ni Jehova kas Propeta ken Manangisalakan.a Kinunana ken ni Satanas: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.” (Genesis 3:15) Babaen ti Bin-i ti kukuana a “babai,” ti nailangitan a paset ti organisasionna, masungbatan ni Jehova ti karit ni Satanas ken maipaayanna iti namnama a pannakaispal ken biag dagiti kaputotan ni Adan.​—Roma 5:21; Galacia 4:26, 31.

“Ti Sagrado a Palimed ti Pagayatanna”

7. Ania a panggep ti impalgak ni Jehova babaen ken ni apostol Pablo?

⁷ Iti suratna kadagiti Kristiano idiay Efeso, nagsayaat ti panangiladawan ni apostol Pablo no kasano ti panangimaton ni Jehova kadagiti bambanag tapno maitungpal ti panggepna. Insurat ni Pablo: ‘Impakaammona kadatayo ti sagrado a palimed ti pagayatanna. Maitunos dayta iti pakaragsakanna unay a pinanggepna a mismo maipaay iti maysa a panangaywan agingga iti naan-anay a pagpatinggaan dagiti naituding a tiempo, awan sabali, tapno ummongen a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.’ (Efeso 1:9, 10) Ti nadayag a panggep ni Jehova ket agkaykaysa ken siaayat nga agpasakup iti kinasoberanona ti amin nga adda iti uniberso. (Apocalipsis 4:11) Iti kasta, masantipikar ti naganna, mapaneknekan nga ulbod ni Satanas, ken maibanag ti panggepna “kas sadi langit, kasta met iti daga.”―Mateo 6:10.

8. Ania ti kaipapanan ti sao a naipatarus kas “panangaywan”?

⁸ Matungpal ti ‘pakaragsakan’ wenno panggep ni Jehova babaen ti “maysa a panangaywan.” Inusar ni Pablo ti maysa a sao a literal a kaipapananna “panangimaton iti sangakabbalayan.” Ti tuktukoyenna ket saan a maysa a gobierno a kas iti Mesianiko a Pagarian, no di ket maysa a wagas ti panangimaton kadagiti bambanag.b Ti nagsayaat a wagas ti panangaywan ni Jehova kadagiti bambanag tapno maibanagna ti panggepna ket nainaig iti maysa a “sagrado a palimed” nga in-inut a maipalgak iti panaglabas dagiti siglo.―Efeso 1:10; 3:9, footnote ti Reference Bible.

9. Kasano nga in-inut nga impalgak ni Jehova ti sagrado a palimed ti pagayatanna?

⁹ Babaen kadagiti agsasaruno a tulag, in-inut nga impalgak ni Jehova no kasano a maitungpal ti panggepna mainaig iti Bin-i a naikari idiay Eden. Ti tulag ni Jehova ken ni Abraham ipalgakna nga agtaud iti kaputotan ni Abraham ti naikari a Bin-i ken isu ti pamay-an a “dagiti amin a nasion iti daga” mabendisionanda ti bagida. Impakaammo met dayta a tulag nga adda dagidiay makikadua iti kangrunaan a paset ti bin-i. (Genesis 22:17, 18) Ti Linteg ti tulag iti nainlasagan nga Israel impakaammona met ti panggep ni Jehova a mangipasdek iti “maysa a pagarian ti papadi.” (Exodo 19:5, 6) Ti tulag ken ni David impakitana a ti Bin-i ti agbalin nga Ulo ti Pagarian iti tiempo a di nakedngan. (2 Samuel 7:12, 13; Salmo 89:3, 4) Apaman a ti Linteg ti tulag naiturongna dagiti Judio iti Mesias, impalgak ni Jehova dagiti dadduma pay nga aspeto ti pannakatungpal ti panggepna. (Galacia 3:19, 24) Dagiti tattao a makikadua iti kangrunaan a paset ti bin-i isuda ti mangbukel iti naipadto a “pagarian ti papadi” ken maipanda iti “maysa a baro a tulag” kas ti baro nga “Israel,” maysa a naespirituan a nasion.― Jeremias 31:31-34; Hebreo 8:7-9.c

10, 11. (a) Kasano nga impalgak ni Jehova ti naipadto a Bin-i? (b) Apay nga immay ditoy daga ti bugbugtong nga Anak ti Dios?

¹⁰ Kas pannakaibanag dayta a panangaywan mainaig iti panggep ti Dios, dimteng ti tiempo nga agparang ditoy daga ti naikari a Bin-i. Ni Jehova imbaonna ni anghel Gabriel tapno ipakaammona ken ni Maria nga isu ket mangipasngay iti maysa nga anak a lalaki a maawagan iti Jesus. Kinuna ti anghel iti babai: “Daytoy ket naindaklanto ken maawaganto iti Anak ti Kangatuan; ket ni Jehova a Dios itednanto kenkuana ti trono ni David nga amana, ket agturayto kas ari iti balay ni Jacob iti agnanayon, ket awanto ti panungpalan ti pagarianna.” (Lucas 1:32, 33) Nagbalin ngarud a nalawag no siasino ti naikari a Bin-i.―Galacia 3:16; 4:4.

