Ti Panagibtur a Mangiragpat ti Balligi

“Ta masapulyo ti panagibtur, tapno, iti kalpasan ti panangaramidyo iti pagayatan ti Dios, awatenyo ti naikari.”​—HEBREO 10:36.

1. Apay a napateg ti panagibtur para iti tunggal maysa nga agserserbi ken Jehova a Dios ita?

DAYTOY sibubukel a lubong ket adda iti pannakabalin ti maysa a manangsugsog a dios. Ti di makita nga agturayna, ni Satanas a Diablo, ket ipampamaysana amin a panagreggetna iti panangbusorna ken Jehova ken pananglabanna iti pannakaitan-ok ti unibersal a kinasoberano ni Jehova babaen ti Mesianiko a Pagarian. Daytoy ti mangaramid a di maliklikan a siasinoman a mangidedikar ti bagina iti Dios ken dumasig Kenkuana iti salisal ti kinasoberano ti agtultuloyto a busoren daytoy a lubong. (Juan 15:18-20; 1 Juan 5:19) Ngarud, tunggal maysa kadatayo rebbeng a surayanna ti bagina tapno agibtur agingga a rumukma daytoy a lubong iti nakaro a pannakaabak inton Armagedon. Tapno agbalin a maysa kadagiti naballigi a tao ti Dios a nangparmek iti lubong babaen ti pammatida ken kinatarnawda, rebbeng a kumpettayo a siirut agingga iti panungpalan. (1 Juan 5:4) Kasanotayo a maaramid dayta?

2, 3. Kasano a ni Jehova a Dios ken ni Jesu-Kristo dagiti kadadakkelan nga ulidan ti panagibtur?

² No maminsan, makakitatay pammaregta kadagiti dua a naisangsangayan nga ulidan ti panagibtur. Siasino dagitoy? Maysa ket ni Jesu-Kristo, “ti inauna kadagiti amin a naparsua,” isu a simamatalek a nagibtur iti serbisio ti Dios sipud pay pannakapaaddana iti di ammo a tiempo iti napalabas. Iti kinaandurna iti simamatalek a panagserbina iti Dios, nagbalin ni Jesus nga ulidan kadagiti amin a nasaririt a parsua a simmaruno a napaadda idiay langit ken ditoy daga. (Colosas 1:15, 16) Nupay kasta, ti kadadakkelan nga ulidan ti panagibtur ket ni Jehova a Dios, a nabayagen nga inibturanna ti iyaalsa maibusor iti unibersal a kinasoberanona ket agtultuloy nga aramidenna ti kasta agingga nga isut’ agtignay tapno iti kamaudiananna ket risutenna ti salisal ti kinasoberano.

³ Nagibtur ni Jehova iti mapagulidanan a pamay-an kadagiti bambanag a sadiay ti dayawna ken ti kaunggan a personal a rikriknana ket nainaig. Tinengngelna ti bagina iti sango ti naindaklan a panangrabrabak ken pinawilanna ti bagina manipud panagtignay maibusor kadagidiay nangumsi kenkuana​—maibilang ni Satanas a Diablo. Agyamantayo iti panagibtur ti Dios ken iti kinaasina. No awan dagitoy, ditay koma natagiragsak ti uray kaababaan a panagbiag. Pudno, impabigbig ni Jehova a Dios ti bagina nga awan pakaipadisanna babaen ti panagibturna.

4, 5. (a) Kasano a ti ilustrasion ni Pablo iti agdamdamili ipakitana ti panagibtur ti Dios ken ti kinaasina? (b) Kasano a ti kinaasi ti Dios mapaneknekan a saan a di umiso ti pannakabusbosna?

⁴ Itudo ni apostol Pablo agpada ti panagibtur ken kinaasi ti Dios idi kunana: “Wenno ti agdamdamili awan aya ti pannakabalinna a mangaramid iti maymaysa a pitak ti maysa a damili tapno pakaidayawan, ken ti sabali tapno pakaibabainan? Ket, no ti Dios, idinto a kayatna nga ipakita ti pungtotna ken ipakaammo ti pannakabalinna, ituredna iti adu ken atiddug nga anus dagiti basehas ti pungtot a maipaay a pakapukawan, tapno ipakaammona met dagiti kinabaknang ti gloriana kadagiti basehas ti asi, nga insaganana idi a maipaay iti gloria, kadatayo, nga inayabanna met, saan laeng a kadagiti Judio no di ket kadagiti pay Gentil?”​—Roma 9:21-24.

