‘Pannakasarak iti Maysa a Perlas a Nangato ti Pategna’

“Ti pagarian ti langlangit isu ti kalat a pagreggetan dagiti tattao, ket dagidiay agregregget nga agtultuloy isuda ti makagunggun-od iti dayta.”​—MATEO 11:12.

1, 2. (a) Ania a naisangsangayan a kababalin ti tinukoy ni Jesus iti maysa kadagiti pangngarigna mainaig iti Pagarian? (b) Ania ti kinuna ni Jesus iti pangngarig maipapan iti nangina a perlas?

ADDA kadi aniaman a nakapatpateg kenka, nga itedmo ti amin nga ik-ikutam wenno isakripisiom ti amin nga adda kenka tapno magun-odmo dayta? Nupay ibaga dagiti tattao a porsegidoda a mangragpat kadagiti dadduma a kalat​—kuarta, kinatan-ok, pannakabalin, wenno saad​—manmano laeng a talaga dagidiay sidadaan a mangisakripisio iti amin nga ik-ikutanna tapno magun-odna ti maysa a banag a matarigagayan unay. Dinakamat ni Jesu-Kristo dayta a manmano ngem matarigagayan a kababalin iti maysa kadagiti adu a mamagpanunot a pangngarigna mainaig iti Pagarian ti Dios.

² Dayta a pangngarig, wenno ilustrasion, a dinakamat ni Jesus kadagiti laeng adalanna ket masansan a maawagan kas ti pangngarig maipapan iti nangina a perlas. Kastoy ti kinuna ni Jesus: “Ti pagarian ti langlangit umasping iti agdaldaliasat a komersiante nga agsapsapul kadagiti nasayaat a perlas. Idi makasarak iti maysa a perlas a nangato ti pategna, napan ket dagus nga inlakona amin a bambanag nga adda kenkuana ket ginatangna dayta.” (Mateo 13:36, 45, 46) Ania ti kayat ni Jesus a maadal dagiti agdengdengngeg kenkuana mainaig iti daytoy nga ilustrasion? Kasanotayo a magunggonaan kadagiti sasao ni Jesus?

Nangato ti Pategna a Perlas

3. Apay a nagngina dagiti nasayaat a perlas idi un-unana?

³ Sipud idi un-unana, maus-usar ti perlas kas pangadorno. Sigun iti maysa a reperensia, ti Romano a mannurat a ni Pliny a Laklakay kinunana a ti perlas ti “kanginaan a banag.” Saan a kas iti balitok, pirak, wenno adu a saniata, dagiti perlas ket produkto dagiti sibibiag a banag. Pagaammo nga adda dagiti kita ti tirem a mapagbalinda a nasudi a perlas dagiti babassit a pisi ti bato babaen ti panangkalupkopda kadagita iti adu nga iparuarda a likido a maawagan kas nakar. Idi un-unana, dagiti kasayaatan a perlas ket kangrunaan a maala manipud iti Nalabaga a Baybay, Gulpo ti Persia, ken Taaw Indiano​—nga adayo iti daga ti Israel. Awan duadua a dayta ti makagapu a dinakamat ni Jesus nga adda maysa nga “agdaldaliasat a komersiante nga agsapsapul kadagiti nasayaat a perlas.” Tapno makasarak kadagiti pudno a nangina a perlas, kasapulan ti dakkel a panagregget.

4. Ania ti kangrunaan a leksion ti pangngarig ni Jesus maipapan iti agdaldaliasat a komersiante?

⁴ Nupay nangina dagiti nasayaat a perlas, nalawag a saan a ti balorda ti kangrunaan a leksion iti pangngarig ni Jesus. Iti daytoy a pangngarig, saan laeng a basta inyarig ni Jesus ti Pagarian ti Dios iti maysa a nangina a perlas; intampokna ti maipapan iti maysa nga “agdaldaliasat a komersiante nga agsapsapul kadagiti nasayaat a perlas” ken iti inaramidna idi nakasarak iti maysa. Saan a kas iti ordinario nga aglaklako, ti maysa nga agdaldaliasat a komersiante iti perlas ket eksperto iti dayta a negosio yantangay nalaing a mangilasin kadagiti nangayed a kalidad ti perlas ken kadagiti babassit a detalyena a mamagbalin iti dayta a perlas a naisangsangayan. No makitana ti perlas, ammona no pudno dayta ket saan a maallilaw iti maysa a perlas a nababa ti kalidadna wenno sinsinan.

5, 6. (a) Ania ti nangnangruna a nakakadkadlaw iti komersiante iti pangngarig ni Jesus? (b) Iti pangngarig ti nailemmeng a gameng, ania ti ipalgakna maipapan iti agdaldaliasat a komersiante?

⁵ Adda pay nasayaat a galad daytoy a komersiante. No iti maysa laeng nga ordinario a komersiante, nalabit nga ammuenna nga umuna no ania ti agdama a presio ti perlas tapno makuentana ti maganansiana. Nalabit nga ammuenna met no adda interesado a gumatang iti kasta a perlas tapno nalakana a mailako. Iti ababa a pannao, isu ket interesado iti napartak a panguartaan, saan nga iti panangtagikua iti perlas. Ngem saan a kasta ti komersiante a nadakamat iti pangngarig ni Jesus. Saan nga interesado no panguartaanna dayta. Kinapudnona, sidadaan a mangisakripisio iti “amin a banag nga adda kenkuana”​—nalabit amin nga ik-ikutan ken sanikuana​—tapno matagikuana ti binirbirokna.