¹¹ Immay ditoy daga ti bugbugtong nga Anak ni Jehova tapno masubok agingga ken patay. Agpannuray ken ni Jesus ti kasayaatan a pangsungbat iti karit ni Satanas. Agtalinaed kadi a nasungdo ken ni Amana? Nairaman iti dayta ti maysa a sagrado a palimed. Inlawlawag ni apostol Pablo ti akem ni Jesus: “Ti sagrado a palimed daytoy nadiosan a debosion maawat a naindaklan: ‘Isu naiparangarang iti lasag, naideklara a nalinteg iti espiritu, nagparang kadagiti anghel, naikaskasaba kadagiti nasion, napapati iti lubong, naawat idiay ngato iti kinadayag.’” (1 Timoteo 3:16) Wen, gapu ta di nagbalbaliw ti kinasungdona agingga ken patay, naipaay ni Jesus ti nalawag a sungbat iti karit ni Satanas. Ngem nagtalinaed a nakatalimeng ti dadduma a detalye dayta a sagrado a palimed.

“Ti Sagrado a Palimed ti Pagarian ti Dios”

12, 13. (a) Ania ti maysa nga aspeto “ti sagrado a palimed ti pagarian ti Dios”? (b) Ania ti nairaman iti panangpili ni Jehova iti maysa a limitado a bilang dagiti tattao a mapan idiay langit?

¹² Iti naminsan a panangasabana iti Galilea, imparipirip ni Jesus a ti sagrado a palimed ket nainaig unay iti Mesianiko a Pagarianna. Kinunana kadagiti adalanna: “Naipaay kadakayo ti pannakaawat kadagiti sagrado a palimed ti pagarian ti langlangit [“pagarian ti Dios,” Marcos 4:11].” (Mateo 13:11) Ti maysa nga aspeto dayta a palimed iramanna ti panangpili ni Jehova iti maysa a “bassit nga ipastoran” a buklen ti 144,000 a tattao nga agbalin a kadua ti Anakna kas paset ti bin-i, tapno makipagturay ken ni Jesus idiay langit.​—Lucas 12:32; Apocalipsis 14:1, 4.

¹³ Gapu ta naparsua nga agnaed ditoy daga dagiti tattao, masapul a pagbalinen ni Jehova a “baro a parsua” ti dadduma a tattao tapno makapanda idiay langit. (2 Corinto 5:17) Kas maysa kadagidiay napili a makipaset iti dayta a naisangsangayan a nailangitan a namnama, insurat ni apostol Pedro: “Bendito koma ti Dios ken Ama ni Apotayo a Jesu-Kristo, ta maitunos iti naindaklan nga asina impaayannatayo iti baro a pannakayanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo.”​—1 Pedro 1:3, 4.

14. (a) Kasano a dagiti saan a Judio nairamanda iti “sagrado a palimed ti pagarian ti Dios”? (b) Apay a matarusantayo dagitoy a “nauneg a bambanag ti Dios”?

¹⁴ Ti sabali pay a paset ti sagrado a palimed mainaig iti masanguanan a gobierno a Pagarian isu daytoy: Pagayatan ti Dios nga adda sumagmamano a saan a Judio a mairaman iti dayta a bassit a bilang dagiti tattao a naayaban a makipagturay ken ni Kristo idiay langit. Inlawlawag ni Pablo daytoy nga aspeto ti “panangaywan” ni Jehova, wenno ti wagas ti panangtungpalna iti panggepna: “Iti sabsabali a kaputotan saan a naipakaammo daytoy a palimed iti annak ti tattao a kas ti pannakaipalgakna ita kadagiti nasantuan nga apostolna ken kadagiti mammadto babaen ti espiritu, awan sabali, tapno dagiti tattao iti nasnasion agbalinda a kadua a makipagtawid ken pada a kamkameng iti bagi ken makiraman kadatayo iti kari a maikaykaysa ken Kristo Jesus babaen ti naimbag a damag.” (Efeso 3:5, 6) Ti pannakaawat iti daytoy a paset ti sagrado a palimed ket naipalgak ‘kadagiti nasantuan nga apostol.’ Kasta met ita, no saan a gapu iti tulong ti nasantuan nga espiritu, saantayo a matarusan dagitoy a “nauneg a bambanag ti Dios.”―1 Corinto 2:10; 4:1; Colosas 1:26, 27.

15, 16. Apay a nangpili ni Jehova kadagiti tattao a makipagturay ken ni Kristo?