⁵ Kas ipakita dagitoy a sasao, kabayatan daytoy agdama a panawen ti panagibturna, patuloyen ni Jehova ti nadayag a panggepna ken mangipakita ti asi kadagiti sumagmamano a natauan a basehas. Isaganana dagitoy a basehas maipaay ti agnanayon a dayag ket ngarud atiwenna dagiti dakes a panggep ti naindaklan a bumusbusor, ni Satanas a Diablo, ken amin a kimmappon ken Satanas. Saan nga amin iti sangatauan ti nagbalin a basehas ti pungtot, a maikari iti pannakadadael. Daytat’ mangipabatad iti naanus a panagitured ti Mannakabalin-amin a Dios. Saanto a bareng-bareng ti kinaasina. Agtungpalto dayta iti (1) maysa a nadayag a pamilia ti Pagarian kadagiti langlangit iti sidong ti inay-ayat nga Anak ni Jehova, ni Jesu-Kristo, ken (2) maysa a nakaungaren ken napaan-anayen a puli dagiti tattao a pinarsua iti maysa a paraiso a daga, isuamin ket agtawid ti agnanayon a biag.

Panagibtur Agingga iti Panungpalan

6. (a) Apay a saan a maliklikan dagiti Kristiano ti maysa a pannakasubok ti panagibtur? (b) Aniat’ gagangay a tukoyen ti Griego a sao para iti “panagibtur”?

⁶ Ti kasta a nakaskasdaaw a namnama iti masanguanan, dagiti mangsuray a sasao ni Jesus rebbeng nga umaweng kadagiti lapayagtayo, nga isu ti: “Ngem ti agtalinaed agingga iti panungpalan maisalakanto.” (Mateo 24:13) Napateg ti nasayaat a panangrugi iti kurso ti Kristiano a kinaadalan. Ngem ti kapapatgan inton agangay isu ti no kasano a makapagiburtayo, no kasano kasayaat ti panangiringpastayo iti kurso. Impaganetget ni apostol Pablo daytoy idi kunana: “Ta masapulyo ti panagibtur, tapno, iti kalpasan ti panangaramidyo iti pagayatan ti Dios, awatenyo ti naikari.” (Hebreo 10:36) Ti Griego a sao a naipatarus ditoy a “panagibtur” ket hy·po·mo·neʹ. Gagangay nga ipabigbig daytoy ti natured, natibker, wenno naanus a panagibtur a saanna a mapukaw ti namnama iti sango dagiti lapped, pannakaidadanes, suot, ken pannakasulisog. No inanamaentayo ti pannakaisalakan inton kamaudiananna, rebbeng a lumasattayo iti pannakasubok ti panagibtur kas paset ti napateg a panagsagana maipaay iti dayta a pannakaisalakan.

7. Ania a panangallilaw ti rebbeng a liklikantayo, ket makin-ulidan ti tumulong kadatayo nga agibtur?

⁷ Ditay rebbeng nga allilawen ti bagitayo babaen iti mangay-ayo ti bagi a kapanunotan a mapagballigiantayo a dagdagus ti pannakasubok. Tapno dagiti salisal ti unibersal a kinasoberano ken ti kinatarnaw ti tao ket nalawag pannakasungbatna, saan nga inlisi ni Jehova ti bagina. Inibturanna dagiti di makaay-ayo a bambanag uray no kinabaelanna koma nga inikkat a dagus ida. Ni Jesu-Kristo ket ulidan met iti panagibtur. (1 Pedro 2:21; idiligyo ti Roma 15:3-5.) Gapu kadagitoy a naraniag nga ulidan iti sangotayo, sigurado a situtuloktayo met nga agibtur agingga iti panungpalan.​—Hebreo 12:2, 3.