⁶ Iti panangmatmat ti kaaduan a komersiante, mabalin a saan a nainsiriban ti inaramid ti komersiante a nadakamat iti pangngarig ni Jesus. Ti maysa a naannad a negosiante dina gandaten ti makigasanggasat iti kasta a negosio. Ngem naiduma ti panangmatmat ti komersiante iti pangngarig ni Jesus. Saan a pinansial a ganansia ti kayatna a magun-od no di ket ti rag-o ken pannakapnek nga itden ti panangikut iti maysa a banag nga awan kaasping ti pategna. Nagminar daytoy a punto iti maysa nga umasping nga ilustrasion nga impaay ni Jesus. Kinunana: “Ti pagarian ti langlangit umasping iti gameng a nailemmeng iti talon, a nasarakan ti maysa a tao ket inlemmengna; ket gapu iti rag-o nga adda kenkuana mapan ket ilakona ti aniaman a bambanag nga adda kenkuana ket gatangenna dayta a talon.” (Mateo 13:44) Wen, inlako dayta a tao ti amin nga adda kenkuana gapu iti rag-ona a nakasarak ken mangtagikua iti gameng. Addada kadi kasta nga indibidual ita? Adda kadi gameng a maikari iti kasta a panagsakripisio?

Nangapresiar iti Nangato a Pategna

7. Kasano nga impakita ni Jesus nga apresiarenna unay ti nangato a pateg ti Pagarian?

⁷ Iti pangngarigna, dinakamat ni Jesus “ti pagarian ti langlangit.” Kasta unay ti panangapresiarna iti nangato a pateg ti Pagarian. Dagiti salaysay ti Ebanghelio sibibileg a paneknekanda dayta a kinapudno. Kalpasan a nabautisaran idi 29 K.P., “rinugian ni Jesus ti nangaskasaba ket kunkunana: ‘Agbabawikayo, ta ti pagarian ti langlangit asidegen.’” Iti tallo ket kagudua a tawen, adu a tattao ti sinursuruanna maipapan iti Pagarian. Nawatiwat ti dinaliasatna, a “nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.”​—Mateo 4:17; Lucas 8:1.

8. Ania ti inaramid ni Jesus a mangipakita no ania ti ibanagto ti Pagarian?

⁸ Babaen ti panangaramidna iti adu a milagro iti nadumaduma a lugar​—a pakairamanan ti panangpaimbagna kadagiti masakit, panangpakanna kadagiti mabisin, panangkontrolna iti paniempo, ken panangpagungarna pay ketdi kadagiti natay​—impakita ni Jesus no ania ti ibanagto ti Pagarian ti Dios. (Mateo 14:14-21; Marcos 4:37-39; Lucas 7:11-17) Kamaudiananna, pinaneknekanna ti kinasungdona iti Dios ken iti Pagarian babaen ti panangibuisna iti biagna, a natay kas maysa a martir iti pagtutuokan a kayo. Kas iti agdaldaliasat a komersiante a sidadaan a nangisakripisio iti amin nga adda kenkuana agpaay iti “perlas a nangato ti pategna,” nagbiag ken natay ni Jesus maipaay iti Pagarian.​—Juan 18:37.

9. Ania a manmano a kababalin ti imparangarang dagiti nagkauna nga adalan ni Jesus?

⁹ Saan laeng nga impamaysa ni Jesus ti biagna iti Pagarian no di ket inurnongna ti maysa a bassit a grupo dagiti pasurot. Inapresiar met dagitoy nga indibidual ti nangato a pateg ti Pagarian. Maysa kadakuada ni Andres, maysa a sigud nga adalan ni Juan a Manangbautisar. Apaman a nangngegna ti testimonia ni Juan a ni Jesus “ti Kordero ti Dios,” ni Andres ken ti sabali pay nga adalan ni Juan, nalabit maysa kadagiti annak ni Zebedeo nga agnagan met laeng iti Juan, dagus a natignayda a sumurot ken ni Jesus ket nagbalinda a manamati. Ngem saan laeng a dayta. Dagus a napan ni Andres iti kabsatna a Simon ket kinunana kenkuana: “Nasarakanmi ti Mesias.” Ni Simon (a pagaammo kas ni Cefas, wenno Pedro) agraman ni Felipe ken ti gayyemna a ni Natanael dagus met a nabigbigda a ni Jesus ti Mesias. Kinapudnona, natignay ni Natanael a mangikuna ken Jesus: “Sika ti Anak ti Dios, sika ti Ari ti Israel.”​—Juan 1:35-49.

