No Aniat’ Kalikaguman Kadatayo ti Panagpasakop iti Dios
“Agpasakopkayo ngarud iti Dios.”—SANTIAGO 4:7.
1. Aniat’ maikunatayo maipapan iti kita ti Dios a pagdaydayawantayo?
ANIAN a nakaskasdaaw a Dios ni Jehova! Awan katupagna, awan kaaspingna, awan kapadana, naisangsangayan iti nakaad-adu a pamay-an! Isu ti Katan-okan, ti Sapasap a Soberano nga ikutna amin a pudno a kinaturay. Isut’ manipud iti kinaagnanayon agingga iti kinaagnanayon ken kasta unay ti kinadayagna ta awan ti agbiag a makakita kenkuana. (Exodo 33:20; Roma 16:26) Awan pagpatinggaan ti pannakabalin ken siribna, naan-anay iti kinahustisia, ken isu ti mismo a ladawan ti ayat. Isu ti Namarsuatayo, ti Ukomtayo, ti Manangted-lintegtayo, ken ti Aritayo. Aggapu kenkuana ti amin a nasayaat ken naan-anay a sagut.—Salmo 100:3; Isaias 33:22; Santiago 1:17.
2. Aniat’ saklawen ti panagpasakop iti Dios?
2 Gapu kadagitoy amin, rumbeng laeng nga agpasakoptayo kenkuana. Ngem aniat’ kalikaguman daytoy kadatayo? Adu a bambanag. Yantangay ditay makita ni Jehova a Dios, ti panagpasakop kenkuana ramanenna ti panangipangag iti timek ti nasursuruan a konsiensia, pannakitunos iti naindagaan nga organisasion ti Dios, panangbigbig kadagiti sekular nga autoridad, ken panagraem iti prinsipio ti kinaulo iti uneg ti pamilia.
Panangsalimetmet ti Nasayaat a Konsiensia
3. Tapno masalimetmetan ti nasayaat a konsiensia, masapul a natulnogtayo iti ania a kita dagiti panangiparit?
3 Tapno masalimetmetan ti nasayaat a konsiensia, masapul nga agtulnogtayo kadagiti di maipatungpal—kayatna a sawen, kadagiti linteg wenno prinsipio a di maipatungpal dagiti tao. Kas pangarigan, ti maika-sangapulo iti Sangapulo a Bilin, a maibusor iti panagagum, ket di maipatungpal dagiti natauan nga autoridad. Ket daytoy paneknekanna ti nasantuan a nagtaudan ti Sangapulo a Bilin, ta awan ti natauan a mammanday-linteg a bagi a mangipaulog iti linteg a di met maipatungpal babaen ti panangipatay iti pannusa no masalungasing. Babaen daytoy a linteg, inikkan ni Jehova a Dios ti tunggal Israelita iti responsabilidad nga agbalin a polis iti bagina met laeng—no kayatna ti maaddaan iti nasayaat a konsiensia. (Exodo 20:17) Umasping iti dayta, dagiti aramid ti lasag a manglapped iti maysa nga agtawid iti Pagarian ti Dios iramanda ti “im-imon” ken “ap-apal”—rikrikna a saan a mapatayan iti pannusa dagiti natauan nga ukom. (Galacia 5:19-21) Ngem tapno masalimetmetan ti nasayaat a konsiensia, masapul nga idiantayo dagitoy.
