Agimtuod Dagiti Agtutubo . . .

Apay Masapul nga Adalek ti Biblia?

“IDI nagawidak manipud eskuelaan, diakon kayat ti agadal. Kayatko ti rummuar a makikadua kadagiti gagayyemko!” Kasta ti tignay ti maysa a tin-edyer a managan Ken iti singasing a mangbusbos iti tiempo nga agadal iti Biblia.

Kas kadagiti adu a tin-edyer, mabalin a saan nga adu a tiempo ti ipapaayyo iti personal a panagadal. Nalabit patienyo a ti Biblia ket Sao ti Dios. Mabalin nga agatenderkayo met kadagiti Nakristianuan a gimgimong. Ngem mariknayo nga ammoyon dagiti isursuro ti Biblia. Wenno nalabit panunotenyo: ‘Apay masapul nga adalek ti Biblia? Aniat’ magunggonak iti panagadalko?’

Panangpennek iti Naespirituan a Kasapulanyo

Ti panangimtuod kadagita a saludsod saan a dakes wenno kinaawan panagraem. Maisuppadi ketdi, mabalin nga ipamatmatna pay a mangrugrugin a mabigbigyo ti inawagan ni Jesus a “naespirituan a kasapulan.” (Mateo 5:3) Daytoy saan laeng nga awan mamaayna a panagusiuso. Kas ti panangipatarus ti The New English Bible iti daytoy a bersikulo, daytoy ti “pannakasapul iti Dios”—pannakasapul iti nasingsinged a panangammo iti Dios ken panangawat kadagiti pangpanggepna. Kas pangarigan, idi maysakay pay a bassit nga ubing, mabalin nga insuro dagiti dadakkelyo dagiti kangrunaan a kinapudno iti Biblia. Nalabit inawatyo ti imbagada nga awan ti panagduadua. Ngem idi tumataengankayon, mabalin a nariknayo a masapul a “suutenyo amin a bambanag”—tapno maammuanyo no ti naisuro kadakayo ket pudno wenno saan.—1 Tesalonica 5:21.

Manen, nalabit dikay napadakkel iti maysa a relihiuso a pagtaengan. Kayat kadi a sawen daytoy nga awanen ti naespirituan a kasapulanyo? Nikaanoman! Usigenyo ti kasasaad iti maysa a daga a ti ateismo nabayagen a maitantandudo. Kadagiti nabiit pay a tawen dagiti agtutubo nangipakitada iti kumarkaro nga interes iti relihion. Maysa a propagandista a mangbusor iti relihion ti nangitudo, malaksid kadagiti dadduma a bambanag, “iti di panangipaay dagiti ateista iti makakumbinsir a sungbat kadagiti saludsod maipapan iti kaipapanan iti pannakapaay ken ti panagsagaba iti biag.” Nalabit masarakanyo ti bagiyo a mangim-imtuod kadagita met laeng a salsaludsod—pammaneknek nga adda naespirituan a kasapulanyo.

Saan nga amin a relihion, nupay kasta, mangipaay kadagiti makapnek a sungbat. Ni agtutubo a Manish, kas pangarigan, dimmakkel kas maysa a Hindu, a patienna dagiti minilion a didios. Kaskasdi, aminenna: “Nangrugi a nagpanunotak, ‘Siasino ti Dios?’” Ket adu nga agtutubo a napadakkel kadagiti relihion iti Kakristianuan ti nakasarak a narigat ti mangsapul kadagiti makapnek a sungbat. Sadino ti papanan ti maysa? Sumungbat ni Jesu-Kristo: “Ti saom [sao ti Dios] isu ti pudno.”—Juan 17:17.

Ti umiso a pannakaammo iti Sao ti Dios, ti Biblia, mapnekna ti pannakawawyo kadagiti naespirituan a kinapudno. Dayta sungbatanna dagiti saludsodyo maipapan iti personalidad ti Dios, dagiti gapu iti agdama a kasasaad ti lubong, ken dagiti inanamayo iti masanguanan. Ipapantayon, mabalin a pinadakkeldakayo dagiti nagannak a Saksi ni Jehova, ket mabalin a mariknayo nga adut’ ammoyon ‘iti kinapudno.’ Ngem “maawatanyo kadi . . . ti kaakaba ken kaatiddog ken ti kangato ken kauneg” dagiti kinapudno iti Biblia, wenno narabaw laeng ti pannakaammoyo? (Efeso 3:18) No pudno ti naud-udi a kaso, masapul a ‘paneknekanyo no ania ti nasayaat ken makaay-ayo ken naan-anay a pagayatan ti Dios,’ babaen ti naan-anay a panangadal ti Biblia.—Roma 12:2.