Maysa a Kasapulan a Kualipikasion

8. Ania a kualidad a kasapulantayo amin ti imparang ni apostol Pablo?

⁸ Awan adipen ti Dios, uray kadagidi kauunaan a panawen, ti nalibre manipud panagkasapulan a panangpaneknek iti kinatarnawna babaen ti panagibtur. Dagiti nakalatlatak a tattao iti historia ti Biblia a nagtalinaed a matalek agingga ken patay ken nakakualipikar maipaay iti biag nga agnanayon idiay langlangit kinasapulanda a paneknekan ti kinatibkerda. Kas pangarigan, ti dati a Fariseo, ni Saulo ti Tarso, kunana kadagiti taga Corinto: “Ta iti uray ania saanak a maatiw kadagita kangatuan nga apostol, uray no awan met ti kapaypay-ak. Pudno, dagiti pakakitaan ti kinaapostol naaramidda iti tengngayo iti isuamin nga anus, babaen kadagiti pagilasinan ken datdatlag ken pannakabalin.” (2 Corinto 12:11, 12) Iti laksid dagiti dadagsen ti trabaho, impateg unay ni Pablo ti ministeriona a nagibtur iti naruay unay ken sipapasnek a nagreggetanna nga isut’ saan a mangipaay ti pakalaisan dayta.​—2 Corinto 6:3, 4, 9.

9. (a) Kasano nga impakitan ti napulotan a natda ti panagibtur, ken buyogen ania a resulta? (b) Ania ti agserbi kas pangay-ayo para kadatayo tapno agtultuloy a matalek iti nadiosan a serbisio?

⁹ Kadagiti moderno a panawen, dagiti napulotan a Kristiano nga agserserbi idi iti Dios sakbay ti umuna a gubat sangalubongan ammoda a markaanto ti 1914 ti panungpalan ti Panawen Gentil, ket adu kadakuada ti nangnamnama nga awatenda ti nailangitan a gunggonada iti dayta a nakalalagip a tawen. Ngem saan a napasamak daytoy. Kas ipakita ita dagiti kinapudno, nainayon kadakuada dagiti dinikdekada a panawen ti panagserbi. Kabayatan daytoy a di ninamnama a panagtultuloy ti naindagaan a kurso ti biagda, naglasatda iti pannakapasudi iti ima ni Jehova a Dios. (Zacarias 13:9; Malakias 3:2, 3) Ti agtultuloy a panagibtur timmulong iti pannakapasayaatda. Kas ad-adipen ni Jehova, nagrag-oanda ti pannakaisaad kas ili iti naganna. (Isaias 43:10-12; Aramid 15:14) Ita, iti pannakalasatdan iti dua a gubat sangalubongan ken nakaad-adu a babbabassit a panagbibinnusor, pagragsakanda ti pannakabadang iti panangiwaras ti naimbag a damag babaen ti dumakdakkel a dakkel a bunggoy dagiti sabsabali a karnero, nga addaan bilang itan a nasurok nga uppat a milion. Ti naespirituan a paraiso a tagtagiragsakenda ket nagsaknapen iti intero a daga, uray kadagiti kaadaywan nga isla dagiti baybay. Daytoy a naanamongan a pannakilangen, banag nga apresiarentayo nga ad-adda bayat nga agbibiagtayo, ti nagserbi a kas pangay-ayo tapno simamatalek nga agtultuloytayo iti nadiosan a serbisiotayo agingga a ti pagayatan ken panggep ni Jehova ket naan-anay a naaramiden.

10. Di la ket ta adda panagkapuy kadatayo, aniat’ regular a kasapulan?

¹⁰ Yantangay ti gunggonatayo ket agpannuray iti kinatibkertayo, kanayon a kasapulantayo ti pannakagutugot iti daytoy napateg a banag. (1 Corinto 15:58; Colosas 1:23) Tapno iti kasta ket awan panagkapuy iti ili ni Jehova, rebbeng a regular a maparegtatayo a kumpet iti kinapudno ken iti nasudi a pribilehio ti panangisaknap ti kinapudno, kas kadagiti kabbaro a nabuangay a kongregasion idi umuna a siglo babaen kadagiti panagsarungkar da Pablo ken Bernabe. (Aramid 14:21, 22) Agbalin koma a natibker a pangngeddeng ken determinasiontayo a, kas iti panangiyebkas ni apostol Juan, agtaeng ti kinapudno kadatayo, “ket agyanto kadatayo iti agnanayon.”​—2 Juan 2.