4. Tapno masalimetmetan ti nasayaat a konsiensia, masapul nga agbiagtayo a maitunos kadagiti ania a prinsipio ti Biblia?
4 Wen, masapul nga agbiagtayo a maitunos kadagiti prinsipio ti Biblia. Magupgop dagita a prinsipio iti dua a bilin a silalawag nga inyebkas ni Jesu-Kristo kas sungbat iti saludsod no ania ti kangrunaan a bilin iti linteg ni Moises. “Masapul nga ayatem ni Jehova a Diosmo iti amin a pusom ken iti amin a kararuam ken iti amin nga isipmo. . . . Masapul nga ayatem ti kaarrubam a kas iti bagim.” (Mateo 22:36-40) Ipakita ti sasao ni Jesus a nailanad idiay Mateo 7:12 ti saklawen ti maikadua kadagitoy a bilin: “Gapuna, amin dagiti banag a kayatyo nga aramiden dagiti tao kadakayo, masapul nga aramidenyo met kadakuada; daytoy, kinapudnona, ti kaipapanan ti Linteg ken dagiti Mammadto.”
5. Kasanotay a mataginayon ti nasayaat a pannakirelasion ken Jehova a Dios?
5 Masapul nga aramidentayo ti ammotayo a naimbag ket ditay ar-aramiden ti ammotayo a dakes, adda man makakita wenno awan. Pudno daytoy uray no malisiantayo ti supapak ti di panangaramid iti rumbeng nga aramidentayo wenno panangaramid iti di rumbeng. Kaipapanan dayta ti panangtaginayon iti nasayaat a pannakirelasion iti nailangitan nga Amatayo, a sipapanunottayo iti imballaag ni apostol Pablo idiay Hebreo 4:13: “Awan ti aniaman a parsua a saan a sipapanayag iti imatangna, no di ket dagiti isuamin a banag addada a lamolamo ken agdadata kadagiti mata daydiay a pagidatagantayo.” Ti kanayon a panangaramid iti nalinteg tulongannatay a makidangadang kadagiti nasikap a pangallilaw ti Diablo, mangsaranget kadagiti panangpilit ti lubong, ken makidangadang iti natawid nga agimbubukod a pagannayasan.—Idiligyo ti Efeso 6:11.
Panagpasakop iti Organisasion ti Dios
6. Siasino dagiti inusar ni Jehova a kalasugan ti komunikasion idi sakbay panawen Kristiano?
6 Saannatay nga inikkan ni Jehova a Dios iti kalintegan a mangikeddeng iti kabukbukodantayo no kasano nga ipatungpal dagiti prinsipio ti Biblia iti biagtayo. Sipud idi punganay ti pakasaritaan ti tao, mangus-usar ti Dios kadagiti tattao kas kalasugan ti komunikasion. Gapuna, ni Adan ti pannakangiwat ti Dios ken Eva. Naited ken Adan ti bilin maipapan iti naiparit a bunga sakbay a naparsua ni Eva, isu nga impakaammo la ketdi ni Adan ken Eva ti pagayatan ti Dios agpaay kenkuana. (Genesis 2:16-23) Ni Noe ti propeta ti Dios iti pamiliana ken iti lubong kasakbayan ti layus. (Genesis 6:13; 2 Pedro 2:5) Ni Abraham ti pannakangiwat ti Dios iti pamiliana. (Genesis 18:19) Ni Moises ti propeta ti Dios ken kalasuganna a nakikomunikar iti nasion ti Israel. (Exodo 3:15, 16; 19:3, 7) Manipud ipapatay ni Moises agingga ken Juan a Mammautisar, adu a mammadto, papadi, ken ar-ari ti inusar ti Dios a nangipakaammo ti pagayatanna iti ilina.
7, 8. (a) Idi addan ti Mesias, siasino dagiti inusar ti Dios a pannakangiwatna? (b) Aniat’ sapulen ti nadiosan a panagpasakop kadagiti Saksi ni Jehova ita?
7 Idi addan ti Mesias, ni Jesu-Kristo, isu ken dagiti nasinged nga apostol ken adalanna ti inusar ti Dios a pannakangiwatna. Idi agangay, dagiti napulotan a matalek a pasurot ni Jesu-Kristo ti nagserbi kas “matalek ken naannad nga adipen” iti panangisuro iti ili ni Jehova no kasano nga ipatungpal dagiti prinsipio ti Biblia iti biagda. Ti panagpasakop iti Dios kinaipapananna ti panangbigbig iti instrumento nga us-usaren idi ni Jehova a Dios.—Mateo 24:45-47; Efeso 4:11-14.