Panangsapul iti Umiso a Dalan

Naikkankayon aya ti di umiso a direksion nga agturong iti lugar a kayatyo a papanan? Ti napukaw ken nasayang a tiempo mabalin a makaupay. Kaskasdi, ti intero a panagbiag dagiti adu nga agtutubo ket agturturong iti di umiso a dalan! Kunaen ti Biblia: “Adda dalan a kasla nalinteg iti maysa a tao, ngem ti tungpalna daldalan ni patay.”—Proverbio 14:12.

Usigenyo, kas pangarigan, ti isyu maipapan iti seksual a moralidad. Kinuna ti maysa a 14-años nga ubing a babai: “Awan ti umiso a banag. Adda laeng dagiti opinion.” Ipapantayon, ti tarigagay a makapadas iti sekso ket nabileg, nangnangruna no ubingkay pay. Ngem no saan a malapdan, daytoy a tarigagay mabalin nga iturongnakayo “iti daldalan ni patay.” Tinawen, 2.5 milion a tin-edyer ti E.U. ti makaala iti sakit a mayakar babaen iti sekso. Adu nga agtutubo a babbai ti agbalin a di naikasar nga inna—wenno papatayenda dagiti annakda babaen ti aborsion! Ket uray pay no mabalin a mapasardeng ti panagsikog wenno sakit, ti pannakidenna sakbay ti panagasawa kankanayon a di makaay-ayo iti Dios.—1 Tesalonica 4:3.

Gapuna apay a paitibkolkayo “iti daldalan ni patay”? Mangipaay ti Biblia ti nalawag a panangiturong a tumulong kadakayo nga “umadayu kadagiti tarigagay nga inuubingan.” (2 Timoteo 2:22) Daytoy ramanenna ti ‘panangpapatay,’ saan a ti normal a tarigagay iti pannakidenna iti nadayaw a panagasawa, no di ket iti imoral a derrep iti sekso. (Colosas 3:5) Ti panagadal iti Biblia tulongannakayo a mangaramid iti dayta. Daytat’ mangpabileg iti kababalinyo a mangliklik iti dakes—uray pay no dayta a dakes ket makagargari. Daytat’ “mamagsirib iti nanengneng, iti bumaro [wenno bumalasang] pannakaammo ken kinaannad” tapno maliklikan dagiti kasasaad a mangiturong iti imoral a kababalin.—Proverbio 1:4.

Ti agtutubo a ni Dan maysa kadagiti nagunggonaan manipud iti panagadal iti Biblia. Nupay bigbigenna a dagiti nalulok a tin-edyer kasla agragragsakda, kunaenna a nakitana met dagiti “annak a naipasngay iti ruar ti panagasawa, saksakit ti sekso, ken adu pay a parparikut.” Imtuodenna: “No diak nagadal iti Biblia, kasano koma ti panagbiagko” Maispalnaka met ti Biblia, manipud “iti daldalan ni patay.”

Tulong iti Iyaadani iti Dios

Nupay adu nga agtutubo itatta ti mamati iti maysa a Dios, ti panamati iti personal a Dios kumapuy bayat a tumatataengan dagiti agtutubo. Kunaen ti maysa nga artikulo iti pagiwarnak nga Adolescence a para kadagiti dadduma nga agtutubo, “ti panamati iti Dios ket ar-arapaap laeng.” Adu a relrelihion ti namagbalin iti Dios nga ar-arapaap babaen ti panangilimedda iti kinapudno a ti Dios adda naganna. Ta, kasano a mariknam iti kinasinged iti maysa a dika ammo ti naganna?

Ti Biblia, nupay kasta, ipalgakna a ti nagan ti Dios ket Jehova, nga inusarna ti nagan iti nasurok a 7,000 a daras! (Salmo 83:18) Ti panangammo iti dayta a nagan luktanna ti gundawayyo a maaddaan iti personal a relasion iti Mannakabalin-amin a Dios. Ngem daytoy kaipapananna saan laeng a ti basta gagangay a panaginteres iti Biblia. Kunaen ti 1 Cronicas 28:9: “No isu sapulem, isu masarakmonto.” Daytoy ipamatmatna ti panangsukimatyo iti Kasuratan iti panangikagumaanyo a mangammo a sisisinged ken Jehova.

