AGIWARWARAGAWAG

Opisial ti palasio, naaramat a mangiwaragawag iti publiko iti naarian a bilbilin ken dekdekreto. Agparang ti sao iti Daniel 3:4, a nakadakamatan ti maysa nga agiwarwaragawag kas mangidekdeklara iti dekreto ni Nabucodonosor a dagiti umili agdaydayawda iti ladawan nga inaramidna. (Kitaenyo ti Rbi8 ftn.) Idi agbalin ni Daniel kas maikatlo nga agturay iti pagarian ti Babilonia maitunos iti bilin ni Ari Belsazar, ‘naiwaragawag’ daytoy a kinapudno. (Da 5:29, Rbi8 ftn) Kadagiti kadaanan a paay-ayam dagiti Griego, ti maysa nga agiwarwaragawag impakaammona ti nagan ken pagilian ti tunggal makisalip ken ti nagan, pagilian, ken ama ti nagballigi.

Ti Griego a berbo a naipatarus a “mangasaba” ket ke·rysʹso. Daytoy a Griego a berbo, nga adu a daras nga agparang iti Kristiano a Griego a Kasuratan, mabalin met nga ipatarus nga “agiwarwaragawag.” Ti pannakaaramat daytoy a sao iti Mateo 24:14 ken Marcos 13:10 ipasimudaagna a dagiti manangiwaragawag iti naimbag a damag ti Pagarian ti Dios agak-akemda a kasla agiwarwaragawag.​—Kitaenyo dagiti Rbi8 ftn; idiligyo ti Mr 1:45; Apo 5:2.

Ti ke·rysʹso, iti pangkaaduan, kaipapananna ti “iwaragawag” (naimbag wenno dakes a damag), kas naiduma iti eu·ag·ge·liʹzo·mai, “ideklara ti naimbag a damag.” Ni Noe ket maysa a manangaskasaba (wenno agiwarwaragawag, keʹryx) iti daydi lubong sakbay ti layus, a pinakdaaranna ida. (2Pe 2:5) Ni Kristo nangasaba (kasla maysa nga agiwarwaragawag) kadagiti espiritu a sibabalud, ngem saan a ti naimbag a damag.​—1Pe 3:18, 19.