8 Itatta “ti matalek ken naannad nga adipen” ket naitimpuyog kadagiti Saksi ni Jehova ken irepresentar ti Bagi a Manarawidwid dagitoy a Saksi. Dayta met a bagi ti mangdutok kadagiti manangaywan iti nadumaduma a saad—kas dagiti panglakayen ken agdaldaliasat a pannakabagi—a mangiwanwan ti trabaho iti lugar a masakopanda. Ti panagpasakop iti Dios kalikagumanna ti panagpasakop ti tunggal dedikado a Saksi kadagitoy a manangaywan kas maitunos iti Hebreo 13:17: “Agtulnogkayo kadagiti mangidadaulo kadakayo ken agpasakopkayo, ta dida agsarday a mangaywan kadagiti kararuayo a kasla isuda ti mangidatagto; tapno aramidenda daytoy a sirarag-o a saan a sililiday, ta makadangran daytoy kadakayo.”
Panangawat ti Disiplina
9. Ti panagpasakop iti Dios masansan a ramanenna ti ania?
9 Ti panagpasakop iti Dios masansan a ramanenna ti panangipangag ti disiplina manipud kadagidiay agserserbi kas manangaywan. No kanayon a ditay disiplinaen dagiti bagitayo no kasapulan, mabalin a kasapulantayo ti mabagbagaan ken madisiplina babaen dagidiay addaan kapadasan ken autoridad a mangaramid ti kasta, kas dagiti panglakayen iti kongregasiontayo. Nainsiriban ti panangawat ti kasta a disiplina.—Proverbio 12:15; 19:20.
10. Aniat’ rebbeng nga ipakita dagidiay mangipapaay ti disiplina?
10 Siempre, dagiti panglakayen a mangipapaay ti disiplina masapul nga agbalinda a mismo a pagwadan iti nadiosan a panagpasakop. Kasano? Sigun iti Galacia 6:1, saan nga umdas ti kinalaingda a mangbalakad no di ket mapagulidananda met koma: “Kakabsat, no ti maysa a tao masukalan iti uray ania a panangsalungasing sakbay nga ammona, dakayo nga addaan naespirituan a kualipikasion ikagumaanyo a palintegen ti kasta a tao iti espiritu ti kinaemma, a kitaem ti bagim, di la ket ta masulisogka met.” Iti sabali a pannao, masapul a maitunos ti balakad ti panglakayen iti ulidanna. Maitunos dayta iti pammagbaga a naipaay idiay 2 Timoteo 2:24, 25 ken idiay Tito 1:9. Wen, dagidiay mangipapaay ti pannubngar wenno pammagbaga masapul a naannadda unay tapno saanda a pulos nga agbalin a nagubsang. Kanayonda koma a naemma, naanus, ngem natibker a mangitandudo kadagiti prinsipio ti Sao ti Dios. Dumngegda koma nga awan panangidumduma, a bang-aranda dagidiay marigrigatan ken madagdagsenan.—Idiligyo ti Mateo 11:28-30.
Panagpasakop Kadagiti Turturay a Nangatngato
11. Aniat’ obligasion dagiti Kristiano kadagiti sekular nga autoridad?
11 Ti panagpasakop iti Dios sapulenna met ti panagtulnogtayo kadagiti sekular nga autoridad. Nabalakadantayo idiay Roma 13:1: “Agpasakop koma ti amin a kararua iti turturay a nangatngato, ta awan ti turay malaksid iti Dios; ket dagiti pagturayan binangon ida ti Dios.” Kalikaguman dagitoy a sasao, malaksid kadagiti dadduma a bambanag, ti panagtulnogtayo kadagiti linteg trapiko ken ti panagbalintayo a napasnek iti panagbayad kadagiti buis ken impuesto, kas inggunamgunam ni apostol Pablo idiay Roma 13:7.
