Diborsio​—Aniat’ Pudno a Kunaen ti Biblia?

“TI PINAGTIPON ti Dios a maymaysa, saan koma a pagsinaen ti tao.” (Mateo 19:6) Masansan a mangmangngegantay dagita a nalataken a sasao ni Jesu-Kristo a maad-adaw kas ti maudi nga ebkas iti seremonia ti panagasawa.

Ngem, babaen kadagidiay a sasao, kayat kadi a sawen ni Jesus nga amin a panagasawa ket agbalinda a permanente ket awanen ti aniaman a diborsio? No tartarusan a mismo dagita a sasao, agparang a kasta ti kaso. Nupay kasta, aniat’ nangtignay ken ni Jesus a mangiyebkas iti dayta? Isu aya ti mangiwaywayat iti maysa a banag a baro?

‘Saan a Kasta Idi Damo’

Ti sasao ni Jesus a naadaw iti ngato ket paset ti sungbatna iti saludsod dagiti Fariseo: “Maipalubos aya iti lalaki nga isinana ti asawana iti amin a gapu?” (Mateo 19:3-6) Gapu ta saanda a napnek iti sungbat, nagsaludsod manen dagiti Fariseo kenkuana: “Apay-apay, ngarud, nga imbilin ni Moises ti panangited iti surat ti pannakisina ket sa pagtalawen?” Iti dayta, kinuna ni Jesus: “Gapu iti tangken dagiti puspusoyo, impalubos ni Moises kadakayo a pagtalawenyo dagiti assawayo, ngem idi damo saan a kasta.” Kalpasanna innayonna: “Ket siak kunak kadakayo, a siasinoman a mamagtalawto iti asawana a babai, no saan a maipuon iti pannakiabig, ket makiasawanto iti sabali makabasol iti pannakiabig iti dina asawa.”​—Mateo 19:7-9.

Masapul nga ammuentayo a ti sasao ni Jesus a, “ngem idi damo saan a kasta,” ket naaramid a mangtuktukoy iti diborsio a naaramid babaen ti “panangited iti surat ti pannakisina.” Iti sabali a pannao, idi inyuswat ti Dios ti umuna a panagasawa kada Adan ken Eva, isut’ saan a nangited kadakuada iti “amin a gapu” a panangwaswas iti panagasawada. Kas perpekto a pagasawaan, addaanda ti amin a rason a pagbalinen a naballigi ti panagasawada. Kas perpekto a pagasawaan, addaanda ti amin a rason a pagbalinen a naballigi ti panagasawada. Daytat’ agballigi no agtultuloyda nga agbiag a maitunos iti linteg ken panangiturong ti Dios.

Idi natnag ti sangatauan iti basol ken kinaimperpekto, kasta met ti situasion ti panagasawa. (Roma 5:12) Yantangay saanen a perpekto dagiti tattao, immertengen ti natauan a relasion ket dayta ti namantsaanen iti kinaagum, apal, ken kinaimot. Daytat’ tuktukoyen ni Jesus kas “kinatangken dagiti puspusoyo,” a gapu itoy ti Linteg Mosaiko linugaranna ti diborsio. Kaskasdi, pinalagipan ni Jesus dagiti Fariseo: “Ngem idi damo saan a kasta.” Ita, iti sidong dagiti imperpekto a kasasaad, dagiti pagasawaan ti rebbeng a mangikabil iti ad-adda a panagregget a kasapulan a mangukas iti aniaman a di pagkikinnaawatan ken parparikut imbes nga usaren dagita kas pangibatayan wenno pambar a manggessat iti panagasawada. Nupay kasta, intudo ni Jesus nga adda ti maysa a panggapuan, awan sabali, ti pannakiabig. Ti di panagmatalek iti panagasawa ti mabalin a pakaibatayan a mangrakrak iti panagasawa.

Makapainteres a maammuan no kasano a dagiti nadumaduma a panangilawlawag iti sasao a “no saan a maipuon iti pannakiabig” ti naus-usar a mangitandudo iti sumagmamano a panangmatmat iti diborsio. Kaaduan kadagiti Katoliko nga autoridad laksidenda dagitoy a sasao gapu ta kadagiti katupagna a salaysay idiay Marcos ken Lucas saanda a linaon dayta. Nupay kasta, inlawlawag ti McClintock and Strong’s Cyclopedia: “Ti nalawag a panamagtutunos kadagiti sasao ti masapul a masarakan iti prinsipio a ti eksepsion ti naan-anay a dokumento masapul nga ilawlawagna daydiay abababa, no daytoy ti maaramidan nga awanan puersa. Ita, gapu ta ti diborsio nga agpaay iti dayta a rason ket inadmitir dagiti isuamin, mabalin a natural laeng nga inawat daytoy a kasta da Marcos ken Lucas a saandan nga inyebkas dayta.”