Panaguray Buyogen ti Di Maisin a Panagibtur

11. Aniat’ kasla paglintegan ti Dios kadagiti adipenna, ken kasano a naiyilustrar daytoy iti kaso ni Jose?

¹¹ Agbayag santo malpas ti pannakasuboktayo. (Santiago 1:2-4) Ti Aguray! Aguray! Aguray! kasla isu idi ti pagannurotan ti Dios kadagiti adipenna idi ugma idi nasuotda no maipapan iti determinasionda nga agtultuloy iti pammati. Ngem ti panaguray, kamaudiananna, ti kankanayon a napaneknekan a nanggunggona kadagidiay matalek nga adipen. Ni Jose, kas pangarigan, naguray iti 13 a tawen kas maysa nga adipen ken balud, ngem ti kapadasan pinapinona ti kinataona.​—Salmo 105:17-19.

12, 13. (a) Kasano a ni Abraham ket maysa nga ulidan ti matalek a panagibtur? (b) Iti ania a pamay-an a ti pammati ken panagibtur ni Abraham naiparang kas maysa a pagtuladan para kadatayo?

¹² Agtawenen ti 75 ni Abraham idi isut’ pinaruar ti Dios idiay Ur dagiti Caldeo tapno mapan iti Naikari a Daga. Isut’ agarup agtawen ti 125 idi inawatna ti agturong iti panagkari a pannakaisierto ti kari ti Dios​—a napasamak a dagdagus kalpasan nga imparang ni Abraham ti bileg ti pammatina babaen ti uray agingga iti panangidatonna iti inay-ayatna nga anak, a ni Isaac, a simmardeng laeng idi a ti anghel ni Jehova inggawidna ti imana ken linapdanna ti panagidaton. (Genesis 22:1-18) Naunday a panaguray para ken Abraham ti limapulo a tawen kas managdagus iti ganggannaet a daga, ngem isut’ nagtalinaed iti sabali pay a 50 a tawen agingga a natay iti tawen a 175. Kadagita amin a tiempo, ni Abraham maysa a matalek a saksi ken mammadto ni Jehova.​—Salmo 105:9-15.

¹³ Ti pammati ken panagibtur ni Abraham ket naiparang kas maysa a pagsurotan kadagiti amin nga adipen ti Dios a mayat nga umawat kadagiti naikari a bendision baeten ken Jesu-Kristo, ti Bin-i ni Abraham. (Hebreo 11:8-10, 17-19) Maipapan kenkuana, mabasatayo idiay Hebreo 6:11-15: “Ket tarigagayanmi a tunggal maysa kadakayo ipakitana koma ti kasdi a regta a maipaay iti naan-anay nga inanama agingga iti panungpalan, tapno dikay koma agbalin a nasadut, no di ket tumutulad kadagidiay a gapu iti pammati ken ti kinaanus tawidenda dagiti karkari. Ta idi nagkari ti Dios ken Abraham, gapu ta dina nabalin ti agsapata iti sabali a dakdakkel, nagsapata babaen ti kinaisuna met laeng, a kunkunana: “Pudno a bendisionankanto a bendisionan, ken paaduenkanto a paaduen.’ Ket iti kasta kalpasan ti nabayag a panagan-anus ni Abraham, nagun-odanna ti kari.”