¹⁵ “Ti sangagasut uppat a pulo ket uppat a ribu” a nakita a sitatakder a kadua “ti Kordero” iti nailangitan a Bantay Sion ket nakuna a “nagatang manipud iti daga,” ‘nagatang manipud iti sangatauan kas umuna a bungbunga iti Dios ken iti Kordero,’ ni Kristo Jesus. (Apocalipsis 14:1-4) Pinili ni Jehova ti inauna kadagiti nailangitan nga annakna nga agbalin a kangrunaan a paset ti naikari a bin-i idiay Eden. Ngem apay a pinilina manipud iti sangatauan dagiti agbalin a kakadua ni Kristo? Inlawlawag ni apostol Pablo a daytoy a limitado a bilang ket “naayaban maitunos iti panggep [ni Jehova],” “maitunos iti pakaragsakan unay ti pagayatanna.”―Roma 8:17, 28-30; Efeso 1:5, 11; 2 Timoteo 1:9.

¹⁶ Ti panggep ni Jehova ket tapno masantipikar ti naindaklan ken nasantuan a naganna ken maalangon ti sapasap a kinasoberanona. Babaen ti awan kaaspingna a kinasirib ti ‘panangaywanna,’ wenno ti wagas ti panangimatonna kadagiti bambanag, imbaon ni Jehova ditoy daga ti inauna nga Anakna, ket nasubok agingga ken patay. Maysa pay, inkeddeng ni Jehova a dadduma a tattao a nangitandudo iti kinasoberanona agingga ken patay agbalindanto a paset ti Mesianiko a Pagarian ti Anakna.―Efeso 1:8-12; Apocalipsis 2:10, 11.

17. Apay a pakaragsakantayo a ni Kristo ken dagiti kakaduana nga agturay nagbiagda idi kas tattao?

¹⁷ Impakita ni Jehova ti naindaklan a panagayatna kadagiti kaputotan ni Adan babaen ti panangibaonna nga umay ditoy daga ti Anakna ken babaen ti panangpilina kadagiti tattao a makipagtawid iti Anakna iti gobierno a Pagarian. Kasano a magunggonaan iti dayta dagiti dadduma a nagtalinaed a matalek ken ni Jehova, manipud ken ni Abel a nagtultuloy? Gapu ta nayanak a managbasol ken matay dagiti imperpekto a tattao, kasapulan nga umimbagda iti pisikal ken iti naespirituan ken agsublida iti kinaperpekto, maitunos iti orihinal a panggep ni Jehova agpaay iti sangatauan. (Roma 5:12) No kadagiti amin a mangnamnama iti biag nga agnanayon ditoy daga, anian a makaliwliwa a maammuanda nga ayaten ken kaasian ida ti Arida, kas impakitana idi kadagiti adalanna kabayatan ti ministeriona ditoy daga! (Mateo 11:28, 29; Hebreo 2:17, 18; 4:15; 7:25, 26) Ken anian a mangpatalged iti riknada ti pannakaammo a dagiti kakaduanto ni Kristo kas ar-ari ken papadi idiay langit ket buklen dagiti napnuan iti pammati a lallaki ken babbai a nagbiag idi ditoy daga, isuda a mismo a nakidangadang kadagiti personal a pagkapuyan ken naglak-am kadagiti pakarigatan iti biag, kas kadatayo!―Roma 7:21-25.

Ti Di Mapaay a Panggep ni Jehova

18, 19. Apay a matarusantayo ti sasao ni Pablo iti Efeso 1:8-11, ket ania ti mausig iti sumaganad nga artikulo?

¹⁸ Ad-adda a matarusantayo ita ti pateg ti sasao ni Pablo kadagiti napulotan a Kristiano, a mabasa iti Efeso 1:8-11. Kinunana nga impakaammo kadakuada ni Jehova “ti sagrado a palimed ti pagayatanna,” a ‘naitudingda kas makipagtawid’ ken ni Kristo, ken ‘naitudingda a nasakbay maitunos iti panggep daydiay mamagtignay iti amin a bambanag maitunos iti pamay-an nga ipatigmaan ti pagayatanna.’ Maawatantayo ita a maitunos daytoy iti nakaskasdaaw a “panangaywan” ni Jehova kadagiti bambanag agpaay iti pannakatungpal ti panggepna. Daytoy met ti tumulong kadatayo a mangtarus no apay a kadagiti Kristiano a tumabtabuno iti Pangrabii ti Apo, manmano laeng ti makipaset kadagiti emblema.

¹⁹ Iti sumaganad nga arti kulo, makitatayo no ania ti kaipapanan ti Panglaglagip iti ipapatay ni Kristo kadagiti Kristiano nga addaan iti nailangitan a namnama. Maadaltayo met no apay a ti minilion a mangnamnama nga agbiag nga agnanayon ditoy daga rumbeng a sigagagar nga ammuenda no ania ti isimbolo ti Memorial.

[Footnotes]

Pangrepaso

• Apay a pinarsua ni Jehova ti daga ken inkabilna ti tao iti dayta?

• Apay a napateg a masubok ditoy daga ti bugbugtong nga Anak ni Jehova?

• Apay a nangpili ni Jehova kadagiti tattao a makipagturay ken ni Kristo?