Dadduma irasonanda a yantangay inusar ni Jesus ti sao a “pannakiabig” (Griego, por·neiʹa) a saan a ti “pannakikamalala” (Griego, moi·kheiʹa), mabalin a ti tuktukoyenna ket maysa a di maiyanatup nga aramid sakbay ti panagasawa a mamagbalin iti panagasawa nga awan bilegna. Daytoy ti saan a nesesita a manglimitar iti kaipapanan ti sao. Dagiti nadumaduma nga autoridad bigbigenda a ti por·neiʹa kaipapananna ti “saan a kinadalus, kinabalangkantis, prostitusion, pannakiabig,” ket ti adda idiay Mateo 19:9 “taktakderan dayta, wenno ramanenna, ti pannakikamalala.” Dadduma ikalinteganda nga isitsitar laeng ni Jesus ti pannakiabig kas maysa a pangarigan kadagiti adu a pakaibatayan ti diborsio. Nalawag, daytoy ti panangipappapilit iti maysa nga opinion iti dayta a teksto.

Manipud iti napalabas, nalawag a ti Biblia saanna nga ibagbaga nga amin a panagasawa ti agtalinaed a permanente ket awan ti diborsio a maipalubos iti aniaman a rason. Iti kasumbangirna, ti Biblia ket mangmangted iti maymaysa laeng a maakseptar a pakaibatayan iti diborsio, awan sabali, “maipuon iti pannakiabig.”

“Ti Panagasawa Nadayaw Koma”

Babaen iti panangipalubosna iti pakaibatayan iti diborsio, iparparegta aya ti Biblia dayta? Daytoy aya a panangipalubos pabassitenna ti panagasawa wenno taktakawanna dayta iti kinadayawna? Wenno babaen ti panangipalubos iti maymaysa laeng a pakaibatayan iti diborsio, ti aya Biblia ti mangikabkabil iti di rasonable a padagsen kadagidiay makiasawa?

Maisupadi ketdi, sarsaritaen ti Biblia ti panagasawa kas maysa kadagiti kasingedan ken kalailoan unay a singgalut a mabalin a tagiragsaken ti dua a tao.” “Gapuna ti lalaki panawannanto ti amana ken ti inana ket tumiponto iti asawana ket agbalindanto a maymaysa a lasag,” kuna ti salaysay ti Genesis iti umuna a panagasawa. (Genesis 2:24) Ket dagiti pagasawaan masapul a bantayanda daytoy a “maymaysa a lasag” a relasion kas maysa a banag a nasudi. “Ti panagasawa nadayaw koma kadagiti isuamin, ket ti pagiddaan awan koma ti tulawna,” ibalakad ti Biblia.​—Hebreo 13:4.

Masansan a maikunkuna, iti maysa a pamay-an wenno iti sabali, a ti pundasion ti napaut ken naragsak a panagasawa ket saan a ti romantiko nga ayat no di ket ti kinaawan agumna. Kasta latta ti ipamatmat ti Biblia. Kunaenna: “Kasta met ti rebbeng dagiti lallaki a panagayat kadagiti assawada, a kas kadagiti bagida. Ti agayat iti asawana ayatenna ti bagina, ta nikaanoman awan pay ti gimmura iti lasagna met laeng; no di ket taraonanna ken igagana, a kas met ken Kristo igagana ti kongregasion. . . . Ket, ti babai padayawanna koma ti asawana.” (Efeso 5:28-33) Ken iti prangka a panagsao, ibalakad ti Biblia: “Ited koma ti lalaki iti asawana ti annongna a kas asawa; ket kasta met ti babai ken asawana. Ti babai saan nga isu ti agtagikua iti bagina, no di ti asawana; ket kasta met ti lalaki saan nga isu ti agtagikua iti bagina, no di ni asawana. Saankay nga agpipinnaidam iti maysa ken maysa iti dayta.”​—1 Corinto 7:3-5.

No agpadpada a dagiti assawa situtulokda nga umannurot kadagita a nainsiriban a balakad, mabalbalin a ti panagasawada saan nga agkapuy agingga iti punto a maysa kadakuada ket agtungpal iti pannakikamalala, iti kasta, kaiyariganna, daddadaelenda ti “maymaysa a lasag” a relasionda. Uray pay no ti maysa kadagiti pagasawaan saanna nga akseptaren dagita a prinsipio ti Biblia, ti manamati nga asawa makapagtalek a ti pamay-an ti Dios ket kaskasdi nga isut’ kasayaatan, ket adu a parikut iti panagasawa ti mabalin a masolbar wenno maliklikan.

Imbes nga irekomendar ti diborsio kas pamay-an a panamagpatingga iti di naragsak a panagasawa, ngarud, idagadag ti Biblia kadagiti Kristiano a pagreggetanda a salimetmetan ti panagasawada ket pagbalinenda dayta a naragsak. “Pagrag-oam ti asawa ti kinaagtutubom,” kuna ti proverbio ti Biblia. “Ket makayawanka koma nga agnanayon iti ayatna.”​—Proverbio 5:18,19.

Ti Aya Diborsio ti Sungbat?

