Ti Biag ken Ministerio ni Jesus

Pakpakauna ti Dayag ti Pagarian ni Kristo

NAGSARDENG ni Jesus idi agturturong sadi Cesarea Filipos, ket isut’ mangisursuro iti maysa a bunggoy a kaduana dagiti apostolesna. Inaramidna daytoy nakakelkellaat nga anunsio kadakuada: “Pudno kunak kadakayo adda dadduma kadagiti agtatakder ditoy a didanto maramanan ni patay agingga iti makitada ti Anak ti tao nga um-umay iti pagaraianna.”

‘Aniat’ kayat a sawen koma ni Jesus?’ mabalin a dagiti adalan ti agpampanunot. Agarup maysa a lawas kamaudiananna, inkuyog ni Jesus da Pedro, Santiago, ken Juan kenkuana ket simmang-atda iti maysa a bantay a natayag. Kaawatan a daytat’ rabii, agsipud ta makaturturog dagiti adalan. Bayat nga agkarkararag ni Jesus, nagbalbaliw ti langana iti imatangda. Naglawag ti rupana a kas init, ket dagiti pagan-anayna nagbalinda a napudaw a kas iti lawag.

Kalpasanna, dua a pigura, a nalasinda a kas ni “Moises ken Elias,” nagparangda ket makisasaoda ken ni Jesus maipapan iti ‘ipapanawna a mapasamakto idiay Jerusalem.’ Ti ipapanaw kaawatan a tuktukoyenna ti ipapatay ni Jesus ken ti sumarunonto a panagungarna. Gapuna, paneknekan daytoy a panagpapatang a ti nakababain nga ipapatayna ket saan a maysa a banag a liklikan, kas tinarigagayan ni Pedro.

Idi nakariingda a naan-anayen, dagiti adalan ti nagsipsiput ken nagdengngeg a sisiddaaw. Nupay daytoy ket maysa a sirmata, daytat’ nagparang a nakapudpudno unay ta gapu itoy rinugian ni Pedro ti makiraman iti eksena, a kunkunana: “Apo, nasayaat nga agyantayo ditoy. No kayatmo agaramidkami ditoy ti tallo nga ab-abong, maysa ti maipaay kenka ket maysa ken Moises ket maysa ken Elias.”

Bayat nga agsasao ni Pedro, maysa nga ulep a naraniag lininonganna ida, ket maysa a timek iti ulep ti nagkuna: “Daytoy isu ti Anakko, a dungdungoek, isu nga inanamongak; isu ti denggenyo.” Idi nangngeganda ti timek, nagpakleb dagiti adalan. Ngem kuna ni Jesus: “Bumangonkayo ket dikay agbuteng.” Idi a bimmangonda, awan makitada malaksid ken Jesus.

Ket idi a simmalogda iti bantay idi sumaganad nga aldaw, imbilin ni Jesus: “Dikay ibaga iti uray siasino ti nakitayo agingga a ti Anak ti tao agungar kadagiti natay.” Ti panagparang ni Elias iti sirmata ti namataud iti saludsod iti pampanunot dagiti adalan. “Apay,” insaludsodda, “ngarud a dagiti eskriba sawenda a masapul a ni Elias umay nga umuna?”

“Immayen ni Elias,” insungbat ni Jesus, “ket isu dida nailasin.” Ni Jesus, nupay kasta, ket agsasao maipapan ken Juan a Mammautisar, a nangtungpal ti akem nga umas-asping ken ni Elias. Ni Juan ti nangisagana ti dalan ti iyaay ni Kristo, kas inaramid ni Elias ken ni Eliseo.

Anian a makapapigsa daytoy a sirmata, agpadpada ken Jesus ken kadagiti adalanna! Ti sirmata, kaiyariganna ti pakpakauna ti dayag ti Pagarian ni Kristo. Kaiyariganna, nakita dagiti adalan, ti “Anak ti tao nga um-umay iti pagarianna,” kas inkari ni Jesus maysa a lawas a nasapsapa. Kalpasan ti ipapatay ni Jesus, nagsurat ni Pedro maipapan iti ‘panagbalinda a saksi iti kinadayag ni Kristo bayat ti kaaddada a kaduana iti nasantuan a bantay.’

Dimmawat dagiti Fariseo iti pagilasinan ken ni Jesus a mangpaneknek nga isu daydiay naikari iti Kasuratan nga agbalin kas Ari a pinili ti Dios. Saanda a maikkan iti kasta a pagilasinan. Iti kasumbangirna, dagiti nasinged nga adalan ni Jesus napalubosanda a makakita iti panagbaliw ti langa ni Jesus kas pammatalged kadagiti padpadto iti Pagarian. Gapuna, insurat ni Pedro iti kamaudiananna: “Ket naaddaankami ti natibtibker a sao ti padto.” Mateo 16:28–17:13; Marcos 9:1-13; Lucas 9:27-37; 2 Pedro 1:16-19.

◆ Kasanot’ pannakakita ti dadduma iti iyaay ni Kristo iti Pagarianna sakbay ti pannakaramanda iti ipapatay?

◆ Iti sirmata, aniat’ pakisarsaritaan da Moises ken Elias ken ni Jesus?

◆ Apay a daytoy a sirmata ti makapapigsa a tulong kadagiti adalan?

[Ladawan iti panid 9]