12. Iti ania a pamay-an a nakedngan ti panagpasakoptayo ken Cesar?
12 Nupay kasta, nalawag a masapul a nakedngan ti kasta a panagpasakop ken Cesar. Masapul a kanayon a sipapanunottayo iti prinsipio nga imbaga ni Jesu-Kristo, a nailanad idiay Mateo 22:21: “Itedyo ngarud ken Cesar ti kukua ni Cesar, ket iti Dios ti kukua ti Dios.” Kunaen ti footnote ti Roma 13:1 iti Oxford NIV [New International Version] Scofield Study Bible: “Saan a kayat a sawen daytoy a masapul nga agtulnog kadagiti linteg nga imoral wenno di Nakristianuan. Kadagita a kasasaad, rumbeng nga agtulnog a nangnangruna iti Dios ngem kadagiti tao (Ara. 5:29; cp. Dan. 3:16-18; 6:10ff).”
Nadiosan a Panagpasakop iti Uneg ti Pamilia
13. Aniat’ sapulen ti nadiosan a panagpasakop iti uneg ti pamilia?
13 Iti uneg ti pamilia, ti asawa a lalaki ken ama ti pannakaulo. Masapul ngarud nga ipangag dagiti assawa a babbai ti balakad a naipaay idiay Efeso 5:22, 23: “Agpasakop koma dagiti babbai kadagiti assawada a kas iti Apo, ta ti asawa a lalaki isu ti ulo ti babai a kas met ni Kristo isu ti ulo ti kongregasion.”a No maipapan kadagiti annak, saanda a mangaramid kadagiti bukodda a paglintegan no di ket rumbeng nga ipakitada ti nadiosan a panagpasakop agpadpada iti ama ken ina, kas ilawlawag ni Pablo idiay Efeso 6:1-3: “Annak, agtulnogkayo kadagiti dadakkelyo gapu iti Apo, ta daytoy nalinteg: ‘Dayawem ni amam ken ni inam’; nga isu ti umuna a bilin nga adda karina: ‘Tapno naimbag ti lak-ammo ket atiddag ti biagmo iti rabaw ti daga.’”
14. Aniat’ sapulen ti nadiosan a panagpasakop kadagiti ulo ti pamilia?
14 Siempre, nalaklaka para kadagiti assawa a babbai ken annak ti mangipakita ti kasta a nadiosan a panagpasakop no ipakita a mismo dagiti assawa a lallaki ken amma ti nadiosan a panagpasakop. Aramidenda daytoy babaen ti panangwatwatda iti kinauloda a maitunos kadagiti prinsipio ti Biblia, kas dagidiay masarakan idiay Efeso 5:28, 29 ken 6:4: “Kasta met ti rebbeng dagiti lallaki a panagayat kadagiti assawada a kas kadagiti bagida. Ti agayat iti asawana ayatenna ti bagina, ta nikaanoman awan pay gimmura iti lasagna met laeng; no di ket taraonanna ken igagana, a kas met ken Kristo igagana ti kongregasion.’’ ‘‘Amma, dikay ruroden dagiti annakyo, no di ket idalanyo ida iti disiplina ken pammagbaga ni Jehova.”
Dagiti Tulong iti Panangipakita ti Nadiosan a Panagpasakop
15. Ania a bunga ti espiritu ti makatulong kadatayo a mangipakita ti nadiosan a panagpasakop?
15 Aniat’ makatulong kadatayo a mangipakita ti nadiosan a panagpasakop kadagitoy nadumaduma a benneg? Umuna, awan-imutna nga ayat—ayat ken Jehova a Dios ken kadagidiay insaadna a pagpasakopantayo. Naibaga kadatayo idiay 1 Juan 5:3: “Ta daytoy ti kaipapanan ti ayat ti Dios, a tungpalentayo koma dagiti bilinna; ket dagiti bilinna saanda a makapadagsen.” Umasping iti dayta ti imbaga ni Jesus idiay Juan 14:15: “No ayatendak, tungpalenyo dagiti bilinko.” Pudno unay, ti ayat—ti kangrunaan a bunga ti espiritu—tulongannatayo a mangapresiar kadagiti amin nga inaramid ni Jehova nga agpaay kadatayo ket ngarud tulongannatayo a mangipakita ti nadiosan a panagpasakop.—Galacia 5:22.