Nagutugot nga Agtignay

10. Ania ti inaramid dagiti adalan idi inawis ida ni Jesus kalpasan daydi damo a pannakakitada kenkuana?

¹⁰ Ti gagar a narikna da Andres, Pedro, Juan ken dagiti dadduma idi nabigbigda ti Mesias ket mabalin nga idilig iti narikna ti agdaldaliasat a komersiante idi nasarakanna ti nangina a perlas. Ania ti inaramidda? Saan nga ibaga kadatayo ti Ebanghelio no ania ti dagus nga inaramidda kalpasan daydi damo a pannakakitada ken ni Jesus. Agparang a kaaduan kadakuada ti nagsubli iti kadawyan a rutina ti biagda. Ngem kalpasan ti agarup innem a bulan agingga iti makatawen, sinarungkaran manen ni Jesus da Andres, Pedro, Juan, ken ti kabsatna a ni Santiago bayat ti panagkalapda iti Baybay ti Galilea.a Idi nakitana ida, kinuna ni Jesus: “Surotendak, ket pagbalinenkayto a dumadaklis iti tattao.” Ania ti inaramidda? No maipapan kada Pedro ken Andres, kuna ti salaysay ni Mateo: “Madagdagus nga idi binaybay-anda dagiti iket, simmurotda kenkuana.” No maipapan kada Santiago ken Juan, mabasatayo: “Madagdagus nga idi pinanawanda ti barangay ken ti amada, simmurotda kenkuana.” Innayon a kinuna ti salaysay ni Lucas: “Binaybay-anda ti amin a banag ket simmurotda kenkuana.”​—Mateo 4:18-22; Lucas 5:1-11.

11. Ania ti mabalin a makagapu no apay a dagus nga impangag dagiti adalan ti awis ni Jesus?

¹¹ Kinadarasudos kadi ti madagdagus a panagtignay dagiti adalan? Saan! Uray nagsublida iti panagdaklis a negosio dagiti pamiliada kalpasan a naam-ammoda ni Jesus, awan duadua a naitukit kadagiti puso ken isipda ti nakita ken nangngegda kenkuana. Ti panaglabas ti dandani makatawen ket nangted kadakuada iti umdas a tiempo tapno mautobda dagita a bambanag. Ita, dimtengen ti kanito tapno agdesisionda. Mayarigda kadi iti daydiay agdaldaliasat a komersiante a gapu iti kasta unay a pannakatignayna idi nasarakanna ti di magatadan a perlas ket, kas iti panangiladawan ni Jesus, “napan ket dagus” nga impamuspusanna a gatangen dayta a perlas? Wen. Natignay ti pusoda gapu kadagiti nakita ken nangngegda. Nabigbigda a tiempon tapno agtignayda. Gapuna, kas kunaen ti salaysay, dida nagpangadua a nangtallikud kadagiti amin a banag ket nagbalinda a pasurot ni Jesus.

12, 13. (a) Ania ti tignay ti adu a nakangngeg ken ni Jesus? (b) Ania ti kinuna ni Jesus maipapan kadagiti matalek nga adalanna, ken ania ti ipasimudaag dagiti sasaona?

¹² Anian a naiduma dagidi a matalek nga adalan no idilig kadagiti dadduma a nadakamat kadagiti salaysay ti Ebanghelio! Adu kadagidiay pinaimbag wenno pinakan ni Jesus ti nagsubli kadagiti inaldaw a rutinada. (Lucas 17:17, 18; Juan 6:26) Nagkedked pay ketdi ti dadduma idi inawis ida ni Jesus nga agbalin a pasurotna. (Lucas 9:59-62) Maisupadi iti dayta, kinuna ni Jesus maipapan kadagiti matalek: “Nanipud iti kaaldawan ni Juan a Mammautisar agingga ita ti pagarian ti langlangit isu ti kalat a pagreggetan dagiti tattao, ket dagidiay agregregget nga agtultuloy isuda ti makagunggun-od iti dayta.”​—Mateo 11:12.

¹³ “Pagreggetan” ken “agregget nga agtultuloy”​—ania ti ipasimudaag dagita a sasao? No maipapan iti Griego a berbo a nagtaudan dagitoy nga ebkas, kuna ti Vine’s Expository Dictionary of Old and New Testament Words: “Ti berbo ipasimudaagna ti dakkel a panangikagumaan.” Ket no maipapan iti dayta a bersikulo, kuna ti eskolar ti Biblia a ni Heinrich Meyer: “Kasta ti pannakadeskribir dayta a nagagar, di malapdan a panangikagumaan ken panagporsegi agpaay iti umad-adani a Mesianiko a pagarian . . . Kasta unay ti gagar ken panangnamnama iti dayta a pagarian.” Kas iti agdaldaliasat a komersiante, dagus a nabigbig dagidi a manmano nga indibidual no ania a talaga ti napateg, ket sidadaan nga insakripisioda ti amin nga adda kadakuada maigapu iti Pagarian.​—Mateo 19:27, 28; Filipos 3:8.

Nagbirok Met Dagiti Dadduma

14. Kasano nga insagana ni Jesus dagiti apostol iti trabaho a panangikasaba iti Pagarian, ket ania ti resultana?

¹⁴ Bayat nga intultuloy ni Jesus ti ministeriona, sinanay ken tinulonganna ti dadduma a mangragpat iti Pagarian. Nangpili nga umuna iti 12 manipud kadagiti adalanna ket dinutokanna ida kas apostolna, kayatna a sawen, dagidiay imbaonna. Inted kadakuada ni Jesus dagiti detaliado nga instruksionna no kasanoda nga itungpal ti ministerioda ken namakdaar maipapan kadagiti karit ken rigat nga agur-uray kadakuada. (Mateo 10:1-42; Lucas 6:12-16) Kadagiti simmaruno a dua a tawen wenno nasursurok pay, kimmuyogda iti panangasaba ni Jesus iti nadumaduma a lugar, a tinagiragsakda ti nasinged a relasion kenkuana. Nangngegda dagiti sursurona, nasaksianda dagiti inaramidna a milagro, ken nakitada ti mismo nga ulidanna. (Mateo 13:16, 17) Awan duadua a natukay ti riknada gapu kadagita, nga uray la sireregta ken naimpusuan a binirokda ti Pagarian, kas iti inaramid ti agdaldaliasat a komersiante.

