DRAKMA

Pirak a sinsilio dagiti Griego a maar-aramat pay laeng idi umuna a siglo K.P. (Lu 15:8, 9) Ti Attic a drakma nakitikitan iti ulo ti diosa a ni Athena iti maysa a sikigan ken kullaaw iti bangir a sikigan. Idi tiempo ti naindagaan a ministerio ni Jesus, nalabit bimmaba ti pateg ti drakma iti agarup 3.4 g (0.109 oz t) ket ngarud mapattapatta nga agpateg iti 65 a sentimo ti U.S. iti agdama. Idi umuna a siglo K.P. impada dagiti Griego ti drakma iti denario, ngem ti gobierno ti Roma opisial nga imbilangna ti pateg ti drakma kas tallo a kakapat ti maysa a denario. Nagbayad dagiti Judio iti tinawen a buis iti templo a dua a drakma (maysa a didrakma).​—Mt 17:24.

Ti pirak a drakma dagiti Griego saan koma a mapagkamalian nga isu ti balitok a “drakma” (dar·kemohnʹ) iti Hebreo a Kasuratan, sinsilio a gagangay a naipada iti darik ti Persia (8.4 g; 0.27 oz t; $94.50 sigun kadagiti agdama a pateg).​—Esd 2:69; Ne 7:70-72.