14. Apay a rebbeng a ditay panunoten a ti pannakasubok iti panagibtur ket awan patinggana ken ti gunggona ket naatap?

¹⁴ Napalabasen ti napulotan a natda ti 77 a tawen nanipud panungpalan dagiti Panawen Gentil idi 1914, idi a dadduma kadakuada ti nangnamnama iti pannakaipadayag idiay langit ti pudno a Kristiano a kongregasion. No kasano kabayag pay nga aguray ti natda ditay ammo. Rebbeng kadi ngarud nga agpangngaduatayo ket panunotentayo nga awan patinggana ti panaguray ken ti gunggona ket maysa a naatap a “makaallilaw a kalat”? Saan! Daytat’ dinto pulos mangitan-ok iti kinasoberano ti Dios wenno mangidayaw iti naganna. Isut’ saanto a mapalinteg iti sanguanan ti lubong no iyawatna kadatayo ti balligi ken ti ibungana a gunggona a biag nga agnanayon. Uray kasano kabayag, dagiti natda, kasta met dagiti matalek a mara-karnero a kakaduada, determinadoda nga agpannuray ken Jehova nga agtignay iti bukodna a panawen. Iti panangipakita ti kasta a mapagulidanan a panagitured, sursurotenda ti kurso ni Abraham.​—Roma 8:23-25.

15. (a) Ania ti pakabigbigan a pagsasaotayo, ken babaen kadagiti ania a kapadasan a tinaginayonnatayo a naballigi ni Jehova? (b) Ania a pananggutugot ni Pablo ti agtalinaed a maitutop iti kaaldawantayo?

¹⁵ Ti pakabigbigan a pagsasao, ngarud, ket isu pay laeng ti di maisin a panagibtur iti panangaramid ti pagayatan ti Dios. (Roma 2:6, 7) Iti napalabas sinaranaynatayo kadagiti nakaro a pakarigatan, agraman dagiti pannakaibalud ken kampo konsentrasion, ket inlasatnatayo a sibaballigi buyogen ti kinadayag ti nagan ken panggepna.a Kabayatan ti nabatbati pay a tiempo maipaay ti pannakairingpas ti pannakasuboktayo, itultuloy nga aramiden ni Jehova ti isu met laeng. Ti pananggutugot ni Pablo agtalinaed a maitutop iti kaaldawantayo: “Ta masapulyo ti natibker a panaganus ken panagibtur, tapno maaramidyo ken naan-anay a maitungpalyo ti pagayatan ti Dios, ket iti kasta awatenyo ken ikutanyo ken tagiragsakenyo a naan-anay ti naikari.”​—Hebreo 10:36, The Amplified Bible; Roma 8:37.

16. Apay a rebbeng a ditay matmatan ti dedikasiontayo ken Jehova iti nakedngan laeng a pamay-an wenno buyogen dagiti kondision?

¹⁶ Agingga nga adda trabaho ni Jehova nga aramidentayo iti tengnga daytoy nadangkes a lubong, iti panangtulad ti ulidan ni Jesus, ngarud, kayattayo ti maisinggalut iti dayta a trabaho agingga a daytat’ malpas. (Juan 17:4) Ti dedikasiontayo ken Jehova ket saan a pannakitulag nga agserbitayo kenkuana iti ababa laeng a tiempo ket iti kasta umayen ti Armagedon. Ti dedikasiontayo ket agnanayon. Ti trabaho ti Dios maipaay kadatayo ket saanto nga agpatingga iti gubat ti Armagedon. Nupay kasta, kalpasanto laeng a maitungpaltayo ti trabaho a rebbeng a mairingpas sakbay ti Armagedon a makitatayo dagiti dadakkel a bambanag nga umay iti labes dayta a dakkel a gubat. Iti kasta, mainayon iti naragsak a pribilehio ti panagtultuloy a panangaramid ti trabahona, magunggonaantayonto kadagiti nabayag nga inur-urayen a pammendision nga inkarina.​—Roma 8:32.

Ti Ayat iti Dios Tulongannatayo nga Agibtur

17, 18. (a) Kadagiti tiempo ti pakadagsenan, aniat’ tumulong kadatayo nga agibtur buyogen ti anamong ti Dios? (b) Aniat’ tumulong kadatayo a mangragpat ti balligi, ken aniat’ ditay kunaen maipapan ti nabati pay a tiempo?