15. Ania ti kinuna ni Jesus a pudpudno a pagrag-oan dagiti pasurotna?

¹⁵ Malaksid iti 12 nga apostol, “nangdutok [ni Jesus] iti pitopulo a sabsabali ket imbaonna ida a sagdudua nga umun-una ngem isu iti tunggal siudad ken lugar nga umayannanto.” Pinakdaaranna met ida maipapan kadagiti suot ken rigat a mapasarandanto, ken imbilinna nga ipakaammoda kadagiti tattao: “Ti pagarian ti Dios immasidegen kadakayo.” (Lucas 10:1-12) Idi nagsubli ti 70, nakaragragsakda a nangipadamag ken Jesus: “Apo, uray dagiti sairo naipasakupda kadakami babaen ti panagusar iti naganmo.” Ngem nalabit nasdaawda idi kinuna ni Jesus nga adda dakdakkel a rag-o nga agur-uray kadakuada gapu iti kinaregtada maipaay iti Pagarian. Kinunana kadakuada: “Dikay pagrag-oan daytoy, a naipasakup kadakayo dagiti espiritu, ngem agrag-okayo agsipud ta ti nagnaganyo nailanaden iti langlangit.”​—Lucas 10:17, 20.

16, 17. (a) Ania ti imbaga ni Jesus kadagiti matalek nga apostolna iti maudi a rabii a nagkakaduada? (b) Ania a rag-o ken pammasiguro ti inyeg dagiti sasao ni Jesus kadagiti apostol?

¹⁶ Idi Nisan 14, 33 K.P., iti maudi a rabii a kadua ni Jesus dagiti apostolna, inyussuatna ti nagbalin a pagaammo kas ti Pangrabii ti Apo ket binilinna ida a laglagipenda dayta nga okasion. Iti dayta a rabii, kinuna ni Jesus kadagiti 11 a nabati: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian, tapno mabalinyo ti mangan ken uminum iti lamisaanko idiay pagariak, ket agtugawkayo kadagiti trono tapno ukomenyo ti sangapulo ket dua a tribu ti Israel.”​—Lucas 22:19, 20, 28-30.

¹⁷ Anian a rag-o ken pannakapnek ti nanglapunos kadagiti puso dagiti apostol idi nangngegda dagita a sasao ni Jesus! Naidatag kadakuada ti kangatuan a dayaw ken pribilehio a mabalin a tagiragsaken ti asinoman a tao. (Mateo 7:13, 14; 1 Pedro 2:9) Kas iti daydiay agdaldaliasat a komersiante, adu ti insakripisioda tapno matuladda ni Jesus ket masarakanda ti Pagarian. Iti kasta, naipasigurado kadakuada a saan nga ubbaw dagiti inaramidda a panagsakripisio.

18. Malaksid kadagiti 11 nga apostol, siasino pay ti magunggonaanto iti Pagarian?

¹⁸ Saan laeng a dagiti apostol a kadua ni Jesus iti daydi a rabii ti magunggonaan iti dayta a Pagarian. Pagayatan ni Jehova nga adda 144,000 a mairaman iti tulag ti Pagarian a makipagturay ken Jesu-Kristo iti nadayag a nailangitan a Pagarian. Kanayonanna, nasirmata ni apostol Juan ti “maysa a dakkel a bunggoy, nga awan ti tao a nakabael a mangbilang, . . . a sitatakderda iti sanguanan ti trono ken iti sanguanan ti Kordero, . . . a kunkunada: ‘Ti pannakaisalakan utangmi iti Diostayo, a situtugaw iti trono, ken iti Kordero.’” Isu dagita ti iturayan ti Pagarian ditoy daga.b​—Apocalipsis 7:9, 10; 14:1, 4.

19, 20. (a) Ania a gundaway ti silulukat kadagiti tattao iti amin a nasion? (b) Ania a saludsod ti mausig iti sumaganad nga artikulo?

¹⁹ Sakbay unay a nagpalangit ni Jesus, imbilinna kadagiti matalek a pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:19, 20) No kasta, aggapu kadagiti amin a nasion dagiti agbalin nga adalan ni Jesu-Kristo. Ipategda met ti Pagarian​—nailangitan man wenno naindagaan ti gunggonada​—kas iti inaramid ti agdaldaliasat a komersiante no maipapan iti nasayaat a perlas.

²⁰ Impamatmat ti sasao ni Jesus a ti trabaho a panangaramid kadagiti adalan ket agtultuloy agingga “iti panungpalan ti sistema ti bambanag.” Gapuna, iti kaaldawantayo, addada kadi indibidual a kas iti agdaldaliasat a komersiante, a sidadaan a mangisakripisio iti amin nga ik-ikutanda tapno mabirokanda ti Pagarian ti Dios? Mausig dayta a saludsod iti sumaganad nga artikulo.

[Footnotes]

Panangbirok Ita iti “Perlas a Nangato ti Pategna”

“Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi.”​—MATEO 24:14.

