Malagipyo Pay Aya?

Tinagiragsakyo kadi a binasa dagiti nabiit pay a ruar Ti Pagwanawanan? No kasta, makitayo a makapainteres ti pananglagip kadagiti sumaganad:

◻ Aniat’ kaipapanan ti Griego a sao a pa-rou-si’a a nausar iti Mateo 24:3, 27, 37, 39?

Kuna ti Expository Dictionary of New Testament Words ni Vine: “Ti PAROUSIA . . . ipasimudaagna agpadpada ti idadateng ken ti kasaruno a kaadda a kadua.” Gapuna, saan la a basta apagbiit nga idadateng no di ket ti kaadda manipud iti idadateng nga agtultuloy.​—8/15, panid 11.

◻ Kasano a ‘napaababa dagita nga aldaw’ tapno maisalakan dagiti ‘lasag’ idi umuna a siglo, ken kasanonto a mapasamak iti dakdakkel a kaitungpalan? (Mateo 24:22)

Idi 66 K.P., di ninamnama a pinaababa dagiti Romano ti pananglakubda iti Jerusalem, a nangipalubos iti panaglibas dagiti ‘lasag’ a Kristiano. Umasping iti dayta, manamnamatayo nga uray kaskasano mapaababanto ti umad-adanin a pannakaraut ti Babilonia a Dakkel. Iti kasta maisalakanto dagiti napulotan a Kristiano ken dagiti kakaduada manipud iti posible a pannakadadael.​—8/15, panid 18-20

◻ Aniat’ rumbeng a reaksiontayo no ti maysa a tao mangrugi a makiraman kadagiti emblema ti Memorial wenno isardengna ti panangaramid iti kasta?

Saan a masapul a maseknan ti sabsabali a Kristiano. Kinuna ni Jesus: “Siak ti nasayaat a pastor, ket am-ammok dagiti karnerok.” Kas naipanamnama, am-ammo ni Jehova dagidiay talaga a pinilina kas naespirituan nga annak. (Juan 10:14; Roma 8:16, 17) ​—8/15, panid 31.

◻ Aniat’ kangrunaan a nakairantaan ti Linteg Mosaiko?

Kangrunaanna, Insurona kadagiti Israelita a kasapulanda ti Mesias, a mangsubbot kadakuada manipud iti managbasol a kasasaadda. (Galacia 3:24) Insuro met ti Linteg ti nadiosan a panagbuteng ken panagtulnog, ken tinulonganna ti Israel nga agtalinaed a naisina kadagiti dakes nga aramid dagiti nasion iti aglawlaw. (levitico 18:24, 25)​—9/15, panid 9.

◻ Aniat’ panggep ti baro a tulag? (Jeremias 31:31-34)

Tapno mamataud iti maysa a nasion dagiti ari ken papadi a mangbendision iti amin a sangatauan. (Exodo 19:6; 1 Pedro 2:9; Apocalipsis 5:10)​—9/1, panid 14, 15.

◻ Apay a rumbeng a sanayentayo ti arte ti panagpadispensar?

Makatulong ti panagpadispensar a mangep-ep iti saem a pinataud ti kinaimperpekto, ken maagasanna dagiti nadadael a relasion. Ti tunggal panagpadispensartayo ket leksion iti kinapakumbaba ken sanayennatayo nga agbalin nga ad-adda a maseknan iti rikrikna ti sabsabali.​—9/15, panid 24.

◻ Ti kadi sangalubongan a Layus idi kaaldawan ni Noe ket pudno a pasamak iti historia?

Wen. Masarakan iti intero a lubong, manipud America agingga idiay Australia, dagiti nagkauna a salaysay maipapan iti sangalubongan a layus. Ti kinasaknap ti kastoy a tema ket nanayonan a mangsuporta iti banag a talaga a napasamak ti maysa a sangalubongan a delubio, kas nailanad iti Biblia. (Genesis 7:11-20)​—9/15, panid 25.