16. Kasano a makatulong ti nadiosan a panagbuteng iti nadiosan a panagpasakop?
16 Maikadua, panagbuteng iti Dios. Ti panagbuteng a mapagpungtot ni Jehova a Dios tulongannatayo agsipud ta “kaipapananna ti pananggura iti dakes.” (Proverbio 8:13) Di pagduaduaan, ti panagamak a mapagpungtot ni Jehova igawidnatayo a makikompromiso gapu iti panagbuteng iti tao. Tulongannatay met nga agtungpal kadagiti instruksion ti Dios uray pay ania a pakarigatan ti parmekentayo. Maysa pay, lapdannatayo a tumulok kadagiti sulisog wenno pagannayasan nga agaramid iti dakes. Ipakita ti Kasuratan a naitured ni Abraham nga idaton ti dungdungnguenna nga anak a ni Isaac kas sakripisio gapu iti panagbutengna ken Jehova, ket nagballigi met ni Jose a nangsaranget kadagiti imoral a kalikagum ti asawa ni Potifar gapu iti amakna a mapagpungtot ni Jehova.—Genesis 22:12; 39:9.
17. Aniat’ paset ti pammati iti nadiosan a panagpasakop?
17 Ti maikatlo a tulong isu ti panangisaad ti pammati ken Jehova a Dios. Tulongannatayo ti pammati a mangipangag iti balakad a naipaay idiay Proverbio 3:5, 6: “Agtalekka ken ni Jehova iti amin a pusom ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.” Tulongannatayo ti pammati nangruna no kasla mairurrurumentayo wenno maidumduma gapu iti nagtaudantayo a rasa wenno ili wenno gapu iti panagsubang ti personalidad. Nalabit sakiten ti nakem dagiti dadduma ti saanda pannakairekomenda kas panglakayen wenno ministerial nga adipen. No adda pammatitayo, urayentayo ni Jehova a mangilinteg kadagiti bambanag iti naikeddeng a panawenna. Kabayatanna nalabit kasapulantay ti agibtur a siaanus.—Un-unnoy 3:26.
18. Ania ti maikapat a tulong iti nadiosan a panagpasakoptayo?
18 Ti maikapat a tulong isu ti kinapakumbaba. Saan a narigat para iti tao a napakumbaba ti mangipakita ti nadiosan a panagpasakop agsipud ta ‘buyogen ti napakumbaba a nakem, ibilangna dagiti dadduma a natantan-ok ngem isu.’ Ti tao a napakumbaba sidadaan nga agtignay kas “kanunumuan.” (Filipos 2:2-4; Lucas 9:48) Ngem ti tao a natangsit sakitenna ti agpasakop ken karurodna dayta. Naikuna a ti kasta a tao kaykayatna ti madadael gaput’ dayaw ngem ti maisalbar iti pannakababalaw.