1, 2. (a) Ania ti panangmatmat dagiti Judio idi kaaldawan ni Jesus maipapan iti Pagarian ti Dios? (b) Ania ti inaramid ni Jesus tapno maiwardasna ti umiso a pannakaawat maipapan iti Pagarian, ket ania dagiti resultana?

TI Pagarian ti Dios ket maysa a topiko a paginteresan unay dagiti Judio idi immay ni Jesus ditoy daga. (Mateo 3:1, 2; 4:23-25; Juan 1:49) Ngem idi damo, saan a naan-anay a maawatan ti kaaduan kadakuada no kasano kasaknap ken kabileg dayta a pagarian; dida met naawatan a maysa dayta a nailangitan a gobierno. (Juan 3:1-5) Uray ti dadduma kadagiti nagbalin a pasurot ni Jesus dida naan-anay a naawatan no ania ti Pagarian ti Dios ken no ania ti nasken nga aramidenda tapno magun-odda ti pribilehio a makipagturay ken Kristo.​—Mateo 20:20-22; Lucas 19:11; Aramid 1:6.

² Iti panaglabas ti tiempo, adu a leksion ti siaanus nga insuro ni Jesus kadagiti adalanna, agraman ti pangngarig maipapan iti perlas a nangato ti pategna a nausig iti napalabas nga artikulo, nga impatuldona kadakuada ti kinapateg ti panagregget a mangbirok iti nailangitan a Pagarian. (Mateo 6:33; 13:45, 46; Lucas 13:23, 24) Kasta unay ti pannakatignay ti pusoda yantangay di nagbayag, awan sardayna ken simamaingel nga impakaammoda ti naimbag a damag ti Pagarian agingga iti adayo a luglugar, kas patalgedan ti adu a salaysay iti libro nga Aramid.​—Aramid 1:8; Colosas 1:23.

3. Mainaig iti kaaldawantayo, ania ti kinuna ni Jesus maipapan iti Pagarian?

³ Komusta met iti kaaldawantayo? Maikaskasaba kadagiti minilion a tattao ti maipapan kadagiti bendision nga iyeg ti paraiso a daga iti sidong ti Pagarian. Iti nagpateg a padtona maipapan iti “panungpalan ti sistema ti bambanag,” espesipiko a kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:3, 14; Marcos 13:10) Inlawlawagna pay a maibanag daytoy nagdakkelan a trabaho iti laksid ti adu a bangen ken rigat, uray pay pannakaidadanes. Impanamnamana: “Ti nakapagibtur agingga iti panungpalan isunto ti maisalakan.” (Mateo 24:9-13) Agkalikagum amin dagitoy iti panagsakripisio ken kinapasnek kas iti imparangarang ti komersiante iti pangngarig ni Jesus. Adda kadi dagiti indibidual ita a mangiparparangarang iti kasta a pammati ken kinaregta a mangbirok iti Pagarian?

Ti Rag-o ti Pannakasarak iti Kinapudno

4. Ania ti epektona kadagiti tattao ita ti kinapudno maipapan iti Pagarian?

⁴ Iti pangngarig ni Jesus, kasta unay ti rag-o ti komersiante idi nasarakanna ti matmatanna a ‘nangato ti pategna a perlas.’ Dayta a rag-o ti nangtignay kenkuana a mangaramid iti amin a kabaelanna a manggun-od iti dayta a perlas. (Hebreo 12:1) Ita, adda dagiti tattao a naawis ken natignay iti kinapudno maipapan iti Dios ken iti Pagarianna. Ipalagipna ti komento ni Kabsat A. H. Macmillan, a nangisurat iti libro a Faith on the March maipapan iti inaramidna a panangbirok iti Dios ken iti panggepna agpaay iti sangatauan. Kinunana: “Kada tawen, adu a tattao ti makasarsarak iti daydiay nabirokak. Tattaoda met laeng a kas kadatayo, a naggapu iti amin a puli, rasa, kasasaad ti biag, ken nadumaduma nga edad. Awan ti idumduma ti kinapudno. Aw-awisenna ti amin a kita ti tattao.”

5. Ania dagiti nagsayaat a resulta a makita iti report ti 2004 a tawen serbisio?

⁵ Napaneknekan a pudno dagita a sasao gapu ta iti kada tawen, ginasut a ribu a nasingpet ti panagpuspusoda a tattao ti tigtignayen ti naimbag a damag ti Pagarian ti Dios tapno idedikarda ti biagda ken ni Jehova ken aramidenda ti pagayatanna. Kasta met laeng ti ipakita ti 2004 a tawen serbisio, a nangrugi idi Setiembre 2003 agingga idi Agosto 2004. Iti las-ud dayta a 12 a bulan, 262,416 a tattao ti publiko a nangisimbolo iti dedikasionda ken ni Jehova babaen ti panagpabautisar iti danum. Naangay dayta iti 235 a pagilian, a pangikonkonduktaan dagiti Saksi ni Jehova iti 6,085,387 a panangyadal iti Biblia iti kada lawas tapno tulonganda dagiti tattao manipud iti amin a kasasaad ti panagbiag ken manipud iti adu a nasion, tribu, ken pagsasao a gumun-od iti makaited-biag a kinapudno manipud iti Sao ti Dios.​—Apocalipsis 7:9.