◻ Aniat’ nairaman iti panagbalin a managpadagus?

Ti kinamanagpadagus ket naipatarus manipud iti Griego a sao a buklen ti dua a namunganayan a sao a kayatna a sawen “ayat” ken “ganggannaet.” Gapuna, ti kinamanagpadagus nangnangruna a kaipapanannat’ “panagayat kadagiti ganggannaet.” Ngem ad-adda pay ti ramanenna ngem iti ayat a naibatay iti prinsipio, a maipakita gapu iti pannakarikna iti annongen. Naibatay daytoy iti napudno a kinadungngo, panangipateg, ken pannakigayyem.​—10/1, panid 9.

◻ Ania ti argumento ni Pablo maipanggep iti panagasawa ken kinaawan asawa iti umuna a suratna kadagiti taga-Corinto, iti kapitulo 7?

Maiparbeng ti panagasawa ken, iti dadduma a kasasaad, maibalakad kadagiti dadduma. Ngem di mailibak a makagunggona ti kinaawan asawa iti Kristiano a lalaki wenno babai nga agtarigagay nga agserbi ken Jehova a di unay masingsinga.​—10/15, panid 13.

◻ Kasano a “taraonan (ti maysa a panglakayen) dagidiay bukodna”? (1 Timoteo 5:8)

Ti maysa a panglakayen rumbeng a ‘taraonanna ti bukodna’​—ti asawana agraman kadagiti annakna​—iti material, naespirituan, ken emosional a kasapulanda.​—10/15, panid 22.

◻ Kasanot’ panangliwliwa ni Jehova kadagiti adipenna?

Agtignay ti nasantuan nga espiritu ti Dios kas maysa a “mangliwliwa.” (Juan 14:16, footnote iti Ingles) Ti sabali pay a panangliwliwa ti Dios ket babaen ti Biblia. (Roma 15:4) Ammo ti Dios ti kasapulan ti tunggal maysa kadatayo ken mabalinnatay nga usaren a mangliwliwa iti tunggal maysa, kas iti pannakaliwliwa ni Pablo iti panangipadamag ni Tito maipapan kadagiti taga-Corinto. (2 Corinto 7:11-13)​—11/1, panid 10, 12.

◻ Aniat’ impasimudaag ti panangiladawan ni Pablo ken Jehova kas “ti Ama dagiti nadungngo nga asi,” a masarakan iti 2 Corinto 1:3?

Ti Griego a nombre a naipatarus a “dagiti nadungngo nga asi” nagtaud ti iti sao a naaramat a mangyebkas iti liday gapu iti panagsagaba ti sabali. No kasta iladawan ni Pablo ti nadungngo a rikrikna ti Dios iti amin a matalek nga adipenna a marigirgatan.​—11/1, panid 13.

◻ Aniat’ naaramidan ti panagayunar dagiti Israelita iti tinawen nga Aldaw ni Panangabbong? (Levitico 16:29-31; 23:27)

Ti pannakarambak ti panagayunar tinignayna ti ili ti Israel nga ad-adda koma a sipupuot iti kinamanagbasolda ken ti pannakasapulda iti subbot. Babaen iti dayta inyebkasda ti panagladingit kadagiti basolda ken panagbabawida iti saklang ti Dios.​—11/15, panid 5.

◻ Aniat’ ipasimudaag ti bilin kadagiti agtutubo a: “Lagipem met ti Namarsua kenka”? (Ecclesiastes 12:1)

Kuna ti maysa nga autoridad a ti Hebreo a sao a naipatarus a “laglagipen” masansan nga ipasimudaagna “ti panangipateg iti isip ken ti panagtignay a danggayanna ti pananglagip.” Gapuna ti panangipateg iti daytoy a bilin kaipapananna ti ad-adda pay ngem iti basta panagpanunot maipapan ken Jehova. Karamanna ti panagtignay, panangaramid iti makaay-ayo kenkuana.​—12/1, panid 16.