¹⁷ Nalabit, no dagiti panawen ket makapadagsen, mabalin a maisaludsodtayo: ‘Kasano a makapagibturtayo pay?’ Ti sungbat? Babaen ti panangayattayo iti Dios iti amin a puso, panunot, kararua, ken pigsatayo. “Ti ayat managitured ken nalaing. Ti ayat awan apalna, saan a napasindayag, saan a natangsit. Isuamin sagabaenna, isuamin patienna, isuamin inanamaenna, isuamin ituredna. Ti ayat saan a maibus uray kaano.” (1 Corinto 13:4, 7, 8) No ditay agibtur gapu iti ayat iti Dios, awan mamaay ti panagibturtayo. Ngem no agsagabatayo kadagiti pakadagsenan gapu iti debosiontayo ken Jehova, ti panagibturtayo addaan ngarud ti epekto iti panangpauneg ti ayattayo kenkuana. Ti panagayatna iti Dios, ni Amana, ti namagbalin ken Jesus nga agibtur. (Juan 14:30, 31; Hebreo 12:2) No ti pudno a motibotayo ket ayat iti Dios, ti Amatayo, ania komat’ ditay maibturan?

¹⁸ Ti di maisin nga ayattayo ken Jehova a Dios ti namagbalin kadatayo nga agtalinaed a naballigi iti lubong kabayatan daytoy a kapepeggadan a panawen ti pannakasubok. Ket ni Jehova a Dios, baeten ken Jesu-Kristo, itultuloyna ti mangted iti tulong a kasapulantayo uray kasano pay kabayag ti pannakaipalubos ti panagtalinaed daytoy a daan a sistema dagiti bambanag. (1 Pedro 5:10) Siempre, awan aramidentayo a panangpattapatta no kasano pay kaadu ti nabati a tiempo, ket saantay a mangikeddeng iti espesipiko a petsa. Ipabus-oytay dayta iti Naindaklan a Manangsalimetmet ti Oras, ni Jehova a Dios.​—Salmo 31:15.

19, 20. (a) Kasanot’ rebbeng a panangmatmattayo iti tunggal maibturantayo nga aldaw a lumabas? (b) Ania a kinamaag ti kayattayo a liklikan, ken apay?

¹⁹ Nupay kasta, ti kaputotan a naipadto a makaimatang ken makapasar “iti panungpalan ti sistema dagiti bambanag” ket nataengan unayen. (Mateo 24:3, 32-35) Gapuna a ditay pulos liplipatan a tunggal aldaw nga aglabas nga ibturantayo ket maysa nga aldaw a maikissay ken Satanas ken dagiti demoniona iti panangrugitda iti uniberso babaen ti mismo a kaaddada ken maysa nga aldaw nga as-asideg iti tiempo a dinton ibturan ni Jehova ti kaadda dagiti “basehas ti pungtot a maipaay a pakapukawan.” (Roma 9:22) Din agbayag, inton agpatinggan ti nabayag a panagitured ni Jehova, iyaplitnanton ti pungtotna kadagiti di nadiosan a lallaki ken babbai. Ngarud, ipanayagnanto ti nadiosan a dina iyaanamong iti kurso ti panagtignayda, nupay pinalubosanna ida nga agtalinaed iti daytoy a kaatiddug ti panawen.

²⁰ Kinamaag unay kadatayo no isardengtayo dagiti naayat a panagreggettayo tapno maragpat ti nadayag a gunggona a naipagteng kadatayo baeten ken Jesu-Kristo. Imbes ketdi, determinadotayo nga agtultuloy a matalek kas dagiti Saksi ni Jehova iti daytoy kapapatgan a tiempo a ngangnganin itan-ok ni Jehova ti bagina kas Soberano ti Uniberso.

[Dagiti Footnote]

Kasanot’ Isusungbatmo?

◻ Apay a ditay maliklikan ti pannakasubok ti panagibturtayo?

◻ Ania a panangallilaw ti kayattayo a liklikan?

◻ Tapno maliklikan ti aniaman a panagkapuytayo, ania ti kasapulan?

◻ Ania ti pakabigbigan a pagsasaotayo?

◻ Kadagiti tiempo ti pakadagsenan, aniat’ tumulong kadatayo nga agibtur?

[Ladawan iti panid 11]

Ti ili ti Dios, kas kadagitoy a Saksi idiay Puerto ti España, Trinidad, kankanayon a situtulokda nga agpannuray ken Jehova