6. Ania ti pakaigapuan ti agtultuloy a panagrang-ay kadagiti naglabas a tawtawen?

⁶ Ania ti namagbalin a posible amin dagita? Awan duadua a ni Jehova iyad-adanina kenkuana dagidiay umiso nga agannayas iti kinapudno. (Juan 6:65; Aramid 13:48) Nupay kasta, ditay liplipatan ti panagsakripisio ken awan sarday a panagregget dagidiay nangbusbos iti biagda iti panangbirok iti Pagarian. Idi agtawen iti 79, insurat ni Kabsat Macmillan: “Sipud idi damo a naadalko dagiti kari agpaay iti masakit ken matmatay a sangatauan, saan a kimmapuy ti pammatik iti dayta a mensahe ti Biblia. Determinadoak a mangadal iti ad-adu pay maipapan kadagiti sursuro ti Biblia tapno matulongak dagiti dadduma a kas kaniak nga agsapsapul iti pannakaammo maipapan iti Mannakabalin-amin a Dios a ni Jehova ken kadagiti agkakaimbag a panggepna agpaay iti sangatauan.”

7. Ania a kapadasan ti mangiladawan iti rag-o ken gagar dagidiay nakasarak iti kinapudno iti Biblia?

⁷ Makita met ti kinagagar dagiti adipen ni Jehova ita. Alaentay a pagarigan ni Daniela manipud Vienna, Austria. Kinunana: “Sipud kinaubingko, ti Dios ti kasingedan a gayyemko. Kayatko a maammuan ti naganna gapu ta para kaniak, maysa laeng a titulo ti ‘Dios.’ Ngem idi la agtawenakon iti 17 nga adda dagiti nakasaritak a Saksi ni Jehova. Inlawlawagda ti amin a kayatko a maammuan maipapan iti Dios. Maragsakanak ta nasarakak met laengen ti kinapudno! Magagaranak unay ket rinugiak a kinasabaan ti uray siasino.” Inumsi dagiti kaeskuelaanna gapu iti naregta a pannakisaritana. “Ngem para kaniak, kasla kitkitaek ti pannakatungpal ti padto ti Biblia,” intuloy ni Daniela, “gapu ta naadalko ti kinuna ni Jesus a magura ken maidadanes dagiti pasurotna maigapu iti naganna. Kasta unay ti rag-o ken gagarko.” Di nagbayag, indedikar ni Daniela ti biagna ken ni Jehova, nagpabautisar, ket rinugianna a ragpaten ti kalatna nga agbalin a misionera. Kalpasan ti panagkallaysada ken ni Helmut, nangasabada kadagiti Africano, Tsino, Filipino, ken taga India nga agnanaed idiay Vienna. Agserserbida ita kas misionero iti abagatan a laud ti Africa.

Dida Sumuko

8. Ania ti maysa a makagunggona a pamay-an nga impakita ti adu a tattao nga ay-ayatenda ti Dios ken nasungdoda iti Pagarianna?

⁸ Wen, ti panagserbi kas misionero ti maysa kadagiti pamay-an nga ipakpakita dagiti adipen ni Jehova nga ay-ayatenda ti Dios ken nasungdoda iti Pagarianna. Kas iti komersiante iti pangngarig ni Jesus, dagidiay sumrek iti dayta a pribilehio ket sidadaan a mapan kadagiti adayo a lugar maigapu iti Pagarian. Siempre, saan nga agdaliasat dagita a misionero tapno birokenda ti naimbag a damag ti Pagarian; imbes ketdi, idanonda dayta kadagiti tattao nga agnanaed kadagiti nasulinek a paset ti daga, nga isuro ken tulonganda ida nga agbalin nga ad-adalan ni Jesu-Kristo. (Mateo 28:19, 20) Iti adu a pagilian, masapul nga ibturanda ti naidumduma a rigat. Ngem sibabaknang a magunggonaan ti panagibturda.

9, 10. Ania dagiti makapagagar a kapadasan dagiti misionero kadagiti adayo a lugar, kas iti Central African Republic?

⁹ Maysa a pagarigan ti Central African Republic. Idi napan a tawen, adda 16,184 a timmabuno iti Pananglaglagip iti ipapatay ni Kristo, agarup pito a daras nga ad-adu ngem iti bilang dagiti agibumbunannag iti dayta a pagilian. Gapu ta awan koriente iti adu a paset dayta a pagilian, gagangay nga aramiden dagiti tattao ti inaldaw a trabahoda iti ruar ti pagtaenganda iti sirok dagiti nalinong a kayo. Gapuna, natural laeng nga aramiden dagiti misionero ti trabahoda iti umasping a wagas​—mangyadalda iti Biblia iti ruar ti balay iti sirok dagiti nalinong a kayo. Malaksid a nalawlawag ken naparpariir iti ruar, adda sabali pay a pagsayaatanna. Gapu ta dagiti tattao kadawyan nga apresiarenda ti Biblia, gagangay a pagpapatanganda dagiti narelihiosuan a bambanag. Masansan a madlaw dagiti lumablabas ti mapaspasamak ket makiramanda lattan iti panagadal.