Kasanon no ti maysa kadagiti pagasawaan agbalin a di matalek? Pudno unay, ti di panagmatalek iti panagasawa ti mangpataud iti nasaem unay a pakarigatan. Ti mannakikamalala nga asawa ti nangiyeg iti adu nga ut-ot ken panagsagaba ti asawa nga awan basolna, nga isut’ addaan iti Nainkasuratan a kalintegan a mangidiborsio iti nakabasol nga asawa ken mabalinna ti makiasawa manen. Ngem rebbeng aya a maadda ti diborsio? Dayta laengen aya ti mabalin a pagtungpalan?

Laglagipentay koma a nupay nangited ni Jehova ti nainkalintegan a pakaibatayan ti diborsio, kuna ti Biblia maipapan kenkuana: “Ta isu guraenna ti panangisina.” (Malakias 2:16) Imbes a dardaras a lumagto iti konklusion a ti diborsio ti kakaisuna a solusion, mabalin a panunoten ti maysa ti posibilidad ti panangipakita ti asi ken pammakawan. Apay?

Ti diborsio ket saan a nesesita a mangikkat ti ut-ot ken kinapait, no di ket ti asi ken pammakawan ti makabalin iti dayta, nangnangruna no daydiay nakabasol ket pudpudno a pagbabbabawyanna ti kinadakes. Ti ayat a naipakita iti kasta a nainget a kanito ti aktual a mangpabileg iti panagasawa. Ti panangmatmat iti dayta a banag iti daytoy a lawag ti mangtulong iti asawa nga awan basolna a mangtingiting no ania ti kasayaatan a kurso a surotenna, a laglagipen dagiti sasao ni Jesus: “Naragsak dagiti manangngaasi, ta lak-amendanto ti asi.”​—Mateo 5:7; idiligyo iti Oseas 3:1-5.

Ti pay matingiting isuda dagiti problema a mabalin nga ibungana maipapan kadagiti annak iti agmaymaysa a naganak a pagtaengan. Ti met liday ti naidiborsio a tao, ti maikari iti panangusig. Para iti maysa a babbai, mapakaro dagiti problema gapu iti kinapudno nga iti kaaduan a paset iti lubong itatta, dagiti babai ti kaskasdi nga adda iti kinadisbentaha iti panagbiag. Kalpasan ti panagbalinna a manangtaripato iti pagtaengan iti sumagmamano a tawen, narigat para iti agmaymaysa nga ina ti makasubli kadagiti panggedan ken makikompetensia kadagiti dadduma.

Patien dagiti sumagmamano a babbai, a bayat nga addada pay a siaasawa, isagsaganadan ti bagbagida iti posibilidad iti diborsio. Agpasalistada kadagiti espesial a pagadalan wenno taginayonenda dagiti karerada tapno masalimetmetanda ti pinansial a panagwaywayasda. No suroten man ti maysa nga indibidual wenno saan ti kasta a kurso ket maysa a personal a pangngeddeng. Nupay kasta, imbes a mangbusbos iti panawen ken pigsa nga agsagsagana a maipaay iti maysa a posibilidad, saan aya nga ad-adda a nainsiriban a pagpuonan ti panangipaay iti tiempo ken pigsa iti panangpabileg iti maysa a naragsak ken napapaut a panagasawa? Babaen iti panagtrabaho a sipipinget iti panangparang-ay kadagiti bunga ti espiritu ken panangtaginayon iti nasalun-at a naespirituan a panangmatmat, ti Kristiano a babai ket mabalbalin a tagiragsakenna ti ayat ken pammadayaw ni lakayna. Isu met ti maaddaan ti kompiansa ken panagtalek iti kari ti Dios nga aywanannanto dagiti kasapulan dagidiay ipangpangrunada a biruken ti Pagarian.​—Mateo 6:33; Proverbio 31:28-30; Galacia 5:22, 23.

Ti Kamaudianan a Solusion

La ketdi no agbibiagtayo pay iti daytoy imperpekto a sistema dagiti bambanag, mainanamatayo nga addadanto dagiti problema ti panagasawa. Nupay kasta, babaen ti panangsurot iti nainsiriban a balakad ti Biblia, dagitoy ti mapabassit wenno mataming a sieepektibo. Kasta met, dagiti lallaki ken babbai a situtulok nga agbiag babaen kadagiti pagalagadan ni Jehova iti panagasawa ken kadagiti dadduma pay a paset ti panagbiag mabendisionanda iti namnama a makastrek iti maysa a baro a sistema a “pagtaenganto ti kinalinteg.”​—2 Pedro 3:13.

Iti dayta a sistema, ti sangatauan mawayawayaanton kadagiti dadael ken amin dagiti nakalkaldaang a bunga ti basol ken kinaimperpekto. La ketdi a ti urnos ti panagasawa agtultuloy ditoy daga, ‘no ania ti kaso iti damo’ isunto ti pagwadan. Pudno unay, ti pinagtipon ti Dios, saan koma a pagsinaen ti tao.

[Ladawan iti panid 5]

Aniat’ kinuna ni Jesus maipapan iti diborsio?

[Ladawan iti panid 7]

Idiay baro a lubong, awanton dagiti parparikut iti panagasawa a mangiturong iti diborsio