Naaramidyo kadin ti kasta? Kas pangarigan, mailawlawagyo kadi no apay a saritaen ti Biblia a ni Jehova addaan “matmata,” “laplapayag,” maysa a “rupa,” ken maysa nga “ima”? (1 Peter 3:12; Ezequiel 20:33) Saan Aya a Kunaen ti Biblia a ti “Dios maysa nga Espiritu”? (Juan 4:24) Wenno ammoyo kadi ti saklawen ti abilidad ti Dios a mangpaliiw kadakayo, tapno ammuenna ti sawenyo wenno sakbay pay ti panangisaoyo iti dayta?(Salmo 139:4) Ket dagiti ngay kangrunaan a kababalin ni Jehova nga ayat, kinasirib, kinahustisia, ken pannakabalin? Mailawlawagyo kadi no ania ti kadadakkelan a pannakaiparangarang ti ayat ti Dios? (Juan 3:16) Ammoyo kadi ti nagdumaan iti espiritu ti Dios ken ti pannakabalinna? (Mikias 3:8) Mapaneknekanyo kadi a ti Dios addaan rikrikna—ken mabalin a pagladingiten?—Salmo 78:40.

Adda laeng maymaysa a pamay-an iti panangsungbat kadagidiay a saludsod—babaen iti panagadal iti Biblia. Ni agtutubo a Luther naammuanna a “babaen iti panagadal iti Saona, ‘makita[na]’ ti personalidad ni Jehova ken ti kasasaadna kas persona.” (Idiligyo iti Job 42:5.) Ni Jaquella nakagteng met iti nasaysayaat a pannakaammo iti Dios. Babaen iti panagadal iti Biblia, inapresiarna “a ni Jehova suportaranna ti ibagbagana. No ikarina ti maysa a banag, tungpalenna ti karina; isut’ di agulbod.”—Tito 1:2.

Ti Gunggona iti Panangikagumaanyo

Ti panagadal iti Biblia ramanenna ti panangikagumaan ken ti panangisakripisio iti dadduma kadagiti libre a tiempotayo. Mabalin a narigat ti mangirugi ken mabalin a mangyeg pay iti pannakalais manipud iti pamilia ken gagayyem. Ngem kitaenyo dagiti gunggona. Ti kanayon a panagadal iti Biblia natulonganna ni Paula. Kinunana, napataudna ti “nasingsinged a relasion ken Jehova, kadagiti Kristiano a kakabsatna, ken iti pamiliana.” Kuna ni Sandy a daytat’ nangtulong kenkuana a “mangpabileg iti konsiensiana” a matignay uray pay kadagiti babassit a bambanag. Kunana: “Makapanunotak kadagiti kasuratan wenno prinsipio a makatulong kaniak a mangikeddeng no aniat’ buyaek iti TV.” Ket laglagipenyo ni Ken a nadakamat iti pangrugian? Rinugianna ti nagbasa iti Biblia a kankanayon ket kunaenna: “No ad-adda nga agbasaak, ad-adda a maawisak, ad-adda a napateg.” Ni Ken natignay nga agbalin a bautisado nga adipen ti Dios.

Apay a dikay mangaramid iti serioso a panagadal ti Biblia? Matmatanyo dayta kas maysa a karit. Dawatenyo kadagiti dadakkelyo wenno iti maysa a miembro iti lokal a kongregasion dagiti Saksi ni Jehova a tumulong kadakayo a mangirugi. Agbalin a determinado nga agtultuloy. Iyaplikaryo ti nasursuroyo. Ken laglagipenyo: ‘Ti mangsukimat iti linteg a naan-anay ket pagtalinaedanna naragsakto kadagiti ar-aramidenna.’—Santiago 1:25.

[Blurb iti panid 24]

Ngem “maawatanyo kadi . . . ti kaakaba ken kaatiddog ken ti kangato ken kauneg” dagiti kinapudno ti Biblia, wenno narabaw laeng ti pannakaammoyo?

[Ladawan iti panid 25]

Ti maysa a naganak wenno sabali a miembro iti kongregasion Kristiano matulongannakayo a mangrugi iti proyekto a panagbasa iti Biblia