¹⁰ Gapuna, idi a ti maysa a misionero ket mangyad-adal iti Biblia iti ruar ti balay, maysa nga agkabannuag a lalaki nga agnanaed iti ballasiw ti kalsada ti immasideg ket kinunana a kayatna met ti agpasarungkar iti misionero ken makipagadal iti Biblia tangay awan pay nangsarungkar kenkuana. Siempre, maragsakan nga immanamong ti misionero, ket napartak ti panagrang-ay ti lalaki. Iti dayta a pagilian, dagiti polis masansan a paraenda dagiti Saksi, saan a tapno multaenda ida, no di ket tapno agkiddaw iti baro nga isyu ti magasin a Pagwanawanan ken Agriingkayo! wenno tapno agyamanda iti maysa nga artikulo a tinagiragsakda a binasa.

11. Iti laksid dagiti pakasuotan, ania ti makuna dagiti nabayagen a misionero maipapan iti panagserbida?

¹¹ Adu kadagidiay 40 wenno 50 a tawenen nga agserserbi kas misionero ti simamatalek pay laeng nga agserserbi iti tay-ak agingga ita. Anian nga ulidan ti pammati ken panagandur para kadatayo amin! Kadagiti naglabas nga 42 a tawen, maysa nga agassawa ti nakapagserbi kas misionero iti tallo a pagilian. Kuna ti asawa a lalaki: “Adda dagiti pakarigatan. Kas pagarigan, 35 a tawen a nakidangadangkami iti malaria. Kaskasdi, dimi pulos nagbabawyan ti desisionmi nga agmisionero.” Innayon ti asawana: “Nagadu ti pagyamananmi. Nakaragragsak ti ministerio iti tay-ak, ken naglaka ti mangirugi kadagiti panangyadal iti Biblia. No makitam dagiti iyad-adalam nga umay makigimong sada aglalangen, kasla kanayon nga adda panagtitipon ti pamilia.”

‘Imbilangda ti Amin Kas Pukaw’

12. Kasano a maipakita ti maysa a tao a pudno nga apresiarenna ti kinapateg ti Pagarian?

¹² Idi nasarakan ti agdaldaliasat a komersiante ti nangina a perlas, “napan ket dagus nga inlakona amin a bambanag nga adda kenkuana ket ginatangna dayta.” (Mateo 13:46) Dayta a kinamasindadaan a mangisakripisio iti maysa a nabalor a banag ket agminar kadagidiay pudno a mangap-apresiar iti kinapateg ti Pagarian. Kas maysa kadagidiay makipagturay ken Kristo iti nadayag a Pagarian, kinuna ni apostol Pablo: “Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo.”​—Filipos 3:8.

13. Kasano nga impakita ti maysa a taga Czech Republic ti panangipategna iti Pagarian?

¹³ Umasping iti dayta, adu ita ti sidadaan a mangaramid kadagiti dadakkel a panagbalbaliw iti biagda tapno magun-odda dagiti bendision nga iburay ti Pagarian. Kas pagarigan, idi Oktubre 2003, maysa nga agtawen iti 60 a prinsipal iti eskuelaan idiay Czech Republic ti nakabasa iti libro a katulongan iti panagadal iti Biblia, ti Pannakaammo a Mangiturong iti Biag nga Agnanayon. Kalpasan a nabasana, dagus a binirokna dagiti Saksi ni Jehova iti lugarda tapno agpayadal iti Biblia. Nasayaat ti panagrang-ayna iti naespirituan ket di nagbayag, rinugianna a tinabunuan ti amin a gimong. Ngem komusta ti planona nga agtaray kas mayor sa kalpasanna kas senador? Inkeddengna ti agtaray iti sabali a lumba​—ti lumba ti biag, kas managibumbunannag iti Pagarian. Kinunana, “Adu a literatura ti Biblia ti naipaimak kadagiti estudiantek.” Insimbolona ti dedikasionna ken ni Jehova babaen ti pannakaitanebna iti danum iti maysa a kombension idi Hulio 2004.

14. (a) Ti naimbag a damag ti Pagarian tinignayna ti minilion a mangaramid iti ania? (b) Ania a mamagpanunot a salsaludsod ti nasken nga imtuodentayo iti bagitayo?

¹⁴ Minilion a tattao iti intero a lubong ti nangipangag iti naimbag a damag ti Pagarian iti umasping a wagas. Rimmuarda iti dakes a lubong, inuksobda ti daan a personalidadda, liniklikanda dagiti sigud a kakaduada, ken inwaksida dagiti nailubongan a kalatda. (Juan 15:19; Efeso 4:22-24; Santiago 4:4; 1 Juan 2:15-17) Apay nga inaramidda amin dagita? Gapu ta napatpateg kadakuada dagiti bendision nga iburay ti Pagarian ti Dios ngem iti aniaman nga itukon ti agdama a sistema ti bambanag. Kasta met laeng kadi ti panagriknayo iti naimbag a damag ti Pagarian? Sidadaankayo kadi a mangaramid kadagiti nasken a panagbalbaliw tapno maitunos iti pagayatan ni Jehova ti estilo ti panagbiag, prinsipio, ken kalatyo? No aramidenyo dayta, aglaplapusanan ti bendision a masagrapyo, ita ken iti masanguanan.