19. Ania a nagsayaat nga ulidan iti kinapakumbaba ti impaay ti maysa a dati a presidente ti Watch Tower Society?
19 Maysa a nasayaat nga ulidan iti kinapakumbaba ken nadiosan a panagpasakop ti impakita naminsan ni Joseph Rutherford, ti maikadua a presidente ti Watch Tower Bible and Tract Society. Idi imparit ni Hitler ti trabaho dagiti Saksi ni Jehova idiay Alemania, nagsurat kenkuana dagiti kakabsat sadiay tapno damagenda no aniat’ rumbeng nga aramidenda ta naparitanda metten nga aggigimong ken mangasaba. Dinakamatna daytoy iti pamilia ti Bethel ket sipaprangka nga inannugotna a dina ammo no aniat’ ibagana kadagiti kakabsat nga Aleman, aglalo ta nadagsen dagiti pannusa nga impatay ti gobierno ni Hitler kadagiti kakabsat nga Aleman. Kinunana a no adda makaammo no aniat’ ibaga kadakuada, maragsakan a makangngeg iti dayta. Anian a kinapakumbaba!b
Dagiti Gunggona iti Panangipakita ti Nadiosan a Panagpasakop
20. Ania dagiti bendision nga ibunga ti nadiosan a panagpasakop?
20 Nasayaat a maisaludsod, Ania dagiti gunggona iti panangipakita ti nadiosan a panagpasakop? Adu iti kinapudnona. Malisiantayo dagiti panagdandanag ken pannakaupay a mapasaran dagidiay madi nga agpasakop. Matagiragsaktayo ti nasayaat a pannakirelasion ken Jehova a Dios. Maaddaantayo iti kasayaatan a pannakitimpuyog kadagiti Kristiano a kakabsattayo. Mainayon pay, no natulnogtayo iti linteg, maliklikantayo ti pannakisubang kadagiti agturay ti gobierno. Mananamtay met ti naragsak a biag ti pamilia kas assawa a lallaki ken babbai, kas nagannak ken annak. Maysa pay, no salimetmetantayo ti nadiosan a panagpasakop, agtigtignaytayo a maitunos iti balakad a naipaay idiay Proverbio 27:11: “Agsiribka, anakko, ket paragsakem toy pusok, tapno masungbatak ti mangum-umsi kaniak.”
[Dagiti Footnote]
a Indayaw ti maysa a payunir a ministro iti maysa a di kasado a payunir ti panagraem ken naayat a panangsuporta ni baketna. Dinillaw ti di kasado a payunir a dinakamat met koma ti gayyemna dagiti dadduma pay a kualidad ni baketna. Ngem tawtawen kalpasanna, idi adda metten asawa ti agsolsolo a payunir, nabigbigna no kasano kapateg ti naayat a panangsuporta ti asawa a babai iti naragsak a panagasawa.
b Kalpasan adu a karkararag ken panagadal iti Sao ti Dios, nakita a silalawag ni Joseph Rutherford ti sungbat nga ipaayna kadagiti kakabsat idiay Alemania. Saan nga isu ti mangikeddeng iti rumbeng wenno di rumbeng nga aramidenda. Addaanda iti Sao ti Dios a silalawag a mangibagbaga kadakuada no aniat’ rumbeng nga aramidenda no maipanggep iti panaggigimong ken panangasaba. Gapuna nagtrabaho a sililimed dagiti kakabsat nga Aleman ket intultuloyda ti nagtulnog iti bilin ni Jehova a di baybay-an ti panaggigimong ken panangpaneknek maipapan iti nagan ken Pagarianna.
Pangrepaso a Salsaludsod
◻ Siasino dagiti inusar ti Dios kas kalasugan ti komunikasion, ket aniat’ pagrebbengan dagiti adipenna kadakuada?
◻ Kadagiti ania a nadumaduma a benneg a maipakita ti nadiosan a panagpasakop?
◻ Ania dagiti galad a makatulong kadatayo a mangipakita iti nadiosan a panagpasakop?
◻ Ania dagiti bendision nga ibunga ti nadiosan a panagpasakop?
[Ladawan iti panid 16]
Ti urnos iti templo ti Jerusalem ti inusar ti Dios a nangipakaammo iti pagayatanna iti ilina
[Dagiti ladawan iti panid 18]
Dagiti benneg a maipakitatayo ti nadiosan a panagpasakop