Agturturong ti Panagani iti Tampokna

15. Ania ti naipadto nga aramiden dagiti adipen ti Dios kadagiti maudi nga al-aldaw?

¹⁵ Insurat ti salmista: “Dagiti tattaom situtulok nga idatondanto ti bagbagida iti aldaw ti puersa militarmo.” Karaman kadagidiay nangidaton iti bagbagida “dagiti bunggoy dagiti agtutubo a tattao a kas kadagiti amor” ken ti “dakkel a buyot” dagiti “babbai a mangibagbaga iti naimbag a damag.” (Salmo 68:11; 110:3) Ania ti resulta ti kinaanep ken panagsakripisio dagiti adipen ni Jehova​—lallaki ken babbai, ubbing ken nataengan​—kadagitoy maudi nga al-aldaw?

16. Mangted iti pagarigan no kasano a dagiti adipen ti Dios ikagkagumaanda nga isuro kadagiti dadduma ti maipapan iti Pagarian?

¹⁶ Idiay India, pampanunoten ti maysa a payunir, wenno amin-tiempo nga agibumbunannag iti Pagarian, no kasano a matulongan nga agadal maipapan iti Pagarian ti nasurok a dua a milion a tuleng iti dayta a pagilian. (Isaias 35:5) Inkeddengna ti ageskuela iti maysa nga institusion idiay Bangalore a mangisursuro iti sign language. Inranudna sadiay ti namnama ti Pagarian kadagiti adu a tuleng, ket nabuangay dagiti grupo a mayadalan iti Biblia. Iti sumagmamano laeng a lawas, adu ti nangrugi a makigimong iti Kingdom Hall. Idi agangay, iti maysa a paboda, naam-ammona ti maysa a tuleng a lalaki a taga Calcutta nga addaan iti adu a saludsod ken nangipakita iti napasnek nga interes nga agadal iti ad-adu pay maipapan ken Jehova. Ngem adda parikut. Masapul nga agawid ti agtutubo a lalaki idiay Calcutta, nga agarup 1,600 a kilometro ti kaadayona, tapno agkolehio, ket awan ti Saksi sadiay a makaammo iti sign language. Inkagumaanna a kinombinsir ti amana tapno mapalubosan nga ageskuela idiay Bangalore imbes nga idiay Calcutta tapno maitultuloyna ti panagadalna iti Biblia. Nagsayaat ti panagrang-ayna iti naespirituan, ket kalpasan ti agarup makatawen, indedikarna ti biagna ken ni Jehova. Inyadalanna met iti Biblia ti adu a tuleng, agraman ti maysa a kaubinganna. Ti sanga nga opisina idiay India ket addaan ita iti urnos para kadagiti payunir nga agadal iti sign language tapno tumulongda iti dayta a tay-ak.

17. Mangdakamat iti banag a makapabileg kadakayo iti report ti 2004 a tawen serbisio iti panid 19 agingga 22.

¹⁷ Iti panid 19 agingga 22 daytoy a magasin, masarakanyo ti sangalubongan a report mainaig iti aktibidad dagiti Saksi ni Jehova para iti 2004 a tawen serbisio. Usigenyo a naimbag tapno makitayo a mismo ti pammaneknek a dagiti adipen ni Jehova iti intero a lubong ket sireregta a naipamaysa ita iti panangbirok iti “perlas a nangato ti pategna.”

Itultuloyyo a “Sapulen nga Umuna ti Pagarian”

18. Ania nga impormasion ti saan nga inraman ni Jesus iti pangngarig maipapan iti agdaldaliasat a komersiante, ken apay?

¹⁸ Sublianantay manen ti pangngarig ni Jesus maipapan iti agdaldaliasat a komersiante. Saan a dinakamat ni Jesus no nangalaan ti komersiante iti pagbiagna kalpasan nga inlakona ti amin nga adda kenkuana. Natural laeng nga iyimtuod ti dadduma: ‘Pangalaan ngay ti komersiante iti pagtaraon, pagkawes, ken pagtaenganna ita ta awanen ti aniaman nga ik-ikutanna? Ania ti magunggonana iti dayta a napateg a perlas?’ Rasonable dagita a saludsod iti panangmatmat ti tao. Ngem saan kadi nga indagadag ni Jesus kadagiti adalanna: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo”? (Mateo 6:31-33) Ti kangrunaan a punto ti pangngarig ket: masapul nga iparangarang ti naimpusuan a debosion iti Dios ken ti regta iti Pagarian. Adda kadi masursurotayo iti dayta?

19. Ania dagiti kangrunaan a maadaltayo iti pangngarig ni Jesus maipapan iti perlas a nangato ti pategna?

¹⁹ Kabbaro man a naadaltayo ti makaay-ayo a naimbag a damag wenno nabayagen a salsalimetmetantayo ti Pagarian ken isarsaritatayo dagiti itdenna a bendision, masapul nga itultuloytayo nga ipamaysa ti interes ken atensiontayo iti dayta a Pagarian. Nupay narigat ti panawen ita, adda dagiti natibker a rasontayo nga agtalek a pudno ken awan kaaspingna daydiay birbirokentayo​—kas iti perlas a nasarakan ti komersiante. Dagiti pasamak iti lubong ken dagiti natungpal a padto iti Biblia ket natibker a pammaneknek nga agbibiagtayon iti “panungpalan ti sistema ti bambanag.” (Mateo 24:3) Kas iti agdaldaliasat a komersiante, rumbeng nga ipakitatayo ti naimpusuan a kinaregta agpaay iti Pagarian ti Dios ken agrag-otayo iti pribilehio a mangipakaammo iti naimbag a damag.​—Salmo 9:1, 2.